SEBRÃ GOM-ZUG SÕSGÃ | YÃMB MII SẼN BE SAASẼ BƖ?
Sẽn be saasẽ wã wɛɛngẽ, no-koɛɛmã waooga
Yãmb mi n soka y meng saasẽ sẽn yaa to-to, la y rat n bãng sẽn be-b beenẽ wã bɩ? Sã n yaa woto, bɩ y bãng tɩ y pa y yembr ye. Na maan yʋʋm tusa, nebã sẽn yet rẽ zugã waoogame, leb n kɩɩsda taaba. Neb kẽer tẽedame tɩ d yaab-rãmbã sẽn maan kaalmã bee be, tɩ d segd n waoog-ba. Sãnda tẽedame tɩ yaa nuura la bãan zĩiga, la tɩ yaa malɛgsã la nin-sõma nins sẽn maan kaalmã n vɩ be. La kẽer me yetame tɩ yaa wẽnnaam-dãmb ka tɛk zĩiga.
Neb wʋsg me yetame tɩ d pa tõe n bãng sẽn be saasẽ, bala ned zɩ n kẽng be n lebg n wa n togs a sẽn yã ye. La sẽn yet-b woto wã ka bʋʋm ye. A Zeezi Kirist zĩnda saasẽ n yaool n na n wa tẽngã zugu. A yeela a wakatẽ tũudmã taoor dãmb woto: “M yii Wẽnnaam nengẽ n wa. Mam ka wa m toor ye, la yaa bãmb n tʋm maam.” Daar a to me, a yeela a tʋm-tʋmdbã bũmb sẽn wilgd t’a mii sẽn be saasẽ. Ad a sẽn yeele: “Rot wʋsg be m ba wã yiri.”—Zã 8:42; 14:2.
D miime t’a Zeezi Ba wã la Wẽnnaam, la t’a yʋʋrã la a Zeova. A yirã bee saasẽ. (Yɩɩn-sõamyã 83:19) Rẽnd ned kae n tõe n bilg bũmb nins sẽn be saasẽ wã sõma n ta Wẽnnaam a Zeova la a Zeezi ye. Pĩnd wẽndẽ, a Zeova ne a Zeezi vẽnega wẽn-sakdb tɩ b yã bũmb kẽer sẽn be saasẽ. Yɩɩ bõn-makr pʋgẽ la b yã bõn-kãense.
Sõsg ning sẽn pʋgdã pʋgẽ, d na n goma bõn-makr a wãn yelle. La d tẽeg tɩ sẽn be saasẽ wã pa wa sẽn be tẽng zugã ye. Sẽn be saasẽ wã pa tõe n yã ne nifu, pa tõe n sɩɩse. Wẽnnaam rɩka makr ne bũmb toor-toor ninsaalbã sẽn mi bɩ b sẽn tõe n mams b yamẽ, n bilg sẽn be saasẽ wã, sẽn na yɩl tɩ b tõog n wʋme. Bõn-makr kãensã na n sõng-y lame tɩ y bãng sẽn be-b saasẽ wã.
