Zeremi sebre 43:1-13
43 A Zeremi sẽn wa n togs nin-buiidã gom-kãensã fãa b Wẽnnaam a Zeova sẽn togs-a wã n sa n pa kell bũmbã, rat n yeel tɩ goam nins fãa b Wẽnnaam a Zeova sẽn tʋm-a t’a tɩ togs-bã,
2 a Osaya biig a Azariya, a Kareya biig a Zohanan+ ne rap nins fãa sẽn yaa wuk-m-mens rãmbã yeela a Zeremi yaa: “Fo sẽn yet bũmb ningã yaa ziri! Tõnd Wẽnnaam a Zeova pa tʋm foo tɩ f yeel yaa: ‘Ra kẽng-y Ezɩpt n tɩ zĩnd be ye.’
3 La yaa a Neriya biig a Baruk+ n tõgd foo tɩ f gomd woto, sẽn na yɩl n ning tõnd Kalde nebã nusẽ tɩ b kʋ tõndo, wall b tall-d n kẽng yembd Babilonne.”+
4 Dẽ, a Kareya biig a Zohanan ne tãb-biisã nanambs la nin-buiidã fãa kɩɩsa a Zeova koɛɛgã, n pa kell n pa Zida soolmẽ wã ye.
5 La a Kareya biig a Zohanan ne tãb-biisã nanambs peega Zida neb nins sẽn ketã, neb nins sẽn da yi buud toɛy-toɛyã fãa pʋsẽ b sẽn da sãeegã, n lebg n wa n na n zĩnd Zida soolmẽ wã.+
6 B peega rapã, pagbã, kambã, rĩmã kom-pugli wã, ne neb nins fãa* gũudbã naab a Nebuzaradan+ sẽn da bas ne a Safan+ biig a Ahikam+ biig a Gedaliya+ wã, n paas no-rɛɛs a Zeremi ne a Neriya biig a Baruki.
7 B sẽn pa sak a Zeova koɛɛgã yĩnga, b kẽnga Ezɩpt soolmẽ wã, hal n tãag Tapanɛɛse.+
8 A Zeova goma ne a Zeremi Tapanɛɛs n yeele:
9 “Wʋk kug-bɛd n kẽng a Farawõ zakã sẽn be Tapanɛɛsã rignoorẽ, n tɩ solg-b zĩig ning b sẽn gãneg ne tãn-koɛɛmã tẽngre, la f lud-b ne tãn-maasa. Maan dẽ Zʋɩf-rãmbã nifẽ.
10 Rẽ poor bɩ f yeel-ba: ‘Ad Israyɛll Wẽnnaam a Zeova sẽn yaa tãb-biis naabã sẽn yeele: “Mam na n tʋmame tɩ b bool Babilon rĩm a Nebukadnezaar* sẽn yaa mam tʋm-tʋmdã.+ Mam na n lugla a geerã kug-kãensã mam sẽn solgã zugu. A na n tẽega a naamã fu-roog n lud kug-kãensã.+
11 A na n waame, n zab ne Ezɩpt soolmã.+ Ned ning sẽn segd ne bã-toaaga, bã-toaag n na n kʋ-a. Ned ning sẽn segd ne yembdo, a na n kẽnga yembdo. Ned ning sẽn segd tɩ b kʋ-a ne sʋʋga, b na n kʋ-a-la ne sʋʋga.+
12 Mam na n ninga Ezɩpt wẽnnaam-dãmbã rot bugum.+ Babilon rĩmã na n yõog-b lame la a tall wẽnnaam-dãmbã n kẽng yembdo. A na n dɩka Ezɩpt soolmã n pil a meng wa rũm-kɩɩm sẽn pind a fuug to-to wã. A na n yii be n loog ne laafɩ.*
13 A na n wãa Bɛt-semes* sẽn be Ezɩpt soolmẽ wã kugã b sẽn lug tɩ yas sellã, la a yõog Ezɩpt wẽnnaam-dãmbã rot bugum.”’”
Vẽnegr toor-toore
^ Bɩ, “sɩɩs nins fãa.”
^ Ebre, “Nebukadrezaar.” Yaa yʋʋrã boolg a to.
^ Bɩ, “tɩ bũmb pa maan-a ye.”
^ Bɩ, “Wĩntoogã roogo (wẽnd-doogo,)” rat n yeel tɩ Heliyopoliis.
