PIPI kiris-nebã modga wa b sẽn tõe tɛka, tɩ Wẽnnaam Rĩungã koe-noogã ta neb wʋsgo. (Mat. 24:14) Kẽer meng kẽnga tẽn-zẽms n tɩ moon koɛɛgã. Wala makre, tʋm-tʋmd a Poll sẽn wa n gilgd n moond koɛɛgã, a kẽnga zĩig ning b sẽn boond rũndã-rũndã tɩ Tirki wã, n moon zĩig fãa la bala. * Na maan yʋʋm 2000 rẽ poore, Tirki nebã le paamame tɩ b gilg n moon koɛɛgã tẽngã gilli. Yɩɩ yʋʋmd 2014. Ãnd dãmb n sigl tʋʋm-kãnga, la bõe yĩnga?

Tirki koe-moondbã sõor zemsa 2800 la zaka, tɩ nin-buiidã sõor yaool n ta milyõ 79. Rẽnd d sã n na n mage, koe-moond fãa segd n moona hal sẽn dat n ta neb 28000. Yaa vẽeneg tɩ yaa neb bilf bal la koe-moondbã tõog n taas koɛɛgã. A Zeova Kaset rãmbã sẽn naag taab n na n moon koɛɛgã Tirki tẽngã gill yʋʋmd 2014, yaa sẽn na yɩl tɩ koɛɛgã ta neb wʋsg rasem a wãn pʋgẽ bala. Na maan koe-moondb 550 sẽn gomd Tirki buud-gomdã n yi tẽn-zẽms n wa sõng b tẽed-n-taasã n moone. B sẽn naag taab woto wã, bõe la b tõog n maane?

B tõog n moona zĩig fãa la bala. Istãnbull tiging a ye koe-moondb yeelame: “Nebã sẽn yã tõndã, b sokame yaa: ‘Yãmb tara tigis-kãseng ka la? D yãta a Zeova Kaset rãmbã zĩig fãa!’” Ad Izmiir tiging a ye koe-moondb me sẽn yeele: “Rao a ye sẽn tʋmd tagsi gaarẽ pẽnega kãsem-soaba, n sok-a yaa: ‘Bõe n be ka? Yãmb paasa y tʋʋmdã n yɩɩd pĩndã la?’” Hakɩɩka, nebã ra nee koɛɛgã sẽn moond zĩig fãa wã!

Sẽn yi-b tẽn-zẽms n wa wã me sũur yɩ noog wʋsg ne koe-moonegã. A Ɛstefɛn sẽn yit Danemarkã yeelame: “Daar fãa, m da paamd n sõsda ne neb sẽn zɩ n wʋm tɩ b gom a Zeova yelle. M da neeme tɩ m sɩd sõngdame tɩ nebã bãngd a Zeova yʋʋrã.” Ad a Zãndavɩɩd sẽn yit Fãrensã sẽn yeele: “Daar a ye, tõnd moona siimɛtr a ye zags n maan lɛɛr-dãmba. Yɩɩ sõma wʋsgo! Neb wʋsg ra pa mi a Zeova Kaset rãmbã ye. Zãgsã fãa la bal pʋgẽ, d tõog n sõsa ne nebã, n wilg-b video la d kõ-b sɛba.”

Koe-moondb 550 wã basa sẽn kolg sɛb 60000  semen a yiib pʋgẽ bala! Koe-moonegã b sẽn sigl woto wã sɩd sõngame tɩ koɛɛgã ta zĩig zãnga.

Koe-moondbã yẽesem paasame. Tirki koe-moondbã sẽn naag n moonã, paasa b yẽesmã. Wʋsg sɩngame n sokd b mens b sã n pa tõe n yɩ so-pakdba. Sɩd me, yʋʋmd poore, Tirki koe-moondb 82 n lebg so-pakdba.

Sẽn yi-b tẽn-zẽms n wa wã kẽer wilgame tɩ b sẽn tɩ moon koɛɛgã Tirki wã nafa bãmba, baa b sẽn wa n leb b ba-yirã. Saam-bi-poak a Sirinn sẽn yit Alemayn wã yeelame: “D tẽed-n-taasã sẽn be Tirki wã minim n moonda koɛɛgã segb buud fãa b sẽn paame. Yaa nana ne-ba. Mam sã n paam segb n tõe n taas koɛɛgã, yãndã yĩnga, yaa toogo. La m sẽn kẽng n tɩ moon Tirki wã, beenẽ koe-moondbã mak-sõngã, n paas m sẽn pʋʋs a Zeova naoor ka tɛkã, sõng-m lame tɩ m tõe n maan m sẽn da pa tõe n maanã. M tõogame meng n moon koɛɛgã metro wã pʋgẽ la m kõ seb-vãado. M pa le zoet yãnd wa pĩndã ye.”

A Zoanɛɛs me sẽn yit Alemayn wã yeelame: “M dɩka yam Tirki koe-moondbã nengẽ, tɩ sõngd-m koe-moonegã pʋgẽ. B maanda b sẽn tõe fãa tɩ koe-noogã tat neb wʋsgo. B taasda koɛɛgã segb buud fãa b sẽn paame. M sẽn leb Alemayn wã, m yãka yam n maand wa bãmba. Masã m tõogd n taasda neb wʋsg koɛɛgã, n yɩɩd pĩndã.”

Ad a Zenɛp sẽn yit Fãrensã sẽn yeele: “M sẽn tɩ moon Tirki wã, sõng-m lame tɩ m maneg m koe-moonegã hal sõma. M raoodã paasame, m teega a Zeova n yɩɩd pĩndã.”

Koe-moondbã yõga zood ne taaba. Nebã pa na n tol n yĩm nonglem la zems-n-taar ning sẽn da be d tẽed-n-taasã sʋka, baa ne b sẽn da yit tẽns toor-toorã. A Zãndavɩɩd yeelame: “D sɩd yãame tɩ d tẽed-n-taasã nonga sãambã. B reega tõnd wa b zo-rãmb la b zak neba. B sak n deega tõnd b zagsẽ wã. M da zoe n miime tɩ dũniyã gill zugu, a Zeova Kaset rãmbã yaa wa zak a ye neba. M karma rẽ naoor wʋsg tõnd sɛbã pʋgẽ. La masã wã, m yãa rẽ ne m nifu. M sũurã maneg n yaa noog m sẽn paam  n yaa a Zeova Kaset soabã, tɩ m pʋʋsd-a bark wʋsgo. Bala, yaa zu-zẽkr menga.”

A Klɛɛr sẽn yit Fãrensã yeelame: “D yita Danemark tɩ yaa Fãrense, pa rẽ bɩ Alemayn wall Tirki, d fãa ra yaa wa zak a ye neba. Yaa wa a Zeova kɩtame tɩ toadg pa le be tẽnsã sʋka, tɩ lebg tẽn-yɛnga.”

A Ɛstefani me yita Fãrense. A yeelame: “Koɛɛgã mooneg Tirki wã kɩtame tɩ d bãng tɩ yaa d fãa sẽn nong a Zeova wã n kɩt tɩ d zemsd taabã. Pa buud-gomd wall buud minimd ye.”

Sẽn yi-b tẽn-zẽms n wa sõngã wʋsg ra sɩngame n sokd b mens b sã n pa tõe n tolg n yik n tɩ zĩnd Tirki n sõng ne tʋʋmdã sẽn ket n yaa wʋsgã. Neb a wãn meng n zoe n yik n tɩ be be. Tirki saam-biisã sũur nooma wʋsg ne b sẽn paamd sõngr woto wã.

Wala makre, na maan yʋʋm wʋsgo, kãsem-soab a ye bal n da get tẽn-bil a ye koe-moondb sull yelle. B ra yaa neb 25. Yʋʋmd 2015 wã, Alemayn la Peyiba koe-moondb a yoob n wa n na n sõng-ba. Mams-y n ges-y sullã koe-moondb sũy sẽn yɩ noog to-to!

Bõe la d tẽed-n-taas nins sẽn yi tẽn-zẽms n tɩ sõngd Tirki koe-moondbã yeel-yã? Yaa sɩd tɩ wakat ninga, b vɩɩmã pa nana ye. La b paamda bark wʋsgo. Ad kẽer sẽn yeele:

A Federiko. A yita Ɛspayn, n tar yʋʋm 41. Yẽ ne a pagã yik n tɩ be Tirki. A yeelame: “M sẽn pa tar teed wʋsgã kɩtame tɩ m tar vɩʋʋgo, tɩ yaa bũmb nins sẽn tar yõod n yɩɩdã n pak-ma.” B sok-a-la a sã n sagenda neb a taabã me tɩ b maan wa yẽ, t’a leoke: “N-ye! F sã n yik n kẽng tẽn-zẽnga, tɩ sẽn pak-f yaa f sõng nebã tɩ b bãng a Zeova, yaa wa f rɩka f bũmb fãa n ning a nugẽ. F maneg n nee vẽeneg t’a geta f yelle.”

A Rudi. Yaa yi-kãad sẽn tar yʋʋm 57. A yita Peyiba. Ad a sẽn yeele: “D sẽn tɩ moond koɛɛgã zĩig tʋʋmã sẽn yaa wʋsgo, n sõngd neb sẽn zɩ n wʋm koe-noogã, kõta tõnd sũ-noog hal wʋsgo. Nebã sã n  bãng a Zeova, n sak n na n tũ-a, b sũ-noogã kɩtdame tɩ fo me sũur yaa noog wʋsgo.”

A Sasa. Yẽ me yaa yi-kãada, n tar yʋʋm 42. A yita Alemayn. A yeelame: “M sã n yi koɛɛgã mooneg fãa, m segda neb sẽn zɩ n wʋm koe-noogã. M sẽn mi tɩ yaa segb nin-kãensã sẽn paam n na n bãng a Zeova wã, m sũ-noogã pa tõe n bãng n bilg ye.”

A Atsuko. Yaa saam-bi-poak sẽn kẽ kãadem, n tar yʋʋm 36. A yita Zapõ. A yeelame: “Pĩndã, m da ratame tɩ Armagedõ ta tao-tao. La m sẽn yik n tɩ moond koɛɛgã Tirki wã tɛka, m pʋʋsda a Zeova bark a sẽn ket n maand sũ-marã. M sã n ne a Zeova sẽn get koɛɛgã mooneg yell dũniyã gill zug to-to wã, m maneg n nong-a lame, n dat ne m sũur fãa n paas d zoodã.”

A Alisa. Yaa Risi saam-bi-pok sẽn tar yʋʋm 31. A yeelame: “M sẽn tɩ sõngd ne koɛɛgã mooneg tẽn-zẽngã kɩtame tɩ m bãng vẽeneg t’a Zeova sɩd yaa sõma.” (Yɩɩn. 34:9) Ad a sẽn paase: “A Zeova pa le yaa m Ba bal ye. A yaa m zoa meng-meng me. M yãa rẽ vẽeneg yɛl buud toor-toor pʋgẽ. M paam n maana bõn-sõma ka tɛk sẽn kõt-m sũ-noogo. A Zeova ning-m-la bark me hal tɩ seke.”

Koe-moondbã sẽn naag taab n moon Tirki soolmẽ wã yʋʋmd 2014, sõngame tɩ neb wʋsg paam n wʋm koe-noogã. La zĩis koe-noogã sẽn nan pa ta ket n waoogame. Daar fãa, d tẽed-n-taas nins sẽn tɩ sõngd ne koe-moonegã Tirki wã paamd n sõsda ne neb sẽn zɩ n wʋm tɩ b gom a Zeova yelle. Y pa rat n kẽng zĩig a woto buud n tɩ moon koɛɛgã sɩda? Bɩ y “zẽk y nens n ges pʋtã sẽn pelg n dat tigsgã.” (Zã 4:35) Rẽ yĩnga, y pa tõe n tɩ sõng zĩig ‘pʋtã sẽn pelg n dat tigsgu’? Bɩ y mag n ges y sẽn na n maan to-to n wa tõoge, la y sɩng seglgo. Y tõe n kɩsa sɩd tɩ y sã n modg koɛɛgã mooneg pʋgẽ n paase, sẽn na yɩl tɩ koe-noogã “ta dũniyã tɛk fãa,” bark nins y sẽn na n paamã pa tõe n bãng n bilg ye.—Tʋʋ. 1:8.