Yɩɩn-sõamyã sebre 69:1-36
Yɩɩlã taoor soab yĩnga. Yɩɩndame tɩ zems “Rulg-lɛlma.” A Davɩɩd yɩɩlle.
69 Mam Wẽnnaam, fãag-y maam, bala koomã rat n dɩɩ maam.*+
2 Mam suda bɛgd sẽn zulum pʋgẽ, tɩ zĩ-koɛɛng kae ye.+
Mam lʋɩɩ ko-zulums pʋgẽ,tɩ kʋɩlg koom sẽn zoet ne pãng peeg maam n looge.+
3 Mam boolame n ya.+Mam koeesã gĩdame.
Mam ninã pãng booga mam sẽn wa n gũud m Wẽnnaamã.+
4 Neb nins sẽn kis maam zaalem yĩngã+sõor yaa wʋsg n yɩɩd mam zugã zoobdo.
Neb nins sẽn dat n kʋ maamã,mam bɛɛbã sẽn yaa zãmb dãmbã* lebga wʋsgo.
B modga maam sẽn na yɩl tɩ m lebs bũmb m sẽn pa zuki.
5 Mam Wẽnnaam, yãmb mii mam yalemdã.Mam taalã pa solg ne yãmb ye.
6 Tãb-biis naab a Zeova sẽn yaa Zu-soab sẽn ka to,bɩ neb nins sẽn zoet yãmbã ra paam yãnd mam poorẽ ye.
Israyɛll Wẽnnaam,bɩ neb nins sẽn baood yãmbã ra paam paoogr mam poorẽ ye.
7 Mam paama yaoolg yãmb yĩnga.+Mam paama yãnd tɩ loog noore.+
8 Mam lebga sãan m ba-biisã nifẽ.Mam lebga tẽn-zẽng ned m ma wã kamb nifẽ.+
9 Yãmb doogã nonglem yaa wa bugum sẽn dɩt mam sũurẽ wã.+Neb nins sẽn tʋʋd yãmbã tʋy lʋɩɩ mam zugu.+
10 Mam sẽn wa n sik m meng* n loe noorã,*b tʋʋ maam rẽ yĩnga.
11 Mam sẽn wa n yeelg botã,kɩtame tɩ b yaal maam.
12 Sẽn zĩ-b tẽngã rignoorẽ wã gomda mam yell wʋsgo.Rã-yũud-kãasã gomda mam yell b yɩɩlã pʋsẽ.
13 La bɩ mam pʋʋsgã ta yãmb a Zeova,wakat ning yãmb sẽn na n zoe mam nimbãanega.+
Mam Wẽnnaam, yãmb maan-neerã sẽn yaa wʋsgã yĩnga,leok-y maam, la y wilg tɩ y yaa fãagd b sẽn tõe n teege.+
14 Yiis-y maam bɛgdã pʋgẽ.Ra bas-y tɩ m sud ye.
Fãag-y maam neb nins sẽn kis maamã nusẽ,la ko-zulumsã pʋsẽ.+
15 Bɩ y ra bas tɩ koomã sẽn zoet ne pãngã loog ne maam,+wall y bas tɩ zĩ-zulungã vel maam,pa rẽ bɩ bulgã* pag a noor mam zug ye.+
16 Zeova, leok-y maam, bala yãmb maan-neerã yaa sõma.+
Wẽnemd-y n tees-y maam wa sẽn zems yãmb nimbãan-zoeerã sẽn yaa wʋsgã,+
17 la y ra solg y tʋm-tʋmdã y nengã ye.+
Leok-y maam tao-tao, bala m bee yel-pakr pʋgẽ.+
18 Kolg-y maam, n fãag-ma.*Fãag-y maam m bɛɛbã yĩnga.
19 Yãmb mii b sẽn tʋʋd maam, n paoogd-m la b yaand-m to-to wã.+
Yãmb nee mam bɛɛbã fãa.
20 Tʋyã sãama mam sũurã wʋsgo, tɩ m dat n tẽ tɩ manegr kae ye.*
Mam da gũudame tɩ b kʋm-ma, la ned pa kʋm-m ye.+Mam da tẽedame tɩ m na n paama belsdba, la m pa paam baa a yembr ye.+
21 La b zãgsa b na kõ maam dɩɩbo, n kõ-m zẽnem.+Mam ko-yũudã yĩnga, b kõo maam divẽ sẽn yaa miisg sẽn na yɩl tɩ m yũ.+
22 Bɩ b taablã lebg bẽdg b yĩnga,tɩ b paoongã sẽn paasdã lebg tãooga.+
23 Bɩ b ninã menem tɩ b pa le tõe n yã,la bɩ y kɩt tɩ b seesã rigd wakat fãa.
24 Kiig-y y sũ-yikrã b zutu,la y kɩt tɩ y sũ-puugrã sẽn yaa kãsengã sig b zutu.+
25 Bɩ b sik-zĩigã* lebg raboogo.Bɩ ned ra le zĩnd b fu-rotã pʋsẽ ye.+
26 Bala b rigda soab ning yãmb sẽn wẽ wã,la b gomd neb nins yãmb sẽn poglã toodã yell n pa basdẽ ye.
27 Paas-y b taalã,la bɩ b ra paam pʋɩɩr baa bilf yãmb tɩrlmã pʋgẽ ye.
28 Bɩ b yẽes b yʋyã nin-vɩɩsã sebr* pʋgẽ,+la bɩ b ra gʋls b yʋyã n naag nin-tɩrsã ye.+
29 La mam namsdame, n tar toogo.+
Mam Wẽnnaam, bɩ yãmb pãngã sẽn fãagdã kogl maam.
30 Mam na n yɩɩlame n pẽg Wẽnnaam yʋʋrã.Mam na n waoog-a-la ne bark pʋʋsgo.
31 Rẽ na n yɩɩ a Zeova noog n yɩɩd loalga,n yɩɩd lol-poll sẽn tar yɩɩl la nao-bendo.+
32 Sik-m-mens rãmbã na n yãa rẽ n kɩdem sũ-noogo.
Yãmb a neb nins sẽn baood Wẽnnaamã, bɩ y keng y pelse.
33 Bala a Zeova kelgda naong rãmbã kosgo,+la a pa na n paoog a neb nins sẽn be yembdã ye.+
34 Bɩ saasã la tẽngã pẽg-a.+Bɩ mogrã ne bũmb nins fãa sẽn saagd a pʋgẽ wã pẽg-a.
35 Bala Wẽnnaam na n fãaga Siyõ.+A na n lebs n mee Zida tẽnsã.A nin-buiidã na n zĩnda be, n soog-a.*
36 A tʋm-tʋmdbã kamb la b yagens na n soog-a lame.+Neb nins sẽn nong a yʋʋrã+ na n zĩnda a pʋgẽ.
Vẽnegr toor-toore
^ Bɩ, “taa mam sɩɩgã.”
^ Bɩ, “neb nins sẽn yaa mam bɛɛb zaalem yĩngã.”
^ Ebre, “mam sɩɩgã.”
^ Pa rẽ bɩ, “Mam sẽn wa n yãb la m loe noorã.”
^ Bɩ, “bokã.”
^ Bɩ, “Kolg-y mam sɩɩgã, n fãag-a.”
^ Ebre, “tɩ nodrã pa tõe n maag ye.”
^ Bɩ, “sik-zĩig sẽn gũbg lalgã.”
^ Bɩ, “vɩɩmã sebr.”
^ Rat n yeel tɩ “n soog soolmã.”
