Tõod sebre 20:1-20
20 “Yãmb sã n na n tɩ zab ne y bɛɛba, n mik tɩ b wed-moosã, b saar-dãmbã la b tãb-biisã sõor yɩɩda yãmba, bɩ y ra yɛɛs ye. Bala yãmb Wẽnnaam a Zeova sẽn yiis yãmb Ezɩpt soolmẽ wã bee ne-yã.+
2 Yãmb sã n wa rat n kẽng zabre, maan-kʋʋdã segd n kolgame n gom ne nin-buiidã.+
3 A segd n yeel-b lame yaa: ‘Israyɛll neba, kelg-y-yã! Yãmb rabd n na n tɩ zaba ne y bɛɛba. Ra bas-y tɩ y pɛleng yɩk ye. Ra n zoe-y rabeem wall y yɛɛs bɩ n dig bãmb yĩng ye.
4 Bala yãmb Wẽnnaam a Zeova kẽnda ne yãmba, n na n tɩ zab ne y bɛɛbã n sõng-yã, la a fãag-yã.’+
5 “Tãb-biisã taoor dãmb me segd n yeela nin-buiidã yaa: ‘Ãnd n me ro-paall n nan pa kẽ a pʋgẽ? Bɩ a lebg n kuili, sã n pa rẽ a tõe n kii zabrẽ wã, tɩ ned a to wa kẽ a roogẽ wã.
6 Ãnd n sel viyn pʋʋg n nan pa sɩng a biisã rɩɩbo? Bɩ a lebg n kuili, sã n pa rẽ a tõe n kii zabrẽ wã, tɩ ned a to yɩ pipi n dɩ a viyn pʋʋgã biisi.
7 Ãnd n bao pag n nan pa kẽ kãadem ne-a? Bɩ a lebg n kuili,+ sã n pa rẽ a tõe n kii zabrẽ wã, tɩ ned a to kẽ kãadem ne pagã.’
8 Taoor dãmbã segd n soka nin-buiidã yɛs yaa: ‘Ãnd soab n zoet rabeem, la ãnd soab pɛleng n yɩke?+ A segd n lebg n kuilame, n da wa kɩt t’a saam-biisã gĩin maag wa yẽnda ye.’+
9 Taoor dãmbã sã n gom ne nin-buiidã n sa, b segd n yãka tãb-biis nanambs tɩ b lʋɩ nin-buiidã taoore.
10 “Yãmb sã n wa kolg tẽng n na n zab ne-a, yãmb segd n deng n wilga tẽngã neb b sẽn segd n maan tɩ laafɩ zĩnd bãmb ne yãmb sʋka.+
11 B sã n sak n na n bao laafɩ ne yãmba, la b pak b kʋɩlensã n kõ-yã, neb nins fãa sẽn be tẽn-kãng pʋgẽ wã na n yɩɩ yãmb n so, tɩ b tʋmd y tʋʋm-wɛglã. B na n tʋmd n kõta yãmba.+
12 La b sã n zãgs tɩ b kõn bao laafɩ ne-yã, n na n zab ne-yã, bɩ y gũbg tẽngã.
13 Yãmb Wẽnnaam a Zeova na n ning-b-la yãmb nusẽ, la y segd n kʋʋ rap nins fãa sẽn be tẽngã pʋgẽ wã ne sʋʋse.
14 La y tõe n talla pagbã, kambã, rũmsã la bũmb nins fãa sẽn be tẽngã pʋgẽ wã looge, rat n yeel tɩ te-zɛɛdmã fãa.+ Yãmb na n dɩɩ y bɛɛbã teedã y sẽn zɛ wã, yãmb Wẽnnaam a Zeova sẽn kõ yãmbã.+
15 “Yaa woto la yãmb na n maan tẽns nins fãa sẽn zãr wʋsg ne yãmba, n pa buud nins sẽn pẽ yãmbã tẽnsã.
16 Bu-kãensã tẽnsã yãmb Wẽnnaam a Zeova sẽn na n kõ yãmb tɩ yɩ y pʋɩɩrã pʋsẽ, y pa segd n bas bũmb sẽn vʋʋsd ne yõor baa a yembr ye.+
17 Y segd n sãama b fãa zãng wa yãmb Wẽnnaam a Zeova sẽn yeel yãmbã. Yaa Hɛt nebã, Amoor nebã, Kanaã nebã, Perɛɛz nebã, Hevi nebã ne Zebuus nebã.+
18 Yaa sẽn na yɩl tɩ b ra wa zãms yãmb tɩ y maan bõn-wẽns nins fãa b sẽn maan b wẽnnaam-dãmbã yĩngã, n kɩt tɩ y wa beeg yãmb Wẽnnaam a Zeova ye.+
19 “Yãmb sã n tilg y sikã n gũbg tẽng sẽn na yɩl n zab n deeg-a, n zabd ne-a rasem wʋsgo, y pa segd n dɩk lay n kɛ tɩɩsã n sãam ye. Yãmb tõe n dɩɩ b biisã, la y pa segd n kɛ-b n lub ye.+ Yãmb segd n zaba ne tɩɩg wa y sẽn zabd ne ninsaal to-to wã sɩda?
20 Yaa tɩɩg yãmb sẽn mi tɩ ned pa tõe n dɩ a biisã bal la y tõe n kʋ. Yãmb tõe n kɛ-a lame n lubi, n tall n gũbg tẽng ning sẽn zabd ne yãmbã, hal n wa tõog-a.
