Sõdb sebre 24:1-25
24 A Balaam sẽn wa n yã tɩ Israyɛll nebã bark ningr nooma a Zeova wã,* a pa le bao bũmb sẽn wilgd tɩ wẽng n na n paam-b ye.+ A wẽnemda a neng n tees we-raoogã.
2 A Balaam sẽn zẽk a neng n yã Israyɛll nebã sẽn tilg b sik-zĩigã buud-buudã,+ Wẽnnaam vʋʋsmã siga a zugu.+
3 Dẽ, a togsa Wẽnnaam koɛɛgã n yeele:+
“Ad a Beoor biig a Balaam koɛɛga,rao ning nin sẽn pukã koɛɛga,
4 ned ning sẽn wʋmd Wẽnnaam goamã koɛɛga,ned ning sẽn paam vẽnegr sẽn yit Sẽn-tõe-a-fãa wã nengẽ wã,ned ning sẽn wõgemd t’a nin getẽ wã koɛɛga:+
5 A Zakoob yagense, ad y fu-rotã be neere!Israyɛll neba, y fu-rotã yaa neeba!+
6 B yɛdg n zãaga zĩig wa kosoodo,+wa zẽed zĩis sẽn be kʋɩlg noore,wa alowɛs tɩɩs a Zeova sẽn sele,la wa sɛɛdr tɩɩs sẽn be koom noore.
7 Koom n yit Israyɛll nebã lʋʋd a yiibẽ wã n zoet wakat fãa,b bʋda b bõn-buudã* koom sẽn waoog noore.+
B rĩmã+ me na n yɩɩ kãseng n yɩɩg a Agaage.+B rĩungã na n paama ziiri.+
8 Wẽnnaam yiis-b-la Ezɩpti.Wẽnnaam yaa wa we-naaf yɩɩl b yĩnga.
Israyɛll nebã na n sãama buud nins sẽn maand-b pãngã.+B na n wãba b kõabã, la b sãam-b ne b pɛɛmã.
9 Israyɛll nebã wũgame. B gãee wa gɩgemde.B sẽn gãe wa gɩgemdã, ãnda n na n saag n yik-ba?
Neb nins sẽn ningd yãmb barkã tara barka.Kãab-wẽng bee ne neb nins sẽn kãabd yãmb wẽngã.”+
10 Dẽ, a Balak sũurã puuga ne a Balaam. A Balak wẽe nug-pogse, la a yeel a Balaam yaa: “Mam boola yãmb tɩ y wa kãab mam bɛɛbã wẽnga.+ La naoor a tãabã fãa, yãmb pa maand baa fʋɩ tɩ pa b bark ningr ye.
11 Kẽng-y n kuil-y tao-tao. Mam da rat n keo-y-la wʋsgo,+ la a Zeova monga yãmb keoore.”
12 A Balaam leoka a Balak yaa: “Mam yeela koe-taasdb nins yãmb sẽn tʋmã yaa:
13 ‘Baa a Balak sã n kõ maam a roogã sẽn pid ne wanzuri la sãnem, mam pa tõe n maan baa fʋɩ wa sẽn zems mam daabo,* n zʋʋg a Zeova noorã, tɩ yaa sõma wall wẽng ye. Yaa bũmb ning a Zeova sẽn na n yeel maamã bal la m na n togse.’+
14 Masã, mam na n leba m nebẽ wã. Bɩ y wa tɩ m wilg-y bũmb ning nin-kãensã sẽn na n maan yãmb buudã beoog-daare.”*
15 Dẽ, a togsa Wẽnnaam koɛɛgã n yeele:+
“Ad a Beoor biig a Balaam koɛɛga,rao ning nin sẽn pukã koɛɛga,+
16 ned ning sẽn wʋmd Wẽnnaam goamã,ned ning sẽn paam Sẽn ka-a to wã bãngrã koɛɛga.A yãa vẽnegr sẽn yit Sẽn-tõe-a-fãa wã nengẽ,a sẽn wa n wõgemd t’a nin getẽ wã:
17 Mam na n yã-a lame, la pa masã ye.Mam na n ges-a lame, la pa mas-masã ye.
Ãdg+ n na n yi a Zakoob yagensã sʋka,naam dasaar+ n na n zẽk Israyɛll nebã sʋka.+
Sãmbg sẽn kae, a na n wãa Mowaab nebã+ rĩyã,*la a wã tãb-biis nins sẽn yaa nen-kɛglem dãmbã zu-wamse.
18 Edom na n lebga Israyɛll nebã soolem.+Seyɩɩr+ na n lebga a bɛɛbã soolem,+tɩ Israyɛll nebã wilgd b raoodo.
19 Ned sẽn yi a Zakoob yagensã sʋk n na n tõog a bɛɛbã.+A na n sãama tẽngã ned ning fãa sẽn põse.”
20 A Balaam sẽn yã Amalɛkã, a kell n togsa Wẽnnaam koɛɛgã n yeele:
“Amalɛk n yɩ pipi buud toor-toorã sʋka,*+la b na n wa baas n sãam-a lame.”+
21 A sẽn yã Kɛn nebã,+ a kell n togsa Wẽnnaam koɛɛgã n yeele:
“Yãmb sik-zĩigã paamda koglgo. Yãmb gãagã zĩig lugla pĩigã zugu.
22 La ned n na n yõog Kayin ne bugum.
Na n kaoosa yʋʋm a wãn tɩ Asiiri nebã yaool n tall yãmb n kẽng yembdo?”
23 A kell n togsa Wẽnnaam koɛɛgã n yeele:
“Kayto! Wakat ning Wẽnnaam sẽn na n maan dẽ wã, ãnda n na n põse?
24 Koom-kogend n na n yi mogrã noor Kitim+ n wa,b na n namsa Asiiri nebã.+B na n namsa Ebɛɛre.
La yẽ me na n wa sãama zãnga.”
25 Rẽ poore, a Balaam+ yikame n looge, t’a Balak me rɩk a sore.
Vẽnegr toor-toore
^ Ebre, “ra yaa sõma a Zeova nifẽ wã.”
^ Bɩ, “yagensã.”
^ Ebre, “sẽn yit mam sũurẽ.”
^ Bɩ, “wakatã baasgẽ.”
^ Bɩ, “Mowaab nebã kɩgdsã.”
^ Rat n yeel tɩ Amalɛk n yɩ pipi n zab ne Israyɛll nebã b sẽn yi Ezɩptã poore.
