Tõod sebre 12:1-32
12 “Ad noy la tõod nins yãmb sẽn segd n tũ neere, wakat ning fãa yãmb sẽn na n vɩɩmd soolem ning yãmb yaab-rãmbã Wẽnnaam a Zeova sẽn na n kõ yãmb tɩ y soogã pʋgẽ.
2 Yãmb segd n sãama zĩis nins fãa buud nins y sẽn na n tõogã sẽn pʋʋsd b wẽnnaam-dãmbã,+ tɩ yaa tãn-lug-lug wall kunkub zutu, bɩ yaa tɩ-bedr sẽn tar vãad wʋsg fãa tẽngre.
3 Yãmb segd n sãama b tẽn-kugã, n wã kugã b sẽn lugl n pʋʋsdẽ wã,+ n yõog ra-lugsã b sẽn lugl n pʋʋsdẽ* wã, la y lub bõn-naandsã b sẽn pees tɩ yaa b wẽnnaam-dãmbã,+ hal tɩ b yʋyã menem be.+
4 “Yãmb pa segd n waoog yãmb Wẽnnaam a Zeova wa buud a taabã sẽn waoogd b wẽnnaam-dãmbã to-to wã ye.+
5 Kẽngd-y zĩis nins yãmb Wẽnnaam a Zeova sẽn na n yãk a yʋʋrã yĩnga, zĩig ning a sẽn be yãmb buud toor-toorã fãa sʋkã, n waoog-a.+
6 Yaa be la yãmb segd n kẽnd ne y maand sẽn yõogd bugmã,+ y maandã, y piig-pʋɩɩrã,+ y kũunã,+ y pʋleng maandã, y yamleoog kũunã,+ la y rũm-bɛdã ne y rũm-bõonegã kom-dẽemsã.+
7 Yãmb ne y zagsã rãmb segd n dɩɩ yãmb Wẽnnaam a Zeova taoor be,+ la y kɩdem sũ-noog bũmb nins fãa y sẽn maandã yĩnga,+ bala yãmb Wẽnnaam a Zeova ninga yãmb barka.
8 “Yãmb pa segd n maan wa tõnd sẽn maand ka rũndã wã, tɩ ned kam fãa maand sẽn yaa tɩrg a meng nifẽ wã ye.*
9 Bala yãmb nan pa ta vʋʋsg zĩigẽ wã,+ la soolem ning yãmb Wẽnnaam a Zeova sẽn na n kõ yãmbã pʋgẽ ye.
10 Yãmb sã n wa rʋʋg Zʋrdẽ kʋɩlgã+ n tɩ zĩnd soolem ning yãmb Wẽnnaam a Zeova sẽn na n kõ yãmb tɩ y soogã pʋgẽ, a na n kɩtame tɩ y paam y mens ne y bɛɛbã fãa sẽn gũbg yãmbã, n zĩnd bãane.+
11 Yãmb na n talla bũmb nins fãa mam sẽn wilg yãmbã, n wa zĩig ning yãmb Wẽnnaam a Zeova sẽn yãk n ning a yʋʋrã:+ Yaa y maand sẽn yõogd bugmã, y maandã, y piig-pʋɩɩrã,+ y kũunã, la pʋleng maandã y sẽn pʋlem tɩ y na n kõo a Zeova wã.
12 Yãmb na n kɩdma sũ-noog y Wẽnnaam a Zeova taoore,+ yãmb ne y kom-dibli wã, y kom-pugli wã, y yem-daadã ne y yem-pogsã, la Levi buudã neb sẽn be yãmb tẽnsẽ wã.* Bala b pa kõ Levi buudã neb pʋɩɩr yãmb sʋk ye.+
13 Gũus-y n da wa kõ y maand sẽn yõogd bugmã zĩig ning fãa yãmb sẽn paam ye.+
14 Yaa zĩig ning a Zeova sẽn na n yãk yãmb buud a yembr soolmẽ wã bala, la yãmb segd n kõt y maand sẽn yõogd bugmã. Yaa be la yãmb segd n maand bũmb nins fãa mam sẽn yeel yãmbã.+
15 “La yãmb sã n wa rata, yãmb tõe n kʋʋ rũng n wãb a nemdã,+ wa sẽn zems bark ning yãmb Wẽnnaam a Zeova sẽn kõ yãmb y tẽnsã fãa pʋsẽ wã.* Ned sẽn yaa rẽgd ne ned sẽn yaa yɩlemd fãa tõe n wãba nemdã, wa yãmb sẽn wãbd yãk bɩ walg nemd to-to wã.
16 La yãmb pa segd n dɩ zɩɩmã ye.+ Yãmb segd n daag-a-la tẽng wa koom.+
17 Yãmb tẽnsã pʋsẽ, b pa na n kõ yãmb sor tɩ y rɩ y koodã, y divẽ-paalgã la y kaamã pʋɩɩr a ye pʋɩ piig zugã, bɩ n wãb y rũm-bɛdã ne y rũm-bõonegã kom-dẽemsã,+ la y pʋleng maandã y sẽn pʋlem tɩ y na n kõome wã, y yamleoog kũunã, wall y kũunã ye.
18 Yãmb ne y kom-dibli wã, y kom-pugli wã, y tʋm-tʋmd-daadã ne y tʋm-tʋmd-pogsã, la Levi buudã neb sẽn be yãmb tẽnsẽ wã* segd n dɩɩ bõn-kãens yãmb Wẽnnaam a Zeova taoore, zĩig ning yãmb Wẽnnaam a Zeova sẽn na n yãkã.+ Yãmb na n kɩdma sũ-noog y Wẽnnaam a Zeova taoore, bũmb nins fãa y sẽn maandã yĩnga.
19 Yãmb sã n be y soolmã pʋgẽ fãa, bɩ y gũus n da wa yĩm Levi buudã neb yell ye.+
20 “Yãmb Wẽnnaam a Zeova sã n wa yalg yãmb soolmã+ wa a sẽn da pʋlmã,+ tɩ yãmb wa yeel tɩ y rata nemd n wãbe, y yam sẽn be nemd wãbr yĩnga, yãmb tõe n wãba nemd wakat ning fãa y sẽn date.+
21 Zĩig ning yãmb Wẽnnaam a Zeova sẽn yãk n ning a yʋʋrã+ sã n zãra ne yãmba, y segd n yãka y rũm-bɛdã wall y rũm-bõonegã a Zeova sẽn kõ yãmbã kẽer n kʋ, wa mam sẽn yeel yãmbã. Yãmb segd n wãba nemdã yãmb tẽnsã pʋsẽ,* wakat ning fãa yãmb sẽn date.
22 Yãmb tõe n wãba nemdã wa yãmb sẽn wãbd yãk wall walg nemd to-to wã.+ Ned sẽn yaa rẽgd ne ned sẽn yaa yɩlemd fãa tõe n wãb-a lame.
23 Kell-y n yãk-y yam n da tol n dɩ zɩɩmã,+ bala zɩɩmã yaa vɩɩmã.*+ Y pa segd n wãb nemdã ne vɩɩmã* ye.
24 Yãmb pa segd n dɩ zɩɩmã ye. Yãmb segd n daag-a-la tẽng wa koom.+
25 Yãmb pa segd n dɩ-a, sẽn na yɩl tɩ bũmb fãa yɩ sõma ne yãmb ne y kambã la y yagensã, yãmb sẽn maand sẽn yaa tɩrg a Zeova nifẽ wã yĩnga.
26 Yãmb sã n wa wat zĩig ning a Zeova sẽn na n yãkã, yaa bõn-sõamyã nins yãmb sẽn so wã bal la y segd n zã, n paas y pʋleng maandã.
27 Yaa be la yãmb na n kõ y maand sẽn yõogd bugmã, nemdã ne zɩɩmã+ yãmb Wẽnnaam a Zeova tẽn-kugrã zugu. Yãmb maandã zɩɩm segd n daaga yãmb Wẽnnaam a Zeova tẽn-kugrã sɛɛgẽ.+ La yãmb tõe n wãba nemdã.
28 “Gũus-y neer n sak goam nins fãa mam sẽn togs yãmbã, sẽn na yɩl tɩ bũmb fãa yɩ sõma ne yãmba, y kambã la y yagensã wakat fãa. Bala yãmb maanda sẽn yaa sõma la sẽn yaa tɩrg yãmb Wẽnnaam a Zeova nifẽ.
29 “Yãmb Wẽnnaam a Zeova sã n wa sãam buud nins yãmb sẽn tõogã,+ tɩ y be b soolmẽ wã,
30 bɩ y gũus n da wa lʋɩ bẽdgẽ, b sẽn sãam-b yãmb nifẽ wã poor ye. B wẽnnaam-dãmbã wɛɛngẽ, da yeel-y yaa: ‘Wãn to la bu-kãensã neb ra tũud b wẽnnaam-dãmbã? Ma-me na n maana woto.’+
31 Yãmb pa segd n waoog yãmb Wẽnnaam a Zeova woto ye. Bala bãmb maanda bõn-wẽns buud fãa a Zeova sẽn kisi, n kõt b wẽnnaam-dãmbã. B pʋd n yõogda b kom-dibli la b kom-pugli bugum n kõt b wẽnnaam-dãmbã.+
32 Yaa mam sẽn yet yãmb goam ninsã la y segd n tũ neere.+ Yãmb pa segd n paas gomd bɩ n yãk gomd ye.+
Vẽnegr toor-toore
^ Ges-y gom-biis võor bilgrã zĩigẽ.
^ Bɩ, “bũmb ning a sẽn tagsd tɩ yaa tɩrgã ye.”
^ Ebre, “rignoyẽ wã.”
^ Ebre, “y rignoyã fãa pʋsẽ wã.”
^ Ebre, “rignoyẽ wã.”
^ Ebre, “rignoyẽ wã.”
^ Bɩ, “sɩɩgã.”
^ Bɩ, “sɩɩgã.”
