D SÃ N tar zoa hakɩɩka, yaa bõn-sõng tɛkẽ. La zood sẽn kaoosd pa tiigd n paam ye. Tõnd ne ned zood sã n wa rat n sãame, bõe la d tõe n maane? Biiblã gomda neb sẽn yɩ zo-rãmb hakɩɩk yelle. La b zoodã wa n dat n sãamame. D tõe n dɩka yam b kibayã pʋgẽ.

Sãmbg sẽn kae, a Davɩɩd sẽn yɩ pe-kɩɩma, n wa lebg rĩmã ra tara zo-rãmb hakɩɩka. Tõe tɩ y zoe n tagsda a Zonatã yelle. (1 Sãm. 18:1) La a Davɩɩd ra tara zo-rãmb a taaba. Wala makre, no-rɛɛs a Natã. Biiblã pa wilg b zoodã sẽn sɩng wakat ning ye. La a Davɩɩd wa n togsa a Natã a sũur gomde, wa ned buud fãa sẽn mi n togs a zoa a sũur gomdã. A Davɩɩd da rat n mee roog a Zeova yʋʋrã yĩnga. A Natã sẽn da yaa a Davɩɩd zoa, n da tar a Zeova vʋʋsem sõngã me wã, yaa vẽeneg t’a Davɩɩd kelg-a-la neere.—2 Sãm. 7:2, 3.

La bũmb n maane, tɩ b zoodã ra na n sãame. Rĩm a Davɩɩd yoo ne a Batseba. Rẽ poore, a kɩtame tɩ b kʋ a sɩd a Uuri. (2 Sãm. 11:2-21) Na maan yʋʋm wʋsgo, a Davɩɩd ra  sakda a Zeova ne a sũur fãa, n da maand sẽn yaa tɩrga. La a wa n yoome! Sɩnga wãn t’a Davɩɩd sẽn yaa rĩm-sõngã wa maan yel-wẽnd a woto? A ra pa mi t’a sẽn maanã yaa wẽng la? Bɩ a ra tẽedame t’a tõe n solga yellã t’a Zeova pa bãnge?

Bõe la a Natã na n maane? A na n basame tɩ ned a to tɩ togs rĩmã t’a sẽn maanã yaa wẽng bɩ? Neb a taab n da mi a Davɩɩd sẽn maan to-to tɩ b kʋ a Uuri wã. Woto wã, bõe t’a na n kẽes a toog yellã pʋgẽ, tɩ wa sãam yẽ ne a Davɩɩd zoodã sẽn kaoos hal wʋsgã? A sã n kẽes a toogo, pʋd n da tõe n tũu ne a yõor menga. Tẽeg-y t’a Davɩɩd ra kɩtame tɩ b kʋʋ a Uuri, t’a yaool n da pa beeg-a ye.

La a Natã ra yaa Wẽnnaam no-rɛɛsa. A Natã ra miime t’a sã n pa gome, yẽ ne a Davɩɩd zoodã pa na n le yɩ wa pĩndã, la t’a sũur-kasetã na n ningd-a-la taale. A zoa a Davɩɩd maana bũmb sẽn sãam a Zeova sũuri. Yaa tɩlɛ tɩ rĩmã paam sõngr sẽn na yɩl tɩ yẽ ne a Zeova zoodã le paam pãnga. A Davɩɩd ra rata zoa hakɩɩk sõngre. A Natã yɩɩ zo-kãng buudu. Sẽn na yɩl t’a goamã kẽ a Davɩɩd sẽn yɩ pe-kɩɩmã, a reng n dɩka makre. A Natã sẽn maan to-to n taas a Davɩɩd Wẽnnaam koɛɛgã kɩtame t’a bãng t’a sẽn maanã yaa wẽng wʋsgo, la kɩt t’a tek yam n kos sugri.—2 Sãm. 12:1-14.

Y zoa sã n wa tudgi, wall a maana yel-wẽnde, y manesem na n yɩɩ wãna? Tõe tɩ y na n tagsame tɩ y sã n yeel-a t’a sẽn maanã yaa wẽngã, na n sãama y zoodã. Tõe me tɩ y tags tɩ y sã n tɩ togs kãsem-dãmbã sẽn na yɩl tɩ b sõng-a, na n yɩɩ wa y zãmba y zoa wã. Woto wã, y maanda wãna?

A Giyani, saam-biig ning yell d sẽn gom sɩngrẽ wã yeelame: “Mam bãngame tɩ maam ne a Morisiyo pa le yaa wa pĩndã ye. A ra pa le pelgd a pʋg ne maam ye. Mam yãka yam n na n tɩ gom ne-a, baa sẽn da yaa toog wʋsgã. Mam da sokda m meng yaa: ‘Bõe la m na n yeel-a? A zoe n mii a sẽn segd n maanega. A sũur tõe n yika ne maam menga!’ La mam tẽega bũmb nins fãa tõnd sẽn zãms ne taabã, tɩ kõ-m daood tɩ m tɩ gom ne-a. Wakat n zĩnd t’a Morisiyo sõng ma-me woto. M da pa rat tɩ d zoodã sãam ye. M da rat n sõng-a lame, m sẽn dat a neerã yĩnga.”

Ad a Morisiyo sẽn yeele: “A Giyani ra rat n sɩd sõnga maam. A ra bee bʋʋm. Mam da miime tɩ m yam-yãkrã sẽn wa ne zu-loees ninsã pa yẽ yelle, pa a Zeova yell me. Woto wã, mam saka kãsem-dãmbã saglse, tɩ m tẽebã wa lebs n paam pãnga.”

A Davɩɩd ra tara zo-rãmb a taab sẽn kell n sõng-a a zu-loees sasa. Wala makre, a Husayi. Biiblã yeelame t’a yaa a “Davɩɩd zoa.” (2 Sãm. 16:16; 1 Kib. 27:33) Tõe t’a ra tʋmda na-yirã, n leb n da yaa rĩmã zoa, tɩ rĩmã mi n kɩt t’a tʋm tʋʋmd neb a taabã sẽn pa segd n bãnge.

A Davɩɩd biig a Absalom sẽn wa n deeg naamã ne pãngã, Israyɛll neb wʋsg n kẽ-a, la a Husayi pa maan woto ye. A Davɩɩd sẽn wa n zoetẽ wã, a Husayi tũ-a lame. A Davɩɩd sũur da sãama wʋsgo, bala yaa a meng biiga, n paas neb a sẽn da kɩs sɩd n zãmb-a. La a Husayi kell n maana sɩd ne a Davɩɩde, n sak meng n na n maan bũmb sẽn da tõe n tũ ne a yõore, sẽn na yɩl t’a Absalom magbã yɩ faoore. A Husayi pa maan woto a sẽn tʋmd na-yirã yĩng ye. Yaa a sẽn da yaa a Davɩɩd zoa hakɩɩkã yĩnga.—2 Sãm. 15:13-17, 32-37; 16:15–17:16.

Rũndã-rũndã, d sã n get d tẽed-n-taasã sẽn noom ne taab to-to wã, tɩ rẽ pa be ne tʋʋmd ning b sẽn tʋmd tigingã pʋgẽ wã, sɩd bee yamleoogo. D tẽed-n-taasã sẽn tar manesem ning ne tõndã, yaa wa b ned kam fãa yetame: “Mam sẽn yaa f zoa wã, pa sẽn yaa tɩlɛ yĩng ye. Yaa m sẽn nand-fã yĩnga.”

 Saam-biig yʋʋr sẽn boond t’a Federiko paama zood a woto buudu. A wa n tara zu-loe-kɛgemse, t’a zoa yʋʋr sẽn boond t’a Ãntoniyo teel-a. Ad a Federiko sẽn yeele: “A Ãntoniyo sẽn wa tõnd tigingã pʋgẽ wã, pa kaoos la tõnd yõg zood ye. Tõnd d yiibã fãa ra yaa kãsemb-sõngdba, n da naagd taab n tʋmdẽ, tɩ d sũur noome. Pa n yã n kaoos la a lebg kãsem soab ye. A ra yaa m zoa, la a kõt mak-sõng m sẽn tõe n tũ.” La a Federiko wa n maana sẽn pa segde. A baoo kãsem-dãmbã sõngr tao-tao. La a ra pa le yaa so-pakd la kãsemb-sõngd ye. Ãntoniyo manesem yɩɩ wãn ne-a?

A Federiko yeelame: “Mam da neeme tɩ m yellã namsda a Ãntoniyo. A maana a sẽn tõe fãa n na n keng m daoodo. A sõnga maam wʋsg sẽn na yɩl tɩ m tẽebã le paam pãnga, n pa tol n bas-m ye. A kenga m daood sẽn na yɩl tɩ m mao n paas m tẽebã pãnga, la m da koms raood ye.” Ad a Ãntoniyo me sẽn yeele: “Mam da wae n bee ne a Federiko. Ra yaa sẽn na yɩl tɩ sẽn yaa bũmb ning fãa la a rat n togs-m bɩ a togse, baa yaa a yellã sẽn namsd-a to-to wã.” A Federiko tẽebã le wa n paama pãnga, t’a wa lebg so-pakd la kãsemb-sõngd yɛsa. Ad a Ãntoniyo sẽn paase: “Baa tõnd sẽn pa le be tiging a ye wã, tõnd zoodã noom n yɩɩda pĩndã.”

Yãmb zoa sã n daag yãmb n bas wakat y sẽn dat a sõngr n tɩ yɩɩda, y manesem na n yɩɩ wãna? Bũmb sẽn zabd sũur wa woto sõor paooda. Y na n sak n kõ-a-la sugr bɩ? Y zoodã na n kell talla pãng wa pĩndã bɩ?

Tẽeg-y bũmb ning sẽn paam a Zeezi, a kũumã sẽn wa n ket rasem a wãnã. A ra wae n bee ne a tʋm-tʋmdbã sẽn kell n sak-a wã, tɩ b ra nong taab wʋsgo. A Zeezi sẽn bool-b t’a zo-rãmbã sɩd zemsame. (Zã 15:15) La b sẽn wa n yõk-a wã, a tʋm-tʋmdbã manesem yɩɩ wãna? B zoeeme. La a Pɩyɛɛr yaool n da yeelame tɩ yẽ kõn tol n bas a Zu-soabã ye.  Baasgo, daar-n-kãng yʋng bala, a kɩɩsame t’a pa mi a Zeezi ye.—Mat. 26:31-33, 56, 69-75.

A Zeezi ra miime t’a na n yɩ a ye a zu-loɛɛgã sasa. Rẽnd a ra tara bʋʋm n na n sãam a sũuri. La rasem a wãn a vʋʋgrã poore, a sẽn wa n sõsd ne a karen-biisã, a goamã pa wilg baa bilf t’a sũur sãama ne-ba, wall t’a maanda sũ-kẽk ye. A Zeezi pa tags tɩ yaa tɩlɛ t’a tẽeg a karen-biisã b sẽn maan bũmb ning a yõkrã sasa wã, pa rẽ bɩ n sõdg b kongr toor-toorã ye.

A pʋd n kenga a Pɩyɛɛr ne tʋm-tʋmdb a taabã raoodo. A maana bũmb tɩ wilgdẽ t’a kɩs-b-la sɩda. A kõ-b-la tʋʋmd yõod sẽn ka to: A yeel-b lame tɩ b moon koɛɛgã dũniyã tɛk fãa. A Zeezi ra ket n geta a karen-biisã wa a zo-rãmba. B pa tol n yĩm a sẽn wilg to-to t’a nong-b lame wã ye. B maana b sẽn tõe fãa sẽn na yɩl n da tol n le bas b Zu-soabã ye. Sɩd me, b tõog n tʋma tʋʋmd ning a Zeezi sẽn kõ neb nins fãa sẽn na n tũ yẽ wã.—Tʋʋ. 1:8; Kol. 1:23.

Saam-bi-poak yʋʋr sẽn boond t’a Ɛlvira ket n tẽra yẽ ne a zoa yʋʋr sẽn boond t’a Giwuliyana moor sẽn da yõsge. A Ɛlvira yeelame: “A yeela maam tɩ m sẽn maan bũmb ningã sãama a sũurã, tɩ nams maam wʋsgo. A ra tara bʋʋm n na n yik a sũuri. La mam mikame tɩ yaa mam mengã la m manesmã sẽn na n wa ne yɛl ninsã n da pak-a n tɩ yɩɩda. Woto linga maam wʋsgo. A pa ges mam sẽn maan-a wã ye. A ra bas n bʋʋda wẽng ning mam sẽn maan m mengã. M kõn tol n yĩm rẽ ye. M pʋʋsda a Zeova barka, m sẽn paam zoa sẽn dat mam neere, n yɩɩd a mengã.”

Woto wã, bõe la zoa hakɩɩk na n maane, yẽ ne a to zood sã n wa rat n sãame? A na n sak n tɩ gom ne-a sẽn na yɩl n maneg yellã. Baa sã n yaa tɩlɛ t’a togs-a sɩda, segd n yɩɩ ne bʋgsem. Zoa hakɩɩk segd n yɩɩ wa a Natã ne a Husayi sẽn kell n pa ne a Davɩɩd a zu-loees sasa wã, la wa a Zeezi sẽn sak n kõ a karen-biisã sugrã. Yãmb yaa zoa a woto buud bɩ?