1, 2. Baa ne a Sayull sẽn yɩ sik-m-meng soab sɩngrẽ wã, bõe n wa n kɩt t’a Zeova bas-a? (Ges-y fotã sẽn be yĩngrã.)

A ZEOVA sẽn wa n yãk a Sayull t’a lebg rĩmã, rẽ t’a yaa sik-m-meng soaba, tɩ nebã ra nand-a. (1 Sãm. 9:1, 2, 21; 10:20-24) La a sẽn deeg naamã, tao-tao bal t’a lebga wuk-m-meng soaba. Ad bũmb a ye a sẽn maane. Filisti nebã wa n dat n zaba ne Israyɛll nebã, t’a Sãmwɛll yeel-a t’a pa Gilgall n gũ-a t’a wa reng n kʋ maoong n kõ a Zeova. La a Sãmwɛll sẽn wa n kaoosdẽ wã, nin-buiidã sẽn da be ne a Sayullã yɛɛsame, tɩ wʋsg sɩng loogre. A Sayull pa tõog a meng n gũ ye. A maana maoongã a toore, tɩ yaool n da pa yẽ n segd n maan ye. Kɩtame t’a Zeova sũurã sãam ne-a.—1 Sãm. 13:5-9.

² A Sãmwɛll sẽn ta Gilgallã, a zaba a Sayull a sẽn kɩɩs a Zeova noorã. La a Sayull pa sak t’a kongame ye. A baoome n na n wilg t’a bee bʋʋm la a sẽn wa n baas n kʋ maoongã, la tɩ pa tolg n yaa wẽng ye. (1 Sãm. 13:10-14) Wakat kãng tɛka, bũmb wʋsg la a Sayull maan ne tɩtaam bɩ wuk-m-menga. Kɩtame t’a Zeova  reeg naamã n bas-a. La sẽn yɩɩd menga, a ra pa le yaa ned sẽn ta a Zeova yam ye. (1 Sãm. 15:22, 23) Hakɩɩka, a Sayull sɩnga neere, la a pa baas neer ye.—1 Sãm. 31:1-6.

3. a) Neb wʋsg tagsg yaa bõe sik-m-mengã wɛɛngẽ? b) Sogs-bʋs la d na n leoke?

³ Rũndã-rũndã vɩɩmã lebga wags taaba, tɩ neb wʋsg tagsdẽ tɩ f sã n dat n yɩ neda, f pa segd n yɩ sik-m-meng soab ye. Ned fãa rat n wilga bũmb fãa pʋgẽ t’a sãoo a taabã. Wala makre, rao a ye sẽn da maand filim-dãmba, n wa lebg politik tar soab hal t’a yʋʋrã yi yeelame tɩ yẽ pa sik-m-meng soaba, la t’a saagdame t’a kõn tol n yɩ sik-m-meng soab ye. Baa wʋsg sẽn tagsd woto wã, bõe yĩng tɩ kiris-nebã segd n yɩ sik-m-mens rãmba? Bõe n wilgd tɩ ned yaa sik-m-meng soaba? Bõe la sik-m-meng pa rat n yeele? Yaa sogs-kãensã la d na n leoke. Sõsg ning sẽn na n pʋglã pʋgẽ, d na n gesa d sẽn tõe n maan to-to n kell n yɩ sik-m-mens rãmb baa sã n wa yaa toogo.

4. Bõe n wilgd tɩ ned yaa wuk-m-meng soaba?

⁴ Biiblã wilgdame tɩ sik-m-meng soab yaa ned sẽn pa tɩta-neda, bɩ wuk-m-meng soaba. (Karm-y Yel-bũn 11:2.) A Davɩɩd ra pʋʋsa a Zeova, n kos-a t’a gũ-a t’a “ra maan tɩtaam” ye. (Yɩɩn. 19:14, Wẽnnaam Sebre, 1983) La bõe n wilgd tɩ ned yaa wuk-m-meng soaba? Ned sã n maan bũmb a sẽn pa tar sor n na n maane, yaa wuk-m-menga. Tõe tɩ yaa a sẽn pa tõe n maag a menga, wall a sẽn tagsd t’a sãoo a taabã n kɩt t’a maan a sẽn pa tar sor n na n maanã. D fãa sẽn pa zems zãngã, wakat ninga d maanda bũmb kẽer ne wuk-m-menga. La Rĩm a Sayull vɩɩmã sẽn baas to-to wã wilgda tõnd tɩ wuk-m-meng sã n lebg d minungu, na n wa kɩtame tɩ d lebg ned sẽn pa tõe n ta a Zeova yam. Sebr Sõng pʋgẽ wã, Yɩɩn-sõamyã 119:21 yetame tɩ Wẽnnaam ‘kãabda a sɩbgr tɩtaam dãmba.’ Bõe yĩnga?

5. Bõe n wilgd tɩ wuk-m-meng yaa yel-wẽn-kãsenga?

⁵ D bãng tɩ tɩta-ned bɩ wuk-m-meng soab pa a ye ne ned sẽn mi n tudg n zẽk a meng ye. Ned sã n yaa wuk-m-meng soaba, pipi, paoogda a Zeova sẽn yaa tõnd Naab la d Wẽnnaamã. Yiib-n-soaba, ned sã n wuk a meng n maan bũmb a sẽn pa tar sor n na n maane, wae n wata ne mo-yõs la zaba. (Yel. 13:10) La tãab-n-soaba, nebã sã n wa bãng t’a sẽn maanã yaa wuk-m-menga, lebgda yãnd la paoogre. (Luk 14:8, 9) Sɩd-sɩdã, wuk-m-meng zɩ n baas neer ye. A Zeova bee bʋʋm la a sẽn wilg Biiblã pʋgẽ tɩ d mao n yɩ sik-m-mens rãmb wakat fãa wã.

6, 7. Bõe n wilgd tɩ ned yaa sik-m-meng soaba?

⁶ Sik-m-meng soab miime t’a pa tar sor n tõe n maan bũmb fãa, la t’a pãngã tara koaka. Kiris-ned sẽn yaa sik-m-meng soab pa tagsd t’a sãoo a taabã ye. A pʋd n getame t’a taabã yɩɩda yẽnda. (Fili. 2:3) A tẽegdame t’a kongdame. A sã n sɩd kong me, a sakd n deega a kongrã. Sik-m-meng soab sakd n kelgda neb a taabã me tagsgo, n dɩkd yam b nengẽ. A Zeova nonga sik-m-mens rãmbã wʋsgo.

⁷ Biiblã wilgdame tɩ sik-m-meng soab mii a meng sõma, a sak n deegame t’a bãngrã, a minimã ne a sẽn tõe n maanã tara koaka, la tɩ bũmb kẽer me la a pa tar sor n na n maane. A manesmã ne a taabã la a no-goamã wilgda rẽ vẽenega.

8. Tagsa la manesem bʋs la d pa segd n talle, d sã n dat n kell n yɩ sik-m-mens rãmba?

⁸ Ned tõe n wa tara tagsa wall manesem sẽn wilgd t’a yaa wuk-m-meng soaba, n ka  miẽ meng ye. Wala makre, a tõe n wa tagsdame t’a yɩɩda a taaba, a meng wall a zakã ned bɩ a zoa sẽn tar tʋʋm kẽer tũudmã pʋgẽ yĩnga. (Rom. 12:16) Nina tõeeme me n wa yik n maand bũmb kẽere, a sẽn dat tɩ nebã ges-a wall b pẽg-a yĩnga. (1 Tɩm. 2:9, 10) D pʋd n tõeeme meng n wa rat n wilgd d taabã sẽn segd la sẽn pa segde, d sẽn tagsd tɩ d yam, d bãngre, wall d yʋʋm yɩɩd-b lame yĩnga.—1 Kor. 4:6.

9. Bõe n kɩt tɩ neb kẽer lebg wuk-m-mens rãmba? Togs-y kibar sẽn be Biiblã pʋgẽ n wilgd rẽ.

⁹ D bãng tɩ d sã n bas tɩ d yĩngã tʋlsem soog-do, d tõe n wa maanda bũmb wʋsg ne wuk-m-menga. Neb kẽer sẽn da rat ziir la waoogre, sẽn tʋlg bũmb b to sẽn tare, pa rẽ bɩ sẽn pa tõog b sũur lebga wuk-m-mens rãmba, n maan bũmb b sẽn da pa tar sor n maane. Wala makre, a Absalom, a Ozɩyaas ne a Nebukadnezaare. B basame tɩ b yĩngã tʋlsem tõog-ba, tɩ b maan b sẽn da pa tar sor n na n maane, t’a Zeova sɩbg-ba, tɩ wilg tɩ b segd n sika b menga.—2 Sãm. 15:1-6; 18:9-17; 2 Kib. 26:16-21; Dãn. 5:18-21.

10. Bõe yĩng tɩ d pa segd n yɩ tao-tao n kao d to bʋʋdo? Togs-y kibar sẽn be Biiblã pʋgẽ n wilgd rẽ.

¹⁰ Bũmb a taab me n tõe n kɩt tɩ ned tall manesem tɩ wõnd a pa sik-m-meng soab ye. D tẽeg a Abimelɛk kibarã sẽn be Sɩngr 20:2-7 wã, la a Pɩyɛɛr kibarã sẽn be Matye 26:31-35 wã. Rẽ yĩnga, b sẽn maanã yaa wuk-m-meng bɩ, bɩ yaa zɩɩlem wall b sẽn pa tags n zãage? D sẽn pa tõe n bãng sẽn be d taabã sũyẽ wã, d pa segd n yɩ tao-tao n kao b bʋʋd ye.—Karm-y Zak 4:12.

11. Kiris-ned sẽn yaa sik-m-meng soab mii bõe?

¹¹ Kiris-ned sẽn yaa sik-m-meng soab mii a sẽn tar sor n na n maane, la a sẽn pa tar sor n na maan tigingã pʋgẽ. A Zeova yaa Wẽnnaam sẽn pa zũnd-zãnd soab ye. A kɩtame tɩ tigingã ned kam fãa tar a sẽn maand tigingã neer yĩnga. Rẽnd ned kae n pa tar yõod ye. A bark sẽn ka to wã yĩnga, a kõo ned kam fãa kũun toɛy-toɛya, tɩ d minimã, d bãngrã la d tõodã yaa toor-toore. D tõe n talla rẽ fãa n maan bũmb wʋsg a yʋʋrã waoogr yĩnga, la d taabã sõngr yĩnga. (Rom. 12:4-8) Yaa d sẽn tar yõod a Zeova nifẽ, la a sẽn kɩs tõnd sɩdã n kɩt t’a kõ-d kũun toɛy-toɛy woto wã.—Karm-y 1 Pɩyɛɛr 4:10.

12, 13. Bõe yĩng tɩ tʋʋmd d sẽn tʋmd a Zeova tũudmã pʋgẽ sã n wa toeem bɩ d pa segd n ling-du?

¹² Tʋʋm nins d sẽn tʋmd a Zeova tũudmã pʋgẽ wã tõe n wa toeemame. A Zeezi vɩɩmã wilgda rẽ. Sɩngrẽ wã, yẽ ne a Zeova bal n da be ne taaba. (Yel. 8:22) A Zeova sẽn wa n na n naan malɛgs a taabã, ãndũniyã ne bũmb nins sẽn be tẽng zugã, la ninsaalbã, a Zeezi sõng n tʋmame. (Kol. 1:16) La a Zeova wa n tʋm-a-la tẽngã zugu, n kɩt tɩ b rog-a t’a yaa bi-pɛɛlg sẽn pa tõe n maan baa fʋɩ a toore, n tall bɩʋʋng hal n wa lebg kãsma. (Fili. 2:7) A sẽn ki n dol nebã yel-wẽnã poore, a leba saasẽ, tɩ Wẽnnaam kɩt t’a lebg a Rĩungã rĩm yʋʋmd 1914. (Ebre. 2:9) La toeeng n nan ket taoore. Biiblã wilgame t’a Zeezi na n sooga tẽngã, n dɩ naam yʋʋm tusri, la tɩ rẽ poore, a na n lebsa naamã, tɩ “Wẽnnaam yɩ taoor soab bũmb fãa pʋgẽ.”—1 Kor. 15:28.

¹³ Woto wilgdame tɩ tʋʋm nins b sẽn kõ tõnd a Zeova tũudmã pʋgẽ wã me tõe n toeemame. Sasa ninga, yaa d yam-yãkr n wat ne toeengã. Wala makre, d sã n da yaa d yembre, n wa kẽ kãadem, wall d sã n da pa tar kamba, n wa rog biiga. Nina tõe n yãka yam n toeem bũmb sãnda a vɩɩmã  pʋgẽ, sẽn na yɩl n tõog n yɩ so-pakda. Bũmb kẽer me tõe n kɩtame tɩ d tar weer n tʋmd a Zeova tʋʋmdã wʋsgo. La yɛl sãnda tõe n kɩtame tɩ d wa pa le tõe n maan wa pĩndã ye. Tõe n yɩ bãaga, kʋʋlem bɩ bũmb a to. La d yaa biiga, bi-bɩɩg wall kãsma, d tara keelem tɩ d pa tar keelem, d bãng t’a Zeova mii ned kam fãa sẽn tõe, la t’a nanda d modgrã. A pa rat tɩ d maan sẽn yɩɩd d pãng ye. D sã n maan d sẽn tõe, a sũur yaa noog wʋsgo.—Ebre. 6:10.

14. Wãn to la sik-m-meng sõngd tõnd tɩ d maan sũ-noogo?

¹⁴ A Zeezi tʋma tʋʋm nins fãa a Zeova sẽn kõ-a wã ne a sũur fãa tɩ kõ-a sũ-noogo. (Yel. 8:30, 31) Tõnd me tõeeme tɩ d tʋʋmã kõ-d sũ-noogo. Kiris-ned sẽn yaa sik-m-meng soab pa get t’a yɩɩda a na tʋm tʋʋmd b sẽn kõ-a tigingã pʋgẽ, wall a tagsdẽ tɩ b segd n paas-a-la tʋʋm a taab ye. Leb n pa tʋʋm nins neb a taabã sẽn tʋmdã la a get ye. A tʋmda tʋʋmd ning b sẽn kõ-a wã ne a sũur fãa la a pãng fãa, n maand sũ-noog ne rẽ, bala a kɩsa sɩd tɩ yaa a Zeova meng n kõ-a tʋʋmdã. Sik-m-meng soab sakd n deegame t’a tẽed-n-taasã sẽn tʋmd tʋʋm ninsã me yaa a Zeova n kõ-ba. A maanda sũ-noog ne rẽ, la a teend-ba.—Rom. 12:10.

15. Sik-m-mengã wɛɛngẽ, mak-sõng-bʋg la a Zedeyõ kõ tõndo?

¹⁵ Sik-m-mengã wɛɛngẽ, a Zedeyõ kõo mak-sõng tɛkẽ. A Zeova sẽn wa n yeel-a  t’a ratame t’a tɩ zab n fãag Israyɛll nebã Madiyã rãmbã nugẽ wã, a leokame: “Manaase buudã fãa pʋgẽ, yaa tõnd doogã n tɩ yaa naong rãmba. Sẽn paase, mam ba wã zak pʋga, maam n yaa b fãa yao-zʋʋga.” (Bʋ. 6:15) A saka tʋʋmdã, la a baoome n na n bãng a Zeova sã n sɩd ratame tɩ yẽ tʋm tʋʋmdã. A leb n kosa a Zeova t’a wilg-a sor bũmb fãa pʋgẽ. (Bʋ. 6:36-40) A Zedeyõ ra yaa raood soaba, la a tar pãnga. Baa ne rẽ, a yɩɩ gũus-m-meng soaba, n tʋm ne yam. (Bʋ. 6:11, 27) A pa tũnug ne tʋʋmd ning a Zeova sẽn kõ-a wã n bao naam la yʋʋr ye. A sẽn tʋm tʋʋmdã n sa wã bala, a lebg n kuila a yiri.—Bʋ. 8:22, 23, 29.

16, 17. Sik-m-meng soab tagsg yaa wãn ne Biiblã sẽn sagend tɩ d modg n kẽngd taoor Wẽnnaam tũudmã pʋgẽ wã?

¹⁶ Kiris-ned sẽn segd n yɩ sik-m-meng soabã pa rat n yeel t’a pa segd n bao n na n tʋm tʋʋm tigingã pʋgẽ n paas ye. Biiblã sagenda ned fãa t’a modg n kẽngd taoor Wẽnnaam tũudmã pʋgẽ. (1 Tɩm. 4:13-15) La rat n yeelame tɩ rẽnda f paam tʋʋm n paas bɩ? Ayo. Sẽn yaa tʋʋmd ning fãa la d zoe n tʋmd tigingã pʋgẽ, a Zeova tõe n sõng-d lame tɩ d minimã paase. D leb n tõe n bɩɩsda zʋg-sõma, la d bɩɩsd tõod nins a Zeova sẽn kõ-dã, n tõog n tũ a Zeova sõma la d tʋm d taabã sõngr yĩnga.

¹⁷ B sã n wa rat n kõ kiris-ned tʋʋmde, sik-m-mengã na n kɩtame t’a reng n bao n bãng b sẽn dat t’a maan bũmb ningã takɩ. A na n pʋʋsa a Zeova n gom tʋʋmdã yelle, la a bʋgs n ges a sã n na n tõogame. Wala makre, a na n tags n gesa a sã n tara sẽk la pãng n na n tʋm tʋʋmdã, tɩ pa tiis a tʋʋm a taab sẽn tar yõodo. A sã n mik tɩ na n yɩɩ toogo, a na n tags n gesa a sã n pa tõe n kos neb a taab tɩ b reeg a tʋʋm kẽer n tʋme. Sik-m-meng soab sã n bʋgs woto, a bãngda a sã n na n saka tʋʋmdã bɩ a na n basame tɩ b kõ ned a to.

18. a) B sã n wa kõ-d tʋʋmde, sik-m-mengã sõngdame tɩ d maan bõe? b) Bõe la b yet Rom-dãmb 12:3 pʋgẽ, tɩ sõngd tõnd tɩ d yɩ sik-m-mens rãmba?

¹⁸ A Zedeyõ sẽn maan to-to wã tẽegda tõnd tɩ b sã n wa kõ-d tʋʋmde, yaa tɩlɛ tɩ d paam t’a Zeova wilg-d sor la a ning bark tɩ yãk nenga. Biiblã pʋd n sagenda tõnd tɩ d ‘kẽn ne d Wẽnnaamã ne sik-m-menga.’ (Mii. 6:8) Rẽ wã, b sã n wa kõ-d tʋʋmd bɩ d reng n pʋʋse, la d maan vaeesg Wẽnnaam Gomdã pʋgẽ la a siglgã sɛb pʋsẽ, n bãng a Zeova sẽn dat tɩ d maanã takɩ. D tẽegdẽ tɩ sẽn yaa bũmb ning fãa la d tõog n maan a Zeova tũudmã pʋgẽ, pa d yam bɩ d pãng yĩng ye. Yaa a Zeova sik-m-mengã n kɩtd tɩ d “yɩ kãsenga.” (Yɩɩn. 18:36, Wẽnnaam Sebre, 1983) D sã n yaa sik-m-mens rãmba, d pa na n tags tɩ d yɩɩda d taabã, wall d tags tɩ d ka võor ye.—Karm-y Rom-dãmb 12:3.

19. Bõe yĩng tɩ d segd n yɩ sik-m-mens rãmba?

¹⁹ D sẽn mi t’a Zeova n yaa d Naanda, la yĩngr la tẽng fãa Soaalã, d sikda d meng bũmb fãa pʋgẽ, bala yẽ n zems ne ziir la waoogre. (Vẽn. 4:11) Sik-m-mengã kɩtame tɩ sẽn yaa tʋmd ning fãa la b kõ-d tigingã pʋgẽ, d maanda sũ-noog ne rẽ, n tʋmd wa d sẽn tõe. Leb n kɩtdame tɩ d waoogd d taabã, baa b tagsa wã la b yel-manesmã sẽn mi n yaa toorã. Rẽ sõngdame tɩ zems-n-taar beẽ. Sik-m-mengã kɩtdame tɩ d sã n wa rat n maan bũmb bɩ d reng n tags d taabã yelle, la d gũus neer n da maan sẽn pa zems ye. A Zeova nonga sik-m-mens rãmbã wʋsgo. Yaa rẽ fãa yĩng la kiris-ned sẽn segd n yɩ sik-m-meng soabã. Sõsg ning sẽn pʋgdã pʋgẽ, d na n yã d sẽn tõe n maan to-to n kell n yɩ sik-m-mens rãmba, baa sã n wa yaa toogo.