TÕND sẽn be dũniyã “yaoolem wakate,” tɩ vɩɩmã tar kengrã, yaa tɩlɛ tɩ d maneg n bɩɩs sũ-mar n yɩɩd pĩndã. (2 Tɩm. 3:1-5) Dũniyã neb wʋsg pa tar sũ-mar ye. Yaa b mensã yell bal n pak-ba, b nonga zaba, n pa tar yõk-m-meng ye. Rẽ n so tɩ d ned kam fãa segd n sok a meng yaa: ‘Ma-me lebga ned sẽn pa tar sũ-mar wa dũniyã neb bɩ? Bõe n sɩd wilgd tɩ ned tara sũ-mare? Bõe la m tõe n maan n tõog n yɩ ned sẽn maand sũ-mar wakat fãa?’

Biiblã pʋgẽ, b sã n yeel tɩ ned maanda sũ-mare, pa rat n wilg bal t’a tõogda toog zu-loɛɛg pʋgẽ ye. Ned sẽn maand sũ-mar tẽeda manegr me, rat n yeel t’a saagdame tɩ yɛlã na n wa manegame. A pa tagsd a meng yell bal ye. A baooda neb a taabã me neere, baa sã n yaa bãmb n wa ne yellã, bɩ yaa bãmb n namsd-a. A na n ket n saagdame tɩ yẽ ne nin-kãens zoodã bɩ b zems-n-taarã na n manegame. Dẽnd Biiblã sẽn sõdg zʋg-sõma nonglmã sẽn wat ne, n deng n sõdg sũ-marã pipi wã pa lingd tõnd ye. * (1 Kor. 13:4) Sũ-marã naaga zʋg-sõma nins me vʋʋsem sõngã sẽn sõngd ned t’a bɩɩsã. (Gal. 5:22, 23) Woto wã, bõe la d segd n maan n tõog n yɩ ned sẽn maand sũ-mare?

Sẽn na yɩl n bɩɩs sũ-mare, d segd n pʋʋsda a Zeova n kot a vʋʋsem sõngã sõngre. A sakd n kõta neb nins sẽn kɩs-a sɩd la b teeg-a wã a vʋʋsem sõngã. (Luk 11:13) La baa Wẽnnaam vʋʋsem sõngã sẽn yaa pãn-kãsengã, yaa tɩlɛ tɩ tõnd me maan d sẽn tõe fãa, la d modg tɩ d tʋʋm-tʋmdɩ wã kell n zems ne d sẽn pʋʋsd n kotẽ wã. (Yɩɩn. 86:10, 11) Woto rat n yeelame tɩ daar ne a to fãa, d segd n maooda d pãng tɛk n maand sũ-mare, hal tɩ wa lebg d minungu. La woto bal pa sek d na tõog n maand sũ-mar wakat fãa ye. Bõe me n na n sõng-do?

D segd n bao n bãnga mak-sõng ning a Zeezi sẽn kõ wã, la d rɩk a togs-n-taare. Tʋm-tʋmd a Poll sɩd wilga rẽ. A sẽn wa n na n gom yalẽ-paalgã yellã, a sõdga sũ-marã n naage, n bas n yeel yaa: “Bɩ Kiris laafɩ . . . soog yãmb sũyã.” (Kol. 3:10, 12, 15) Sẽn na yɩl tɩ Kirist laafɩ wã soog d sũyã, d segd n dɩka a togs-n-taare, n kɩs sɩd zãng wa yẽ tɩ Wẽnnaam na n wa remsa yel-kɛgr fãa tɩ zems a wakate. D sã n maand woto, d na n kell n yɩɩ sũ-mar soaba, baa sẽn wa n yaa yell ning fãa.—Zã 14:27; 16:33.

D fãa yãgdame tɩ dũni-paalgã Wẽnnaam sẽn pʋlmã wa tao-tao. La d sã n tags a Zeova sẽn maand sũ-mar ne tõnd to-to wã, sõngda tõnd tɩ d bɩɩs sũ-mare. Ad Biiblã sẽn yete: “Wẽnnaam ka basd tɩ bãmb sẽn kãabã kaoos n pids wa neb kẽer sẽn tagsdã ye. La yaa tɩ bãmb maanda sũ-mar  ne yãmba, b sẽn ka rat tɩ ned baa a yembr sãama yĩnga. Bãmb ratem yaa tɩ yãmb fãa tek yam n kos sugri.” (2 Pɩy. 3:9) D sã n bʋgs a Zeova sẽn maand sũ-mar ne tõnd to-to wã, pa kɩt tɩ d rat n maan sũ-mar ne d taabã sɩda? (Rom. 2:4) La yel-bʋs pʋgẽ la yaa tɩlɛ tɩ d tall sũ-mare?

Beoog sẽn vẽeg fãa, yaa tɩlɛ tɩ d tall sũ-mar yɛl wʋsg pʋgẽ. Wala makre, d to sã n gomda, baa d sã n tara bũmb sẽn tar yõod n na n togse, yɩta sõma tɩ d tall sũ-mare, n da wa kʋʋg a goamã ye. (Zak 1:19) D tẽed-n-taag manesem ning sã n wae n yikd d sũuri, yaa tɩlɛ me tɩ d maand sũ-mare. D mao n da yik d sũur ne-a ye. Yɩta sõma tɩ d tẽeg t’a Zeova ne a Zeezi nee pãn-komsem nins tõnd sẽn tarã, la b pa yikd b sũur ne tõnd ye. B pa gẽnesd tõndo, n baood baa d kong-bõonesã ye. B geta tõnd zʋg-sõma wã, n maand sũ-mar ne-d hal tɩ d wa toeeme.—1 Tɩm. 1:16; 1 Pɩy. 3:12.

D sã n maan bũmb wall d togs gomde, tɩ ned wa yeel tɩ pa zemse, yaa tɩlɛ me tɩ d tall sũ-mare. Naoor wʋsgo, tõe n sãama d sũuri, tɩ d rat n gom n wilg tɩ pa sɩd ye. La pa woto la Wẽnnaam Gomdã sagend tõnd tɩ d maan ye. Ad b sẽn yeele: “Sũ-mar soab n são tɩta-neda. Ra sak tɩ f sũur yik tao-tao ye. Bala, sũ-yikr paada yalembã pʋsẽ.” (Koɛ. 7:8, 9) Dẽnd baa yaa rõdga, d segd n talla sũ-mare, n tags neer n ges d sẽn na n leok to-to. Yaa woto la a Zeezi maan-yã, nebã sẽn wa n dõd-a wã.—Mat. 11:19.

Yaa tɩlɛ ne roagdbã me tɩ b tall sũ-mare, sẽn yɩɩd fãa b sã n wa na n kibl b kambã, wall n sõng-b tɩ b zãag b mens ne tʋls-wẽns la zʋgd sẽn pa sõma. D gom a Matiyaas yelle. A tʋmda Betɛll a ye pʋgẽ, Erop soolmẽ wã. A bi-bɩɩlmã wakate, a karen-bi-taasã ra yaand-a-la a sẽn yaa a Zeova Kaset soabã yĩnga. Sɩngrẽ wã, a roagdbã ra pa mi ye. La b wa n mikame t’a sɩngame n maand sãmbse, n da sokd a meng sã n sɩd yaa a Zeova Kaset rãmbã la tũudum hakɩɩkã. Ad a Zils sẽn yaa a ba wã sẽn yeele: “Yel-kãnga pʋgẽ, ra yaa tɩlɛ tɩ d tall sũ-mar wʋsgo.” A Matiyaas ra mi n sokame yaa: “Wẽnnaam yaa ãnda? La Biiblã sã n pa Wẽnnaam Gomde? Bõe n wilgd tɩ sɩd yaa Wẽnnaam n yeel tɩ d maan woto la woto, la a gɩdg woto la woto?” A leb n da mi n soka a ba wã yaa: “Bõe yĩng tɩ ned na n ning-m taale, m sẽn pa tẽed bũmb nins yãmb sẽn tẽedã yĩng bala?”

Ad a Zils sẽn yeele: “Wakat ninga, a sã n na n sok a sogsgã, yaa ne sũ-yikri. La pa ne maam ne a ma la a sẽn yikd a sũurã ye. Yaa ne d tũudmã, bala, a ra getame tɩ yaa d tũudmã yĩng la vɩɩmã sẽn pa nana ne-a wã.” A Zils maana wãn n sõng a biigã? A yeelame: “Maam ne-a mi n zĩndame n sõs ne taab n kaoose. Naoor wʋsgo, m kelgd-a lame, la m mi n sok-a sogsg a wãna, n na n bãng a sẽn tagsdã sõma, la yellã sẽn namsd-a to-to wã. M mi n wilg-a-la bũmb ning võore, la m yeel-a t’a tags rẽ yell daarã pʋgẽ, tɩ d yaool n wa leb n sõse. Wakat ning me, a sã n togs a tagsg bũmb ning zugu, m yet-a lame t’a bas tɩ yɩ rasem a wãna,  tɩ m paam n tags a sẽn yeelã zug neere. D sẽn da wae n sõsd woto wã, bilf-bilfã, a Matiyaas wa n wʋmda Biiblã sẽn yetã võor sõma. Wala makre, a bãnga a Zeezi sẽn ki tɩ yɩ maoongã võore, a Zeova sẽn segd n yɩ yĩngr la tẽng Naabã võore, la a bãng me t’a Zeova sɩd nonga tõndo. Kaoosa bilfu, leb n pa yɩ nana me ye. La tarẽ-n-tarẽ, a wa n nonga a Zeova ne a sũur fãa. Maam ne m pagã sũur nooma wʋsgo, bala, d sẽn tall sũ-mar n sõng d biigã a bi-bɩɩlmã wakatã woma biisi.”

A Zils ne a pagã sẽn wa n maand sũ-mar ne b biigã, n sõngd-a wã, b teega a Zeova, n da kɩs sɩd t’a na n sõng-b lame. A Zils yeelame: “M da nong n yeta a Matiyaas tɩ maam ne a ma sẽn nong-a wʋsgã, d pẽdgda ne pʋʋsgo, n kot a Zeova t’a sõng-a t’a wʋm yɛlã võore.” B sũur nooma wʋsg b sẽn maan sũ-mare, n pa koms raood n basã!

D roagd wall d zoa sã n bẽed bãag sẽn tõt saabo, tɩ d segd n ges a yelle, yaa tɩlɛ me tɩ d maan sũ-mare. D gom a Elɛn * yelle. Yẽ me bee Erop soolmã tẽng a ye pʋgẽ.

Na maan yʋʋm a nii woto, a Elɛn sɩdã lʋɩɩ bãaga. Yɩɩ bã-kɛgeng sẽn kɩt t’a zugã pa le tʋmd sõma ye. A pa le mi sũ-noogo, sũ-sãanga, wall nimbãan-zoeer ye. Yaa zu-loɛɛg meng-meng ne a Elɛn. Ad a sẽn yeele: “Yɩɩ tɩlɛ tɩ m maan sũ-mar wʋsgo, la m pʋʋs wʋsg me.” A paasame: “Vɛrse ning sẽn belsd maam n tɩ yɩɩdã yaa Filip-rãmb 4:13. Be, b yeelame yaa: ‘Bũmb fãa pʋgẽ, mam tara pãnga, sẽn kõt-a maam pãngã maasem yĩnga. *’” Ne pãng ning a Zeova sẽn kõtã maasem, a Elɛn tõogd n maanda sũ-mar yellã pʋgẽ, n kɩs sɩd zãng t’a na n sõng-a lame.—Yɩɩn. 62:6, 7.

Sũ-marã wɛɛngẽ, a Zeova n kõ mak-sõng sẽn ka to, tɩ d segd n dɩk a togs-n-taare. (2 Pɩy. 3:15) Kibay wʋsg n be Biiblã pʋgẽ, n wilgd a Zeova sẽn maan sũ-mar meng-menga. (Nee. 9:30; Eza. 30:18) Wala makre, y tẽra a Zeova manesem sẽn yɩ to-to, a sẽn wa n yãk yam n na n sãam Sodom, t’a Abrahaam soka sogsg rẽ wɛɛngẽ wã bɩ? A Abrahaam sẽn wa n gomdã, a Zeova pa kʋʋg a goamã ye. A pʋd n talla sũ-mare, n kelg a Abrahaam sogsgã fãa, la bũmb nins sẽn da kɩt t’a maand yɩɩrã. Rẽ poore, a Zeova lebs n togsa bũmb nins sẽn kɩt t’a Abrahaam maand yɩɩrã, tɩ wilgdẽ t’a kelg-a-la sõma, la a yaool n yeel-a t’a bas a yam tɩ baa yaa nin-tɩrs piig bal n be Sodom, yẽ pa na n sãam tẽngã ye. (Sɩng. 18:22-33) Ad yaa mak-sõng tɛkẽ! Wakat fãa, a Zeova maagda a yĩng n kelge, n pa yikd a sũur ye.

Hakɩɩka, yaa tɩlɛ ne kiris-nebã fãa tɩ b bɩɩs sũ-mare, bala naaga zʋg-sõma nins ned sẽn yelg yalẽ-paalgã sẽn segd n tallã. D sã n maood d pãng tɛk n na n bɩɩs sũ-mare, d waoogda d Ba a Zeova sẽn yaa nonglem la sũ-mar soabã. Rẽ me, d na n paam n naaga “neb nins sẽn maand tẽeb la sũ-mare, n deegd pʋɩɩr ning Wẽnnaam sẽn kãabã.”—Ebre. 6:10-12.