Bʋ-kaoodbã sebre 15:1-20
-
A Sãmsõ roka a sũur ne Filisti nebã (1-20)
15 Sẽn kaoos bilfu, bɩle wã tigsg wakate, a Sãmsõ zãa bʋ-poll n kẽng n na n tɩ ges a pagã. A yeelame: “Mam dat n kẽe m pagã nengẽ ro-gãagẽ wã.”* La a pagã ba wã pa sak t’a Sãmsõ kẽ ye.
2 A pagã ba wã yeelame: “Mam tagsame tɩ fo tog n kis-a lame.+ Rẽ n so tɩ mam dɩk-a n kõ kom-bɩɩs nins sẽn da tũud foomã nin-yende.+ A yaoã neerem pa yɩɩd-a sɩda? M bõos tɩ f rɩk-a n ledg a kẽemã.”
3 La a Sãmsõ yeela bãmb yaa: “So-kãngã, mam sã n maan Filisti nebã wẽnga, b pa tõe n ning-m taal ye.”
4 Dẽ, a Sãmsõ kẽngame n tɩ yõg waas* kobs-tã, n dɩk vɩlems n wẽnemd waasã seesã n sẽb b zʋyã ne taaba, la a ning vɩleng zʋy a yiib fãa sʋka.
5 Rẽ poore, a yõgena vɩlemsã bugum, n bas waasã tɩ b tɩ kẽ Filisti nebã pʋt sẽn ket n yas ne koodã. A yõoga bũmba fãa ne bugum, sẽn sɩng ne ka-gĩnã sẽn dʋrã n tãag koodã sẽn ket n yasã, ne viyn pʋtã la oliiv tɩɩsã.
6 Filisti nebã sokame yaa: “Ãnd n tʋm tʋʋm-kãngã?” Tɩ b leok-ba: “Yaa Timna raoã rɛɛmb a Sãmsõ, bala a rɩka a pagã n kõ kom-bɩɩs nins sẽn da tũud-a wã nin-yende.”+ Woto, Filisti nebã kẽngame n tɩ yõog pagã ne a ba wã bugum.+
7 Rẽ la a Sãmsõ yeel-b yaa: “Yãmb sẽn maan woto wã, mam pa na n zĩnd tɩ m pa reng n dok m sũur ne yãmb ye.”+
8 A kʋʋ bãmb yembr-yembr* hal wʋsgo. Rẽ poore, a kẽngame n tɩ kẽ Etam pĩigã bokẽ n pa be.
9 Rẽ zugẽ, Filisti nebã wa n tilga b tãb-sik Zida, n da kẽnd n gilgd Leyi.+
10 Rẽ la Zida nebã sok yaa: “Bõe yĩng tɩ y wa n na n zab ne tõndo?” Tɩ b leoke: “Tõnd waame n na n yõk* a Sãmsõ n maan-a wa a sẽn maan tõndã.”
11 Zida neb tus a tãab n kẽng Etam pĩigã bokẽ n tɩ yeel a Sãmsõ yaa: “Fo pa mi tɩ Filisti nebã n so tõnd la?+ Bõe yĩng tɩ fo maan tõnd bõn-kãngã?” T’a Sãmsõ leok-b yaa: “Mam maana bãmb wa bãmb sẽn maan maamã.”
12 La b leoka yẽ yaa: “Tõnd waame n na n yõk* foo n kõ Filisti nebã.” T’a Sãmsõ yeel-ba: “Wẽen-y tɩ yãmb pa na n maan maam bũmb ye.”
13 Tɩ b yeel-a: “Ayo! Tõnd na n sẽba foo bal n ning b nugẽ. D pa na n kʋ-f ye.”
Dẽ, bãmb sẽb-a-la ne wĩ-paal a yiibu, n yiis-a bokã pʋgẽ.
14 A Sãmsõ sẽn ta Leyi wã, Filisti nebã zẽka b koees n kaasd ne sũ-noog n segd-a. La a Zeova vʋʋsmã kõo a Sãmsõ pãnga,+ tɩ wĩyã sẽn da sẽb a nusã lebg wa lẽ* gĩs sẽn yõog bugum, tɩ bãensã yi a nusẽ wã n lʋɩ.+
15 A Sãmsõ yãa bõn-daoog sẽn ki paalem yeer kõbre, n dɩk n kʋ rap tusri.+
16 Dẽ, a Sãmsõ yeelame yaa:
“Ne bõang yeer kõbre: Rʋr a ye, rʋy a yiibu!
Ne bõang yeer kõbre, mam kʋʋ rap tusri.”+
17 A sẽn gom n sa, a loba yeerã kõbre, la a pʋd zĩ-kãng yʋʋr tɩ Ramat-leyi.*+
18 Rẽ poore, ko-yũud n yõk-a, t’a bool a Zeova n yeele: “Yaa yãmb n sõng y tʋm-tʋmdã t’a paam tõogr a woto. La masã, yãmb na n basame tɩ ko-yũud kʋ maam, tɩ m lʋɩ neb sẽn pa kẽ bãong nugẽ?”
19 Dẽ, Wẽnnaam kɩtame tɩ bok sẽn da be Leyi yoke, tɩ koom pusg n yi.+ A Sãmsõ sẽn yũ koomã, a pãngã* leb n waame t’a nengã yẽege. Rẽ n so t’a pʋd zĩ-kãng yʋʋr tɩ Ɛn-hakoore.* A ket n bee Leyi n tãag rũndã.
20 A Sãmsõ yɩɩ Israyɛll bʋ-kaood yʋʋm pisi, Filisti nebã sẽn da wa n so Israyɛll nebã wakate.+
Vẽnegr toor-toore
^ Bɩ, “ro-taoorẽ wã.”
^ Yaa we-rũng sẽn wõnd baaga, la a bedrmã pa ta baag ye.
^ Ebre, “kʋʋ bãmb n palg karg ger zugu.”
^ Bɩ, “sẽb.”
^ Bɩ, “sẽb.”
^ Yaa bũmb sẽn wõnd berense, b sẽn da kood Ezɩpti. B ra tara a tãandã n maand futu.
^ Rat n yeel tɩ “yeer kõbr kunkubri.”
^ Bɩ, “vʋʋsmã.”
^ Rat n yeel tɩ “sẽn boond-a wã ko-bundga.”
