Tõnd zakã rãmb ra vɩɩ Fãrens tẽn-bil a ye sẽn boond tɩ Telãnkuure. Mam ba wã ra yaa Fãrens neda, la m ma ra yita Itali. Mam sẽn wa n tar yʋʋm a nii, tõnd yikame n kẽng Itali. D ra tɩ vɩɩ Rom sak a ye nebã nus sẽn pa zãade. Tõnd zakã rãmb vɩɩm lebga toogo. Ligdã zu-loees mi n kɩtame tɩ mam doagdbã zabd taaba.

Mam sẽn wa n tar yʋʋm 15, m ma yeela maam tɩ m mi n yi n bao zo-rãmba. Woto kɩtame tɩ m da mi n yi n kaoos n yaool n lebg n wa zakẽ. Pa yã n kaoos la m paam tũud-n-ta-wẽns ye. Daar a ye, rao n kolg maam n sõs noog-noog wa a rata m neere. La a kõo maam dorge. Mam sẽn da pa rat t’a tags tɩ m yaa biigã yĩnga, m sak n deegame. Tao-tao bala, mam lebga dorgã yamba, tɩ dorg yũudbã yaool n yaa neb sẽn tʋmd tʋʋm-dẽgdo. Rap n yõg maam naoor wʋsgo. Wakat kãnga, m da getame tɩ vɩɩmã pa tar yõod ye. M yamã ra yii vɩɩmã. M da tagsdame tɩ ned kae n nong maam ye. M sẽn wa n tar yʋʋm 16, m makame n na n kʋ m menga. M yũu wiski butelle, la m yɩk n lʋɩ baraas pʋgẽ. B yiis-m lame tɩ m pa ki ye. La m sobgame n kaoos rasem a tã.

Rẽ poore, m yam le kẽe vɩɩmã. La m lebga nen-kɛglem soaba, la pʋ-lik soaba. M da belgda nebã tɩ m na n sak n kẽe ne-ba, la d sã n ta b zakẽ wã, m kõt-b-la dorg tɩ b gũsi, tɩ m zu b te-sõma wã. Bi-bees sula me n da kɩtd tɩ m sõngd-b n koosd dorg Itali soolmã fãa pʋgẽ. M da wae n paamda zu-loees ne polɩɩs-rãmbã. Mam vɩɩmã ra tara sãoong bala, tɩ m pa tar m sẽn maandg ye. La m da kɩsa sɩd tɩ Wẽnnaam sẽn naan maamã pa zaalem yĩng ye. M pʋʋsa Wẽnnaam n kos t’a sõng-m tɩ baa yaa yʋʋm-yɛng pʋgẽ bɩ m paam laafɩ la sũ-noogo.

Mam sẽn wa n tar yʋʋm 24, m yãka yam n na n tɩ vɩɩmd Ãngeletɛɛre, dorg koaasdb a taab sẽn da baood maam n na n kʋ yĩnga. La nand tɩ m looge, m kẽnga m ma nengẽ n na n tɩ ges-a. M sẽn ta wã, m yãa rao m sẽn da mi tɩ yaa bi-bɛɛg sẽn zãad Biibl n sõsd ne m ma. Raoã yʋʋr la a Annunziato Lugarà. * Mam sẽn yã-a wã, m yɛɛsame, n sok-a a sẽn baood bũmb  ning tõnd zakẽ wã. A sõsa ne maam n wilg a sẽn toeem to-to n tõog n lebg a Zeova Kaset soabã. Rẽ poore, a yeela maam tɩ m pʋlem tɩ m sã n ta Ãngeletɛɛre, m na n bao a Zeova Kaset rãmbã zĩiga. M yeel-a lame tɩ m na n maana woto. La m sẽn ta Ãngeletɛɛrã, pa kaoos la m le sɩng m tʋʋm-yoodã ye.

Daar a ye, mam da kẽnda Lõndre, n wa yã a Zeova Kaset soab sẽn kãabd nebã Gũusg Gasgã ne Réveillez-vous ! wã sor noore. M tẽega m sẽn pʋlem a Annunziato bũmb ningã, tɩ kɩt tɩ m kos-a t’a zãms-m Biiblã.

Bũmb ning mam sẽn bãng Biiblã pʋgẽ wã yɩ-m-la noog wʋsgo. Wala makre, 1 Zã 1:9 goamã kenga m raoodo. Be, b yeela woto: “Tõnd sã n vẽneg n togs Wẽnnaam d yel-wẽnã, bãmb yaa sɩd soaba la tɩrga tɩ kõ tõnd sugr d yel-wẽnã yĩnga, la b pek tõnd n yiis d tʋʋm-wẽnsã fãa.” Gom-kãensã sɩd kẽe maama, bala m sẽn da vɩ to-to wã kɩtame tɩ m getẽ tɩ m yaa dẽgdo. Pa yã n kaoos la m sɩng tigissã kẽnd a Zeova Kaset rãmbã Rĩung roogẽ ye. B reega maam sõma. Mam yãame tɩ b sɩd nonga taaba, n zemsd taab wa zag-yɛng neba. Mam sẽn sɩng n baood neb sẽn nong taab woto wã yĩnga, m yãka yam n na n lebg b tigingã neda.

Tʋʋm-dẽgdã la dorgã basg pa yɩ toog ne-m ye. La yɩl n tõog n toeem m zʋgdã yɩɩ toog wʋsgo. M bãngame tɩ m pa waoogd nebã la m nand-b wa sẽn segdã ye. Hal baa rũndã menga, m ket n maoodame n dat n bas zʋg-wẽns kẽere. La a Zeova sõnga maam tɩ m toeem wʋsgo. Mam sẽn sɩng Biiblã zãmsgã kiis a yoob poore, m deega lisg n lebg a Zeova Kaset soaba. Yɩɩ yʋʋmd 1997.

M lisgã reegr poore, m kẽe kãadem ne pag yʋʋr sẽn boond t’a Barbara. Wakat kãng tɩ yẽ me sẽn lebg a Zeova Kaset soabã pa kaoos ye. Mam zoa a ye n yã mam sẽn toeem to-to wã, n sɩng Biiblã zãmsgo. A wa n lebga a Zeova Kaset soaba, t’a tão a ye me rɩk a naoore. Mam yaab-poak a ye me sẽn da tar yʋʋm 80 n sɩng Biiblã zãmsgo, n wa reeg lisgu. La a maana kaalem masã.

Rũndã-rũndã, m yaa kãsem-soab tõnd tigingã pʋgẽ. Maam ne m pagã yaa wakat fãa so-pakdba, n moond koɛɛgã italiyẽ-rãmb nins sẽn vɩ Lõndrã. Wakat ninga, m mi n tẽegda m vɩɩmã sẽn da yaa to-to pĩndã tɩ m sũurã sãamdẽ. La a Barbara sõngd-m-la wʋsg zĩ-kãng wɛɛngẽ. Mam sɩng n baooda zak sẽn tar bãane, la ba sẽn nong maam. Masã, m paama rẽ fãa. M da pʋʋsa Wẽnnaam n kos t’a sõng-m tɩ baa yaa yʋʋm-yɛng pʋgẽ bɩ m paam laafɩ la sũ-noogo. La m paama sẽn yɩɩd rẽ.