1. A Lazaar sẽn maan kaalmã, a Mart ra kɩsa sɩd ne bõe? (Ges-y fotã sẽn be yĩngrã.)

A MART yaa a Zeezi zoa la a karen-biiga. A Lazaar sẽn yaa a tão wã maana kaalem, t’a be sũ-sãang pʋgẽ. Bũmb n be n tõe n bels-a bɩ? N-ye. A Zeezi kenga a pɛlg n yeel-a yaa: “Fo tão wã na n vʋʋgame.” Yaa sɩd tɩ pa kɩt t’a Mart sũ-sãangã sa fasɩ ye. La a tẽe a Zeezi gomdã. Rẽ n so t’a leok yaa: ‘Mam miime t’a na n vʋʋga vʋʋgrã wakate, yaoolem daarã.’ (Zã 11:20-24) A ra kɩsa sɩd tɩ wakat n wat tɩ sẽn ki-bã na n vʋʋge. La baraar bala, a Zeezi maana yel-solemd n vʋʋg a Lazaare.

2. Bõe yĩng tɩ yãmb me rat n tall a Mart tẽebã buudu?

² Bũmb ka be d sẽn tõe n tiki, n tags tɩ d ned sã n maan kaalem, a Zeezi wall a Ba wã na n maana yel-solemd n vʋʋg-a zĩig pʋgẽ ye. La baasgo, yãmb kɩsa sɩd wa a Mart tɩ wakat n wat tɩ sẽn ki-bã na n vʋʋg bɩ? Tõe tɩ yaa y pag wall y sɩda, y ma wall y ba, pa rẽ bɩ y biig wall y yaab n maan kaalem. Sãmbg kae tɩ y yãgdame n dat n wa paam n mobg a soaba, n sõs ne-a, la y naag taab n maan sũ-noogo. Bʋʋm waoog sẽn sek yãmb me na yeel wa a Mart yaa: ‘M miime tɩ m nedã sẽn  maan kaalmã na n vʋʋgame.’ Bɩ d lebg n tẽeg bũmb nins sẽn kɩt tɩ d kɩs sɩd tɩ sẽn ki-bã na n wa vʋʋgame wã. Kiris-ned fãa sã n bʋgs rẽ zugu, na n naf-a lame.

3, 4. Ãnd dãmb la a Zeezi ra zoe n vʋʋge, la bõe yĩng tɩ d tõe n yeel tɩ rẽ maneg n kenga a Mart tẽebã?

³ A Mart rãmb zakã ra pẽe Zerizalɛm. Dẽnd a pa yã a Zeezi sẽn maan yel-solemd n vʋʋg Nayin pʋg-kõorã bi-riblã ye. Bala, Nayin bee hal Galile. La a tog n wʋmame tɩ b gomda. Wõnda yaa nebã noorẽ me la a wʋm a Zeezi sẽn vʋʋg a Zayirus bi-puglã. Sẽn da be-b a Zayirus zakẽ wã fãa ‘dag n miime tɩ biigã kiime.’ La a Zeezi gãda a nugã, n yeel-a yaa: “M biiga, yiki.” Zĩig pʋgẽ, biigã yikame. (Luk 7:11-17; 8:41, 42, 49-55) A Mart ne a ma-biig a Maari fãa ra miime t’a Zeezi tõe n kɩtame tɩ bãag sigi. Rẽ n so tɩ b ra kɩs sɩd t’a Zeezi sã n da beẽ be, b tão wã ra pa na n ki ye. La a sẽn paam n ki wã, sẽn maand n le be bɩ? D tẽeg t’a Mart yeelame t’a Lazaar na n vʋʋga kũum vʋʋgrã wakate, “yaoolem daarã.” Bõe yĩng t’a ra kɩs sɩd ne rẽ? Bõe yĩng tɩ tõnd me tõe n kɩs sɩd tɩ wakat n wate, tɩ tõnd neb nins sẽn maan kaalmã la neb a taab sẽn ki na n vʋʋge?

⁴ Biiblã kibay wʋsg n tõe n sõng-d tɩ d kɩs sɩd tɩ sẽn ki-bã na n wa vʋʋgame. D na n goma bãmb b wãn yelle. Tõe tɩ y na n yãa bũmb kẽer y sẽn da zɩ n tags ye. Rẽ na n kɩtame tɩ y maneg n kɩs sɩd tɩ y neb nins sẽn ki wã na n wa vʋʋgame.

5. Bõe n kɩt t’a Mart ra kɩs sɩd t’a Lazaar na n wa vʋʋgame?

⁵ D tẽeg t’a Mart pa yeel t’a saagdame t’a tão wã na n vʋʋgame ye. A yeelame yaa: ‘Mam miime t’a na n vʋʋga vʋʋgrã wakate.’ Pa a Mart sẽn wʋm a Zeezi sẽn vʋʋg neb sẽn da ki wã bal n kɩt t’a ra tẽed kũum vʋʋgrã ye. Sẽn deng bãmb wakatã menga, Wẽnnaam vʋʋga neb sẽn da maan kaalem. A Mart tog n da mii kiba-kãens hal a yãadmẽ. Yaa a roagdbã nengẽ la karen-doogẽ wã la a wʋm kiba-kãense. D na n goma a tãab yelle.

6. Yel-solem-bʋg la a Mart ra tog n miẽ?

⁶ Ned b sẽn vʋʋg pipi tɩ Biiblã gomd a yell yɩɩ no-rɛɛs a Eli wakatẽ wã. Wẽnnaam da kõo no-rɛɛs a Eli tõog t’a maand yel-soalma. Daar a ye, pʋg-kõor sẽn da be Sarepta, Fenisi soolmẽ wã n deeg-a sãando. Sarepta yaa tẽng sẽn be Israyɛll nug-rɩtgã. Wẽnnaam maana yel-solemde, n kɩt tɩ pagã zom la a kaam pa sa ye. Sõngame tɩ pagã ne a biigã pa ki kom ye. (1 Rĩm. 17:8-16) La biigã wa n lʋɩ bãaga, n maan kaalem. A Eli sõnga pagã a yellã pʋgẽ. A gãandame n tẽeg a meng biigã zugu, n pʋʋs a Zeova n yeel yaa: “Wẽnnaam Sẽn-Ka-Saabo, mam Wẽnnaam, mam kot-y lame tɩ y kɩt tɩ biigã leb n paam vɩɩm!” Wẽnnaam reega a Eli kosgã n kɩt tɩ biigã vʋʋge. Woto la Biiblã pipi kibar sẽn gomd ned sẽn vʋʋg yelle. (Karm-y 1 Rĩm-dãmb 17:17-24.) A Mart tog n da mii kiba-kãnga sõma.

7, 8. a) Pagã biig sẽn ki wã, bõe la a Eliize maan tɩ bels-a? b) A Eliize sẽn vʋʋg biigã wilgda tõnd bõe a Zeova zugu?

⁷ No-rɛɛs a Eliize sẽn ledg a Eli wã me maana yel-solemd n vʋʋg neda. Rẽ la Biiblã kibar a yiib-n-soab sẽn gomd ned sẽn vʋʋg yelle. Israyɛll pag a ye sẽn da be tẽng yʋʋr sẽn boond tɩ Sunem n da mi n deegd a Eliize sãando, n get a yell hal sõma. Pagã ra yaa kiri, t’a sɩdã me kʋʋle. La Wẽnnaam ning-a-la bark a maan-neerã yĩnga, n kɩt t’a rog bi-ribla.  Yʋʋm a wãn poore, biigã kiime. Mams-y n ges-y rẽ sẽn sãam a ma wã sũur to-to! A kosa a sɩdã sore, n kẽng Karmell tãngã sẽn be kilo 30 zĩigẽ wã, n tɩ yã no-rɛɛs a Eliize. No-rɛɛsã yeela a tʋm-tʋmd a Geyaazi t’a reng taoor n tɩ vʋʋg biigã. A Geyaazi kẽngame, la a pa tõog ye. Rẽ poore, pagã ne a Eliize tũu taab n wa.—2 Rĩm. 4:8-31.

⁸ A Eliize kẽe roog ning biigã sẽn da beẽ wã, n pʋʋs a Zeova. A Zeova kelga a pʋʋsgã, n maan yel-solemd tɩ biigã vʋʋge. Pagã sẽn yã a biigã, a sũ-noogã ra pa tõe n bãng n bilg ye! (Karm-y 2 Rĩm-dãmb 4:32-37.) Tõe t’a tẽega a Ana sẽn da pʋʋs a Zeova n yeel bũmb ningã. A Ana ra yaa kiri, t’a Zeova wa ning-a bark t’a rog a Sãmwɛll. A sẽn wa n tall-a n kẽng sɛk-roogẽ wã, a pʋʋsa a Zeova n pẽg-a, n yeel yaa: “Bãmb n tõe tɩ ned sig kɩɩm-kulgu, la b tõe t’a vʋʋge.” (1 Sãm. 2:6) Wẽnnaam vʋʋga Sunem pagã biigã, tɩ wilgdẽ t’a sɩd tõe n vʋʋga ned sẽn ki.

9. Togs-y Biiblã kibar a tãab-n-soab sẽn gomd kũum vʋʋgrã yelle.

⁹ A Eliize yɩɩ no-rɛɛs n kaoos yʋʋm 50 la zaka. A wa n lʋɩɩ bãaga, “la rag n yaa a yõor bãaga.” A sɩd maana kaalem tɩ b mum-a. Kaoosg zugẽ, bũmb sẽn yɩ yel-solemd n maane. Israyɛll neb n da rebd n na n tɩ mum neda, la mikame tɩ bɛɛb n kẽ tẽngã. B sẽn yã bɛɛbã, b rɩka kũumã n lob a Eliize yaoogẽ wã, la b zoe. Wakat kãng t’a Eliize yĩngã ra paam n lebga kõab bala. Ad Biiblã sẽn yete: “Raoã sẽn sɩɩs a Eliize kõabã, raoã vʋʋgame n yik n yalse.” (2 Rĩm. 13:14, 20, 21) Kiba-kãensã fãa sɩd sõnga a Mart t’a kɩs sɩd tɩ Wẽnnaam tara kũumã tɩɩm. Segd n kɩtame tɩ yãmb me bas y yam tɩ Wẽnnaam tõogã ka koak ye.

10. Bõe n paam a Dorkase, la bõe la a Pɩyɛɛr maan-yã?

¹⁰ Biiblã babg ning b sẽn da gʋls ne gɛrkã pʋgẽ me, b gomda wẽn-sakdb sẽn vʋʋg neb yelle. D ra zoe n goma a Zeezi sẽn vʋʋg pʋg-kõorã bi-ribl Nayin tẽngã noorã, la a sẽn vʋʋg a Zayirus bi-puglã. Tʋm-tʋmd a Pɩyɛɛr me vʋʋga a Dorkas b sẽn boond me t’a Tabita wã. Baraarã, a Pɩyɛɛr kẽe roog ning pʋgẽ b sẽn da gãneg-a n gũud a mumbã, n pʋʋs a Zeova, n yaool n yeel yaa: “Tabita yiki.” Zĩig pʋgẽ, a vʋʋgame. A Pɩyɛɛr boola a tẽed-n-taasã n ‘wilg-b t’a vʋʋgame.’ Nebã sẽn wʋm kibarã, sɩd yɩ-b-la noog hal tɩ Biiblã yeel tɩ “neb wʋsg tẽe Zu-soabã.” Nin-kãensã ra tõeeme masã n taas b taabã koe-noogã tɩ b bãng a Zeezi, la b sõng-b tɩ b bãng t’a Zeova tõe n vʋʋga sẽn ki-bã.—Tʋʋ. 9:36-42.

11. A Luk sẽn da yaa logtorã yeelame tɩ bõe n paam bi-bɩɩg a ye? Bõe n yɩ sẽn zĩnd-b be wã noogo, la bõe yĩnga?

¹¹ Ned a to me vʋʋgr la neb wʋsg maan kaseto. Yɩɩ Torwaas tẽngẽ wã, rũndã-rũndã Tirki soolmã pʋgẽ. Baraare, tʋm-tʋmd a Poll ne a tẽed-n-taas n da tigim taab yĩngr doog a ye pʋgẽ. A Poll sõsa ne-b n tãag yʋn-sʋka. Bi-bɩɩg a ye yʋʋr sẽn boond t’a Etikus n da zao fẽnetr zug n kelgdẽ. A wa n gũsame, n yi yĩngr doogã fenetr zug n lʋɩ tẽnga. Tõe tɩ yaa a Luk sẽn yaa logtorã n yɩ pipi n wudg n tɩ ges a Etikus. A sẽn ges-a wã, a bãngame t’a pa sobg bal ye. Yaa sẽn ki! A Poll me sigame n wa, n zẽk-a n mobge, n bas n yeel gomd sẽn ling nebã. A yeelame yaa: “A vɩɩme.” Sẽn zĩnd-b be wã sũy yɩɩ noog hal wʋsgo. “Yɩɩ belsg kãseng bãmb fãa yĩnga,” bala b ra mii vẽeneg tɩ bi-bɩɩgã ra kiime, la t’a lebg n vʋʋgame.—Tʋʋ. 20:7-12.

12, 13. Bõe la d sokd d mense, la bõe yĩnga?

¹² Kibay nins yell d sẽn gomã tog n kɩtame tɩ yãmb me bas y yam wa a Mart tɩ sẽn ki-bã na n wa vʋʋgame. D kɩsa sɩd tɩ Wẽnnaam, a soab ning sẽn naana tõndã tõeeme tɩ ned sẽn ki vʋʋge. Yãmb sã n gũus n gesame, yaa wẽn-sakdb la a Zeova tũ ne n vʋʋg neb nins yell d sẽn gomã. Wala makre, a Eli, a Zeezi la a Pɩyɛɛre. Sẽn paase, yɩɩ wakat a Zeova sẽn da mi n kõ ninsaalb tõog tɩ b maand yel-soalma. La neb n ki sẽn deng wakat kãnga, la rẽ poore. Rẽ yĩnga, d tõe n kɩsa sɩd tɩ bãmb me na n wa vʋʋgame bɩ? D tẽeg t’a Lazaar kũumã poore, a Mart yeelame yaa: ‘Mam miime t’a na n vʋʋga vʋʋgrã wakate, yaoolem daarã.’ Tõnd me tõe n basa d yam wa a Mart bɩ? Bõe n kɩt t’a ra kɩs sɩd tɩ sẽn ki-bã na n wa vʋʋgame, la bõe yĩng tɩ tõnd me tõe n kɩs sɩd ne rẽ?

¹³ Vɛrse-rãmb n be Biiblã pʋgẽ, n wilgd tɩ pĩnd wẽndẽ wẽn-sakdbã ra miime t’a Zeova yãka wakat n na n wa vʋʋg sẽn ki-bã. D gom bãmb b wãn yelle.

14. A Abrahaam kibarã sõngda tõnd tɩ d bãng bõe kũum vʋʋgrã wɛɛngẽ?

¹⁴ D tẽeg a Zeova sẽn yeel a Abrahaam t’a rɩk a Izaak, biig ning a sẽn n gũ n kaoos n yaool n na n paamã, n maan bũmb ningã. A yeel-a lame yaa: “Rɩk f biigã, fo bi-ribl yẽndã, a Izaak fo sẽn nongã, n kẽng Moriiza, la f sã n ta beenẽ, bɩ f rɩk-a n maan maoong sẽn yõogd bugum.” (Sɩng. 22:2) Mams-y n ges-y a Abrahaam tagsg sẽn yɩ a soaba, a sẽn wʋm woto wã. A Zeova ra pʋlmame tɩ ne a Abrahaam yagensã maasem, buudã fãa neb na n paama barka. (Sɩng. 13:14-16; 18:18; Rom. 4:17, 18) A wilgame me tɩ na n tũu ne a Izaak. (Sɩng. 21:12) La a Abrahaam sã n dɩk a biigã n kʋ maoongo, wãn to la pʋlengã na n pidsi? Wẽnnaam vẽnega a Poll t’a yeel t’a Abrahaam ra kɩsa sɩd tɩ Wẽnnaam tõe n vʋʋga a Izaak. (Karm-y Ebre-rãmb 11:17-19.) Biiblã pa wilg t’a Abrahaam ra tẽedame t’a sã n kʋ a biigã, a na n lebg n vʋʋga zĩig pʋgẽ, wall lɛɛr a wãn poore, pa rẽ bɩ rasem a wãn bɩ semen a wãn poor ye. A ra pa tõe n bãng wakat ning a biigã sẽn na n vʋʋgã ye. La a ra kɩsa sɩd t’a Zeova na n vʋʋg-a lame.

15. Wẽn-sakd a Zoob ra kɩsa sɩd ne bõe?

¹⁵ Wẽn-sakd a Zoob me ra kɩsa sɩd tɩ wakat n wat tɩ sẽn ki-bã na n vʋʋge. A ra miime tɩ b sã n kɛ tɩɩga, a lebsd n tobame  n lebg wa tɩ-polle. La ninsaal yẽ nengẽ pa woto ye. (Zoob 14:7-12; 19:25-27) Ninsaal sã n ki, a pa tõe n vʋʋg a toor ye. (2 Sãm. 12:23; Yɩɩn. 89:49) La pa rat n yeel tɩ Wẽnnaam pa tõe n vʋʋg ned sẽn ki ye. A Zoob pʋd n da kɩsa sɩd t’a sã n ki, a Zeova na n yãka wakat n tẽeg a yelle, n vʋʋg-a. (Karm-y Zoob 14:13, 15.) A Zoob ra pa tõe n bãng sẽn na n yɩ wakat ning ye. La a ra kɩsa sɩd tɩ yẽ sã n ki, sẽn naan-a ninsaalã tõe n vʋʋga yẽ, la t’a na n sɩd n tẽega a yell n vʋʋg-a.

16. Bõe la malɛk yeel a Dãniyɛlle?

¹⁶ A Dãniyɛll me yɩɩ pĩnd wẽndẽ wẽn-sakda, t’a kibarã be Biiblã babg ning b sẽn da gʋls ne ebre wã pʋgẽ. A tũu a Zeova a vɩɩmã tõre, t’a Zeova ra bee ne-a, n sõngd-a. Vugri, malɛk n yeel “Wẽnnaam nin-nongr” a Dãniyɛll yaa: “Gãneg f yam! Keng f meng n paam daoodo!”—Dãn. 9:22, 23; 10:11, 18, 19.

17, 18. Bõe la Wẽnnaam pʋlem a Dãniyɛlle?

¹⁷ A Dãniyɛll ra kolga yʋʋm 100, n miẽ tɩ pa na n kaoos la a maan kaalem ye. Tõe t’a ra sokda a meng a beoog sẽn na n yɩ to-to. A sã n ki, a na n wa vʋʋgame bɩ? N-ye! Dãniyɛll sebrã baasgẽ, Wẽnnaam yeel-a-la bũmb sẽn kɩt t’a ra tõe n bas a yam. A yeel-a lame t’a kell n yals kãn-kãe n tãag a yõor tɛka, t’a “na n paama vʋʋsgo.” (Dãn. 12:13) A Dãniyɛll ra miime tɩ “tʋʋmde, tagsgo, la bãngr ne yam ka be” yaoogẽ wã, zĩig ning a sẽn na n kẽngẽ wã ye. (Koɛ. 9:10) La pa na n tek woto ye. A Zeova pʋlma a Dãniyɛll t’a beoog na n yɩɩ neere.

¹⁸ Malɛkã paasame t’a Dãniyɛll na n ‘yik n deega a keoor yaoolem daarã.’ A pa togs-a sẽn na n yɩ wakat ningã takɩ ye. A wilgame bal t’a Dãniyɛll na n kiime, n paam vʋʋsgo. La a sẽn yeel-a t’a na n ‘yik n deega a keoor yaoolem daarã’ wilgdame t’a na n wa vʋʋgame. Rẽ na n yɩɩ hal kaoosg zugẽ, “yaoolem daarã.”

19, 20. a) Wãn to la kibay nins yell d sẽn gomã sõng tõnd tɩ d wʋm a Mart sẽn yeel a Zeezi bũmb ningã võore? b) Bõe yell la d na n gom sõsg ning sẽn pʋgdã pʋgẽ?

¹⁹ A Mart ra tara bʋʋm n na n kɩs sɩd t’a tão wã sẽn yaa wẽn-sakdã na n “vʋʋga vʋʋgrã wakate, yaoolem daarã.” A Zeova sẽn pʋlem a Dãniyɛll bũmb ningã, n paas a Mart sẽn leok a Zeezi to-to tɩ wilgdẽ t’a kɩsa sɩd tɩ sẽn ki-bã na n wa vʋʋgame wã segd n kɩtame tɩ tõnd me bas d yam. Hakɩɩka, wakat n wat tɩ sẽn ki-bã na n vʋʋge!

²⁰ D goma yel-soalem sẽn zĩnd pĩnd wẽndẽ, n wilgdẽ tɩ ned sẽn ki tõe n vʋʋgame. D yãame tɩ pĩnd wẽndẽ pagb la rap sẽn tũ Wẽnnaam ra kɩsa sɩd tɩ wakat n wat tɩ sẽn ki-bã na n vʋʋge. La rẽ yĩnga, bũmb n be Biiblã pʋgẽ n wilgdẽ tɩ b tõe n pĩnd n togsa hal sẽn kaoos tɩ ned na n wa vʋʋgame, tɩ sɩd wa pids bɩ? Sã n beeme, na n sõng-d lame tɩ d maneg n kɩs sɩd wa a Mart tɩ wakat n wate, tɩ sẽn ki-bã na n vʋʋge. La na n yɩɩ wakat bʋgo? D na n goma rẽ fãa yell sõsg ning sẽn pʋgdã pʋgẽ.