A GAYUS yaa kiris-ned sẽn zĩnd pipi kiris-nebã wakate. Yʋʋmd 100 sẽn wa n kolgdẽ wã, yell a ye n da namsd yẽ ne kiris-neb a taaba. Neb n da zãmsd b tẽed-n-taasã yɛl sẽn pa sɩda, n da rat n koms b tẽebã la b wa ne welgre. (1 Zã 2:18, 19; 2 Zã 7) Rao a ye yʋʋr sẽn boond t’a Diyotɛrf n da saad n gomd tʋm-tʋmd a Zã ne neb a taab yell wẽnga. A ra pa rat n deeg kiris-neb nins sẽn gilgd n kaagd tigimsã sãando, la a rat t’a taabã me maan wa yẽ. (3 Zã 9, 10) A Zã sẽn wa n gʋlsd a Gayus lɛtrã tɩ yaa yel-kãngã n da be b tigingã pʋgẽ. Yaa lɛt-kãng la sẽn be Biiblã pʋgẽ tɩ b boondẽ t’a “A Zã taabẽ sebre.” A gʋls-a-la yʋʋmd 98 wã sẽnese.

Baa sẽn pa yɩ nana ne a Gayusã, a kell n tũu a Zeova ne a sũur fãa, n maan sɩd ne-a. Wãn to la a wilg t’a maanda sɩd ne a Zeova? Bõe yĩng tɩ yaa sõma tɩ d rɩk a togs-n-taare? Wãn to la a Zã sebrã tõe n sõng-d rẽ wɛɛngẽ?

Sẽn gʋls-a tãabẽ Zã wã boola a meng tɩ “kãsmã.” Rẽ bal seka a Gayus na bãng tɩ yaa tʋm-tʋmd a Zã, sẽn sõng-a yẽ t’a lebg kiris-nedã. A Zã boola a Gayus t’a ‘ba-bi-nongr a Gayus sẽn ya ned yẽ sẽn nonge.’ Rẽ poore, a yeelame tɩ yẽ kota Wẽnd t’a Gayus tall pãng la keelem wa a tẽebã sẽn tar pãngã. Sɩd yaa pẽgr tɛkẽ!—3 Zã 1, 2, 4.

Tõe t’a Gayus ra yaa kãsem-soab tigingã pʋgẽ. Lɛtrã pa wilgd rẽ vẽeneg ye. A Zã pẽga a Gayus a sẽn deegd saam-biis nins sẽn yaa sãambã, baa ne a sẽn pa mi-bã. A Zã nifẽ, woto wilgdame t’a Gayus maanda sɩd ne Wẽnnaam, bala hal pĩnd wẽndẽ, wẽn-sakdbã minim n maanda sãambã sãando.—Sɩng. 18:1-8; 1 Tɩm. 3:2; 3 Zã 5.

A Zã sẽn pẽg a Gayus a sẽn deegd saam-biisã sãandã wilgdame tɩ saam-biis n da mi n yit a Zã sẽn beẽ wã n kẽnd n kaagd tigimsã, tɩ b sã n lebg n wa bɩ b togsd a Zã yɛlã sẽn yaa to-to tigimsã pʋsẽ wã. Tõe tɩ yaa woto la a Zã ra paamd tigimsã kibaya.

Saam-biis nins sẽn gilgd n kaagd tigimsã sã n da paam n na n sig b tẽed-n-taasã nengẽ, rẽ n noom-b n yɩɩda. Zĩis n da be b sẽn da tõe n tɩ yao n gãande. La b ra pa get sãambã yell sõma beenẽ ye. Rẽ me, yaa zĩis sẽn pid ne yoaadba. Rẽnd sã n tõe, sãamb kẽer sigda b zo-rãmb nengẽ, tɩ saam-biis nins sẽn gilgd n kaagd tigimsã me sigd b tẽed-n-taas nengẽ.

A Zã ra ratame t’a Gayus leb n deeg neb  sãando. A yeel-a lame: “Fo sã n sõng-b so-toakã wɛɛngẽ, wa sẽn zems Wẽnnaam yam, na n yɩ neere.” A sẽn yeel t’a sõng-b so-toakã wɛɛngẽ wã rat n yeelame t’a ges tɩ b paam bũmb nins sẽn yaa tɩlɛ ne b so-toakã. Yaa vẽeneg t’a Gayus ra zoe n sõnga sãamb a taab woto. Bala, b sẽn leb a Zã nengẽ wã, b kɩsa a Gayus nonglmã la a tẽebã kaseto.—3 Zã 3, 6.

Tõe tɩ sãamb nins sẽn na n sig a Gayus nengẽ wã yaa misioneer-dãmba, neb a Zã sẽn tʋme, wall tigims sull yel-gɛtba. Sẽn yaa a soab fãa, yaa Rĩungã koe-noogã yĩng la b sẽn gilgdã. A Zã yeelame tɩ yaa “Zu-soabã yʋʋrã yĩng la b kẽng-yã.” (3 Zã 7) Vɛrse a 6 pʋgẽ, a Zã goma Wẽnnaam yelle. Rẽnd a sẽn yeel tɩ yaa ‘Zu-soabã yʋʋrã yĩngã,’ wõnda yaa a Zeova yell la a gomda. Woto wilgdame tɩ sãambã ra yaa kiris-neba, tɩ b tẽed-n-taasã ra segd n deeg-b sõma. Sɩd me, a Zã yeelame: “Tõnd tog n deega nin-bãmbã-rãmba, tɩ tõnd tõe n yɩ tʋmd-n-taas ne bãmba, sɩdã yĩnga.”—3 Zã 8.

A Zã sẽn gʋls lɛtrã n tool a Gayusã, pa sẽn na n pʋʋs-a bark bal ye. A ra ratame me n sõng-a t’a bãng a sẽn na n maaneg ne yell a ye. Tigingã ned a ye yʋʋr sẽn boond t’a Diyotɛrf n wa n yik n pa rat n sak n deeg saam-biis nins sẽn gilgd n kaagd tigimsã ye. A ra baoodame meng n na n gɩdg neb a taabã tɩ b ra reeg-b ye.—3 Zã 9, 10.

Baa a Diyotɛrf ra rat n deeg saam-biisã sãand me, yaa vẽeneg tɩ kiris-ned sẽn maand sɩd ne a Zeova pa na n sak n sig a nengẽ ye. A Diyotɛrf ra yaa ned sẽn nong n yɩ taoor soab tigingã pʋgẽ. A Zã sã n taas tigingã neb koɛɛga, a Diyotɛrf ra sãbsda a goamã. A ra gilgdame me n gomd a Zã ne neb a taab yell wẽnga. Yaa sɩd tɩ tʋm-tʋmd a Zã pa yeel t’a Diyotɛrf yaa zirẽ-n-be-karen-saamb ye. La a Diyotɛrf ra pa sakd zu-sobend ning a Zã sẽn da tarã ye. A sẽn da baood yʋʋr la a tar manesem kiris-ned sẽn pa segd n tallã kɩtame tɩ b pa mi a sã n da ket n maanda sɩd ne Wẽnnaam ye. A Diyotɛrf kibarã sõngdame tɩ d bãng tɩ tiging ning pʋgẽ, ned tõe n wa yik n baooda yʋʋr la a gomd n paoogd a taabã, n dat n wa ne welgre. A Zã kõo a Gayus saglg tõnd me sẽn segd n tũ. A yeelame: “Da maan togs-n-taar ne sẽn yaa wẽng ye.”—3 Zã 11.

A Zã lɛtrã pʋgẽ, a goma kiris-ned a to yelle. A yʋʋr la Demetiryus. Yẽ ra pa wa a Diyotɛrf ye. A kõo mak-sõngo. Sɩd me, a Zã yeelame: ‘Neba fãa . . . kɩta a Demetiryus kaset sõngo. Tõnd me kɩta yẽnda kaset sõngo, la fo miime tɩ tõnd kaset yaa sɩda.’ (3 Zã 12) Tõe t’a Demetiryus ra rata a Gayus sõngre, t’a Zã kell n bẽd ne lɛtrã n na n gom a yelle, sẽn na yɩl tɩ b reeg-a neere. Tõe tɩ yaa a Demetiryus meng n zã lɛtrã n tɩ kɩs a Gayus. A Demetiryus sẽn yaa ned a Zã sẽn tʋme, tɩ tõe me t’a ra yaa tigims sull yel-gɛtã, a ra tõe n kõo vẽenem n paas a Zã lɛtrã zugu.

A Gayus ra zoe n maanda sãambã sãando. Woto wã, bõe yĩng t’a Zã sagl-a t’a ket n maand sãambã sãando? A ra getame tɩ rẽnda a Gayus paam raood n paas sẽn na yɩl n ket n maand woto bɩ? Tʋm-tʋmdã ra yɛɛsda a Diyotɛrf sẽn da baood n na n yiis sẽn deegd-b sãambã tigingã pʋgẽ wã na n wa kɩt t’a Gayus maand sãmbs ne sãambã reegr bɩ? Sẽn yaa a soab fãa, a Zã wilga a Gayus t’a sẽn maandã yaa neere. A yeel-a lame yaa: “Ned ning sẽn maanda neer yaa Wẽnnaam neda.” (3 Zã 11) Woto yaa bũmb sẽn kɩt tɩ d segd n maand neere, la d kell n wɩng ne neer maanego.

La rẽ yĩnga, a Zã lɛtrã sõnga a Gayus t’a wɩng ne sãambã reegr bɩ? A Zã tãabẽ sebrã bee Biiblã pʋgẽ hal ne rũndã, tɩ d sã n karem a goamã bɩ tõe n sõng-d tɩ d “maan togs-n- taar ne sẽn yaa neere.” Dẽnd d tõe n yeelame tɩ sõnga a Gayus me t’a kell n wɩng ne sãambã reegre.

Yaa bũmb nins Biiblã sẽn togs a Gayus zugã tɛk la woto. La baa ne rẽ, d tõe n dɩka yam wʋsg a kibarã pʋgẽ.

Pipi, tõnd sʋkã neb kẽer sẽn paam n bãng a Zeova wã, tũu ne neb sẽn sak n tog sor n na n tɩ taas koe-noogã. Yaa sɩd tɩ rũndã-rũndã, kiris-neb wʋsg pa togd sor n zãag zĩig koɛɛgã mooneg yĩng ye. La d tõe n dɩka a Gayus togs-n-taare, n sõngd d tẽed-n-taas nins sẽn gilgd Wẽnnaam tʋʋmdã yĩngã, la d kengd b raoodo. Wala makre, tigims sull yel-gɛtbã ne b pagbã. D tõeeme me n teel d tẽed-n-taas nins sẽn yik n kẽng zĩig a to, wall sẽn pʋd n kẽng tẽn-taag sẽn na yɩl n sõng zĩis nins koe-moondbã sẽn pa waoogã. Bɩ d fãa ‘mao n maand sãambã sãando.’—Rom. 12:13; 1 Tɩm. 5:9, 10.

Yiib-n-soaba, tigingã ned sã n wa yik n pa rat n sak taoor dãmbã zu-sobendo, baa a buud sẽn pa wae wã, pa segd n ling-d ye. Pa nebã fãa n sak tʋm-tʋmd a Zã zu-sobendã ye. A Poll me nengẽ yɩɩ woto. (2 Kor. 10:7-12; 12:11-13) D tigingã neb kẽer sã n wa maand a buudu, d manesem segd n yɩɩ wãna? A Poll sagla a Tɩmote rẽ wɛɛngẽ. A yeel-a lame yaa: “Wẽnnaam tʋmtʋmd yaool n ka tog ne zab ye, a tog n tara nonglem nebã fãa yĩnga. . . . A tog n demsa no-koɛɛm-wẽedbã ne sũ-bʋgsem.” Neb sẽn nong yẽgeng sã n baood goam ne-d tɩ d kell n maan sũ-bʋgsem, tõe n kɩtame tɩ bilf-bilf bɩ b wa toeem yam. Tõe me t’a Zeova “na n kɩtame tɩ b paam sũ-lebgre, n tõog n bãng sɩdã.”—2 Tɩm. 2:24, 25.

Tãab-n-soaba, d segd n wilgame tɩ d sũur nooma ne d tẽed-n-taas nins sẽn ket n maand sɩd ne a Zeova baa b sẽn namsd-b tũudmã yĩngã. Segdame me tɩ d pẽgd-b rẽ yĩnga. Tʋm-tʋmd a Zã kenga a Gayus pɛlga, n wilg-a t’a maanda sẽn yaa neere. Rũndã-rũndã me, kãsem-dãmbã segd n dɩka a Zã togs-n-taare, n kengd b tẽed-n-taasã raood sẽn na yɩl tɩ b ra yɛ ye.—Eza. 40:31; 1 Tes. 5:11.

Yaa ne gɛrk la a Zã gʋls lɛtr ning a sẽn tool a Gayusã. D sã n sõd lɛtrã gom-biisã, yaa gom-biis 219 bala. Biiblã sɛb fãa sʋka, seb-kãng n yaa koɛɛg n yɩɩda. La baa rũndã, a ket n nafda kiris-nebã hal wʋsgo.