Bõe yĩng tɩ d nong rasem a tãab tigis-kãsemsã wʋsgo? Wa sẽn da yaa to-to Israyɛll nebã wakatẽ wã, tigis-kãsemsã yaa segb d sẽn paamde, n naagd d tẽed-n-taas bãmb kobs n waoogd a Zeova. Wakat ning menga, yaa d tẽed-n-taas bãmb tusa. Tigis-kãsemsã sasa, d kelgda sõss sẽn kengd d tẽebã hal sõma. D sẽn paamd n be ne d zakã rãmba, la d paamd n sõsd ne d tẽed-n-taasã sẽn yaa d zo-rãmbã me noom-d la wʋsgo. D sẽn nong tigis-kãsemsã yĩnga, d maanda d sẽn tõe fãa, n kẽng rasem a tãabã fãa.

D sã n mi n tigim taaba, d pa tagsd neb a taabã sẽn tõe n maan bũmb nins n kõ-dã yell bal ye. D tagsda d sẽn tõe n maan to-to n wilg-b tɩ d nong-b lame. (Gal. 6:10; Ebre. 10:24, 25) D sã n pak rignoorã tɩ d to kẽ bɩ a yi, wall d sã n pa yãmb goeels zaalem, wilgdame tɩ d baooda d taabã me nafre. (Fili. 2:3, 4) Rasem a tãab tigis-kãsemsã yaa segb me d sẽn paamde, n yõgd zood ne d tẽed-n-taas d sẽn da pa mi. Nand tɩ tigissã sɩnge, tigissã poor me, la vʋʋsgã sasa, d tõe n baoo weer n sõs ne ned d sẽn da pa mi. (2 Kor. 6:13) D sẽn na n sɩng zood ning segb a woto sasa wã tõe n kaoosa wakat sẽn kõn sa! La sẽn yɩɩd fãa, nebã sã n yã d sẽn nong taab ne nonglem hakɩɩkã, tõe n kɩtame tɩ b wa naag tõnd n tũ a Zeova.—Zã 13:35.

GES-Y VIDEO WÃ: “NONGLEM PA SAT A BADA: TIGS-KÃSEMS SẼN TIGIM TẼNS TOOR-TOOR NEBÃ. RẼ POOR BI Y LEOK SOGSGÃ:

• Yʋʋmd 2019 tigs-kãsems nins sẽn tigim tẽns toor-toor nebã sasa, sẽn yi-b tẽn-taas n wa wã paamame tɩ b maan bõe n wilg-b tɩ b nong-b lame?

• Zems-n-taar la nonglem ning sẽn be a Zeova nin-buiidã sʋkã ka to ye. Yaa bõe yĩnga?

• Siglgã taoor lʋɩtb Sull nebã goma bũmb kẽer kiris-nebã sẽn maande, n wilgd taab b nonglem. Togs-y sẽn yaa bũmb ninsi.

• Bõe la a Zeova Kaset rãmbã maan Alemayn la Kooredisiidi, tɩ wilgd vẽeneg tɩ b sɩd nonga taaba?

• Bõe la d segd n dat ne d sũur fãa n maane?