Zeremi sebre 11:1-23
11 Ad goam nins a Zeova sẽn taas a Zeremi wã. A yeelame:
2 “Bɩ yãmb fãa kelg kaool-kãngã goamã!
“Taas* gom-kãensã Zida la Zerizalɛm nebã,
3 n yeel-b yaa: ‘Ad a Zeova sẽn yaa Israyɛll Wẽnnaamã sẽn yeele: “Kãab-wẽng bee ne ned ning sẽn pa sakd kaool-kãngã goamã.+
4 Yaa goam nins mam sẽn togs yãmb yaab-rãmbã, daar ning mam sẽn yiis-b Ezɩpt+ soolmẽ wã, wʋng sẽn tar n yẽnegd kutã pʋgẽ wã,+ n yeel-ba: ‘Sak-y mam koɛɛgã, la y maan bũmb nins fãa mam sẽn yeel yãmbã, tɩ rẽ la yãmb na n yɩ mam nin-buiidu, tɩ mam yɩ yãmb Wẽnnaam.+
5 Yaa sẽn na yɩl tɩ m pids wẽeneg ning mam sẽn wẽen yãmb yaab-rãmbã, n yeel tɩ m na n kõ-b-la tẽng sẽn pid ne bĩisim la sɩɩdo,+ wa sẽn yaa to-to rũndã-rũndã wã.’”’”
Mam leokame yaa: “Ãmiina,* Zeova.”
6 Rẽ poore, a Zeova yeela maam yaa: “Moon gom-kãensã fãa Zida tẽnsã pʋsẽ, la Zerizalɛm soayã zut n yeele: ‘Kelg-y kaool-kãngã goamã la y tũ-ba.
7 Bala mam sagla yãmb yaab-rãmbã daar ning mam sẽn yiis-b Ezɩpt soolmẽ wã hal n tãag rũndã. Mam sagl-b-la naoor wʋsg* n yeele: “Sak-y mam koɛɛgã.”+
8 La b pa kelg ye. B pa kɩll b tʋb n kelg maam ye. B ned kam fãa pʋd n diglma a sũur n tũ a sũurã sẽn yaa wẽngã.+ Dẽ, mam tẽeg-b-la kaool-kãngã goamã fãa mam sẽn da togs-b tɩ b tũ wã, la b zãgsame tɩ b kõn tũ ye.’”
9 Rẽ poore, a Zeova yeela maam yaa: “Zida ne Zerizalɛm nebã seta taab n na n kɩɩs maam.
10 Bãmb me konga wa b yaab-rãmbã sẽn zĩnd pĩndã, n zãgs tɩ b kõn tũ mam goamã ye.+ Bãmb me tũu wẽnnaam-dãmb a taaba, n waoog-ba.+ Israyɛll nebã ne Zida nebã kɩɩsa mam kaoolã mam sẽn da maan ne b yaab-rãmbã.+
11 Woto wã, ad a Zeova sẽn yeele: ‘Ade! Mam na n kɩtame tɩ yel-beed paam-ba.+ Yaa yel-beed b sẽn pa na n tõog n põse. B sã n wa boond maam n kot sõngre, m pa na n kelg-b ye.+
12 Dẽ, Zida tẽnsã neb ne Zerizalɛm nebã na n kẽnga wẽnnaam-dãmb nins b sẽn maand maand* n kõtẽ wã nengẽ, n tɩ kos sõngre,+ la b pa na n tol n fãag-b b yel-beedã wakat ye.
13 Bala Zida neba, yãmb wẽnnaam-dãmbã sõor lebga wa yãmb tẽnsã sõore. Yãmb maana tẽn-kug wʋsg wa Zerizalɛm soayã sõor n kõ wẽn-faoogã. Yaa tẽn-kug y sẽn tar n maand maand n kõt a Baalle.’+
14 “La sã n yaa ne foo,* ra pʋʋs nin-kãensã yĩng ye. Ra yãb ne maam b yĩnga, wall f pʋʋs b yĩng ye.+ Bala b sã n wa boond maam b yel-beedã yĩnga, m pa na n kelg ye.
15 Bõe yĩng tɩ mam nebã m sẽn nongã ket n be mam doogẽ wã,tɩ wʋsg yaool n maand wẽnga?
Yel-beedã sã n wa paam foo,* b na n talla nemd sẽn yaa sõng* n kɩt t’a loog n bas-f bɩ?
Fo na n kɩdma sũ-noog wakat kãng sɩda?
16 A Zeova ra boonda foo tɩ oliiv tɩɩg sẽn tobd wʋsgo,sẽn yaa neer la sẽn tar biis sẽn yaa sõma.
La a ninga foo bugum, bʋʋr sẽn yaa kãseng pʋgẽ.Bɛɛbã kaoo fo wilã.
17 “Tãb-biis naab a Zeova sẽn yaa soab ning sẽn sel foomã+ yeelame tɩ yel-beed n na n wa fo zugu, Israyɛll nebã ne Zida nebã sẽn maan wẽng ningã yĩnga. B maana maand n kõ a Baalle, n kɩt tɩ mam sũurã yiki.”+
18 A Zeova togsa maam bõn-kãng sẽn na yɩl tɩ m bãnge.Wakat kãnga, yãmb kɩtame tɩ mam yã bũmb nins b sẽn da maandã.
19 Mam da yaa wa pe-bil sẽn sakd nana b sẽn tar n dabd kodgre.
M da pa mi tɩ b magdame n na n maan maam yelle, n yetẽ yaa:+
“Bɩ d sãam tɩɩgã ne a biisã.Bɩ d yiis-a nin-vɩɩsã soolmẽ,sẽn na yɩl tɩ b ra le tẽeg a yʋʋrã yell ye.”
20 La tãb-biis naab a Zeova kaooda bʋʋd ne tɩrlem.A feesda tagsa nins sẽn zulmã,* la sũyã.+
Bɩ y kɩt tɩ m yã y sẽn na n dok y sũur to-to ne-bã,bala mam basa m yellã* ne yãmba.
21 Ad bũmb ning a Zeova sẽn yeel Anatot+ nebã wɛɛngẽ, neb nins sẽn baood n yãk mam yõorã,* la b yetẽ yaa: “Fo pa segd n togs bãngr-goam a Zeova yʋʋr yĩng ye.+ Sã n pa rẽ, tõnd mensã nus n na n kʋ foo.”
22 Woto yĩnga, ad tãb-biis naab a Zeova sẽn yeele: “Ade! Mam na n sok-b lame. B na n kʋʋ b kom-bɩɩsã ne sʋʋse,+ tɩ kom kʋ b kom-dibli wã la b kom-pugli wã.+
23 B ned baa a ye meng pa na n kell ye. Bala mam na n kɩtame tɩ yel-beed paam Anatot+ nebã, yʋʋmd ning m sẽn na n sok-bã.”
Vẽnegr toor-toore
^ Wõnda yaa a Zeremi la a gomd ne.
^ Bɩ, “Bɩ a yɩ woto!
^ Ebre, “da sãta beoog n sagend-b.”
^ Bɩ, “maand sẽn nusd bug-zõos.”
^ Rat n yeel t’a Zeremi.
^ Rat n yeel tɩ Zida.
^ Rat n yeel tɩ maand b sẽn maan wẽnd-doogẽ wã.
^ Ebre, “m bʋ-kaoorã yell.”
^ Ebre, “yiimã.”
^ Bɩ, “sẽn baood mam sɩɩgã.”
