A B D E F G H I K L M N O P R S T U V W Y Z

A

• A Aarõ kom-dibli.

  Yaa a Levi yageng a Aarõ kamb la a yagense. A Moyiiz Tõogã tũub sasa, yɩɩ a Aarõ la b yãk pipi t’a yɩ maan-kʋʋdb kãsma. A Aarõ kom-dibli wã ra yaa maan-kʋʋdb n tʋmd sɛk-roogẽ wã la wẽnd-doogẽ wã.​—1Ki 23:28.

• Aazi.

  Biiblã babg ning b sẽn da gʋls ne Gɛrkã pʋgẽ, yaa Rom soolem a ye yʋʋre. Rũndã-rũndã, soolem-kãng naaga Tirki tẽngã babg ning sẽn be yaangã, n paas ko-sʋk tẽns kẽere. Wala makre, Samos ne Patmose. Aazi na-tẽngã ra yaa Efɛɛze. (Tʋ 20:16; Vẽ 1:4)​—Ges-y vẽnegr ning sẽn yaa B13.

• Ab.

  Yaa yʋʋr b sẽn pʋd Zʋɩf-rãmbã tũudmã kalãndriye wã kiuug a nu soabã, Babilon yembdã poore. La a yaa buud a taabã kiuug piig la a ye soabã. A sɩngda sẽoog kiuugã pʋɩ-sʋk n tãag sa-sik kiuugã pʋɩ-sʋka. B pa ning yʋ-kãng Biiblã vɛrse-rãmb pʋsẽ ye. B boond-a lame bal tɩ “kiuug a nu soabã.” (Sõ 33:38; Ɛsd 7:9)​—Ges-y vẽnegr ning sẽn yaa B15.

• Abiib.

  Yaa yʋʋr b sẽn pʋd Zʋɩf-rãmbã tũudmã kalãndriye wã pipi kiuugã, Babilon yembdã poore. La a yaa buud a taabã kiuug a yopoe-n-soabã. Gom-bilã rat n yeelame tɩ “ka-zut sẽn yaa kẽese.” A sɩngda tʋʋlg kiuugã pʋɩ-sʋk n tãag tʋʋl-nif kiuugã pʋɩ-sʋka. Zʋɩf-rãmbã sẽn yi yembd Babilonnã poore, b pʋd-a lame tɩ Nizã kiuugu. (Tõ 16:1)​—Ges-y vẽnegr ning sẽn yaa B15.

• Absẽnt.

  Yaa tɩɩs buud toor-toor sẽn yaa toog liga, la sẽn tar yũ-noogo. Biiblã pʋgẽ, b mii n gomda absẽnt yell n na n bilg yoobã, yembdã, wẽgbã, la wẽn-kɩɩsgã sẽn wat ne toog ningã. Vẽnegr 8:11 wã pʋgẽ, “absẽntã” makda bũmb sẽn yaa toog liga n le yaa zẽnem.​—Tõ 29:18; Ye 5:4; Ze 9:15; Am 5:7.

• Adaar.

  Yaa yʋʋr b sẽn pʋd Zʋɩf-rãmbã tũudmã kalãndriye wã kiuug piig la a yiib-n-soabã, Babilon yembdã poore. La a yaa buud a taabã kiuug a yoob-n-soabã. A sɩngda wao-fugdg kiuugã pʋɩ-sʋk n tãag tʋʋlg kiuugã pʋɩ-sʋka. (Ɛst 3:7)​—Ges-y vẽnegr ning sẽn yaa B15.

• A Davɩɩd tẽnga.

  Yaa yʋʋr b sẽn pʋd Zebuus tẽngã a Davɩɩd sẽn zab n deeg la a me a na-yirã be wã poore. B ra boond-a lame me tɩ Siyõ. Yaa Zerizalɛm goabg sẽnesã sẽn teesd yaangã. Bab-kãng n yaa kʋdr n yɩɩda.​—2Sã 5:7; 1Ki 11:4, 5.

• A Davɩɩd Biiga.

  Wae n yaa a Zeezi la b ra boond woto, tɩ wilgdẽ tɩ yaa yẽ la soab ning sẽn segd n deeg Rĩung ning b sẽn maan kaool n pʋlem tɩ yaa a Davɩɩd yageng n na n soogã.​—Zã 10:22, 23; Tʋ 5:12.

• A Israyɛll.

  Yaa yʋʋr ning Wẽnnaam sẽn pʋd a Zakoobã. B wa n boonda a yagensã fãa tɩ Israyɛlle. B ra wae n boonda a Zakoob kom-dibli piig la a yiibã yagensã t’a Israyɛll kom-dibli, a Israyɛll roogo, wall Israyɛll nebã (rapã). B ra boonda buud piigã soolmã sẽn da be rɩtgã sẽn welg n bas soolem ning sẽn da be goabgã tɩ Israyɛlle. La kaoosg zugẽ, b wa n boonda kiris-neb nins sẽn paam vʋʋsem sõngã zaeebã tɩ “Wẽnnaam Israyɛllã.”​—Ga 6:16; Sɩn 32:28; 2Sã 7:23; Ro 9:6.

• Akayi.

  Biiblã babg ning b sẽn da gʋls ne Gɛrkã pʋgẽ, Akayi wã yaa Rom soolem sẽn be Gɛrɛs goabga, t’a na-tẽngã yaa Korẽnte. Peloponɛs tõrã ne Gɛrɛs soolmã tẽn-sʋk tẽnsã ra yaa Akayi n so. (Tʋ 18:12)​—Ges-y vẽnegr ning sẽn yaa B13.

• Alamot.

  Yaa yɩɩlã wɛɛngẽ gom-bil sẽn dat n yeel tɩ “kom-pugli bɩ pʋg-bɩɩse.” Gom-bilã bilgda pʋg-bɩɩsã koees rãamd sẽn yaa raagã. B ra yɩɩnda woto sẽn na yɩl n wilg tɩ yʋʋm-teoog ning b sẽn segd n wẽ wã wall koeesã tog n yɩɩ raaga.​—1Ki 15:20; Yɩ 46:Sɩngr goamã.

• Albatr.

  Yaa parfẽ tʋg-bõonese. Sɩngrẽ wã, b ra maand-b-la ne kug b sẽn yãt Alabastrõ sẽnẽ. Alabastrõ yaa Ezɩpt tẽng a ye. B ra wae n maanda tʋgdã tɩ b yubli wã yaa bãanes sẽn na yɩl tɩ b tõe n pag b noyã, tɩ parfẽ wã ra yi ye. Kaoosg zugẽ, b wa n boonda kugr ning b sẽn tar n maand tʋgdã tɩ albatr me.​—Mrk 14:3.

• Alfa la Omega.

  Yaa Gɛrkã pipi gʋls-bilã la a yaoolem gʋls-bilã yʋya. Vẽnegr sebrã pʋgẽ, yaa naoor a tãab la b pʋd Alfa la Omega wã n naag taaba, tɩ yaa Wẽnnaam naam yʋʋre. Zĩis a tãabã fãa, b võorã rat n yeelame tɩ “pipi soabã la yaoolem soabã,” ne “sɩngrã la baasgã.”​—Vẽ 1:8; 21:6; 22:13.

• A Moyiiz Tõogã.

  Yaa Tõog ning a Zeova sẽn tũnug ne a Moyiiz n kõ Israyɛll nebã, b sẽn wa n be Sinayi we-raoogẽ wã yʋʋmd 1513 sẽn deng a Zeezi rogmã. B nong n boonda Biiblã pipi sɛb a nu wã me tɩ Tõogã.​—Zoz 23:6; Luk 24:44.

• Aram, Aram neba.

  Aram nebã yaa a Sɛm biig a Aram yagense. B ra bee Libã tãensã soolmã n tãag Mezopotami, la sẽn sɩng ne Toriis tãensã  sẽn be rɩtgã n tãag Damaase, hal n yõsg goabg soolmã. Soolem-kãng b sẽn boond ne Ebre tɩ Arammã wa n lebga Siiri, tɩ b boond a nebã tɩ Siiri neba.​—Sɩn 25:20; Tõ 26:5; Ooz 12:12.

• Arameyẽ.

  Yaa buud-gomd sẽn wõnd Ebre wã wʋsgo. B gʋls-biisã yaa a ye. Sɩngrẽ wã, yaa Aram nebã n da gomd Arameyẽ wã. La kaoosg zugẽ, wa n lebga buud-gomd Asiiri la Babilon soolmã neb sẽn da gomd ne taab leebgã wɛɛngẽ la b sõsg sasa. Pɛrs soolmã pʋgẽ me, Arameyẽ wã n da yaa buud-gomd ning nanambsã ne b poorẽ dãmbã sẽn da gomdã. (Ɛsd 4:7) Ɛsdras ne Zeremi la Dãniyɛll sɛbã babs kẽer ra gʋlsa ne Arameyẽ.​—Ɛsd 4:8–6:18; 7:12-26; Ze 10:11; Dã 2:4b–​7:28.

• Areyopaaz.

  Yaa tãng sẽn yaa zãntlg n be Atɛnne, Akropollã rɩtg sẽnese. B leb n da boonda bʋ-kaoodb nins sẽn tigimd taab be wã tɩ Areyopaaze. Epikiryẽ-rãmbã ne ɛstoyisiyẽ-rãmbã bãngdb talla a Poll n kẽng Areyopaazẽ wã, sẽn na yɩl t’a wilg bũmb nins a sẽn tẽedã võore.​—Tʋ 17:19.

• Armagedõ.

  Yaa Ebre gom-bil ning sẽn yaa Har Megido wã, t’a võorã rat n yeel tɩ “Megido tãnga.” B sã n gomd Armagedõ yelle, naoor wʋsgo, yaa “Wẽnnaam Sẽn-tõe-a-fãa wã ra-kãsengã zabrã” yell la b gomda, wakat ning “dũniyã gill rĩm-dãmbã” sẽn na n tigim taab n yik zabr ne a Zeova wã. (Vẽ 16:14, 16; 19:11-21)​—Ges-y TO-KÃSENGÃ.

• Arzãna.

  Yaa zĩig b sẽn maneg tɩ yaa neer tɩ tɩɩs la mood be be. Pipi arzãnã ra yaa Edɛnne, a Zeova sẽn maneg n kõ a Ãdem ne a Awa wã. A Zeezi sẽn wa n gomd ne bi-bɛɛgã b sẽn ka namsg ra-luk zug n yɛgl-a wã, a wilgame tɩ tẽngã gill na n wa lebga arzãna. Sãmbg sẽn kae, arzãn ning yell b sẽn gomd 2 Korẽnt rãmb 12:4 pʋgẽ wã yaa arzãn sẽn nan wate. B sẽn gomd a soab yell Vẽnegr 2:7 pʋgẽ wã yaa arzãn sẽn be saasẽ. ​—Sal 4:13; Luk 23:43.

• A Salomo zãndã.

  A Zeezi wakatẽ wã, ra yaa zĩig sẽn be samandã yaang sẽnes tɩ nebã tũud n loogdẽ. B ra luda zĩ-kãng tɩ wõnd zãnde. Neb wʋsg ra tẽedame tɩ yaa wẽnd-doog ning a Salomo sẽn da me wã sẽn sãam n kelle. A Zeezi kẽna be ‘waood wakate,’ tɩ pipi kiris-nebã me ra tigimd taab be n waoogd Wẽnnaam. (Zã 10:22, 23; Tʋ 5:12)​—Ges-y vẽnegr ning sẽn yaa B11.

• Astarte.

  Yaa Kanaã nebã wẽn-poaka, n yaa a Baal paga. B ra yetame tɩ yaa yẽ n sõngd-b zabr sasa, la tɩ yaa yẽ n kɩtd tɩ tɩɩsã, rũmsã la ninsaalbã sõor fɩɩgdẽ.​—1Sã 7:3.

• A Zakoob.

  Yaa a Izaak ne a Rebeka bi-ribla. Wẽnnaam wa n pʋd-a lame t’a Israyɛlle. A wa n lebga Israyɛll buudã yaaba. (B ra boonda Israyɛll buudã me tɩ Israyɛll nebã, la kaoosg zugẽ tɩ Zʋɩf-rãmbã.) A roga kom-dibli 12, tɩ bãmb ne b yagensã wa lebg Israyɛll buud 12. B ra ket n boonda Israyɛll buudã bɩ a nebã t’a Zakoobe.​—Sɩn 32:29; Mat 22:32.

• Azazɛll.

  Yaa Ebre gom-bil sẽn tõe n dat n yeel tɩ “bʋʋg sẽn menemde.” Paasg daarã, b basda bʋʋg ning b sẽn na n yãk t’a yɩ Azazɛllã t’a kẽ we-raoogã. Rẽ makda a sẽn tall nin-buiidã rɩẽ yel-wẽnã n looge.​—Maa 16:8, 10.

• A Zeezi waoongo.

  Biiblã babg ning b sẽn da gʋls ne Gɛrkã zĩis kẽere, gom-bi-kãensã bilgda wakat ning sẽn sɩng ne a Zeezi Kirist sẽn deeg naam saasẽ n lebg Wẽnnaam Rĩungã Rĩmã sẽn yaa dũni-kãngã yaoolem wakatã sɩngr n tar n watẽ. Kirist waoongã pa a sẽn na n wa n wẽneg n loog ye. Yaa wakat sẽn kaoosde, la sẽn pa wõnd a taaba.​—Mat 24:3.

• Azelzeyiya.​—

  Ges-y NIN-YOOLEM.

• A Zeova.

  Yaa woto la b lebg Tetragrammã ne Moore. (Tetragrammã yaa Wẽnnaam yʋ-peellã sẽn da gʋls ne Ebre gʋls-biis a naasã.) Biibl-kãngã pʋgẽ, yaa naoor 7 000 la zak la b gʋls yʋ-kãnga.​—Ges-y vẽnegr ning sẽn yaa A4 ne A5.

• A Zida.

  Yaa a Zakoob bi-ribl a naas-n-soaba, a Leya sẽn doge. A Zakoob sẽn wa n kolg kũumã, a togsa bãngr-gomd n wilg t’a Zida yageng n na n wa yɩ rĩm-kãsenga, n dɩ naam wakat sẽn kõn sa. A Zeezi yɩɩ a Zida yagenga. B ra boonda a Zida yagensã tɩ Zida buudã. B wa n boonda b soolmã me tɩ Zida. Yaa Zida buudã ne Benzame buudã, maan-kʋʋdbã la Levi buudã nebã n da yaa Zida sẽn yaa goabg rĩungã. Zida ra bee tẽngã goabga, tɩ Zerizalɛm ne wẽnd-doogã be be.​—Sɩn 29:35; 49:10; 1Rĩ 4:20; Ebr 7:14.

• Ãds-baga.

  Yaa ned sẽn get wĩntoogã, kiuugã la ãdsã sẽn kẽnd to-to wã sẽn na yɩl n togs beoog yɛla.​—Dã 2:27; Mat 2:1.

• Ãmiina.

  “Bɩ a yɩ woto,” bɩ “sɩd-sɩda.” Yaa Ebre gom-bil ning sẽn yaa aman t’a võorã rat n yeel tɩ “sẽn yaa sɩda, b sẽn tõe n teege.” Pʋleng bɩ pʋʋsg wall gomd ning poore, nebã yetame tɩ “ãmiina” sẽn na yɩl n wilg tɩ b sakame. Vẽnegr sebrã pʋgẽ, b boola a Zeezi tɩ Ãmiina.​—Tõ 27:26; 1Ki 16:36; Vẽ 3:14.

B

• Baal.

  Yaa Kanaã nebã wẽnnaam. B ra yetame tɩ yaa yẽ n so sa-gãongã, tɩ yaa yẽ n wat ne saagã, la tɩ yaa yẽ n kɩtd tɩ tɩɩsã, rũmsã la ninsaalbã sõor fɩɩgdẽ. B leb n da boonda wẽn-bõones me tɩ “Baal-dãmba.” Ebre wã pʋgẽ, gom-bilã võor yaa “Soaala, Zu-soaba.”​—1Rĩ 18:21; Ro 11:4.

• Bag-bʋgda.

  Yaa ned sẽn yet t’a tõe n bãnga sẽn wat beoogo. Biiblã wilgdame tɩ maan-kʋʋdb nins sẽn maand tɩtã, neb nins sẽn get ãds n  bʋgd bagrã, sẽn boond-b kɩɩmsã n paas neb a taab sẽn maand bũmb sẽn wõnd woto yaa bag-bʋgdba.​—Maa 19:31; Tõ 18:11; Tʋ 16:16.

• Baras.

  Yaa bũmb b sẽn da tar n makd koom zulum, t’a woglmã zems metr a 1,8. (Tʋ 27:28)​—Ges-y vẽnegr ning sẽn yaa B14.

• Bark pʋʋsg kũuni.

  Yaa zems-n-taar maoong b sẽn da kõt Wẽnnaam n na n pʋʋs-a bark bũmb nins a sẽn kõ-bã yĩnga, la a nonglmã yĩnga. B ra wãbda rũng ning b sẽn kʋ n maan maoongã, ne bur sẽn ning rabɩllã la bur sẽn pa ning rabɩllã. B ra segd n wãba nemdã daar-n-kãng bala.​—2Ki 29:31.

• Bat.

  Yaa makdg sẽn tar n makd bũmb sẽn yaa koom-koom. Vaeesdbã vaees n yãa yʋ-peds tɩ b gʋls “bat” b zutu, n mag n mik tɩ zemsa litr 22. Naoor wʋsgo, b tika batã makdg n geel n bãng makds nins b sẽn tar n makd bõn-koeemse, la bũmb toor-toor sẽn yaa koom-koom tɩ Biiblã gomd b yellã sẽn zem to-to. (1Rĩ 7:38; Eze 45:14)​—Ges-y vẽnegr ning sẽn yaa B14.

• Bã-loangdga.

  Yaa bãag sẽn longd neb tao-tao, la sẽn kʋʋda. Wẽnnaam mi n kɩtame tɩ bã-loangdg wa, sẽn na yɩl n sɩbg neba.​—Sõ 14:12; Eze 38:22, 23; Am 4:10.

• Bãnde.

  Yaa bũmbu, tʋʋmde, yell sẽn maane, wall bũmb sẽn pa wae sẽn maane, tɩ wilgd bũmb a to sẽn na n maan rũndã bɩ beoog-daare.​—Sɩn 9:12, 13; 2Rĩ 20:9; Mat 24:3; Vẽ 1:1.

• Bãngr-gomde.

  Yaa gomd Wẽnnaam sẽn vẽneg ned t’a togse. Tõe n yɩɩ Wẽnnaam daabã vẽnegr wall a moonego. Bãngr-gomd tõe n yɩɩ zãmsg Wẽnnaam sẽn vẽnege, Wẽnnaam noor wall a bʋ-kaoor togsgo, pa rẽ bɩ bũmb sẽn wat togsgo.​—Eze 37:9, 10; Dã 9:24; Mat 13:14; 2Pɩ 1:20, 21.

• Bãn-sɩlenga.

  Yaa raoog sẽn yaa wok tɩ bãn-sɩleng be a noorẽ wã, tɩ ka-koaadbã tar n lekd rũmsã. B rɩka bãn-sɩlengã n mak ne yam soab goam sẽn kɩtd tɩ sẽn kelgd-a wã tũ sagl-sõma wã. Naaf sã n mi n yaa tõtre, a tãooda bãn-sɩlengã a sẽn pa rat n sak lekrã yĩnga, tɩ pogend-a. Rẽ n so tɩ b mi n wa yeel tɩ ned ‘tãooda bãnga.’​—Tʋ 26:14; Bʋ 3:31.

• Bãong kõom.

  Yaa b sẽn na n wãag rao raoolem gãongo. Wẽnnaam ra kɩtame tɩ bãong kõom yaa tɩlɛ ne a Abrahaam, a kambã la a yagensã, la rẽ pa tɩlɛ ne kiris-nebã ye. Sẽn paase, Biiblã zĩis wʋsgo, b gomda bãong kõom yell tɩ makd bũmbu.​—Sɩn 17:10; 1Ko 7:19; Fi 3:3.

• Beege, Beegre.

  Yaa noor kɩɩsgo. Biiblã pʋgẽ, beegr ne “yel-wẽnd” fãa yaa yembre.​—Yɩ 51:3; Ro 5:14.

• Beelzebuub.

  Yaa a Sʋɩtãan sẽn yaa zĩn-dãmbã naab bɩ b taoor soabã yʋʋr a to. Tõe tɩ yaa Baal-zebuub sẽn yaa wẽnnaam ning Filisti nebã sẽn da waoogd Ekrõ wã yʋʋrã la b wẽnemd tɩ lebg Beelzebuub.​—2Rĩ 1:3; Mat 12:24.

• Bog-zulunga.

  Yaa Gɛrk gom-bil ning sẽn yaa abyssos, sẽn dat n yeel tɩ “bok sẽn zulum wʋsgo,” bɩ “bok zulum sẽn pa tõe n make, sẽn pa tar tɛka.” B sã n gomd bog-zulung yell Biiblã babg ning b sẽn da gʋls ne Gɛrkã pʋgẽ, yaa zĩig b sẽn tõe n pag neda, malɛk bɩ bũmb a to yell la b gomda. Tõe n yɩɩ yaoogo, wall bũmb a to.​—Luk 8:31; Ro 10:7; Vẽ 20:3.

• Boto.

  Yaa pɛɛl b sẽn pa maag b yĩng n maneg tɩ b ra tar n sẽt kord bɩ yondo, wala b rãmb nins sẽn tar n suiid koodã. B ra wae n wʋgd-a-la ne bʋ-sabl kõbdo, la yaa rẽ la b ra minim n yer kʋʋr wakate.​—Sɩn 37:34; Luk 10:13.

• Bõn-naandga, Bõn-naands pʋʋsgo.

  Bõn-naandg yaa bũmb b sẽn tags n naane, wall b sẽn ges n naane, tɩ neb tõe n waoogd-a wa b wẽnnaam. Bõn-naands pʋʋsg yaa ned sẽn na n nand bõn-naandga, n nong-a wall a waoogd-a.​—Yɩ 115:4; Tʋ 17:16; 1Ko 10:14.

• Bõn-paklg sẽn yaa sõngã.

  Yaa bõn-paklg b sẽn maan ne sãnem halaal tɩ pɩnda, tɩ b gʋl a zug ne Ebre yaa: “Sõmblem yita a Zeova nengẽ.” B ra ningd-a-la maan-kʋʋdb kãsmã zu-vindgã taoore. (Yik 39:30)​—Ges-y vẽnegr ning sẽn yaa B5.

• Bugum laase.

  Yaa laas b sẽn maan ne sãnem, wanzuri wall zũudu, tɩ b tar n tʋmd sɛk-roogẽ wã la wẽnd-doogẽ wã. B tar n yõogda wisdu, n vaagd maandã bug-saalã tẽn-kugrã zugu, la lamdã bug-zẽend sẽn be sãnem fɩtl-doagendgẽ wã. B ra boond-b lame me tɩ wisd yõogr laase.​—Yik 37:23; 2Ki 26:19; Ebr 9:4.

• Bugum mogre.

  Yaa zĩig “sẽn dɩt bugum ne kidbri,” la pa zĩig sɩd-sɩd ye. B boond-a lame me tɩ “kũum a yiib-n-soabã.” B na n loba yel-wẽn-maandb nins sẽn pa tek yamã, a Sʋɩtãana, la baa kũumã ne Yaoogã (bɩ Hadɛs) bugum mogrã pʋgẽ. B sẽn na n lob malɛk ne kũum la Hadɛs me bugum mogrẽ wã, tɩ bugum yaool n pa tõe n maan b baa a ye bũmbã, wilgdame tɩ bugum mogrã makda sãoong wakat sẽn kõn sa yĩnga, la pa namsg wakat sẽn kõn sa yĩng ye.​—Vẽ 19:20; 20:14, 15; 21:8.

• Bull.

  Yaa Zʋɩf-rãmbã tũudmã kalãndriye wã kiuug a nii-n-soabã yʋʋre. La a yaa buud a taabã kiuug a yiib-n-soabã. A yita gom-bil a to võor sẽn yaa “wom” pʋgẽ. A sɩngda zĩ-likr kiuugã pʋɩ-sʋk n tãag sɩpaolg kiuugã pʋɩ-sʋka. (1Rĩ 6:38)​—Ges-y vẽnegr ning sẽn yaa B15.

• Bur b sẽn dɩk n kõ Wẽnnaam.

  Yaa bur piig la a yiib b sẽn da rogend taabl zug sɛk-roogã ne wẽn-doogã Zĩ-sõngã pʋgẽ. B rogend-b-la ruls a yiibu, tɩ rulg fãa yaa bur a yoobe. B boond-a lame me tɩ ‘bur sẽn dogend taab zugu,’ la “bur  b sẽn wilgi.” Vʋʋsg daar fãa, b ra ledgda burã ne bur b sẽn nan maane. Yaa maan-kʋʋdbã bal n da tar sor n na n wãb bur ning b sẽn ledgã. (2Ki 2:4; Mat 12:4; Yik 25:30; Maa 24:5-9; Ebr 9:2)​—Ges-y vẽnegr ning sẽn yaa B5.

• Bur b sẽn wilgi.​—

  Ges-y BUR B SẼN DƖK N KÕ WẼNNAAM.

• Bur sẽn pa ning rabɩll tigrã.

  Tig-kãsems a tãabã Israyɛll nebã sẽn da maand yʋʋmd fãa wã sʋka, tig-kãng la pipi soaba. A ra sɩngda Nizã kiuugã rasem 15, rat n yeel tɩ Pakã tigrã vẽkembeoogo, n kaoos rasem a yopoe. Bur sẽn pa ning rabɩll bal la nebã ra wãbda, tɩ woto ra tẽegd-b Ezɩpt yiibã.​—Yik 23:15; Mrk 14:1.

• Bʋ-kaoodba.

  Yaa rap a Zeova sẽn da yãk sẽn na yɩl tɩ b fãag a nin-buiidã, nand tɩ Israyɛll soolmã paam rĩm-dãmb sẽn yaa ninsaalba.​—Bʋ 2:16.

• Bʋ-kaood-sõngdba.

  Babilon naamã sasa, bʋ-kaood-sõngdbã ra yaa soolem toɛy-toɛyã taoor dãmb sẽn da mi tõogã, la sẽn da pa tar naam wʋsg ye. Rom soolmã pʋgẽ, bʋ-kaood-sõngdbã ra yaa goosneema wã yel-gɛtba. Wala makre, yaa bãmb n da get tɩ zũnd-zãnd ra zĩndi, n get ligdã yelle, n kaood sẽn kɩɩsd-b tõogã bʋʋdo, la b kõt noor tɩ b sɩbgd neba.​—Dã 3:2; Tʋ 16:20.

• Bʋ-kaoor geere.

  Wae n yaa zĩig b sẽn maneg tɩ yaa zãntlg la sẽn tar rʋʋdse, tɩ nanambsã tõe n zĩnd be n gom ne kʋʋngã la b wilg-b sard ning b sẽn dɩkã. B sã n gomd “Wẽnnaam bʋʋdã kaoob geer” ne “Kiristã bʋ-kaoorã geer” yelle, makda bũmb ning Wẽnnaam sẽn maane, sẽn na yɩl tɩ b wa kao ãdem-biisã bʋʋdã.​—Ro 14:10; 2Ko 5:10; Zã 19:13.

• Bʋ-kaoorã daare.

  Yaa daar bɩ wakat Wẽnnaam sẽn yãke, n na n bʋ neb sulli, wall buud toor-toore, pa rẽ bɩ ãdem-biisã fãa. Tõe n yɩɩ sasa Wẽnnaam sẽn na n sãam neb nins a sẽn ges tɩ b segda ne kũumã. Leb n tõe n yɩɩ wakat b sẽn pak sor tɩ neb tõe n põse, la b paam vɩɩm sẽn kõn sa. A Zeezi ne a tẽn-tʋmdbã goma “Bʋ-kaoor daar” sẽn wat yelle, n wilg tɩ pa na n yɩ sẽn vɩ-bã bal bʋʋd kaoob ye. La yaa sẽn ki-bã me.​—Mat 12:36.

• Bũmb b sẽn gãneg n deeg samde.

  Yaa bũmb ned sẽn kõ n deeg samde, tɩ wilgdẽ t’a na n wa yaoome la a lebs n deeg bũmbã. A Moyiiz Tõogã ra tara noy bũmb b sẽn gãneg n deeg samdã wɛɛngẽ, sẽn na yɩl n kogl Israyɛll neb nins sẽn yaa naong rãmb la sẽn pa tar sõangdã.​—Yik 22:26; Eze 18:7.

• Bũmb b sẽn tar n ningd bãnde.

  Yaa bũmb b sẽn da tar n tikd bũmb zug sẽn na yɩl n wilg sẽn so-a bũmbã, bũmbã sã n yaa halaale, wall n wilg tɩ b sakame n na n maan bũmbu. (Naoor wʋsgo, yaa tãnd bɩ sirbd zug la b tikda.) Pĩnd wẽndẽ wã, b ra maanda bũmb b sẽn tar n ningd bãndã ne bũmb sẽn yaa kɛgenga (kugri, wob-yẽnd wall raoogo), n ning gʋls-biis wall bũmb naand a zugu. B mi n gomda bũmb b sẽn tar n ningd bãnd yelle, tɩ yaa sẽn na n wilg tɩ bũmb yaa halaale, tɩ yaa ned so bũmbã, wall tɩ yaa bũmb sẽn solge.​—Yik 28:11; Ne 9:38; Vẽ 5:1; 9:4.

D

• Dagõ.

  Yaa Filisti nebã wẽnnaam. B pa mi gom-bilã sẽn yitẽ takɩ ye. La bãngdb kẽer tagsdame t’a yaa Ebre wã gom-bil sẽn yaa dagh (zĩnfu).​—Bʋ 16:23; 1Sã 5:4.

• Darik.

  Yaa Pɛrs nebã ligd-koɛɛng sẽn maan ne sãnem t’a zɩslmã yaa garam a 8,4. (1Ki 29:7)​—Ges-y vẽnegr ning sẽn yaa B14.

• Darkem.

  Biiblã babg ning b sẽn da gʋls ne Gɛrkã pʋgẽ, yaa Gɛrk-rãmbã wanzuri ligd-koɛɛnga, t’a zɩslmã zems garam a 3,4. Biiblã babg ning b sẽn da gʋls ne Ebre wã pʋgẽ, b gomda sãnem Darkem sẽn da be Pɛrs nebã wakatẽ wã yelle. Darkem-kãng ne Darikã zema taaba. (Ne 7:70; Mat 17:24)​—Ges-y vẽnegr ning sẽn yaa B14.

• Dekapoll.

  Sɩngrẽ wã, ra yaa Gɛrk-rãmbã tẽns piig sẽn naag taaba (Yaa Gɛrkã gom-bil ning sẽn yaa deka sẽn dat n yeel tɩ “piigã,” ne gom-bil ning sẽn yaa polis sẽn dat n yeel tɩ “tẽngã” sẽn naag taaba). Leb n da yaa babg ning sẽn be Galile mogrã ne Zʋrdẽ kʋɩlgã yaangã yʋʋre, bala tẽn-kãens wʋsg ra bee be. Tẽn-kãens ra yaa Gɛrɛs nebã minundã la b leebgã pãng zĩisi. A Zeezi tũu bab-kãng n looge, la b pa wilg t’a Zeezi kẽnga tẽng baa a ye pʋgẽ ye. (Mat 4:25; Mrk 5:20)​—Ges-y vẽnegr ning sẽn yaa A7 ne B10.

• Deniye.

  Yaa Rom nebã ligd-koɛɛng sẽn maan ne wanzuri, t’a ye fãa zɩslem zems garam a 3,85, tɩ b maan a Sezaar naand a neng a ye zugu. Yaa tʋm-tʋmd daar a ye tʋʋmd yaoodo. Rom nanambsã ra kɩtame tɩ Zʋɩf fãa ra segd n yao “yõor-yaoodã” deniye a ye. (Mat 22:17; Luk 20:24)​—Ges-y vẽnegr ning sẽn yaa B14.

• Dẽenem biisi.

  Yaa biis nins b sẽn dengd n yãk kood tigsg wakatã. Leb n yaa bũmb fãa pipi biis wall b kamba. A Zeova ra yeela Israyɛll nebã tɩ b kõ-a b dẽenem biisi, tɩ yaa ninsaala, rũng wall koodo. Israyɛll buudã tõr ra kõta Wẽnnaam b dẽenem biisã, Bur sẽn pa ning rabɩll tigr sasa la Pãntekotã sasa. “Dẽenem biisã” leb n makda Kiristã ne a karen-biis nins sẽn paam vʋʋsem sõng zaeebã.​—1Ko 15:23; Sõ 15:21; Ye 3:9; Vẽ 14:4.

• Divẽ kũuni.

  Yaa divẽ b sẽn da kiigd tẽn-kugrã zugu. B ra kiigd-a-la maand a taabã fãa la bal b sẽn da kõt Wẽnnaamã zugu. A Poll rɩka makr ne divẽ kũunã, n na n wilg t’a saka ne yamleoog n  na n mong a meng kiris-neb a taabã yĩnga.​—Sõ 15:5, 7; Fi 2:17.

• Dũniyã.

  Yaa Gɛrk gom-bil ning sẽn yaa aion wã. B sã n wa gomd yɛlã sẽn yaa to-to, bɩ bũmb toor-toor sẽn maan tɩ kɩt tɩ wakat wall zãmaan ning yaa toor ne a taabã, yaa gom-bi-kãng la b pʋta. Biiblã gomda “dũni-kãngã” yelle, tɩ bilgd yɛlã sẽn yaa to-to dũniyã pʋgẽ, la dũniyã rãmb yel-manesem sẽn yaa to-to wã. (2Tɩ 4:10) Ne kaoolã Tõog maasem, Wẽnnaam kɩtame tɩ zãmaan sɩnge, tɩ neb kẽer boondẽ tɩ Israyɛll nebã bɩ Zʋɩf-rãmbã zãmaane. A Zeezi Kirist sẽn ki tɩ yɩ maoongã maasem yĩng me, Wẽnnaam kɩtame tɩ zãmaan a to sɩnge. Zãmaan-kãng yaa kiris-neb nins sẽn paam vʋʋsem sõng zaeebã wakate. Rẽ n yɩ zãmaan-paalg sɩngre, sẽn yaa bũmb nins kaoolã Tõogã sẽn da pĩnd n togsã pidsgu. Gom-bil ning sẽn yaa dũniyã leb n tõe n bilga zãmaan toor-toor bɩ yɛl toor-toor sẽn looge, wall sẽn wate.​—Mat 24:3; Mrk 4:19; Ro 12:2; 1Ko 10:11.

• Dũniyã saabo.

  Yaa wakat ning sẽn tar n dabd a Sʋɩtãan dũniyã bɩ a sẽn sigl dũniyã yɛl to-to wã saabã. Wakat kãng ne Kiristã waoongã tũuda taaba. A Zeezi na n wa kɩtame tɩ malɛgsã yiis “nin-wẽnsã nin-tɩrsã sʋka,” n sãam-ba. (Mat 13:40-42, 49) A Zeezi karen-biisã ra rat n bãnga ‘saabã’ sẽn na n yɩ wakat ninga. (Mat 24:3) Nand t’a Zeezi leb saasẽ, a pʋlma a karen-biisã t’a na n zĩnda ne-b n tãag wakat kãnga.​—Mat 28:20.

E

• Ebre.

  Yɩɩ a Abram (a Abrahaam) la b bool pipi tɩ Ebre, sẽn na yɩl tɩ b bãng yẽ n bak ne a yagsã sẽn da yaa Amoor nebã. Rẽ poore, b ra boonda a Abrahaam yagens nins a yageng a Zakoob sẽn dogã tɩ Ebre-rãmba, la b boond b buud-gomdã me tɩ Ebre. A Zeezi wakatẽ wã tɩ Arameyẽ wã gom-biis wʋsg kẽe Ebre wã. Yaa rẽ la a Zeezi ne a karen-biisã ra gomda.​—Sɩn 14:13; Yik 5:3; Tʋ 26:14.

• Edom.

  Yaa yʋʋr b sẽn pʋd a Izaak biig a Ezayu. A Ezayu (Edom) yagensã tɩ zab n deega Seyɩɩr sẽn yaa soolem sẽn yaa tãens n be Mog-kɩɩngã ne Akaba sʋkã. B wa n boonda soolmã tɩ Edom. (Sɩn 25:30; 36:8)​—Ges-y vẽnegr ning sẽn yaa B3 ne B4.

• Efa.

  Yaa makdg b sẽn tar n makd bõn-koeemse, la koodo. B boonda laokã me tɩ efa. A zemsa bat makdgã b sẽn tar n makd bũmb sẽn yaa koom-koomã. Rẽnd a zemsa litr 22. (Yik 16:36; Eze 45:10)​—Ges-y vẽnegr ning sẽn yaa B15.

• Efood.

  Yaa fu-koɛɛg maan-kʋʋdbã sẽn da yere. Maan-kʋʋdb kãsmã ra yera efood sẽn yaa toor zalle. A efoodã taoore, b ra ninga yãoog lutg sẽn tar kug-neeb piig la a yiibu. (Yik 28:4, 6)​—Ges-y vẽnegr ning sẽn yaa B5.

• Efrat.

  Yaa Aazi goabg sẽnes kʋɩlg ning sẽn yaa wok la kãseng n yɩɩdã. Leb n yaa Mezopotami kʋɩls a yiibã sẽn yaa-b kãsems n yɩɩdã a ye. Yaa Sɩngr 2:14 la b gom Efrat kʋɩlgã yell pipi, n sõdg-a n naag Edɛn kʋɩls a naasã. B ra mi n boond-a lame bal tɩ “Kʋɩlgã.” (Sɩn 31:21) Kʋɩl-kãng n da yaa tẽng ning b sẽn da kõ Israyɛll nebã rɩtg toadga. (Sɩn 15:18; Vẽ 16:12)​—Ges-y vẽnegr ning sẽn yaa B2.

• Efrayim.

  Yaa a Zozɛf bi-ribl a yiib-n-soabã yʋʋre. B wa n boonda Israyɛll buud a yembr ne yʋ-kãnga. Israyɛll soolmã sẽn welgã poore, Efrayim buudã sẽn da yaa buud ning sẽn tar pãng n yɩɩd buud piigã sʋkã wa n makda buud piigã rĩungu.​—Sɩn 41:52; Ze 7:15.

• Elull.

  Yaa yʋʋr b sẽn pʋd Zʋɩf-rãmbã tũudmã kalãndriye wã kiuug a yoob-n-soabã, Babilon yembdã poore. La a yaa buud a taabã kiuug piig la a yiib-n-soabã. A sɩngda sa-sik kiuugã pʋɩ-sʋk n tãag bõn-bɩʋʋng kiuugã pʋɩ-sʋka. (Ne 6:15)​—Ges-y vẽnegr ning sẽn yaa B15.

• Epikiryẽ-rãmbã bãngdba.

  Yaa Gɛrk-rãmbã bãngd a Epikir (341-270 S.D.Z.R.) poorẽ dãmbã. B ra tagsdame tɩ bũmb ning sẽn tar yõod n yɩɩd ned vɩɩm pʋgẽ yaa a sẽn na n noogd a yõore.​—Tʋ 17:18.

• Erood.

  Yaa zak a ye neb sondre, tɩ Rom nanambsã ra yãkd-b tɩ b rɩt naam Zʋɩf-rãmbã zutu. A Erood le Gãrã yʋʋrã yiime, a sẽn lebs n me Zerizalɛm wẽnd-doogã, n paas a sẽn kɩt tɩ b kʋ kom-bõonegã a sẽn wa n baood a Zeezi n na n kʋ wã yĩnga. (Mat 2:16; Luk 1:5) B yãka a Erood Arkelayuus ne a Erood Ãntipaas sẽn yɩ a Erood le Gãrã kambã tɩ b rɩ naam b ba wã soolmã babs kẽer zutu. (Mat 2:22) A Ãntipaas ra yaa tetark tɩ b ra wae n boond-a tɩ “rĩma.” A Zeezi koɛɛgã mooneg sẽn kaoos yʋʋm a tãab la pʋɩ-sʋkã sasa tɩ yẽ n da rɩt naam. A kell n dɩɩ naam n tãag Tʋʋm sak 12 sẽn gomd bũmb nins yellã sẽn wa n maandẽ wã. (Mrk 6:14-17; Luk 3:1, 19, 20; 13:31, 32; 23:6-15; Tʋ 4:27; 13:1) Rẽ poore, yɩɩ a Erood Agripa pipi soabã sẽn yaa a Erood le Gãrã yagengã n dɩ naam wakat bilf pʋgẽ, bala Wẽnnaam malɛk n wẽ-a t’a ki. (Tʋ 12:1-6, 18-23) A biig a Erood Agripa a yiib-n-soabã n deeg a zĩig n dɩ naam hal n tãag wakat ning Zʋɩf-rãmbã sẽn tõdg Rom naabã.​—Tʋ 23:35; 25:13, 22-27; 26:1, 2, 19-32.

• Erood poorẽ dãmbã.

  Ra yaa neb sull sẽn nong b tẽngã tɩ looge, la sẽn da teend Erood-rãmbã bũmb ning fãa b sẽn da maand pʋgẽ, tɩ b rɩt naam Rom nanambsã yʋʋr yĩnga. Wõnda Sadiseyẽ-rãmb kẽer da bee sul-kãng pʋgẽ. A Erood poorẽ dãmbã naaga Fariziyẽ-rãmbã n kɩɩs a Zeezi.​—Mrk 3:6.

• Etanim.

  Yaa yʋʋr b sẽn pʋd Zʋɩf-rãmbã tũudmã kalãndriye wã kiuug a yopoe-n-soabã. La a  yaa buud a taabã pipi kiuugã. A sɩngda bõn-bɩʋʋng kiuugã pʋɩ-sʋk n tãag zĩ-likr kiuugã pʋɩ-sʋka. Zʋɩf-rãmbã sẽn yi Babilon n lebg n wa wã poore, b ra boond-a lame tɩ Tisri. (1Rĩ 8:2)​—Ges-y vẽnegr ning sẽn yaa B15.

• Etiyopi.

  Yaa pĩnd wẽndẽ tẽng sẽn da be Ezɩpt goabga. Yaa rũndã-rũndã Ezɩptã goabg babgã ne rũndã-rũndã Sudã wã rɩtg babgã pʋɩ-sʋka. B mii n boond-a lame me ne Ebre tɩ “Kuus.”​—Ɛst 1:1.

• Ɛrmes.

  Yaa Gɛrk-rãmbã wẽnnaam sẽn da yaa a Zees biiga. Gɛrk-rãmbã ra tagsdame t’a Ɛrmes la b wẽnnaam-dãmbã koe-taasda, n leb n yaa b wẽnnaam ning sẽn kõt gom-minimã. Yaa rẽ yĩng la Listr nebã sẽn tudg n bool a Poll t’a Ɛrmesã.​—Tʋ 14:12.

• Ɛstoyisiyẽ-rãmbã.

  Yaa Gɛrɛs soolmã bãngdb lekoll a ye neba. B ra tẽedame tɩ ninsaal sã n dat n paam sũ-noogo, a segd n vɩɩmdame tɩ zems a sẽn tagsde, la wa yɛlã sẽn yaa to-to wã. Sã n yaa ne bãmba, ned sẽn sɩd yaa yam soab toog kae ne yõ-noogre, la a pa zoet toog me ye.​—Tʋ 17:18.

F

• Fadgo.

  Yaa yaood tẽng bɩ naab sẽn na n yao a to, n na n wilg t’a sak n deegame tɩ yẽ n so-a, sẽn na yɩl tɩ laafɩ zĩnd b sʋka, wall sẽn na yɩl t’a kogl-a. (2Rĩ 3:4; 18:14-16; 2Ki 17:11) Fadg leb n yaa yaood b sẽn da rogend ned kam fãa t’a segd n yao.​—Ne 5:4; Ro 13:7.

• Farawõ.

  Yaa Ezɩpt rĩm-dãmbã naam yʋʋre. Farawõ-rãmb a nu yʋ-pɛɛl la b pʋd Biiblã pʋgẽ, (a Sɩsak, a So, a Tiraka, a Neko, ne a Hofra) la b pa togs kẽer yʋy ye. Wala makre, b rãmb nins sẽn zĩnd a Abrahaam, a Moyiiz la a Zozɛf wakatẽ wã.​—Yik 15:4; Ro 9:17.

• Fariziyẽ-rãmba.

  Yaa Zʋɩf-rãmbã tũudum sul-kãseng a ye sẽn da be a Zeezi la a karen-biisã wakatẽ wã. B ra pa maan-kʋʋdb ye. La b ra tũuda Tõogã dem-dem hal baa yel-bõonesã pʋgẽ, la b ra kɩt tɩ minundã ne Tõogã zem taaba. (Mat 23:23) B ra kisa Gɛrk-rãmbã minung buud fãa. B sẽn da yaa Tõogã la minundã bãngdbã yĩnga, b ra tõogdame tɩ neb wʋsg sakd b raabã. (Mat 23:2-6) Fariziyẽ-rãmb kẽer da yaa Sãnedrẽ wã neba. B ra wae n wẽeda no-koeemd ne a Zeezi Vʋʋsg daarã la minundã tũub wɛɛngẽ, ne a Zeezi sẽn da mi n be ne yel-wẽn-maandb la yõor-yaood dɛɛgdbã yĩnga. B kẽer wa n lebga kiris-neba. Wala makre, Tars rao a Solle.​—Mat 9:11; 12:14; Mrk 7:5; Luk 6:2; Tʋ 26:5.

• Filisti, Filisti nebã.

  Yaa soolem sẽn da be Israyɛll goabg sẽnese, mogrã noor tɩ b boond-a tɩ Filisti. B ra boonda Kɛrɛt neb nins sẽn yik n tɩ zĩnd be wã tɩ Filisti neba. A Davɩɩd zab n tõog-b lame, la b kell n sooga b mense, n da yaa Israyɛll nebã bɛɛb wakat fãa. (Yik 13:17; 1Sã 17:4; Am 9:7)​—Ges-y vẽnegr ning sẽn yaa B4.

• Fu-lilldgã.

  Yaa peen-neer b sẽn wʋge, n gʋl seribẽ-rãmb naand peendã zugu. Sɛk-roogã ne wẽnd-doogã pʋgẽ, yaa peen-kãng n da welgd Zĩ-sõngã ne Zĩ-sõng sẽn yɩɩdã. (Yik 26:31; 2Ki 3:14; Mat 27:51; Ebr 9:3)​—Ges-y vẽnegr ning sẽn yaa B5.

• Fut pãrsgo.

  Zʋɩf-rãmbã ra wae n pãrsda b fut n na n wilg b sũ-sãanga. Naoor wʋsgo, yaa fuugã loor bal la b pãrgda, sẽn na yɩl tɩ yãoogã tondẽ. B pa pãrsd fuugã fãa n kɩt tɩ ned pa le tõe n yeelg-a ye.​—Sɩn 37:34; Ɛst 4:1; Tʋ 14:14.

G

• Galaad.

  Yaa Zʋrdẽ kʋɩlgã yaang n tãag Zabok longã rɩtg la a goabg babgã sẽn sakd koodã la b ra wae n boond woto. Wakat ning me, yaa Israyɛll buudã neb soolem sẽn be Zʋrdẽ kʋɩlgã yaangã, zĩig ning Rubɛn buudã, Gaad buudã la Manase buudã pʋɩ-sʋkã sẽn da be wã. (Sõ 32:1; Zoz 12:2; 2Rĩ 10:33)​—Ges-y vẽnegr ning sẽn yaa B4.

• Geera.

  Yaa kɩlo zɩslem sẽn zems garam 0,57. A zemsa sɩkl pʋɩɩr a ye pʋɩ pisi zugu. (Maa 27:25)​—Ges-y vẽnegr ning sẽn yaa B14.

• Gernaad tɩɩg bila.

  Yaa tɩɩg bil sẽn yaa gilg wa pomm, n tar bũmb sẽn yaa wa maanf a sɛɛgẽ wã. A poakã yaa taoko, n tar biis sẽn tar koom wʋsgo, tɩ bil fãa tar bi-bõones sẽn yaa miid-miid wall miuug mas. B nagsa maan-kʋʋdb kãsmã kobr sẽn yaa bãg-vɩɩd n yaa kẽeg haoo wã noor ne bõn-gils sẽn wõnd gernaad tɩɩg biisi. B nagsa ra-lugs nins b sẽn boond tɩ Yakin ne Bowaaz sẽn be wẽnd-doogã noorã pugli wã me ne bõn-gils sẽn wõnd gernaad tɩɩg biisi.​—Yik 28:34; Sõ 13:23; 1Rĩ 7:18.

• Gɛrk.

  Yaa Gɛrɛs tẽngã neb buud-gomde. Leb n tõe n yaa ned sẽn dog Gɛrɛse, bɩ ned roagdb sẽn yit beenẽ. Biiblã babg ning b sẽn da gʋls ne Gɛrkã pʋgẽ, gom-bilã tõe n makda neb nins fãa sẽn pa Zʋɩf-rãmbã, bɩ neb nins sẽn zãms Gɛrɛs tẽngã neb buud-gomd la b minundã.​—Zow 3:6; Zã 12:20.

• Gɛtã.

  Yaa ned Wẽnnaam sẽn kõ tõog t’a tõe n bãng a raabã, ned nin b sẽn puk t’a tõe n yã bũmb neb a taabã sẽn pa ne, wall a wʋm bũmb võor neb a taabã sẽn pa mi. Ebre gom-bilã yita gom-bil võor sẽn yaa “yã” pʋgẽ. Tõe n yaa yã bũmb vẽeneg-vẽeneg wall makre. Nebã ra kẽnda gɛt nengẽ sẽn na yɩl n paam sagl-sõma b zu-loees wɛɛngẽ.​—1Sã 9:9.

• Gitit.

  Yaa yɩɩlã wɛɛngẽ gom-bil b sẽn pa mi a võorã takɩ ye. La wõnda a yita gath sẽn yaa Ebre gom-bilã pʋgẽ. Kẽer tagsdame tɩ yaa yʋʋm-teed b sẽn wẽed la b yɩɩndẽ, b sẽn wat n  maand divẽ, bala gath rat n yeelame tɩ vẽ wẽkr boko.​—Yɩ 81:Sɩngr goama.

• Guvɛrneer.

  Yaa soolem taoor soab Rom soolmã taoor dãmb sẽn yãke. A tara naam bʋ-kaoorã wɛɛngẽ la sodaarã wɛɛngẽ. La baa a sẽn segd n wilg soolmã taoor dãmb a sẽn yãk yam ningã, yẽ naamã n da yɩɩd soolmã pʋgẽ.​—Tʋ 13:7; 18:12.

• Guvɛrneer-dãmbã taoor soaba.

  Yaa na-pʋgdg wall Babilon la Pɛrs soolmã guvɛrneere. Yaa rĩmã n da yãkd-a t’a lebg naaba.​—Ɛsd 8:36; Dã 6:1.

• Gũuda.

  Yaa ned sẽn gũud laog wall neba, sẽn na yɩl tɩ bũmb da maan-b ye. Naoor wʋsgo, yaa yʋng la a tʋmda, tɩ yell sã n beẽ bɩ a maan rãamd tɩ nebã bãnge. Gũudbã ra wae n yasa galʋ-tẽngã lals zutu, la gasd zut n getẽ sẽn na yɩl n paam n yã bũmb nins sẽn be yɩɩg n watẽ wã. Sodaarã pʋgẽ me, b ra boond-b lame tɩ gũudba. D tõe n yeelame tɩ no-rɛɛsdbã ra yaa wa Israyɛll buudã gũudba, n da keoogd-b ne sãoong sẽn wate.​—2Rĩ 9:20; Eze 3:17.

• Gʋlsda.

  Yaa ned sẽn da get Biiblã babg ning b sẽn da gʋls ne Ebre wã n lebsd n gʋlsdẽ. A Zeezi sẽn wa n be tẽng zugã, yaa neb sull sẽn da mi Tõogã la b ra boond woto. B ra kisa a Zeezi.​—Ɛsd 7:6; Mrk 12:38, 39; 14:1.

• Gʋls-sõamyã.

  Yaa goam nins Wẽnnaam sẽn vẽneg tɩ b gʋlsã. Yaa Biiblã babg ning b sẽn da gʋls ne Gɛrkã pʋgẽ bal la d yãt gom-bi-kãngã.​—Luk 24:27; 2Tɩ 3:16.

H

• Hadɛs.

  Yaa Gɛrk gom-bila, t’a võorã ne Ebre gom-bil ning sẽn yaa “Seollã” yaa a yembre. D lebg-a lame tɩ “Yaoogo,” (pipi gʋls-bilã yaa bedre) n na n wilg tɩ yaa ned buud fãa sẽn dabdẽ wã.​—Ges-y YAOOGO.

• Higayon.

  Yaa gom-bil sẽn wilgd yɩɩll sẽn segd n yɩɩl to-to. Gom-bilã sẽn be Yɩɩn-sõamyã 9:16 pʋgẽ wã tõe n dat n yeelame tɩ b bas yɩɩlã sẽn na yɩl tɩ b wʋm pɛndgã rãamd sõma, wall sẽn na yɩl tɩ nebã bʋgse.

• Hĩn.

  Yaa makdg b sẽn tar n makd bũmb sẽn yaa koom-koom. B boonda laokã me tɩ hĩn. B sã n tik kʋdemd yel-mit a Josèphe sẽn yeel tɩ hĩn yaa Atɛn nebã kõoz a yiibã n mage, a zemsa litr a 3,67. (Kõoz yaa pĩnd wẽndẽ Gɛrɛsã neb makdga.) (Yik 29:40)​—Ges-y vẽnegr ning sẽn yaa B14.

• Homɛɛr.

  Yaa makdg b sẽn tar n makd bõn-koeemse. A zemsa koore. B sã n tik bat makdgã n mage, a zemsa litr 220. (Maa 27:16)​—Ges-y vẽnegr ning sẽn yaa B14.

• Horɛɛb, Horɛɛb tãnga.

  Yaa soolem ning sẽn yaa tãens n gũbg Sinayi tãngã. B boonda Horɛɛb tãngã me tɩ Sinayi tãnga. (Yik 3:1; Tõ 5:2)​—Ges-y vẽnegr ning sẽn yaa B3.

I

• Iliri.

  Yaa Rom soolmã babg a ye sẽn da be Gɛrɛs rɩtg sẽnesã. A Poll sẽn wa n gilgd n moond koɛɛgã, a taa hal Iliri soolmẽ wã. La b pa wilg a sã n moona koɛɛgã soolmã pʋgẽ, wall a sã n moon n taa Iliri toadgẽ wã bal ye. (Ro 15:19)​—Ges-y vẽnegr ning sẽn yaa B13.

• Izop.

  Yaa tɩɩg t’a wilã ne a vãadã yaa bãanese, tɩ b ra tar n sukd zɩɩm pʋg wall koom pʋg n mesd ned wall bũmbu, a yɩlgr yĩnga. Tõe tɩ yaa tɩɩg ning b sẽn boond tɩ marzolɛnnã. (Origanum maru; Origanum syriacum). Tõe tɩ izop ning yell b sẽn gomd Zã 19:29 wã yaa marzolɛnnã b sẽn vil ka-zẽeg kãnkãr zugu (Sorghum vulgare), bala ka-zẽeg kãnkãr yaa wok tɩ b sã n dɩk bũmb sẽn fõogd koomã n los divẽ-miisgẽ wã n vil n zẽk n tees bɩ tõe n ta a Zeezi noorã.​—Yik 12:22; Yɩ 51:7.

K

• Kaab.

  Yaa makdg sẽn tar n makd bõn-koeemse. B sã n tik bat makdgã n mage, a zemsa litr a 1,22. (2Rĩ 6:25)​—Ges-y vẽnegr ning sẽn yaa B14.

• Kalde, Kalde neba.

  Yaa soolem la buud ning sẽn da be Tɩɩgr ne Efrat kʋɩlsã sʋka, sẽn kolg zĩis nins b koomã sẽn kẽed mogrẽ wã. B wa n boonda Babiloni ne a nin-buiidã woto. B ra boonda neb nins sẽn zãms siãnsã yɛlã, kʋdemdã yɛlã, buud-goamã, la sẽn get-b ãds n togsd beoog yɛlã la sẽn maand tɩt me wã tɩ ‘Kalde ãds-bagba.’​—Ɛsd 5:12; Dã 4:7; Tʋ 7:4.

• Kalwaare.

  Yaa sʋy buud sẽn naagd taab wʋsg n yɩgda. A Moyiiz Tõogã ra wilgame tɩ b yaa yɩlma, tɩ nebã tõe n wãbe. Kalwaar sẽn wãbd bũmb fãa b sẽn ta zĩig ning tɩ wat ne sãoong wʋsgã yĩnga, nebã ra getame tɩ b waoong yaa yel-beedo.​—Yik 10:14; Mat 3:4.

• Kanaã.

  Yaa a Nowe yagenga, n le yaa a Kam biig a naas-n-soaba. Buud piig la a ye nins sẽn yi a Kanaã pendẽ wã ra bee Mediterane mogrã wogelle, yaang sẽnesã, Ezɩpt ne Siiri sʋka. B ra boonda bab-kãng tɩ “Kanaã soolem.” (Maa 18:3; Sɩn 9:18; Tʋ 13:19)​—Ges-y vẽnegr ning sẽn yaa B4.

• Kaoolã koglgo.

  Yaa koglg b sẽn ka ne akasɩa raado, n bolg sãnem. B ra bĩngd-a-la sɛk-roogã Zĩ-sõng sẽn yɩɩdã pʋgẽ, la kaoosg zugẽ, b bĩng-a-la wẽnd-doog ning a Salomo sẽn me wã Zĩ-sõng sẽn yɩɩdã pʋgẽ. A ra tara ling b sẽn maan ne sãnem, tɩ seribẽ-rãmb a yiib be lingã zug tɩ b nensã tees taaba. Tõod piigã kug-wals a yiibã ra bee kaoolã koglg pʋgẽ. (Tõ 31:26; 1Rĩ 6:19; Ebr 9:4)​—Ges-y vẽnegr ning sẽn yaa B5 ne B8.

• Kaoole.

  Yaa zems-taab Wẽnnaam ne ninsaalb sʋka, wall ninsaalb ne taab sʋka. B pʋlemdame  tɩ b na n maana bũmbu, wall tɩ b pa na n maan ye. Wakat ninga, yaa nin-yend wall sul-yɛng neb n segd n pids bũmb ning b sẽn pʋlmã. Wakat ning me, yaa neb a yiibã fãa n segd maan wa b sẽn yeelã. Biiblã sẽn gomd Wẽnnaam sẽn maan kaool nins ne ninsaalbã yellã sẽn yãk b toogo, a le gomda kaool neb wall buud bɩ tẽns pa rẽ bɩ neb sul sẽn maan ne taab yelle. Kaool nins sẽn tar yõod wʋsgã sʋka, d tõe n sõdga kaool ning Wẽnnaam sẽn maan ne a Abrahaamã, ne a Davɩɩdã, ne Israyɛll buudã (Tõogã kaoolã), la ne Israyɛll sẽn yaa Wẽnnaam dẽndã (kaool-paalgã).​—Sɩn 9:11; 15:18; 21:27; Yik 24:7; 2Ki 21:7.

• Kaseto.

  B ra wae n boonda Tõod piigã b sẽn gʋls kug-wals a yiibã zut n kõ a Moyiizã tɩ “Kasetã.”​—Yik 31:18.

• Kass.

  Yaa bũmb b sẽn yãkd kass tɩɩgẽ (Cinnamomum cassia). Ti-kãng ne sinamon tɩɩgã wõnda taaba. B ra tar-a lame n maand parfẽ. A ra naaga bũmb nins b sẽn tar n maand zaeebã kaam sẽn yaa sõngã me.​—Yik 30:24; Yɩ 45:8; Eze 27:19.

• Kãab-wẽnga.

  Yaa ned sẽn na n togs gomd n dat tɩ yel-beed paam ned bɩ bũmbu. A yaa toor ne tʋy wall sũ-yikr goama. Naoor wʋsgo, kãab-wẽng yaa gomd ned sẽn togsde, n saagdẽ tɩ yel-beed n na n wa ned bɩ bũmb zugu. Gomdã sã n yita Wẽnnaam nengẽ wall ned Wẽnnaam sẽn yãk nengẽ, a lebgda bãngr-gomde.​—Sɩn 12:3; Sõ 22:12; Ga 3:10.

• Kãntɩɩga.

  Yaa bũmb woglem makdga, t’a woglmã zems fo sẽn na n mak kãntɩɩg n tãag nug-bil ning sẽn yaa wok n yɩɩdã baasgẽ. Israyɛll nebã ra wae n tara kãntɩɩg sẽn zems sãntimetr 44,5 n makdẽ. La kãntɩɩg a to n da be t’a woglmã yɩɩd pipi soabã, n zems sãntimetr 51,8. (Sɩn 6:15; Luk 12:25)​—Ges-y vẽnegr ning sẽn yaa B14.

• Kãsem-soaba, Nin-kẽema.

  Yaa rao yʋʋm sẽn vẽsge. La Gʋls-sõamyã pʋgẽ, wae n yaa rao sẽn tar zu-sobend la tʋʋmd neb sull sʋk wall buud pʋgẽ. Vẽnegr sebrã pʋgẽ, b boola bõn-naands sẽn be saasẽ tɩ “kãsem-dãmba.” B lebgda Gɛrk gom-bil ning sẽn yaa presbiteros tɩ “kãsem-soaba,” sã n mik tɩ yaa neb nins sẽn lʋɩt taoor tigingã pʋgẽ wã yell la b gomda.​—Yik 4:29; Ye 31:23; 1Tɩ 5:17; Vẽ 4:4.

• Kãsem-sõngda.

  Yaa Gɛrk gom-bil ning sẽn yaa diakonos t’a võorã yaa “sõangda,” bɩ “tʋm-tʋmda.” “Kãsem-sõngd” yaa ned b sẽn yãke, t’a sõngd kãsem-dãmbã sull tiging pʋgẽ. Nand tɩ b yãk ned t’a lebg kãsem-sõngda, a segd n talla zʋg-sõma kẽer Biiblã sẽn wilgi.​—1Tɩ 3:8-10, 12.

• Kemos.

  Yaa Mowaab nebã wẽnnaam-dãmbã naabã.​—1Rĩ 11:33.

• Kẽebgã tigrã, Rasem a yopoe naoor a yopoe vẽkembeoogã Tigrã.​—

  Ges-y PÃNTEKOT.

• Kẽ kãadem ne f ba-biig paga.

  Yaa minung b sẽn wa n paas a Moyiiz Tõogã pʋgẽ, tɩ rao tõe n kẽ kãadem ne a ba-biig sẽn maan kaalem n pa paam bi-ribl paga, sẽn na yɩl t’a ba-biigã yʋʋrã ra menem ye.​—Sɩn 38:8; Tõ 25:5.

• Ki-paalga.

  Yaa Zʋɩf-rãmbã kiuug fãa pipi daare, tɩ b ra tigimd taaba, n maand tigri, la b maand maando. Kaoosg zugẽ, ra-kãens wa n lebga tig sẽn tar yõod wʋsg buudã tõr yĩnga, tɩ nebã ra basd b tʋʋmã rẽ yĩnga.​—Sõ 10:10; 2Ki 8:13; Kol 2:16.

• Kiris-neba.

  Yaa yʋʋr Wẽnnaam sẽn kõ a Zeezi Kirist karen-biisã.​—Tʋ 11:26; 26:28.

• Kiristã.

  Yaa a Zeezi la b boond woto. Yaa Gɛrk gom-bil ning sẽn yaa Kristos. Gom-bi-kãng ne Ebre wã gom-bil ning sẽn yaa “Mesi” wã sẽn dat n yeel tɩ “b sẽn zae a soabã” yaa a yembre.​—Mat 1:16; Zã 1:41.

• Kirist kɩɩsda.

  Gɛrk gom-bilã bilgda bũmb a yiibu. A makda ned wall bũmb sẽn kis wall sẽn kɩɩsd Kiristã. A leb n tõe n makda zirẽ-be-kirista, rat n yeel tɩ ned sẽn ning a meng Kirist zĩigẽ. Ned buud fãa bɩ siglg wall neb sull sã n yetẽ tɩ b gomda Kiristã yʋʋr yĩng tɩ yaool n pa sɩda, bɩ n yetẽ tɩ b yaa Mesi wã, wall n kɩɩsd Kiristã ne a karen-biisã, d tõe n yeelame tɩ b yaa Kirist kɩɩsdba.​—1Zã 2:22.

• Kislɛɛv.

  Yaa yʋʋr b sẽn pʋd Zʋɩf-rãmbã tũudmã kalãndriye wã kiuug a wɛ soabã, Babilon yembdã poore. La a yaa buud a taabã kiuug a tãab-n-soabã. A sɩngda sɩpaolg kiuugã pʋɩ-sʋk n tãag yʋʋm-sar kiuugã pʋɩ-sʋka. (Ne 1:1; Zkr 7:1)​—Ges-y vẽnegr ning sẽn yaa B15.

• Kɩdeng yʋʋmde.

  Israyɛll nebã sẽn kẽ kãabg tẽngẽ wã tɛka, yʋʋm pis-nu fãa ra yaa kɩdeng yʋʋmde. B ra segd n basa pʋtã tɩ vʋʋse, la b kõ Ebre ning fãa sẽn yaa yamb lohorem t’a looge. B lebsda zĩis nins b sẽn da ra wã. Kɩdeng yʋʋmdã ra yaa tigr b sẽn maand yʋʋmdã tõre. Ra yaa lohorem yʋʋmde, n kɩtdẽ tɩ buudã le lebg wa a sẽn da yaa to-to wakat ning Wẽnnaam sẽn yãk-a wã.​—Maa 25:10.

• Koe-noogã.

  Biiblã babg ning b sẽn da gʋls ne Gɛrkã pʋgẽ, yaa koe-noog ning sẽn gomd Wẽnnaam Rĩungã yelle, la sẽn wilgd tɩ ninsaalbã tõe n paama fãagre, b sã n tẽed a Zeezi Kirist.​—Luk 4:18, 43; Tʋ 5:42; Vẽ 14:6.

• Koor.

  Yaa makdg b sẽn tar n makd bũmb sẽn yaa koom-koom la bõn-koeemse. B sã n tik bat makdgã n mage, a zemsa litr 220. (1Rĩ 5:11)​—Ges-y vẽnegr ning sẽn yaa B14.

• Koray.

  Yaa bũmb sẽn yaa kãn-kãe wa kugri. Yaa mogrã pʋgẽ rũm-bõones kẽer kõab n wat n lebg woto. B bee ko-kãsemsã pʋsẽ, tɩ b kõbgã me  yaa toor-toore, wala makre, miuugu, pɛɛlg la sablga. Yaa Mog-miuugã pʋgẽ la b ra yaa wʋsg n yɩɩda. Pĩnd wẽndẽ wã, koray-miidã ligd ra yaa toog wʋsgo. B ra tar-b lame n maand kĩndi la nag-teed a taaba.​—Ye 8:11.

• Kosoogo.

  Yaa long wall kʋɩlg koom sẽn zoet n tũud zĩig ningã. Naoor wʋsgo, a yaa koɛɛnga, sã n pa sẽoogo. Gom-bilã leb n tõe n bilga kʋɩlgã menga. Kʋɩls kẽer koom yita ko-bunds zĩisẽ, tɩ kɩt tɩ b tar koom wakat fãa. Vɛrse kẽer pʋsẽ, b boola kosoogã tɩ “longo.”​—Sɩn 26:19; Sõ 34:5; Tõ 8:7; 1Rĩ 18:5; Zoo 6:15.

L

• Leviatã.

  B sã n wa gomd a yelle, b wae n gomda koom yell me. Wõnda yaa rũng sẽn vɩ koomẽ. Zoob 3:8; 41:1 pʋgẽ, wõnda yaa yẽbg bɩ rũng a to sẽn yaa parwẽnd n tar pãnga, n vɩ koomẽ. Yɩɩn-sõamyã 104:26 pʋgẽ, tõe tɩ yaa zĩm-bedr buud yell la b gomda. Vɛrse a taab me pʋsẽ, b goma a yell tɩ yaa makre, la d pa tõe n wilg sẽn yaa rũng ning takɩ ye.​—Yɩ 74:14; Eza 27:1.

• Levi, Levi buudã neda.

  Yaa a Zakoob bi-ribl a tãab-n-soaba, a Leya sẽn doge. Leb n yaa buud yʋʋre. A Levi ra tara kamb a tãabo. Yaa a Gɛrsõn ne a Kehat la a Merari. Yaa bãmb la b tik n pʋɩ Levi buudã sul a tãabo. Wakat ninga, b boonda buudã neb fãa tɩ “Levi buudã neba,” a Aarõ yagensã sẽn yaa maan-kʋʋdbã sẽn pa naage. B pa yãk zĩig Kãabg tẽngã pʋgẽ n kõ Levi buudã neb ye. La b kõ-b-la tẽns 48 buud a taabã soolem pʋsẽ.​—Tõ 10:8; 1Ki 6:1; Ebr 7:11.

• Lɛpta.

  A Zeezi ne a karen-biisã wakatẽ, lɛpta wã ra yaa Zʋɩf-rãmbã ligd-koɛɛng ning sẽn paood n yɩɩdã. B ra maand-a-la ne wanzuri wall zũudu. Biibl kẽer pʋsẽ, b lebg-a lame tɩ “tãma.” (Mrk 12:42; Luk 21:2; not-rãmbã)​—Ges-y vẽnegr ning sẽn yaa B14.

• Libã tãensã sẽn tong taabã.

  Libã soolmẽ wã, tãensã sẽn tong taabã yaa zĩis a yiibu. Libã tãensã sẽn tong taabã bee nin-taoore, tɩ b sẽn boond a soab tɩ Ãnti-libã wã be yaanga. Tẽn-nabr sẽn yaa wok la sẽn sakd kood n be b yiibã sʋka. Libã tãensã sẽn tong taabã yɛgda Mediterane mogrã, t’a tãng ning sẽn yaa lug-lug n yɩɩdã kolg metr 3 100. Pĩnd wẽndẽ wã, sɛɛdr tɩɩs sẽn da yaa wogd n da be Libã soolmẽ wã, tɩ tẽn-yagsã neb ra nong b raadã wʋsgo. (Tõ 1:7; Yɩ 29:6; 92:12)​—Ges-y vẽnegr ning sẽn yaa B7.

• Lisgu, lisi.

  Rat n yeelame tɩ “lis zãnga,” bɩ n bõr koom pʋgẽ zãnga. A Zeezi yeelame tɩ yaa tɩlɛ tɩ ned reeg lisg n yaool n lebg a karen-biiga. Biiblã leb n gomda a Zã lisgã yelle, lis ne vʋʋsem sõngã, la lis ne bugmã yelle.​—Mat 3:11, 16; 28:19; Zã 3:23; 1Pɩ 3:21.

• Loaabga.

  Yaa gãong b sẽn bẽneg bɩ bũmb b sẽn wʋge. Tõe n yɩɩ ne rũms gĩin wall b kõbdo. B ningda bũmb ning b sẽn na n lobgã a tẽn-sʋkã sẽn yaa yalengã. Naoor wʋsgo, yaa kugri. B rɩkda loaabgã wĩir a yembr n sẽb nugã, la b gãd loaabgã wĩir a to wã n yulum loaabgã n yaool n bas wĩ-kãnga. Pĩnd wẽndẽ wã, buud toɛy-toɛyã ra tara neb sẽn lobd loobs b tãb-biisã sʋka.​—Bʋ 20:16; 1Sã 17:50.

• Log.

  Makds nins b sẽn tar n makd bũmb sẽn yaa koom-koomã sʋka, yẽ n yaa bilf n yɩɩda, tɩ Biiblã gomd a yelle. Zʋɩf-rãmbã Talmuudã pʋgẽ, b bilgdame t’a zemsa hĩn pʋɩɩr a ye pʋɩ piig la a yiib zugu. Dẽnd b sã n tik rẽ zug n mage, log zemsa litr 0,31. (Maa 14:10)​—Ges-y vẽnegr ning sẽn yaa B14.

• Lohorem d sẽn pa segd ne.

  Yaa Gɛrk gom-bil t’a võorã meng-meng yaa bũmb sẽn yaa sõma la sẽn be rasãnde. Naoor wʋsgo, b sã n gomd lohorem d sẽn pa segd ne yelle, yaa kũun b sẽn kõ ne yamleoogo, pa rẽ bɩ b sẽn kõ kũunã to-to wã yell la b gomda. B sã n gomd Wẽnnaam lohorem d sẽn pa segd ne wã bɩ a barkã yelle, makda kũun Wẽnnaam sẽn kõ ne yamleoogo, n pa baood tɩ d yao-a ye. Dẽnd gomdã bilgda Wẽnnaam sẽn kõt wʋsgã, a nonglem-kãsengã, la a lohorem ne ninsaalbã. B mi n lebga Gɛrk gom-kãngã tɩ “sõmblem,” la “kũun b sẽn kõ ne yamleoogo.” Yaa bũmb b sẽn kõ ned tɩ pa a sẽn tʋm yĩnga, wall a sẽn segd ne rẽ yĩng ye. Bala sẽn kõ-a kũunã kõo yamleoog yĩng bala.​—2Ko 6:1; Efɛ 1:7.

M

• Maan bãnde.

  Yaa kug-bõoneg wall ra-gɩrs la b ra tar n maand bãnd sẽn na yɩl n bãng n yãk yam. B ra ningd-b-la fuug sẽn põdemd pʋgẽ wall laok pʋgẽ n zugsi. Kugr wall ra-gɩrg ning sẽn na n lʋɩ wã, bɩ b sẽn na n yãk a soabã n sõngd tɩ b bãng yam ning b sẽn segd n yãkã. Naoor wʋsgo, b pʋʋsdame n yaool n maan dẽ. B mi n pʋda gom-bil ning sẽn yaa “maan bãndã” n na n gom maan bãnd sɩd-sɩd yelle. Wakat ning me, a makda “pʋɩɩre.”​—Zoz 14:2; Yɩ 16:5; Ye 16:33; Mat 27:35.

• Maan-kʋʋda.

  Yaa rao sẽn gomd Wẽnnaam yʋʋr yĩng nin-buiidã taoore, n sõngd-b tɩ b bãngd Wẽnnaam la a noyã. Maan-kʋʋd leb n da gomda nin-buiidã yʋʋr yĩng Wẽnnaam taoore, n kʋʋd maand nin-buiidã yĩnga, n yõkd Wẽnnaam sɛɛg la a pʋʋsd nin-buiidã yĩnga. Sẽn deng a Moyiiz Tõogã, zak fãa pʋgẽ, ra yaa zakã soab n da yaa maan-kʋʋda. A Moyiiz Tõogã tũub wakate, yaa a Aarõ sẽn da yaa Levi buudã nedã yagens nins sẽn yaa rapã n da yaa maan-kʋʋdba. Levi buudã rap a taabã n da yaa b sõangdba. Kaool-paalgã luglg tɛka, Israyɛll sẽn yaa Wẽnnaam dẽndã neb lebga maan-kʋʋdba, t’a Zeezi Kirist yaa Maan-kʋʋdb kãsmã.​—Yik 28:41; Ebr 9:24; Vẽ 5:10.

•  Maan-kʋʋdb kãsma.

  A Moyiiz Tõogã tũub wakate, maan-kʋʋdb kãsmã n da gomd nin-buiidã yʋʋr yĩng Wẽnnaam taoore, la a get maan-kʋʋdb a taabã tʋʋm yelle. B boond-a lame me tɩ “maan-kʋʋdbã taoor soaba.” (2Ki 26:20; Ɛsd 7:5) Yẽ a ye bal n da tar sor n na n kẽ sɛk-roogã Zĩ-sõng sẽn yɩɩdã pʋgẽ, la wẽnd-doogã b sẽn me kaoosg zugẽ wã Zĩ-sõng sẽn yɩɩdã pʋgẽ. Yʋʋmd fãa, yaa Paasg daarã bal la a ra kẽed be. B boonda a Zeezi Kirist tɩ “maan-kʋʋdb kãsem” me.​—Maa 16:2, 17; 21:10; Mat 26:3; Ebr 4:14.

• Maan-kʋʋdb taoor soaba.

  Biiblã babg ning b sẽn da gʋls ne Ebre wã pʋgẽ, b yetame me tɩ “maan-kʋʋdb kãsma.” Biiblã babg ning b sẽn da gʋls ne Gɛrkã pʋgẽ, ‘maan-kʋʋdb taoor dãmbã’ yaa neb nins sẽn yaa nin-kãsems maan-kʋʋdbã sʋkã. Tõe tɩ neb nins sẽn da yɩ maan-kʋʋdb kãsem-dãmb tɩ b sik-bã, n paas maan-kʋʋdbã sul 24 taoor dãmbã naaga nin-kãense.​—2Ki 26:20; Ɛsd 7:5; Mat 2:4; Mrk 8:31.

• Maan-neere.

  Wae n yaa Ebre gom-bil ning sẽn yaa chesedh sẽn bilgd nonglem sẽn naag ne pʋ-peelem, burkĩndi, maan-sɩda, la sakre. Naoor wʋsgo, yaa Wẽnnaam sẽn nong ninsaalbã to-to wã la gom-bilã bilgda. A leb n bilgda ninsaalb sẽn nong taab to-to me.​—Yik 34:6; Rut 3:10.

• Maan sũ-sãanga.

  Yaa bũmb toor-toor ned sẽn maand sẽn na yɩl n wilg a sũ-sãang a ned kaalem yĩng wall yel-beed a taab yĩnga. Pĩnd wẽndẽ wã, b ra wae n yãkda sũ-sãangã wilgr sẽn segd n kaoos to-to. Sũ-sãang sasa, b sẽn da zẽkd b koees n yãbdã toor sẽn ka be, b ra tara fut n ningd rẽ yĩnga, b ra yugunda b zutã tompɛglem, b ra pãrsda b futã, la b ra pãbd b yãoogã. Ned kaalem poore, b mi n yaooda neb sẽn mi yãbr sõma tɩ b wa yãbe.​—Sɩn 23:2; Ɛst 4:3; Vẽ 21:4.

• Mahalat.

  Yaa yɩɩlã wɛɛngẽ gom-bil sẽn be Yɩɩn-sõamyã 53 ne 88 sɩngr goamã pʋgẽ. A yita Ebre gom-bil võor sẽn yaa “pãng sẽn booge,” bɩ “lʋɩ bãag” pʋgẽ. Dẽnd b ra yɩɩnda yɩɩn-kãens ne nimbãanega. Woto zemsa ne yɩɩl a yiibã goam sẽn yaa sũ-sãang goamã.

• Malɛgsã naaba.

  Yaa malɛgsã taoor soaba. Biiblã pʋgẽ b sã n gomd “malɛgsã naab” yelle, wakat fãa yaa nin-yɛng yell la b gomda. Rẽ wilgdame tɩ malɛgs naab a ye bal n be. Biiblã wilga malɛgsã naabã yʋʋr n yeel t’a yʋʋr la a Mikayɛlle.​—Dã 12:1; Ziid 9; Vẽ 12:7.

• Malɛgse.

  Yaa Ebre wã gom-bil sẽn yaa malak la Gɛrkã gom-bil sẽn yaa aggelos. Gom-biis a yiibã fãa rat n yeelame tɩ “koe-taasda.” La sã n yaa koe-taasd sẽn yit saasẽ yell la b gomda, b yetame tɩ “malɛka.” (Sɩn 16:7; 32:3; Zak 2:25; Vẽ 22:8) Malɛgsã tara pãng wʋsgo. Wẽnnaam naan-b lame tɩ kaoos wʋsg t’a yaool n naan ninsaalbã. Biiblã pʋgẽ, b boond-b lame me tɩ “malɛg-sõamyã ka tɛka,” “Wẽnnaam kom-dibli,” la ‘yibeoog ãdse.’ (Tõ 33:2; Zoo 1:6; 38:7) Wẽnnaam pa naan-b tɩ b tõe n dog kamb ye. A naan-b-la toor-toore. B sõorã yɩɩda milyõ koabg hal zĩig sẽn zãre. (Dã 7:10) Biiblã wilgdame tɩ b tara yʋya, la tɩ b manesmã yaa toor-toore. Baasgo, b sikda b mense, n pa sakd tɩ b waoog-b ye. Naoor wʋsgo, b pa sakd n togs b yʋyã ye. (Sɩn 32:29; Luk 1:26; Vẽ 22:8, 9) B ziirã yɩɩda taaba. B leb n tara tʋʋm toor-toore. Wala makre, kẽer bee a Zeova geerã taoor n tʋmd a tʋʋmã, tɩ sãnda taasd a koeese, tɩ kẽer sõngd a nin-buiidã sẽn be tẽngã zugã, tɩ sãnda pidsd Wẽnnaam bʋ-kaoorã, tɩ kẽer teend koe-noogã moonego. (2Rĩ 19:35; Yɩ 34:7; Luk 1:30, 31; Vẽ 5:11; 14:6) Beoog-daare, b na n sõnga a Zeezi n zab Armagedõ zabrã sasa.​—Vẽ 19:14, 15.

• Malkam.

  Tõe tɩ yaa a Molɛk sẽn yaa Amon nebã wẽnnaam-dãmbã taoor soabã yʋʋr a to. (So 1:5)​—Ges-y MOLƐK.

• Mann.

  Israyɛll nebã sẽn wa n yeebd we-raoogẽ wã yʋʋm 40, mannã n da yaa rɩɩb ning b sẽn da rɩt n yɩɩdã. Yaa a Zeova n da kõt-ba. A Zeova ra kɩtdame tɩ mannã dʋr tẽngã zug yibeoog fãa tɩ meenem gãneg a zugu. La Vʋʋsg daare, mannã ra pa rʋʋgd ye. Israyɛll nebã sẽn na n yã mannã pipi wã, b sokame yaa: “Woto yaa bõe?” Ne Ebre: “Man hu?” (Yik 16:13-15, 35) Vɛrse kẽer pʋsẽ, b boond-a lame tɩ “saasẽ koodo” (Yɩ 78:24), “rɩɩb sẽn yit saasẽ” (Yɩ 105:40), la “pãens rãmb rɩɩbo” (Yɩ 78:25). A Zeezi me goma mannã yelle, tɩ makd bũmbu.​—Zã 6:49, 50.

• Maoong b sẽn yuumdi.

  Yaa maoong b sẽn da kõt Wẽnnaam. Sãmbg sẽn kae, sẽn wa-a ne maoongã ra zãada maoong ning a sẽn dat n kõ wã, tɩ maan-kʋʋdã ning a nusã a nusã tẽngre, n gãd-b n yuum poorẽ la taoore, wall yaa maan-kʋʋdã meng n yuumd maoongã. B sã n maan woto, wilgdame tɩ b kõo a Zeova maoongã.​—Maa 7:30.

• Maoongo.

  Yaa kũun ned sẽn kõ Wẽnnaam n na n pʋʋs-a barka, n na n wilg t’a sak n deegame t’a kongame, la sẽn na n lebs n maneg yẽ ne Wẽnnaam zoodã. Sẽn sɩng ne a Abɛlle, neb n da kõt maand toor-toor ne yamleoogo, hal n tãag wakat ning a Moyiiz Tõogã sẽn wilg tɩ yaa tɩlɛ tɩ b kõt maandã. Wala makre, b ra kʋʋda rũms n kõt maando. A Zeezi sẽn kõ a vɩɩmã sẽn zems zãng tɩ yɩ maoongã tɛka, Wẽnnaam pa le rat tɩ b kõ-a rũms maand ye. La kiris-nebã ket n maanda bũmb toor-toor Wẽnnaam yĩnga, tɩ yaa wa maand b sẽn kõte.​—Sɩn 4:4; Ebr 13:15, 16; 1Zã 4:10.

•  Maoong sẽn yõogd bugum.

  Ra yaa rũng bɩ bũmb a to maoong b sẽn yõogd zãng tẽn-kugrã zug Wẽnnaam yĩnga. Sẽn kõt-a maoongã pa yãkd rũngã (naafo, loalga, boɛɛga, walle, bɩ mar-wan-bila) wall bũmbã baa a fʋɩ ye.​—Yik 29:18; Maa 6:9.

• Masedoan.

  Yaa Gɛrɛs rɩtg soolem a ye. A Alɛgsãndr le Gãrã naamã sasa, soolem-kãng paama pãng wʋsgo, n kell n soog a meng hal n tãag Rom sodaasã sẽn wa n zab n deeg-a wã. Tẽn-tʋmd a Poll sẽn na n kẽng Erop pipi wã, rẽ tɩ Rom n da so Masedoanne. A Poll kẽnga Masedoan naoor a tãabo. (Tʋ 16:9)​—Ges-y vẽnegr ning sẽn yaa B13.

• Maskɩll.

  Yaa Ebre gom-bil b sẽn pa mi a võorã takɩ, tɩ be Yɩɩn-sõamyã 13 sɩngr goamẽ wã. Tõe n dat n yeelame tɩ “bʋgsg yɩɩlle.” Kẽer tagsdame tɩ gom-bil a to võor sẽn yaa ‘tʋm ne yam’ ne Maskɩllã võor pa zãr ne taab ye.​—2Ki 30:22; Yɩ 32:Sɩngr goamã.

• Meed-dãmba, Medi.

  Yaa a Zafɛt biig a Madayi yagense. B ra bee rũndã-rũndã Irã wã tẽngã bagb ning sẽn yaa tãensã. B wa n boonda bab-kãng tɩ Medi tẽnga. Meed-dãmbã wa n naaga Babilon nebã tɩ b zab ne Asiiri n tõoge. Wakat kãng tɩ Pɛrs yaa Medi soolem, la a Sirus wa n yik n tõdgame, tɩ Medi ne Pɛrs naag taaba, n lebg Meed la Pɛrs-rãmbã soolem. Yaa soolem-kãng n tõog Babilon soolmã yʋʋmd 539 S.D.Z.R. Meed-dãmb n da be Zerizalɛm yʋʋmd 33 Pãntekotã sasa. (Dã 5:28, 31; Tʋ 2:9)​—Ges-y vẽnegr ning sẽn yaa B9.

• Merodak.

  Yaa Babilon tẽngã wẽnnaam-dãmbã taoor soaba. Babilon rĩm la a tõog lugund a Hamurabi sẽn kɩt tɩ Babilon lebg Babilon soolmã na-tẽngã poore, a Merodak (bɩ a Marduk) lebga kãseng nebã nifẽ. A wa n deega wẽnnaam-dãmb wʋsg sẽn deng yẽ zĩigẽ, n lebg Babilon soolmã wẽnnaam-dãmbã taoor soaba. Kaoosg zugẽ, b wa n basa Merodakã (bɩ Mardukã) boolgo, n boond-a ne naam yʋʋr sẽn yaa “Belu” (“Soaala”), hal tɩ b wa wae n boond-a t’a Bɛlle.​—Ze 50:2.

• Mesi.

  A yita Ebre gom-bil a to võor sẽn yaa “zae” bɩ “b sẽn zae a soabã” pʋgẽ. B lebgda gom-bi-kãngã ne Gɛrk tɩ “Kirist.”​—Dã 9:25; Zã 1:41.

• Miir.

  Yaa tɩɩs sũm sẽn tar yũ-noogo. B yãkd-a-la gõos tɩɩg bɩ tɩ-bõones b sẽn boond tɩ Kommifora zugu. Miir ra naaga bũmb nins b sẽn tar n maand ka-sõngã b sẽn da pʋdgd neb kẽer zutã. B ra ningd-a-la bũmb kẽer zutu, wala fut bɩ gãase, la b naagd-a ne kaam n nomd neba, la b maand ka-zɛɛdem. B ra sõogda kũum me miir n yaool n mumi.​—Yik 30:23; Ye 7:17; Zã 19:39.

• Miktam.

  Yaa Ebre gom-bil sẽn be Yɩɩn-sõamyã yɩɩl a yoob sɩngr goam pʋgẽ. (Yɩ 16; 56–60) Yaa gom-bil b sẽn pa mi a võorã takɩ, baa a sẽn tõe n wõnd gom-bil ning sẽn yaa “gʋlsmã.”

• Milkom.

  Yaa wẽnnaam Amon nebã sẽn da waoogde. Tõe tɩ yaa yẽ la wẽnnaam a Molɛke. (1Rĩ 11:5, 7) A Salomo naamã sẽn wa n kolg saabã, a maana zĩ-zãnts wẽn-fao-kãng yĩnga.​—Ges-y MOLƐK.

• Min.

  B boond-a lame me tɩ mane Ezekɩyɛll sebrã pʋgẽ. A tõe n maka bũmb zɩslem, n le yaa ligd me. Tẽn-vaeesdbã sẽn vaees n yã bũmb ninsã wilgdame t’a zemsa sɩkl 50 tɩ sɩkl zems garam 11,4. Rẽnd min ning yell b sẽn gomd Biiblã babg ning b sẽn da gʋls ne Ebre wã pʋgẽ wã yaa garam 570. Tõe tɩ na-yirã ra tara min toor wa sẽn da yaa to-to ne kãntɩɩgã. Biiblã babg ning b sẽn da gʋls ne Gɛrkã pʋgẽ, min yaa darkem 100. A zɩslmã yaa garam 340. Min pis-yoob zema talã a yembre. (Ɛsd 2:69; Luk 19:13)​—Ges-y vẽnegr ning sẽn yaa B14.

• Molɛk.

  Yaa Amon nebã wẽnnaam. Tõe tɩ yaa yẽ la b sẽn boond me t’a Malkam, a Milkom la a Molokã. Tõe tɩ yaa naam yʋʋre, la pa wẽnnaam takɩ yʋʋr ye. A Moyiiz Tõogã ra wilgame tɩ b segd n kʋʋ ned ning sẽn na n dɩk a biig n maan maoong n kõ a Molɛke.​—Maa 20:2; Ze 32:35; Tʋ 7:43.

• Molok.​—

  Ges-y MOLƐK.

• Munaafɩɩk.

  Yaa yʋʋr b sẽn tar n boond a Sʋɩtãan Biiblã babg ning b sẽn da gʋls ne Gɛrkã pʋgẽ. B pʋda a Sʋɩtãan yʋ-kãnga, bala yẽ n yagd ziri n yɩɩda, n yaa soab ning sẽn dõt a Zeova, n kɩɩsd a goamã, la a sãamd a yʋʋrã sẽn yaa sõngã.​—Mat 4:1; Zã 8:44; Vẽ 12:9.

• Mut-labɛn.

  Yaa gom-bil sẽn be Yɩɩn-sõamyã 9 sɩngr goamẽ wã. A rat n yeelame tɩ “biigã kaalem yĩnga.” Kẽer tagsdame tɩ yaa yʋʋm-teed rãamd neb wʋsg sẽn mi yʋʋre, wall sɩngr goam b sẽn segd n togs b sã n wa na n yɩɩl yɩɩn-kãngã.

N

• Naam dasaare.

  Yaa rasaar naab sẽn zãade, tɩ wilgdẽ tɩ yẽ n so naamã.​—Sɩn 49:10; Ebr 1:8.

• Naar.

  Yaa kaam sẽn yaa miuug n tar yũ-noogo, t’a ligdã yaa toog wʋsgo. B ra yãkd-a-la tɩɩg a ye pʋgẽ (Nardostachys jatamansi). Naar ligd sẽn da yaa toog wʋsgã yĩnga, b ra wae n kalemd-a-la ne kaam sõmblem sẽn pa ta-a, la b ra mi n yetẽ tɩ kaam yaa naar tɩ yaool n pa naar halaal ye. A Mark ne a Zã fãa togsame tɩ b pʋdga ‘naar halaal’ a Zeezi zugu.​—Mrk 14:3; Zã 12:3.

• Namsg ra-luka.

  Yaa Gɛrk gom-bil ning sẽn yaa storos t’a võorã yaa raoog sẽn yaa selle, bɩ zãn-daoogo, wa a soab ning zug b sẽn kʋ a Zeezi wã. Bũmb pa be n wilgdẽ tɩ Gɛrk gom-bilã rat n yeelame tɩ pika, wa neb nins sẽn pa mi Wẽnnaamã sẽn da tar a soab n  pʋʋsd b wẽnnaam-dãmbã yʋʋm kobs sẽn deng Kiristã waoongã ye. B sẽn lebg Gɛrk gom-bilã tɩ “namsg ra-lukã” sɩd zemsame, bala b pʋta gom-bil ning sẽn yaa storosã me sẽn na yɩl n bilg namsg la yãnd ning a Zeezi karen-biisã sẽn na n paamã. (Mat 16:24; Ebr 12:2)​—Ges-y RA-LUKA.

• Nanambsã.

  Yaa Babilon goosneema wã tʋm-tʋmdb naam sẽn pa ta guvɛrneer-dãmbã taoor soaba. Biiblã pʋgẽ, nanambsã ra tara naam n yɩɩd Babilon na-yirã yam dãmbã. Rĩm a Daryuus sẽn yaa Meedã naam sasa me, b ra gomda nanambs yelle.​—Dã 2:48; 6:7.

• Nazarɛt neda.

  B ra boonda a Zeezi woto, a sẽn da yit Nazarɛtã yĩnga. Wõnda gom-bi-kãng ne Ebre gom-bil ning b sẽn lebg Ezayi 11:1 tɩ ‘tɩ-tobengã’ yaa a yembre. B wa n boonda a Zeezi karen-biisã me tɩ Nazarɛt neba.​—Mat 2:23; Tʋ 24:5.

• Nazireyẽ.

  Gom-bilã yita Ebre wã gom-bil a ye võor sẽn yaa “ned b sẽn bak toore,” “ned b sẽn dɩk n kõ,” bɩ “ned b sẽn welg toor” pʋgẽ. Nazireyẽ-rãmb buk a yiib n da be. Yaa neb nins sẽn yaa Nazireyẽ ne yamleoogã, la Wẽnnaam sẽn yãk b rãmbã. Pag bɩ rao ra tõe n pʋlma a Zeova t’a na n yɩɩ Nazireyẽ n kaoos wakat a wãna. Neb nins sẽn pʋlem ne yamleoogã ra segd n tũu noy a tãabo: B ra pa segd n yũ rãam wall b rɩ bũmb b sẽn maan ne viyn biisi, b ra pa segd n wõrs b zoobdo, la b ra pa segd n sɩɩs kũum me ye. Wẽnnaam sẽn yãk b rãmb tɩ b yaa Nazireyẽ-rãmbã segd n paa woto b yõor tɛka. Yaa a Zeova n da wilgd noy nins takɩ b sẽn segd n tũ wã.​—Sõ 6:2-7; Bʋ 13:5.

• Ned sẽn pa yamba, Ned sẽn paam lohorem.

  Rom nebã naam sasa, “ned sẽn pa yamb” yaa ned sẽn dog n pa yamba, n yaa tẽng-n-biiga. La “ned sẽn paam lohorem” yaa ned sẽn da yaa yamb n paam a menga. Yamb sã n da paam sebr sẽn wilgd t’a tara lohorem, a ra lebgda Rom tẽng-n-biiga, la a ra pa tõe n paam tɩ b yãk-a t’a yɩ naab soolmã pʋgẽ ye. B sã n da kõ yamb lohorem la b pa kõ-a sebre, a pa lebgd tẽng-n-biig hakɩɩk ye.​—1Ko 7:22.

• Neer-kugri.

  Yaa kug-gilg b sẽn dogend kugr a to me sẽn yaa gilg zugu, n tar n werd zom. B ra ningda bũmb tẽngr kugrã tẽn-sʋka, sẽn na yɩl tɩ yĩngr kugrã tõe n yilimdẽ. Pĩnd wẽndẽ wã, neer sẽn werd ne nus n da be zags wʋsg pʋsẽ, tɩ pagbã tar n werda. Sẽn na yɩl tɩ zak rãmb paam rɩɩb daar fãa, yaa tɩlɛ tɩ b tar neer sẽn werd ne nugu. Rẽ n so t’a Moyiiz Tõogã ra wilg tɩ ned pa segd n deeg a to neer bɩ a neer-kugr samd yĩng ye. B ra maanda neer-kug sẽn wõnd neer-kug nins b sẽn werd ne nusã sẽn yaa bɛda, tɩ yaa rũms n tɛt n yilimdẽ.​—Tõ 24:6; Mrk 9:42.

• Nefilim.

  Yaa malɛgs n tedg n lebg ninsaalba, n dɩgs ninsaalb kom-pugli n dog-ba. B ra yaa nen-kɛglem dãmb sẽn zĩnd sẽn deng sa-kãsengã.​—Sɩn 6:4.

• Nehilot.

  Yaa gom-bil b sẽn pa mi a võorã takɩ, tɩ be Yɩɩn-sõamyã 5 sɩngr goamẽ wã. Neb kẽer tagsdame t’a yaa yʋʋm-teoog b sẽn peebde, la t’a wõnda Ebre wã gom-bil ning sẽn yaa chalil (wɩɩga). La a tõe n yɩɩ yʋʋm-teoog rãamd me.

• Netinim.

  Yaa neb sẽn da tʋmd wẽnd-doogẽ wã, bɩ sẽn da sõngd ne wẽnd-doogã tʋʋma. B ra pa Israyɛll neb ye. Ebre gom-bilã rat n yeelame tɩ “neb b sẽn dɩk n kõ,” tɩ wilgdẽ tɩ b ra rɩk-b lame n kõ wẽnd-doogã tʋʋm yĩnga. Wõnda Netinim-dãmb wʋsg ra yaa Gabawõ nebã kamb la b yagense. A Zozuwe ra “kɩtame tɩ b wɩɩsd raad la b yõngd koom nin-buiidã yĩnga, la a Zeova tẽn-kugrã yĩnga.”​—Zoz 9:23, 27; 1Ki 9:2; Ɛsd 8:17.

• Nimbãan-zoeer kũuni.

  Yaa kũun b sẽn kõ n na n sõng ned sẽn dat sõngre. Biiblã babg ning b sẽn da gʋls ne Ebre wã pʋgẽ, b pa gom nimbãan-zoeer kũun yell vẽeneg-vẽeneg ye. La Tõogã ra togsa Israyɛll nebã bũmb toor-toor b sẽn da segd n maan n sõng naong rãmbã.​—Mat 6:2.

• Ninsaal biigã.

  Yaa gomd sẽn be evãnzill-dãmbã pʋsẽ na maan naoor 80. B ra boonda a Zeezi Kirist woto, tɩ wilgdẽ t’a sẽn dogã a sɩd yɩɩ ninsaala, la t’a ra pa malɛk sẽn tedg a meng n lebg ninsaal ye. Yʋ-kãng wilgdame me t’a Zeezi na n wa pidsa Dãniyɛll 7:13, 14 bãngr-gomdã. Biiblã babg ning b sẽn da gʋls ne Ebre wã pʋgẽ, b boola a Ezekɩyɛll ne a Dãniyɛll woto, tɩ wilgd welgr ning sẽn be koe-taasdb kãens sẽn yaa kiidbã ne Wẽnnaam sẽn yaa soab ning sẽn kɩt tɩ b taas koeesã sʋka.​—Eze 3:17; Dã 8:17; Mat 19:28; 20:28.

• Nin-yoolem.

  Yaa Gɛrk gom-bil ning sẽn yaa azelzeyiya wã, t’a võorã bilgd ned sẽn kɩɩsd Wẽnnaam noyã n tʋmd tʋʋm sẽn yaa wẽns wʋsgo, la sẽn tar manesem sẽn wilgd t’a pa zoet yãnd wall t’a toog kae ne rẽ ye. A leb n bilgda ned sẽn pa nand zu-sobendã, tõodã la noyã wall sẽn yaand bõn-kãens menga. Dẽnd nin-yoolem pa bilgd ned sẽn tar manesem sẽn pa zems bal ye.​—Ga 5:19; 2Pɩ 2:7.

• Nizã.

  Yaa yʋ-paall b sẽn pʋd Abiib kiuugã Babilon yembdã poore. Yaa Zʋɩf-rãmbã tũudmã kalãndriye wã pipi kiuugu. La a yaa buud a taabã kiuug a yopoe-n-soabã. A sɩngda tʋʋlg kiuugã pʋɩ-sʋk n tãag tʋʋl-nif kiuugã pʋɩ-sʋka. (Ne 2:1)​—Ges-y vẽnegr ning sẽn yaa B15

• No-loeere.

  Yaa ned sẽn na n mong a meng rɩɩb tɩ kaoos bilfu. Israyɛll nebã ra maanda no-loeer Paasg daarã daare, yel-pakr wakate, la b sã n wa rat tɩ Wẽnnaam wilg-b sore. Zʋɩf-rãmbã ra lugla no-loeer a naas yʋʋmd fãa, n  tẽegd yɛl-pakr sẽn paam-b wakat sẽn looge. No-loeer pa tɩlɛ ne kiris-nebã ye.​—Ɛsd 8:21; Eza 58:6; Luk 18:12.

• No-rɛɛsa.

  Yaa ned Wẽnnaam sẽn kɩtd t’a wilgd neb a taabã a raabã. No-rɛɛsdbã yɩɩ Wẽnnaam koe-taasdba, n da togsd bũmb a Zeova sẽn pʋlem tɩ watẽ, a zãmsgã, a noyã la a bʋ-kaoor koeesã.​—Am 3:7; 2Pɩ 1:21.

• Nugbĩng sẽn tar n ningd bãnde.

  Yaa bũmb b sẽn tar n ningd bãnd buud b sẽn da pit nug-bila, wall b sẽn loet ne wĩiri. Wõnda b sẽn loet-a soab ne wĩirã ra rɩkd n pida yublã. A ra makda naab wall taoor soab naam. (Sɩn 41:42)​—Ges-y BŨMB B SẼN TAR N NINGD BÃNDE.

• Nug-yakemde.

  Yaa bũmb woglem makdg sẽn zems nug-raoogã ne nug-bi-kɛmblã yalem. B sã n tik kãntɩɩg ning sẽn yaa sãntimetr 44,5 wã n mage, nug-yakemd woglem zemsa sãntimetr 22,2. (Yik 28:16; 1Sã 17:4)​—Ges-y vẽnegr ning sẽn yaa B14.

• Nus tikri.

  B ra tikda ned ne nus n na n wilg tɩ b yãk-a lame t’a na n tʋm tʋʋmd ninga, wall n na n ning-a barka, pa rẽ bɩ n na n sãoog a bãaga, wall sẽn na yɩl t’a paam vʋʋsem sõngã. Wakat ninga, b tikda rũms ne nus nand tɩ b kʋ-b n maan maando.​—Yik 29:15; Sõ 27:18; Tʋ 19:6; 1Tɩ 5:22.

O

• Omɛɛr.

  Yaa makdg b sẽn tar n makd bõn-koeemse. A zemsa litr a 2,2 wall efa pʋɩɩr a ye pʋɩ piig zugu. (Yik 16:16, 18)​—Ges-y vẽnegr ning sẽn yaa B14.

• Onigs.

  Yaa kug-neer sẽn tar kõbg toor-toore, (sablga, miuugu, pugsg-pugsg la kẽega) n bẽes pɛɛl-pɛɛla. B ra ning-a-la maan-kʋʋdb kãsmã fuug ning sẽn yaa toor zallã zugu.​—Yik 28:9, 12; 1Ki 29:2; Zoo 28:16.

P

• Paasg daarã.

  Yaa ra-sõng ning sẽn tar yõod n yɩɩd Israyɛll nebã nifẽ. B boond-a lame me tɩ Yomkipur (Ebre, yohm hakkippurim sẽn dat n yeel tɩ “ludb raare.”) Israyɛll nebã ra maand-a-la Etanim kiuugã rasem 10. Yʋʋmd fãa, yaa baraar bal la maan-kʋʋdb kãsmã ra kẽed sɛk-roogã Zĩ-sõng sẽn yɩɩdã pʋgẽ n kõ maandã zɩɩm yẽ mengã yel-wẽnã yĩnga, Levi buudã neb a taabã yel-wẽnã yĩnga, la nin-buiidã yel-wẽnã yĩnga. Paasg daarã ra yaa ra-sõngo, tɩ Israyɛll nebã tigimd taab la b loet noore. Leb n da yaa vʋʋsg daare, tɩ nebã ra tog n bas b daar fãa tʋʋmã.​—Maa 23:27, 28.

• Paasgo.

  Biiblã babg ning b sẽn da gʋls ne Ebre wã pʋgẽ, b sã n gomd Paasg yelle, yaa maand b sẽn maand sẽn na yɩl n sõng nebã tɩ b pẽneg Wẽnnaam la b waoog-a. B sẽn da wa n tũud a Moyiiz Tõogã, b ra maanda maand yʋʋmd fãa Paasg daarã, sẽn na yɩl tɩ laafɩ lebs n zĩnd Wẽnnaam ne nin-buiidã ned kam fãa sʋka, la Wẽnnaam ne buudã tõr sʋka, baa ne b yel-wẽnã. Maan-kãensã ra makda a Zeezi maoongã a sẽn da na n wa kõ vugr wakat fãa yĩng ãdem-biisã yel-wẽnã yĩnga, tɩ pak sor tɩ b tõe n maneg b yell ne a Zeova wã.​—Maa 5:10; 23:28; Kol 1:20; Ebr 9:12.

• Pakã.

  Yaa tigr Israyɛll nebã sẽn da maand Abiib kiuugã (b sẽn wa n boond tɩ Nizã kiuugã) rasem 14 daare, n tẽegd Wẽnnaam sẽn yiis-b Ezɩptã. Tigrã raare, b ra kodgda pe-bil (wall bʋʋg) n sẽ, n wãb ne zẽ-vãad sẽn yaa toogo, la ne bur sẽn pa ning rabɩlle.​—Yik 12:27; Zã 6:4; 1Ko 5:7.

• Pãng kugri.

  Yaa kugr ning b sẽn ningd roog gõdrẽ, zĩig ning roog lals a yiib sẽn yekd taabã. Kug-kãng tara yõod wʋsgo, bala yẽ n kɩtd tɩ lalsã sog taaba, n tar pãnga. Pãng kugr ning sẽn tar yõod n yɩɩdã yaa kugr ning b sẽn ningd yẽbgrã gõdrẽ wã. Nong n yaa kugr sẽn tar pãng wʋsg la b ra yãkd n ning galʋ-tẽng ro-bɛd la a lalsã gõdrẽ. Biiblã goma dũniyã yẽbgr pãng kugr yell tɩ yaa makre. A leb n boola a Zeezi tɩ kiris-neb tigingã “yẽbgrã pãng kugri,” tiging ning b sẽn mak ne roog Wẽnnaam sẽn me wã.​—Efɛ 2:20; Zoo 38:6.

• Pãntekot.

  Yaa tig-kãsems a tãab nins Zʋɩf-rãmbã rapã fãa sẽn da segd kẽnd Zerizalɛm n tɩ maanã yiib-n-soaba. Pãntekot rat n yeelame tɩ “(Rasem) pis-nu soaba.” Biiblã babg ning b sẽn da gʋls ne Gɛrkã pʋgẽ, yaa woto la b boond-a. Bool-kãng zemsa ne tigr ning b sẽn da boond tɩ Dẽenem biis tigr wall Rasem a yopoe naoor a yopoe vẽkembeoogã tigrã Biiblã babg ning b sẽn da gʋls ne Ebre wã pʋgẽ wã. Nizã kiuug rasem 16 loogr poore, yaa rasem 50 soabã la b maand tig-kãnga.​—Yik 12:27; Zã 6:4; 1Ko 5:7.

• Pɛrs, Pɛrs nebã.

  Yaa soolem la neba, tɩ b sã n gomd b yell bɩ b wae n naagd Meed-dãmbã. Yaa vẽeneg tɩ bãmb ne Meed-dãmbã yaa buudu. Sɩngrẽ wã, Pɛrs nebã ra bee rũndã-rũndã Irã wã tẽn-nabrã goabg sẽn dabd nin-taoor sẽnese. A Sirus le Gãrã naamã tɛka, Pɛrs nebã sɩnga Meed-dãmbã soogre, la soolem a yiibã ra ket n naagda taab n dɩt naamã. (Pĩnd wẽndẽ kʋdemdã yel-mitb kẽer yeelame t’a Sirus ba wã yaa Pɛrs neda, t’a ma wã yaa Meed.) A Sirus zab n deega Babilon soolmã yʋʋmd 539 S.D.Z.R., la a kõ sor tɩ Zʋɩf-rãmb nins sẽn da be yembd be wã lebg n leb b ba-yirã. Pɛrs soolmã ra sɩngda Ẽndus kʋɩlgã sẽn be yaangã n tãag Eze Mogrã sẽn be nin-taoorã. Pɛrs nebã sooga Zʋɩf-rãmbã n tãag wakat ning a Alɛgsãndr le Gãrã sẽn wa n zab ne Pɛrs nebã n tõog yʋʋmd 331 S.D.Z.R. A Dãniyɛll paama vẽnegr n deng n yã Pɛrs soolmã. B goma Pɛrs soolmã yell Ɛsdras ne Neemi la Ɛstɛɛr sɛbã pʋsẽ. (Ɛsd 1:1; Dã 5:28; 8:20)​—Ges-y vẽnegr ning sẽn yaa B9.

•  Piig-pʋɩɩre.

  Yaa bũmb b sẽn pʋɩ zĩis piiga, n yãk a ye n kõ bɩ n yao fadgo, sẽn yɩɩd fãa tũudmã yĩnga. (Mal 3:10; Tõ 26:12; Mat 23:23) A Moyiiz Tõogã tũub wakate, yʋʋmd fãa, Israyɛll nebã ra yãkda b koodã la b rũmsã piig-pʋɩɩr n kõt Levi buudã neb n teel-ba. Levi buudã neb yãkda kũun-kãng piig-pʋɩɩr n kõ a Aarõ yagens nins sẽn yaa maan-kʋʋdbã n na n teel-ba. B ra yãkda bũmb a taab me piig-pʋɩɩr n kõtẽ. La b pa yeel tɩ kiris-nebã segd n kõo piig-pʋɩɩr ye.

• Pipi biiga.

  Nong n yaa rao pipi bi-ribla. (La pa biig ning pag sẽn na n dog pipi wã bal ye.) Pĩnd wẽndẽ wã, pipi bi-riblã ra tara ziir zak pʋgẽ. Ba wã kaalem poore, yaa yẽ n da lebgd zakã soaba. Gom-bilã tõe n maka rũng “dẽenem biig” me.​—Yik 11:5; 13:12; Sɩn 25:33; Kol 1:15.

• Pĩm.

  Yaa kɩlo, n leb n yaa yaood Filisti nebã sẽn da kɩt tɩ nebã yaooda, kut bɩ bũmb ning saasg yĩnga. Tẽn-vaeesdbã vaees n yãa kug toor-toor sẽn yaa kɩlo-rãmb Israyɛlle, tɩ pĩnd Ebre wã gom-bil sẽn yaa “pĩm” be b zutu. B zɩslmã zemsa garam a 7,8. Rẽ kolga sɩkl pʋɩ a yiib pʋɩ a tãab zugu.​—1Sã 13:20, 21.

• Porneya.​—

  Ges-y YOOBO.

• Purim.

  Yaa tigr b sẽn da maand Adaar kiuugã rasem piig la a naase, la a rasem piig la a nu wã. Zʋɩf-rãmbã ra maanda tig-kãng n tẽegd b sẽn põs sãoong Rĩm-poak a Ɛstɛɛr wakatẽ wã. Purim sẽn pa Ebre gom-bilã võor yaa “bãnde.” B pʋd-a lame tɩ Purim tigr bɩ Bãnd tigri, a Haman sẽn maan bãnd n na n bãng daar ning a sẽn na n sãam Zʋɩf-rãmbã yĩnga.​—Ɛst 3:7; 9:26.

• Pʋg-rɩkdga.

  Ebre-rãmbã nengẽ, pʋg-rɩkdg ziir pa ta pagb a taabã ye. Wakat kẽere, b boond-a lame tɩ paga. Wõnda pʋg-rɩkdsã ra yaa yem-pogse. Tõe n yaa 1) Ebre bi-pugl a ba sẽn koos t’a lebg yamba (Yik 21:7-9), 2) bu-zẽng bi-pugl b sẽn da, bɩ 3) bu-zẽng bi-pugl b sẽn yõk zabr sasa (Tõ 21:10-14). Sãnda me ra yaa pagb tʋm-tʋmd-pogs bɩ b yem-pogse, wala makre a Saara, a Leya ne a Rasɛll tʋm-tʋmd-pogsã.​—Sɩn 16:3, 4; 30:3-13; Bʋ 8:31; 9:18.

• Pʋg-yoodre.

  Yaa pag sẽn sakd n kẽed ne rao sẽn pa a sɩda, sẽn yɩɩd fãa ligd yĩnga. (Gɛrkã gom-bil ning b sẽn lebg tɩ “pʋg-yoodrã” yaa porne, sẽn dat n yeel tɩ “koose.”) Biiblã mi n gomda rap sẽn koosd b mens yell me. A Moyiiz Tõogã ra gɩdga koos-m-menga. Sẽn paase, b ra pa sakd tɩ ned koos a meng n dɩk ligdã n wa kõ a Zeova roogẽ wã ye. La neb nins sẽn da pʋʋsd bõn-naandsã yaool n da koosda b mens b wẽnd-dotã pʋsẽ n paamd ligd wʋsgo. (Tõ 23:17, 18; 1Rĩ 14:24) Sẽn paase, Biiblã mi n gomda pʋg-yoodr yelle, tɩ yaa sẽn na n mak neb wall buud bɩ sigls sẽn pʋʋsd bõn-naands n yaool n yetẽ tɩ b yaa wẽn-tũudba. Wala makre, Vẽnegr sebrã pʋgẽ, b boonda “Babilon-kãsengã” sẽn yaa tũudum siglgã tɩ pʋg-yoodre, bala a baooda dũniyã nanambs zood sẽn na yɩl n paam naam la arzɛgse.​—Vẽ 17:1-5; 18:3; 1Ki 5:25.

• Pʋleng maoongo.

  Yaa maoong b sẽn kõt ne yamleoogo, b sã n wa maan pʋlems kẽere.​—Maa 23:38; 1Sã 1:21.

• Pʋlengo.

  Yaa ned sẽn yeel Wẽnnaam t’a na n maana bũmbu, t’a na n kõ-a-la kũuni, t’a na n tʋma a tʋʋmde, bɩ t’a na n laka a meng ne bũmb kẽere, baa Wẽnnaam sẽn pa gɩdg bõn-kãensã. Rẽ ne wẽeneg yaa a yembre.​—Sõ 6:2; Koɛ 5:4; Mat 5:33.

R

• Ra-bãongo.

  Yaa bũmb b sẽn tar n balgd ned sẽn na yɩl n sɩbg-a. Ra-bãand kẽer yaa ned nao bal la b balgda, tɩ sãnda yaa ned la b gãt n põde, n naag a naoã ne a nusã la a yublã n balge.​—Ze 20:2; Tʋ 16:24.

• Rabɩlle.

  Yaa bũmb b sẽn ningd zom-nagdg sẽn na yɩl tɩ wuki, wall bõn-yũudl pʋgẽ sẽn na yɩl tɩ kũmi. Wae n yaa zom sẽn da zoe n wuk la b yãkd n bĩngi. Biiblã mi n goma rabɩll yelle, tɩ makd yel-wẽnd la bũmb sẽn sãamd neda. Rabɩll leb n makda bũmb sẽn paamd pãng wʋsg tɩ yaool n pa bũmb b sẽn ne ye.​—Yik 12:20; Mat 13:33; Ga 5:9.

• Rahaab.

  Yaa gom-bil sẽn be Zoob sebrã, Yɩɩn-sõamyã la Ezayi sebrã pʋgẽ n makd bũmbu. (A yaa toor ne pag ning yell b sẽn gomd Zozuwe sebrã pʋgẽ t’a yʋʋr yaa a Rahaabã.) Zoob sebrã pʋgẽ, vɛrse-rãmbã sõngdame tɩ d bãng tɩ Rahaabã yaa bõn-bãnd sẽn be mogrã pʋgẽ. Biiblã vɛrse-rãmb a taab pʋsẽ, mogrã bõn-bãndã makda Ezɩpti.​—Zoo 9:13; Yɩ 87:4; Eza 30:7; 51:9, 10.

• Ra-luk b sẽn lugl n pʋʋsdẽ.

  Ebre gom-bilã (Aseera) bilgda 1) ra-luk sẽn makd a Aseera sẽn yaa Kanaã nebã wẽn-poak b sẽn yet tɩ yẽ n kɩtd tɩ tɩɩsã, rũmsã la ninsaalbã sõor fɩɩgdẽ wã, wall 2) wẽn-poak a Aseera mengã naande. Wõnda b ra lugenda ra-lugsã tɩ yas selle. Wakat ninga, pa b tõrã fãa n yaa raad ye. Tõe n yɩɩ raad b sẽn pa peese, wall tɩɩs menga.​—Tõ 16:21; Bʋ 6:26; 1Rĩ 15:13.

• Ra-luk pugla.

  Yaa bũmb b sẽn ning ra-luk zug sẽn na yɩl n nags-a. Wẽnd-doog ning a Salomo sẽn me wã noore, ra-lugs a yiib sẽn wõnd tãab n da be be tɩ b boond-b tɩ Yakin la Bowaaze. B ra ninga pugl-bɛd ra-lug-kãens zutu. (1Rĩ 7:16)​—Ges-y vẽnegr ning sẽn yaa B8.

• Ra-luka.

  Yaa raoog sẽn yaa tɩrg tɩ b mi n ka ned a zugu. Tẽns kẽer pʋsẽ, b mi n kaa ned ra-luk zug  n na n kʋ, wall b rɩk kũum n yagl ra-luk zug sẽn na yɩl n keoog nebã bɩ n paoog sẽn ki-a wã. Asiiri nebã sẽn da yaa wẽnem dãmb wʋsg zabr pʋgẽ wã sã n da tɩ zab n yõg neba, b yagend-b-la ra-lugs sẽn yaa sɩlems zut tɩ kõs b pʋgã n tãag b yãoogã. La Zʋɩf-rãmbã tõogã pʋgẽ, ned sã n da beeg beeg-kãsenga, wala makre, a sã n paoog Wẽnnaam bɩ a sã n pʋʋs bõn-naandga, b rengd n lob-a-la ne kug n kʋ, bɩ n kʋ-a ne manesem a to. Rẽ poore, b rɩkda a kũumã n yagl ra-luk bɩ tɩɩg zug tɩ yɩ keoogr nebã yĩnga. (Tõ 21:22, 23; 2Sã 21:6, 9) Sã n yaa ne Rom dãmbã, b ra wae n sẽbda ned ra-luk zug n bas-a be rasem a wãn tɩ toogã, ko-yũudã, komã, la wĩntoogã zabdmã kɩt t’a ki. Sasa ning me, b kaada a soabã nusã ne a naoã ra-luk zugu, wa b sẽn kʋ a Zeezi to-to wã. (Luk 24:20; Zã 19:14-16; 20:25; Tʋ 2:23, 36)​—Ges-y NAMSG RA-LUKA.

• Reem sẽn naag ne tʋʋm-yoodo:

  Gɛrkã gom-bilã võor yaa “rã-yũur tigri, tɩ sẽn be-b tigrẽ wã yũud rãamã yaar la b tʋmd tʋʋm-dẽgdo.” Tẽn-tʋmdbã wakatẽ, tig a woto ra waeya sẽn tũud-b Gɛrk-rãmbã minimdã sʋka. Rẽ ra naaga wẽn-faadã pʋʋsg yel-maandɩ. A Poll sõdga “reem sẽn naag ne tʋʋm-yoodã” n naag “yĩngã tʋʋmã,” n paas tɩ sẽn maand-b bõn-kãensa wã “pa na n paam Wẽnnaam Rĩungã ye.” A Poll ne a Pɩyɛɛr sõdga “reem sẽn ne naag tʋʋm-yoodã” n naag yel-wẽn-kãsems wala rã-tɩgre, yoobo, rẽgdo, nin-yoolem la tʋʋm-wẽns ratem.​—Ga 5:19-21; 1Pɩ 4:3; Ro 13:13.

• Rẽgdo.

  Tõe n yaa ned sẽn yaa rẽgdo, wall Wẽnnaam noy kɩɩsgo. La Biiblã pʋgẽ, b sã n gomd rẽgd yelle, mi n yaa bũmb a Moyiiz Tõogã sẽn wilg tɩ pa zemse, bɩ tɩ pa yɩlemd ye. (Maa 5:2; 13:45; Mat 10:1; Tʋ 10:14; Efɛ 5:5)​—Ges-y YƖLEMDE.

• Rĩmã Gũudba.

  Yaa Rom sodaas b sẽn da yãke, tɩ b gũud Rom naabã. B wa n lebga neb sẽn tar pãng politikã wɛɛngẽ, hal n da tõe n teel naab wall b sik-a a naamẽ wã.​—Fi 1:13.

• Rɩk-n-kõ tigrã.

  Yaa tigr b sẽn da maand yʋʋmd fãa n tẽegd wẽnd-doogã yɩlgr yelle. Yaa a Antiokus Epifan n da maan tɩ wẽnd-doogã lebg rẽgd Wẽnnaam nifẽ. Tigrã ra sɩngda Kislɛɛv kiuugã rasem 25, n kaoos rasem a nii.​—Zã 10:22.

• Rudma.

  Yaa moog sẽn wõnd tãn-wĩig n yit koom noore, tɩ b tar n wʋgd peto, yaase, la b maand koom-kogendo. B ra tar-a lame me n maand bũmb sẽn wõnd sebre. B tall-a lame n maan seb-pindem wʋsgo.​—Yik 2:3.

• Rʋʋbã yɩɩlle.

  Yaa Yɩɩn-sõamyã 120–134 sɩngr goamã. Baa nebã sẽn da tar tagsg sẽn yaa toor-toor gom-kãngã võorã wɛɛngẽ wã, neb wʋsg tẽedame tɩ yɩɩn-sõamyã piig la a nu-kãensã ra yaa yɩɩl Israyɛll nebã sẽn da yɩɩnd ne sũ-noog n waoogd Wẽnnaam, b sã n wa rabd Zerizalɛm sẽn be Zida tãensẽ wã n na n tɩ maan tig-kãsems a tãabã b sẽn da maand yʋʋmd-yʋʋmdã.

S

• Saar.

  Yaa bũmb sẽn tar nao a yiib tɩ wed-moos tatẽ. B wae n tar-a lame n kẽnd zabre.​—Yik 14:23; Bʋ 4:13; Tʋ 8:28.

• Saasẽ na-poaka.

  Yaa wẽn-poak Israyɛll neb sẽn yaa kɩɩsdb sẽn da waoogd a Zeremi wakatẽ wã yʋʋre. Kẽer tagsdame tɩ yaa Babilon nebã wẽn-poak a Istaare (Astarte). Wẽn-poak a to me n zĩnd hal pĩnda, tɩ Sumeri rãmbã ra waoogd-a. A yʋʋrã yaa Inana sẽn dat n yeel tɩ “Saasẽ na-poaka.” B sẽn yeel t’a yaa Saasẽ wẽn-poakã sẽn yãk a toogo, yaa wẽn-poak b sẽn da yet t’a kõta pagbã rogem. Ezɩpt nebã gʋlsem a ye pʋgẽ, b boola a Astarte me tɩ “Saasẽ paga.”​—Ze 44:19.

• Sadiseyẽ-rãmbã.

  Yaa Zʋɩf-rãmbã tũudum sul-kãseng a ye neba. Ra yaa rakãag-rãmb la maan-kʋʋdb sẽn tar noor tʋʋm nins sẽn da tʋmd wẽnd-doogẽ wã zutu. B ra pa sakd minund wʋsg Fariziyẽ-rãmbã sẽn da tũudi, la bũmb a taab Fariziyẽ-rãmbã sẽn da tẽedã ye. Makre, Sadiseyẽ-rãmbã ra pa tẽed kũum vʋʋgrã, b ra pa tẽed me tɩ malɛgs beeme ye. B ra kisa a Zeezi.​—Mat 16:1; Tʋ 23:8.

• Samande.

  Yaa vɩʋʋg ning sẽn da be sɛk-roogã ne fuug ning b sẽn da tẽeg tɩ yaa wa lalg n gũbg-a wã sʋkã. Kaoosg zugẽ, samandã wa n yaa vɩʋʋg ning sẽn be wẽnd-doogã ne lalgã sẽn gũbg-a wã sʋkã. Tẽn-kugr ning zug b sẽn da yõogd maandã ra bee sɛk-roogã samandẽ wã, la wẽnd-doogã saman-bilã pʋga. (Ges-y vẽnegr ning sẽn yaa B5, B8, B11.) Biiblã leb n gomda zags la na-yir saman yelle.​—Yik 8:13; 27:9; 1Rĩ 7:12; Ɛst 4:11; Mat 26:3.

• Samari.

  Yɩɩ Israyɛll buud piigã rĩungã sẽn da be goabgã na-tẽng na maan yʋʋm 200. B ra boonda buud piigã soolmã tõr me tɩ Samari. B ra mee galʋ-tẽngã tãng zugu, tɩ tãngã yʋʋr me yaa Samari. A Zeezi wakatẽ wã tɩ Samari ra yaa Rom soolem, tɩ Galile be a goabga, tɩ Zide be a rɩtgo. A Zeezi sẽn wa n gilgd n moond koɛɛgã, a ra pa wae n moond Samari soolmẽ wã ye. La a ra mi n pasga soolmã n looge, la a sõs ne Samari neba. A Pɩyɛɛr tʋma ne Rĩungã kʋɩlen-biig a yiib-n-soabã sẽn pa kʋɩlen-biig sɩd-sɩdã, wakat ning Samari nebã sẽn paam vʋʋsem sõngã. (1Rĩ 16:24; Zã 4:7; Tʋ 8:14)​—Ges-y vẽnegr ning sẽn yaa B10.

• Samari neba.

  Sɩngrẽ wã, yaa Israyɛll buud piigã rĩungã sẽn da be goabgã neb la b ra boond woto. La yʋʋmd 740 S.D.Z.R., Asiiri nebã zab n deega Samari. Rẽ poore, b boonda sãamb nins Asiiri nebã sẽn tall n wa be wã me tɩ Samari  neba. A Zeezi wakatẽ wã tɩ pa le yaa buud neb bɩ soolem neb la b boond woto ye. Ra wae n yaa tũudum sull neb sẽn da be pĩnd wẽndẽ Sikɛmmã ne Samari sɛɛgẽ. Tũudum-kãng nebã sẽn da tẽed bũmb ninsã kẽer da yaa toor fasɩ ne Zʋɩf-rãmbã.​—Zã 8:48.

• Sãnedrẽ.

  Yaa Zʋɩf-rãmbã bʋ-kaoodb sull ning sẽn tar noor n yɩɩdã sẽn da be Zerizalɛmmã. A Zeezi wakatẽ wã, b ra yaa neb 71. Ra yaa maan-kʋʋdb kãsmã, neb sẽn yɩ maan-kʋʋdb kãsem-dãmba, maan-kʋʋdb kãsem-dãmb zags rãmba, kãsem-dãmba, buud zu-soben-dãmba, zak taoor dãmba, la gʋlsdba.​—Mrk 15:1; Tʋ 5:34; 23:1, 6.

• Sebat.

  Yaa yʋʋr b sẽn pʋd Zʋɩf-rãmbã tũudmã kalãndriye wã kiuug piig la a ye soabã, Babilon yembdã poore. La a yaa buud a taabã kiuug a nu soabã. A sɩngda yʋʋm-vẽkr kiuugã pʋɩ-sʋk n tãag wao-fugdg kiuugã pʋɩ-sʋka. (Zkr 1:7)​—Ges-y vẽnegr ning sẽn yaa B15.

• Seb-pindem.

  Yaa sebr b sẽn maan ne gãong wall ne papiris n gʋlsd a neng a ye zugu, n mi n vil-a raoogo. Sɩngrẽ wã, b gʋlsa Gʋls-sõamyã wã seb-pindem zutu, tɩ b ra get seb-pindem-kãens n lebsd n gʋlsd seb-pindem a taab zutu, bala yaa seb-pindmã bal n da be.​—Ze 36:4, 18, 23; Luk 4:17-20; 2Tɩ 4:13.

• Seglg daare.

  Yaa Vʋʋsg daarã ket tɩ beoogo, tɩ Zʋɩf-rãmbã ra segend b mens Vʋʋsg daarã yĩnga. Yaa daar ning b sẽn boond rũndã-rũndã tɩ arzũmã wĩndgã kõom poor la seglg daarã ra sɛta, tɩ Vʋʋsg daarã sɩnge. Zʋɩf-rãmbã daar sɩngda zaabr n tɩ baas vẽkembeoogã zaabre.​—Mrk 15:42; Luk 23:54.

• Sela.

  Yaa yɩɩlã wɛɛngẽ gom-bil sẽn be Yɩɩn-sõamyã la Habakuk sɛbã pʋgẽ. Tõe t’a rat n yeelame tɩ b bas yɩɩlã wall yʋʋm-teedã wẽebo, pa rẽ bɩ yɩɩlã la yʋʋm-teedã fãa sẽn na yɩl n bʋgse, wall n paas yɩɩlã b sẽn nan yɩɩlã pãnga. Sɛptãntã pʋgẽ, b lebg-a lame tɩ diapsalma sẽn dat n yeel tɩ “yʋʋm-teed yen-ye wẽebo.”​—Yɩ 3:4; Ha 3:3.

• Seminit.

  Yaa yɩɩlã wɛɛngẽ gom-bil sẽn dat n yeel tɩ “nii-n-soabã.” Tõe t’a bilgda yʋʋm-teed wẽeb la yɩɩl sẽn yɩɩnd tẽngr-tẽngre. Sã n yaa yʋʋm-teedã wɛɛngẽ, tõe n yɩɩ yʋʋm-teed sẽn maan tɩ b sã n wẽedẽ, bɩ b rãamdã pa yit sõma ye. Sã n yaa yɩɩlã wɛɛngẽ, wõnda b sẽn na n wẽed yʋʋm-teedã tẽngr-tẽngre, tɩ b tũud rẽ n yɩɩndẽ.​—1Ki 15:21; Yɩ 6:Sɩngr goamã; 12:Sɩngr goamã.

• Seoll.

  Yaa Ebre gom-bila, t’a võorã ne Gɛrk gom-bil ning sẽn yaa “Hadɛsã” yaa a yembre. D lebg-a lame tɩ “Yaoogo,” (pipi gʋls-bilã yaa bedre) n na n wilg tɩ yaa ned buud fãa sẽn dabdẽ wã.​—Sɩn 37:35; Yɩ 16:10; Tʋ 2:31.

• Serafẽ-rãmba.

  Yaa malɛgs sẽn gũbg a Zeova geerã saasẽ. Ebre gom-bil ning sẽn yaa seraphim rat n yeelame tɩ “sẽn dɩt-b bugum.”​—Eza 6:2, 6.

• Seribẽ-rãmbã.

  Yaa malɛgs sẽn tar ziir-kãsenga, n tʋmd tʋʋm sẽn yaa zalle. B yaa toor ne serafẽ-rãmbã.​—Sɩn 3:24; Yik 25:20; Eza 37:16; Ebr 9:5.

• Seya.

  Yaa makdg b sẽn tar n makd bõn-koeemse. B sã n tik bat makdgã sẽn tar n makd bũmb sẽn yaa koom-koomã n mage, a zemsa litr a 7,33, bala b zema taaba. (2Rĩ 7:1)​—Ges-y vẽnegr ning sẽn yaa B14.

• Se-yõkda.

  Yaa ned sẽn yõkd sɛɛg sẽn na yɩl tɩ zems-n-taar le zĩnd sul a yiib bɩ neb sʋka. Gʋls-sõamyã pʋgẽ, b yeelame t’a Moyiiz yɩɩ Tõogã kaool se-yõkda, t’a Zeezi yaa kaool-paalgã se-yõkda.​—Ga 3:19; 1Tɩ 2:5.

• Sezaar.

  Yaa Rom tẽngã buud a ye sondre, la wa n lebga Rom nanambsã naam yʋʋre. B pʋda a Ogust ne a Tɩbɛɛr la a Kolood yʋyã Biiblã pʋgẽ. Baa b sẽn pa pʋd a Neerõ yʋʋrã, b boola yẽ me tɩ “Sezaare.” Biiblã babg ning b sẽn da gʋls ne Gɛrkã pʋgẽ, “Sezaar” leb n makda pãn-soaadba, bɩ goosneema.​—Mrk 12:17; Tʋ 25:12.

• Sɛk-roogo.

  Yaa fu-roog b sẽn tõe n dɩk n toeem zĩiga. Yaa be la Israyɛll nebã ra waoogd Wẽnnaam b sẽn yi Ezɩptã poore. A Zeova kaoolã koglg ra bee a pʋgẽ. Kaoolã koglg ra makda Wẽnnaam sẽn be b sʋkã. Yaa be la b ra maand maandã la b waoogd Wẽnnaam. B ra maan-a-la ne raad n pil-a ne pɛɛl sẽn wʋg ne lẽ gĩsi, n gʋl seribẽ-rãmb b zutu. A ra tara ro-pʋs a yiibu. Pipi soabã ra boondame tɩ Zĩ-sõngo, tɩ yiib-n-soabã boondẽ tɩ Zĩ-sõng sẽn yɩɩda. (Zoz 18:1; Yik 25:9)​—Ges-y vẽnegr ning sẽn yaa B5.

• Siiri, Siiri neba.​—

  Ges-y ARAM, ARAM NEBA.

• Sirt.

  Yaa zĩ-bɛd a yiib sẽn be Libi mogrã noore, Afirik rɩtg sẽnese. Pĩnd koom-kogendã rãmb ra zoeta Sirt tũubu, koomã sẽn mi n kãag bĩis-rʋrã n toeemd zĩig tɩ rẽ tõe n wa ne yellã yĩnga. (Tʋ 27:17)​—Ges-y vẽnegr ning sẽn yaa B13.

• Sivan.

  Yaa yʋʋr b sẽn pʋd Zʋɩf-rãmbã tũudmã kalãndriye wã kiuug a tãab-n-soabã, Babilon yembdã poore. La a yaa buud a taabã kiuug a wɛ soabã. A sɩngda sig-noy kiuugã pʋɩ-sʋk n tãag sigr kiuugã pʋɩ-sʋka. (Ɛst 8:9)​—Ges-y vẽnegr ning sẽn yaa B15.

• Sɩdã kɩɩsgo.

  Yaa Gɛrk gom-bil sẽn yaa apostasia, n dat n yeel tɩ “zãag f meng ne.” A tõe n dat n yeelame me tɩ “zoe n base, raag n base, wall kɩɩsgo.” Biiblã babg ning b sẽn da gʋls ne Gɛrkã pʋgẽ, b wae n gomda “sɩdã kɩɩsg” yell n na n bilg ned sẽn bas tũudum hakɩɩkã.​—Ye 11:9; Tʋ 21:21; 2Te 2:3.

• Sɩɩga.

  Yaa nefɛs sẽn yaa Ebre gom-bilã ne psikɛ sẽn yaa Gɛrk gom-bilã la b sẽn lebg tɩ sɩɩgã. D sã n maag d yĩng n ges gom-bi-kãensã sẽn  be zĩis nins Biiblã pʋgẽ wã, d mikdame tɩ b tõe n makda 1) neba, 2) rũms wall 3) ned bɩ rũng vɩɩm. (Sɩn 1:20; 2:7; Sõ 31:28; 1Pɩ 3:20; ges-y not-rãmbã me.) Biiblã wilgdame tɩ nefɛs la psikɛ b sẽn lebg tɩ sɩɩgã yaa tẽng zug bõn-naands nug sẽn tõe n sɩɩse, nif sẽn tõe n yã, la sẽn kiidi. Woto yaa toor fasɩ ne tũudum wʋsg sẽn yet bũmb ning sɩɩgã wɛɛngẽ wã. Biibl-kãngã pʋgẽ, naoor wʋsgo, b lebga nefɛsã ne psikɛ wã tɩ zems ne b sẽn dat n yeel bũmb ningã. Makre, b mi n lebg-b lame tɩ “vɩɩm,” “bõn-vɩɩga,” “neda,” wall b yeel bal tɩ “maam,” “foo,” “yãmba,” “bãmba,” “yẽ.” Naoor wʋsg me, b mi n ninga vẽnegr n wilg tɩ gom-bil ning võor a to yaa “sɩɩga.” D sã n wa pʋd “sɩɩg” vɛrse pʋgẽ wall vẽnegr pʋgẽ, a võorã zemsda ne d sẽn zoe n togs bũmb ning zugẽ wã. B sã n yeel tɩ ned maana bũmb ne a sɩɩg fãa, rat n yeelame t’a maan-a-la ne a pãng fãa bɩ ne a sũur fãa. (Tõ 6:5; Mat 22:37) Zĩis kẽer me, b sã n gomd nefɛs bɩ psikɛ yelle, tõe n yaa bõn-vɩɩs tʋlsem bɩ bũmb b sẽn nong yell la b gomda. Leb n tõe n yaa ninsaal sẽn ki bɩ rũng sẽn ki yell la b gomda.​—Sõ 6:6; Ye 23:2; Eza 56:11; Aaz 2:13.

• Sɩkl.

  Ebre-rãmbã ra tara Sɩkl n bilgd bũmb zɩslem. Leb n da yaa b ligd me. A zɩslmã zemsa garam 11,4. B ra gomda “zĩ-sõngã sɩklã” yelle, tɩ tõe tɩ yaa sẽn na n wilg tɩ sɩkl zɩslem segd n yɩɩ takɩ, wall t’a segd n zemsa sɩkl ning sẽn da be sɛk-roogẽ wã. Tõe tɩ na-yirã ra tara sɩkl (sẽn yaa toor ne sɩkl ning nebã sẽn wae n tarẽ wã), bɩ sɩkl zɩslem sẽn yaa takɩ sẽn be na-yirã.​—Yik 30:13.

• Sɩngr goama.

  Yaa goam nins sẽn be Yɩɩn-sõamyã wã sɩngrẽ n wilgd ned ning sẽn gʋls yɩɩllã, a yɛl sẽn da yaa to-to, la wakat ning a sẽn yɩɩlã, yɩɩllã sẽn segd n yɩɩl to-to la yʋʋm-teed nins b sẽn segd n wẽ wã, la a sẽn gʋls yɩɩllã bũmb ning yĩnga.​—Ges-y Yɩɩn-sõamyã 3, 4, 5, 6, 7, 30, 38, 60, 92, 102 sɩngr goamã.

• Soondg tẽnse.

  Yaa Levi buudã neb tẽnse, tɩ ned sã n da kʋ a to ne yĩdg bɩ a tõe n zoe n kẽng be, tɩ sẽn dokd-a sẽn ki-a wã sũurã ra wa paam-a n kʋ ye. Yaa tẽns a yoob a Zeova sẽn kɩt t’a Moyiiz yãk Kãabg tẽngã tõr pʋgẽ. Kaoosg zugẽ, a Zeova kɩtame t’a Zozuwe me yãk tẽn-kãense. Ned sã n da zoe n tɩ kẽ soondg tẽngẽ, a togsda a yellã kãsem-dãmbã sẽn be tẽngã rignoorẽ wã. B reegd-a-la sõma. Sẽn na yɩl tɩ ned sẽn kʋ a to ne yamleoog ra wa paam koglg a woto, b tallda sẽn zoe-a n kẽng soondg tẽngẽ wã n leb tẽng ning pʋgẽ a sẽn kʋ nedã, tɩ b kao a bʋʋd n bãng a sã n pa tar taale. B sã n wa bãng t’a pa tar taale, b segd n tall-a lame n leb soondg tẽngẽ wã. A segd n zĩnda tẽn-kãng pʋgẽ n pa long a toadga, n tãag a yõor tɛk wall maan-kʋʋdb kãsmã kũum.​—Sõ 35:6, 11-15, 22-29; Zoz 20:2-8.

• Sorã.

  Gʋls-sõamyã pʋgẽ, gom-bi-kãngã bilgda manesem bɩ tʋʋm-tʋmdɩ sẽn tat a Zeova yam bɩ sẽn pa tat a yam. B ra boonda neb nins sẽn lebg a Zeezi Kirist karen-biisã tɩ “Sorã” neba, rat n yeel tɩ b sẽn da vɩ to-to wã wilgdame tɩ b tẽeda a Zeezi Kiristã, la tɩ b rɩkda a togs-n-taare.​—Tʋ 19:9.

• Sõma la wẽng bãngr tɩɩgã.

  Yaa tɩɩg sẽn da be Edɛn zẽedã zĩigẽ. Wẽnnaam tika tɩ-kãng n na n wilg tɩ yẽ n tar sor n na n lugl noy “sõma” la “wẽngã” wɛɛngẽ ninsaalbã yĩnga.​—Sɩn 2:9, 17.

• Sõngo, Sõmblem.

  B boonda a Zeova tɩ “Sõngo,” bala a yaa yɩlemd bũmb fãa pʋgẽ, t’a sẽn maand fãa yaa yɩlemd la sõngo. (Yik 28:36; 1Sã 2:2; Ye 9:10; Eza 6:3) Ebre wã la Gɛrkã pʋgẽ, b sã n yeel tɩ ned yaa sõngo (Yik 19:6; 2Rĩ 4:9), tɩ rũng yaa sõngo (Sõ 18:17), tɩ bũmb yaa sõngo (Yik 28:38; 30:25; Maa 27:14), tɩ zĩig yaa sõngo (Yik 3:5; Eza 27:13), tɩ wakat yaa sõngo (Yik 16:23; Maa 25:12), la tɩ tʋʋmd yaa sõngo (Yik 36:4), rat n yeelame tɩ welga toor wall tɩ b kɩtame tɩ lebg sõngo, n yaa Wẽnnaam sẽn yaa sõngã rẽnda. Leb n dat n yeelame tɩ welga toor a Zeova tʋʋmdã yĩnga. Biiblã babg ning b sẽn da gʋls ne Gɛrkã pʋgẽ, gom-biis nins sẽn yaa “sõng” la “sõmblmã” bilgda ned bɩ bũmb sẽn welg toor Wẽnnaam yĩnga. A leb n bilgda ned yel-manesem sẽn yaa sõma.​—Mrk 6:20; 2Ko 7:1; 1Pɩ 1:15, 16.

• Sugr kũuni.​—

  Ges-y PAASGO.

• Sugr kũun zĩiga.

  Yaa kaoolã koglg limdi. Paasg daarã, maan-kʋʋdb kãsmã ra mesda yel-wẽndã maand zɩɩm kaoolã koglg limd taoore. B sẽn boond-a ne Ebre wã yaa gom-bil sẽn dat n yeel tɩ “lud (yel-wẽnde)” wall “yẽes (yel-wẽnde).” B ra maan-a-la ne sãnem yen-ye, tɩ seribẽ-rãmb a yiib be a kɩrems a yiibã. Wakat ninga, b boond-a lame bal tɩ ‘limdi.’ (Yik 25:17-22; 1Ki 28:11; Ebr 9:5)​—Ges-y vẽnegr ning sẽn yaa B5.

• Sʋɩtãana.

  Yaa Ebre gom-bil t’a võorã yaa “Kɩɩsda.” Biiblã pʋgẽ b sã n gomd Sʋɩtãan yelle, wae n yaa Wẽnnaam bɛ-kãsengã yell la b gomda.​—Zoo 1:6; Mat 4:10; Vẽ 12:9.

• Sʋndo.

  Yaa bũmb b sẽn tar n wʋgd futu.​—Yik 39:27.

• Sũ-sãang yɩɩlle.

  Yaa yɩɩll b sẽn yɩɩnd wall yʋʋm-teed b sẽn wẽed n na n wilg tɩ b sũurã sãama wʋsgo. Wala makre, ned zoa wall a roagd sẽn ki t’a wilgd a sũ-sãanga.​—2Sã 1:17; Yɩ 7:Sɩngr goamã.

• Sũur-kaseto:

  Yaa tõog sẽn kɩtd tɩ ninsaal tõe n bãng sõma la wẽng n bake, sẽn kɩtd t’a tõe n bãng a sẽn segd n maan la a sẽn pa segd n maane. Biiblã pʋgẽ, Gɛrkã gom-bil ning b sẽn lebg tɩ sũur-kasetã rat n yeelame tɩ bãng f  menga. Woto rat n yeelame tɩ d sã n maan sẽn pa sõma, d sũur-kasetã tõe n kaoo d bʋʋd bɩ n ning-d taale. La d sã n maan sẽn yaa sõma, a tõe n kɩtame tɩ d yamã gãe bãane. D sã n yãk yam n na n maan bũmb sẽn pa sõma me, a tõe n keoog-d lame.​—Ro 2:14, 15; 9:1.

T

• Taal maoongo.

  Yaa maoong ned sẽn kõt a yel-wẽn yĩnga. A yaa toor bilf ne yel-wẽn maand a taabã, bala yel-wẽn-maand sẽn tek yam sã n da kõ taal maoongo, yaa sẽn na n wilg t’a sak n deegame t’a beega Wẽnnaam, wall t’a kɩtame tɩ ned a to pa le paamd bũmb kaoolã sẽn da kõt-a sor t’a paam ye. Leb n yaa sẽn na yɩl n lebs n paam bũmb a sẽn bõn a yel-wẽndã yĩnga, la sẽn na yɩl tɩ b ra sɩbg-a ye.​—Maa 7:37; 19:22; Eza 53:10.

• Talã.

  Yaa Ebre-rãmbã ligdi, la zɩslem makdg sẽn yaa bedr n yɩɩd a taabã. A zɩslmã yaa kɩlo 34,2. Gɛrk-rãmbã talã wã ra pa ta Ebre-rãmbã rẽndã ye. A zemsa kɩlo 20,4. (1Ki 22:14; Mat 18:24)​—Ges-y vẽnegr ning sẽn yaa B14.

• Tall n kẽng yembdo.

  Yaa b sẽn na n yõk ned a ba-yir bɩ a zakẽ n looge. Naoor wʋsgo, yaa neb sẽn zab n toog n maand woto. Ebre gom-bilã rat n yeelame tɩ “loogre.” Naoor a yiib la b tall Israyɛll nebã n loog yembdo. Asiiri nebã talla buud piig rĩungã sẽn be rɩtgã n kẽng yembdo. Rẽ poore, Babilon nebã talla buud a yiib rĩungã sẽn be goabgã n kẽng yembdo. Rĩung a yiibã yembs kẽer lebg n leba b tẽngẽ wã, Pɛrs rĩm a Sirus naamã wakate.​—2Rĩ 17:6; 24:16; Ɛsd 6:21.

• Tamuuz.

  1) Yaa wẽnnaam a ye yʋʋre. Ebre pagb nins sẽn yaa wẽn-kɩɩsdbã ra yãbda a yĩng Zerizalɛm. Kẽer tagsdame t’a Tamuuz ra yaa rĩma, t’a kũumã poor bɩ b tẽed t’a lebga wẽnnaam. Sumeri rãmbã sɛb pʋsẽ, b boonda a Tamuuz t’a Dumuzi. B ra yetame t’a yaa wẽn-poak a Inana b sẽn yet tɩ yẽ n kɩtd tɩ tɩɩsã, rũmsã la ninsaalbã sõor fɩɩgdẽ wã sɩda, bɩ a rolle. (A Inana la Babilon nebã sẽn boond t’a Istaarã.) (Eze 8:14) 2) Yaa yʋʋr b sẽn pʋd Zʋɩf-rãmbã tũudmã kalãndriye wã kiuug a naas-n-soabã, Babilon yembdã poore. La a yaa buud a taabã kiuug piig soabã. A sɩngda sigr kiuugã pʋɩ-sʋk n tãag sẽoog kiuugã pʋɩ-sʋka.​—Ges-y vẽnegr ning sẽn yaa B15.

• Tarsiis koom-kogendo.

  Sɩngrẽ wã, yaa koom-kogend sẽn da togd sor n kẽnd Tarsiis (rũndã-rũndã yaa Ɛspayn) la b ra boond woto. Wõnda b wa n boonda koom-kogen-bɛdã sẽn tõe n tog sor n zãag zĩigã woto. A Solomo ne a Zozafat ra tara koom-kogen-kãens buud n leebdẽ.​—1Rĩ 9:26; 10:22; 22:48.

• Tartaar.

  Biiblã babg ning b sẽn da gʋls ne Gɛrkã pʋgẽ, tartaarã makda zĩig ning Wẽnnaam sẽn lob malɛgs nins sẽn kɩɩs yẽ a Nowe wakatẽ wã. B sẽn gom tartaroo (lob tartaar pʋgẽ) wã yell 2 Pɩyɛɛr 2:4 pʋgẽ wã pa rat n yeel tɩ b loba “malɛgs nins sẽn maan yel-wẽnã” zĩig ning sẽn pʋʋsd-b bõn-naandsã sẽn boond tɩ tartaarã pʋgẽ ye. (Nin-kãens ra tagsdame tɩ tartaar yaa prizõ buud b sẽn tu tẽnga, la sẽn yaa lika, tɩ b balgd wẽn-bi wã beenẽ.) Rat n yeelame tɩ Wẽnnaam riga malɛg-kãens saasẽ la t’a reega tʋʋmd ning b sẽn da tarã, n lud b yamã tɩ b pa mi Wẽnnaam sẽn na n pids a raabã to-to wã ye. B sẽn be lik bida pʋgẽ wã leb n wilgda b baasgã sẽn na n yɩ to-to wã, bala Gʋls-sõamyã wã wilgame tɩ b na n sãama bãmb ne a Sʋɩtãan sẽn yaa b naabã wakat fãa yĩnga. Rẽnd Tartaarã bilgda malɛgs nins sẽn kɩɩs Wẽnnaamã yɛl sẽn yaa to-to. Tartaarã ne “bog-zulung” ning yell b sẽn gom Vẽnegr 20:1-3 pʋgẽ wã pa a yembr ye.

• Tãntãoogo.

  Yaa bũmb b sẽn maan ne wanzuri, ne zũud bɩ ne bũmb a to, tɩ b tõe n peeb n keoog neba, wall b peeb n yɩɩle. Sõdb 10:2 pʋgẽ, a Zeova yeelame tɩ b maan wanzuri tãntãad a yiib b sẽn na n tar n peebd n tigimd nin-buiidã, n kɩtdẽ tɩ b yikd n dɩkd sore, pa rẽ bɩ sẽn na n kɩt tɩ b kẽng zabre. Wõnda tãntã-kãens ra yaa tɩrse, n yaa toor ne “bardã” sẽn da gõdã b sẽn maand ne rũms yɩɩlã. Tãntãad me n da naag wẽnd-doogã yʋʋm-teed sʋka, la b pa wilg b sẽn maan-b to-to wã ye. Biiblã pʋgẽ, b sã n wa gomd a Zeova bʋ-kaoor koees mooneg yell wall bũmb a taab sẽn yit Wẽnnaam nengẽ yelle, b mi n yeelame tɩ b peeba tãntãado.​—2Ki 29:26; Ɛsd 3:10; 1Ko 15:52; Vẽ 8:7–11:15.

• Tãnwĩig sẽn tar n makdẽ.

  Tãnwĩig sẽn tar n makdẽ woglem yaa kãntɩɩg a yoobe. Sã n yaa kãntɩ-koɛɛgã, a zemsa metr a 2,67. La sã n yaa kãntɩ-wokã, yaa metr a 3,11. (Eze 40:3, 5; Vẽ 11:1)​—Ges-y vẽnegr ning sẽn yaa B14.

• Tãnwĩig.

  Yaa gom-bil sẽn bilgd mood buud toor-toor sẽn wae n yit koom noore. Tãnwĩig ning yell Biiblã sẽn gomdã wae n yaa moog ning b sẽn boond tɩ Arundo donax. (Zoo 8:11; Eza 42:3; Mat 27:29; Vẽ 11:1)​—Ges-y TÃNWĨIG SẼN TAR N MAKDẼ.

• Tebɛt.

  Yaa yʋʋr b sẽn pʋd Zʋɩf-rãmbã tũudmã kalãndriye wã kiuug piig soabã, Babilon yembdã poore. La a yaa buud a taabã kiuug a naas-n-soabã. A sɩngda yʋʋm-sar kiuugã pʋɩ-sʋk n tãag yʋʋm-vẽkr kiuugã pʋɩ-sʋka. Naoor wʋsgo, b boond-a lame bal tɩ “kiuug piig soabã.” (Ɛst 2:16)​—Ges-y vẽnegr ning sẽn yaa B15.

• Teed b sẽn tar n kiisd fɩtl-dãmb bugum.

  Yaa teed sẽn maan ne sãnem bɩ ne wanzuri, tɩ b ra tar n tʋmd sɛk-roogẽ wã la wẽnd-doogẽ wã. Tõe tɩ b ra wõnda siizo-rãmbã, tɩ b tar n kʋrsd fɩtl-dãmbã lamdo.​—2Rĩ 25:14.

•  Tek yam n kos sugri.

  Biiblã pʋgẽ, a võorã yaa ned sẽn na n toeem yam la a maand a bãngẽ a sẽn da vɩ to-to wã yĩnga, a tʋʋm-wẽns yĩnga, pa rẽ bɩ bũmb a sẽn da segd n maan n pa maan yĩnga. Ned sã n sɩd tek yam n kos sugri, a toeemdame n tʋmd tʋʋm sẽn wilgd t’a teka yam.​—Mat 3:8; Tʋ 3:19; 2Pɩ 3:9.

• Terafim-dãmba.

  Yaa zak neb wẽnnaam-dãmb bɩ b bõn-naandse, b sẽn da mi n sokd-b n na n bãng beoog yɛla. (Eze 21:21) B ra maana kẽer tɩ b yaa bɛd n wõnd ninsaala, la sãnda ra yaa kɩdse. (Sɩn 31:34; 1Sã 19:13, 16) Tẽn-vaeesdbã yãa bũmb toor-toor Mezopotami sẽn wilgd tɩ ned sã n da tar terafim-dãmba, a soabã tara kaset sẽn wilgd t’a tara sor n na n paam rogem-pʋɩɩr zakã pʋgẽ. (Tõe tɩ yaa rẽ yĩng la a Rasɛll sẽn dɩk a ba wã terafim-dãmbã.) Ra pa woto Israyɛlle, baa bõn-naands pʋʋsdbã sẽn da tar terafim-dãmb bʋ-kaoodbã la rĩm-dãmbã wakatẽ wã. Terafim-dãmb naaga bũmb nins rĩm a Zoziyas sẽn yaa wẽn-sakdã sẽn sãamã sʋka.​—Bʋ 17:5; 2Rĩ 23:24; Ooz 3:4.

• Te-zɛɛdem.

  Yaa ned teed wall a roog teedo, bɩ a rũms wall a bũmb a taab sẽn tar yõod wʋsg bɛɛb sẽn wa n zab n tõog n wʋk n looge.​—Zoz 7:21; 22:8; Ebr 7:4.

• Tẽn-kugrã yɩɩla.

  Yaa bũmb b sẽn maan tɩ wõnd rũng yɩɩla, n be tẽn-kug kẽer zutu, b gõdrã zĩis a naasẽ wã. (Maa 8:15; 1Rĩ 2:28)​—Ges-y vẽnegr ning sẽn yaa B5 ne B8.

• Tẽn-kugri.

  Yaa bũmb b sẽn maan tɩ yaa zãntlgo, bɩ bũmb b sẽn me ne tãnd wall kuga, pa rẽ bɩ kug-bedre, wall bũmb b sẽn maan ne raado, n bolg ne zuud bɩ sãnem, tɩ b maand maand a zugu, bɩ n yõogd wisd n waoogd Wẽnnaam. Fu-roogã ne wẽnd-doogã pipi ro-pʋsẽ wã, b ra maana ‘sãnem tẽn-kug-bil’ wisdã yõogr yĩnga. B ra maan-a-la ne raad n bolg sãnem. La zakã pʋgẽ, “zũud tẽn-kugrã” sẽn yɩɩd sãnem tẽn-kugrã n da be be maandã yõogr yĩnga. (Yik 27:1; 39:38, 39; Sɩn 8:20; 1Rĩ 6:20; 2Ki 4:1; Luk 1:11)​—Ges-y vẽnegr ning sẽn yaa B5 ne B8.

• Tẽn-tʋmda.

  Gomdã võor yaa “ned b sẽn tʋme.” B boola a Zeezi n paas neb sãnda b sẽn tʋm tɩ b tɩ sõng b taabã tɩ “tẽn-tʋmdba.” Naoor wʋsgo, yaa karen-biis 12 a Zeezi meng sẽn yãk tɩ b gomd a yʋʋrã yĩngã la b boond tɩ “tẽn-tʋmdba.”​—Mrk 3:14; Tʋ 14:14.

• Tigsg roogo.

  Yaa gom-bil võor sẽn dat n yeel tɩ “tigim taaba, tiginga.” La vɛrse-rãmb wʋsg pʋsẽ, tigsg roog yaa zĩig Zʋɩf-rãmbã sẽn da tigimd taab n karemd Gʋls-sõamyã wã, n zãmsd-a, n moond koɛɛgã, la b pʋʋsdẽ. A Zeezi wakatẽ wã, Israyɛll tẽn-bedr fãa ra tara a tigsg roogo, tɩ galʋ-tẽn-bɛdã ra tar sẽn ta a yi bɩ sẽn yɩɩd rẽ.​—Luk 4:16; Tʋ 13:14, 15.

• Tiginga.

  Yaa neb sẽn tigimd taab bũmb takɩ yĩng wall tʋʋmd yĩnga. Biiblã babg ning b sẽn da gʋls ne Ebre wã pʋgẽ, wae n yaa Israyɛll buudã la b boond tɩ tiginga. Biiblã babg ning b sẽn da gʋls ne Gɛrkã pʋgẽ, b boonda kiris-nebã tigims toor-toorã woto. La naoor wʋsgo, yaa kiris-nebã fãa sẽn naag taabã la b boond tɩ tiginga.​—1Rĩ 8:22; Tʋ 9:31; Ro 16:5.

• Tisri.​—

  Ges-y ETANIM ne vẽnegr ning sẽn yaa B15.

• Tɩrlem.

  Biiblã pʋgẽ, yaa bũmb sẽn zems ne noy nins Wẽnnaam sẽn lugl sõma la wẽngã wɛɛngẽ wã.​—Sɩn 15:6; Tõ 6:25; Ye 11:4; So 2:3; Mat 6:33.

• To-kãsenga.

  Gɛrk gom-bil ning b sẽn lebg tɩ “toogã” bilgda zu-loees sẽn namsd ned to-to wã, wall sẽn kɩtd t’a paamd sũ-sãang ningã. A Zeezi ra yeelame tɩ “to-kãseng” buud sẽn zɩ n zĩnd n na n paam Zerizalɛm nebã. Sẽn yɩɩd fãa, a yeelame t’a buud na n paama ninsaalbã fãa wakat ning a sẽn na n ‘wa ne ziirã.’ (Mat 24:21, 29-31) A Poll goma to-kãng yelle, n wilg tɩ ne rẽ maasem la Wẽnnaam sẽn yaa tɩrlem soabã na n “sɩbg neb nins sẽn pa mi Wẽnnaam, la neb nins sẽn pa sakd tõnd Zu-soab a Zeezi koe-noogã.” Vẽnegr sak 19 wã pʋgẽ, b wilgame t’a Zeezi lʋɩɩ yĩngr tãb-biis taoore, tɩ b na n zab ne “we-rũngã ne tẽngã rĩm-dãmbã la b tãb-biisã.” (2Te 1:6-8; Vẽ 19:11-21) B wilgame tɩ “kʋʋn-kãseng” n na n põs to-kãsengã sasa. (Vẽ 7:9, 14)​—Ges-y ARMAGEDÕ.

• Tõd-beoog ãdga.

  Yẽ ne “yibeoog ãdgã” fãa yaa a ye. Yaa ãd-kãng n yɩt yaoolem soab n puk yaanga, tɩ wĩntoogã yaool n puki. Ãd-kãng sã n wa puki, wilgdame tɩ beoogã vẽegr kolgame.​—Vẽ 22:16; 2Pɩ 1:19.

• Tõogã.

  Pipi gʋls-bilã sã n yaa bedre, wae n yaa a Moyiiz Tõogã wall Biiblã pipi sɛb a nu wã yell la b gomda. Pipi gʋls-bilã sã n yaa kɩdga, tõe n yaa a Moyiiz Tõogã noor ninga, wall saglg sẽn be noor ning pʋgẽ yell la b gomda.​—Sõ 15:16; Tõ 4:8; Mat 7:12; Ga 3:24.

U

• Urim ne Tumim.

  Yaa bũmb maan-kʋʋdb kãsmã sẽn da tar n sokd a Zeova n na n bãng a raabo, nin-buiidã sã n wa tar yell sẽn yaa tɩlɛ tɩ b sok Wẽnnaam. A ra tara Urimmã ne Tumimmã n maand wa b sẽn maand bãnd to-to wã. Maan-kʋʋdb kãsmã sã n da na n kẽ sɛk-roogẽ wã, a ra segd n ninga Urimmã ne Tumimmã a yãoog lutgẽ wã. Wonda yaa Babilon nebã sẽn sãam Zerizalɛmmã poor la b bas rẽ maanego.​—Yik 28:30; Ne 7:65.

V

• Vẽ wẽkr boko.

  Yaa bogd a yiib b sẽn tu pĩig zug tɩ bok a ye be yĩngr t’a to wã be tẽngre. B ra tukda ko-sor tɩ bogd a yiibã yekd taaba. B sã n ning  viyn biisã bok ning sẽn be yĩngrã pʋgẽ n tabe, koomã zoet n kẽeda bok a to wã pʋgẽ. Vẽ wẽkr bokã mi n makda Wẽnnaam bʋ-kaoorã.​—Eza 5:2; Vẽ 19:15.

• Vɩɩm naabã.

  Gɛrk gom-bilã rat n yeelame tɩ “taoor soab sẽn yaa kãsenga.” A bilgda tʋʋmd ning a Zeezi sẽn tare, a sẽn fãagd neb nins sẽn maand sɩdã ne yel-wẽndã sẽn wat ne kũumã, la a sõngd-b tɩ b na n wa paam vɩɩm sẽn kõn sa wã.​—Tʋ 3:15; 5:31; Ebr 2:10; 12:2.

• Vɩɩm tɩɩgã.

  Yaa tɩɩg sẽn da be Edɛn zẽedã zĩigẽ. Biiblã pa wilgd t’a biisã tõe n kõo ned vɩɩm ye. La tɩ-kãng ra yaa kaset sẽn wilgd tɩ Wẽnnaam na n kõo neb nins a sẽn na n sak tɩ b rɩ a biisã vɩɩm sẽn kõn sa.​—Sɩn 2:9; 3:22.

• Vʋʋgre.

  Yaa nek n yi kũ-rãmb sʋka. Yaa Gɛrk gom-bil sẽn yaa anastasis t’a võorã yaa “yikri, yals yĩngri.” Biiblã pʋgẽ, b gomda neb a wɛ b sẽn vʋʋg yelle. Wala makre, Wẽnnaam a Zeova sẽn vʋʋg a Zeezi wã. Baa neb a taabã vʋʋgr sẽn tũ ne a Eli, a Eliize, a Zeezi, a Pɩyɛɛr la a Pollã, b wilga vẽeneg tɩ yel-solem-kãensã tũu ne Wẽnnaam pãngã. “Nin-tɩrsã ne sẽn pa-b nin-tɩrsã” vʋʋgr yaa tɩlɛ sẽn na yɩl tɩ Wẽnnaam daabã pidsi. (Tʋ 24:15) Biiblã leb n wilgame tɩ neb n na n vʋʋg n tɩ vɩɩmd saasẽ, n boond vʋʋg-kãng tɩ “pipi” bɩ “dẽenem” vʋʋgre. Yaa a Zeezi ba-biisã sẽn paam vʋʋsem sõng zaeebã vʋʋgrã.​—Fi 3:11; Vẽ 20:5, 6; Zã 5:28, 29; 11:25.

• Vʋʋsem.

  Ebre gom-bil ning sẽn yaa ruah wã ne Gɛrk gom-bil sẽn yaa pneuma wã b sẽn lebg naoor wʋsg tɩ “vʋʋsmã” võorã yaa wʋsgo. La fãa bilgda bũmb d sẽn pa tõe n yã ne nifu, n yaool n tar pãnga. Ebre wã ne Gɛrkã gom-bi-kãensã wae n makda 1) sobgo, 2) bõn-vɩɩsã vʋʋsem, 3) bũmb sẽn be ned sũurẽ n kɩtdẽ t’a gomd wall a maand bũmbu, 4) goam sẽn yit Wẽnnaam bɩ malɛgs nengẽ, 5) malɛgsã, la 6) Wẽnnaam pãngã bɩ vʋʋsem sõngã.​—Yik 35:21; Yɩ 104:29; Mat 12:43; Luk 11:13.

• Vʋʋsem sõngã.

  Yaa Wẽnnaam pãngã a sẽn tar n pidsd a raabã. A yaa sõngo, bala yaa pãng sẽn yit a Zeova sẽn yaa yɩlemd la tɩrg hal wʋsgã nengẽ. Sẽn paase, yaa ne rẽ la Wẽnnaam maand sẽn yaa sõngo.​—Luk 1:35; Tʋ 1:8.

• Vʋʋsg daare.

  Yaa Ebre gom-bil sẽn dat n yeel tɩ “vʋʋse, base.” Yaa Zʋɩf-rãmbã semennã rasem a yopoe-n-soabã (arzũmã wĩndgã kõom n tãag sibrã wĩndgã kõom). B ra boonda b yʋʋmd-yʋʋmd tigã kẽer tɩ vʋʋsg raya. Yʋʋm a 7 soabã ne yʋʋm 50 soabã me ra yaa vʋʋsg yʋʋmde. Vʋʋsg daare, ned ra pa segd n tʋm tʋʋmde, sã n pa maan-kʋʋdbã sẽn tʋmd wẽnd-doogẽ wã balã. Vʋʋsg yʋʋmd fãa, b ra segd n basa b pʋtã n da ko ye. Ebre ra pa segd n modg a to t’a yao samd me ye. A Moyiiz Tõogã sẽn da gɩdg tɩ b ra maan bũmb nins Vʋʋsg daarã ra pa dem-dem ye. La bilf-bilfu, tũudmã taoor dãmb paasa yɛl kẽer hal tɩ Vʋʋsg daarã tũub lebg toog ne nin-buiidã a Zeezi wakatẽ wã.​—Yik 20:8; Maa 25:4; Luk 13:14-16; Kol 2:16.

W

• Waooga.

  Yaa bũmb b sẽn maan ne rũms gãndo, wala makre, bʋʋg wall peesg gãongo, n ningd divẽ. B ra ningda divẽ wã wao-paalg pʋgẽ. Bala divẽ wã sã n kũmi, a yiisda pemsem. Sã n yaa wao-paalga, a wukdame. La sã n yaa wao-kʋdre, a pusgdame.​—Zoz 9:4; Mat 9:17.

• Wãoodo, Wãoore.

  Yaa yĩn-gãong bã-toaaga. Wãood ning yell Biiblã sẽn gomdã pa a ye ne rũndã-rũndã wãoodã ye. Bala a ra pa yõkd neb bal ye. A ra tõe n yõka fut wall roog menga. B boonda ned sẽn bẽed wãood tɩ wãoore.​—Maa 14:54, 55; Luk 5:12.

• Wẽenego.

  Yaa gomd ned sẽn wẽen n togse, n na n wilg tɩ bũmb yaa sɩda, pa rẽ bɩ t’a na n maana bũmbu, wall t’a pa na n maan ye. Naoor wʋsgo, yaa pʋleng f sẽn pʋlem ned sẽn yɩɩd-fo, sẽn yɩɩd fãa Wẽnnaam. A Zeova sẽn maan kaool ne a Abrahaamã, a wẽename n wilg t’a na n pidsame.​—Sɩn 14:22; Ebr 6:16, 17.

• Wẽnd-doogo.

  Wae n yaa zĩig b sẽn yãk toor pʋʋsg yĩnga, rat n yeel tɩ zĩ-sõngo. La naoor wʋsgo, b sã n gomd wẽnd-doog yelle, yaa sɛk-roogã wall Zerizalɛm wẽnd-doogã yell la b gomda. Wẽnd-do-kãng n ledg sɛk-roogã b sẽn da lukd n toeemd zĩigã, n lebg Israyɛll nebã pʋʋsg zĩiga. Yaa a Salomo n me pipi wẽnd-doogã tɩ Babilon nebã wa sãam-a. Wẽnd-doog a yiib-n-soabã yɩɩ a Zorobabɛll n me, Zʋɩf-rãmbã sẽn yi Babilon yembdã poore. Yaa wẽnd-do-kãng la a Erood le Gãrã sẽn wa n lebs n me wã. Gʋls-sõamyã pʋgẽ, b wae n boonda wẽnd-doogã t’a “Zeova roogã.” (Ɛsd 1:3; 6:14, 15; 1Ki 29:1; 2Ki 2:4; Mat 24:1) B boonda Wẽnnaam sẽn be zĩig ning saasẽ wã me tɩ wẽnd-doogo.​—Yik 25:8, 9; 2Rĩ 10:25; 1Ki 28:10; Vẽ 11:19.

• Wẽng soabã.

  Yaa a Sʋɩtãan la b boond woto, a sẽn kɩɩsd Wẽnnaam la a kɩɩsd a no-tɩrsã yĩnga.​—Mat 6:13; 1Zã 5:19.

• Wẽnnaam Rĩungã.

  B sã n gomd Wẽnnaam Rĩungã yelle, wae n yaa naam ning Kirist Zeezi sẽn yaa Wẽnnaam Bi-riblã sẽn dɩt Wẽnnaam sẽn yaa yĩngr la tẽng naabã yʋʋr yĩngã yell la b gomda.​—Mat 12:28; Luk 4:43; 1Ko 15:50.

• Wẽnnaam sɩd-sɩdã.

  Yaa Ebre wã gom-biis nins sẽn yaa Ha-Elohim ne Ha-El la b sẽn lebg tɩ “Wẽnnaam sɩd-sɩdã.” Naoor wʋsgo, b pʋta Ebre wã gom-bi-kãensã n na n wilg welgr ning sẽn be a Zeova a ye tãa sẽn yaa Wẽnnaam sɩd-sɩdã ne wẽn-faadã sʋka. B sẽn lebg gom-bi-kãensã tɩ “Wẽnnaam sɩd-sɩdã” zemsa Ebre wã gom-biisã sẽn dat n yɛɛlgã kɛpɩ.​—Sɩn 5:22, 24; 46:3; Tõ 4:39.

•  Wẽn-sakre.

  Yaa f sẽn na n nong Wẽnnaam a Zeova, n waoogd-a, n tũud-a ne f sũur fãa la f sak n deeg tɩ yẽ n yaa yĩngr la tẽng naaba.​—1Tɩ 4:8; 2Tɩ 3:12.

• Wisd sẽn yaa pɛɛlga.

  Yaa tɩɩs buud ning b sẽn boond tɩ Boswellia wã sũm b sẽn kʋɩɩse. B sã n yõog-a, yũ-noog n yita. Tɩ-kãens sũmã ra naagda wisd ning sẽn yaa sõngã b sẽn da yõogd sɛk-roogẽ wã la wẽnd-doogẽ wã. Ned sã n da wa ne kood biis kũuni, a ra segd n paasa wisd sẽn yaa pɛɛlga. Sẽn paase, b ra kẽeda Zĩ-sõngẽ wã n yugend wisd-kãng bur nins b sẽn dɩk n kõ Wẽnnaamã rulg fãa zugu.​—Yik 30:34-36; Maa 2:1; 24:7; Mat 2:11.

• Wisdu.

  Yaa tɩɩs sũm sẽn tar yũ-nood ne kaam sẽn kalem taaba, tɩ b sã n ning bugmẽ bɩ rɩt bilf-bilfu, tɩ yũ-noog yita. B ra maanda wisd sẽn yaa zall ne bũmb toor-toor a naase, n yõogd sɛk-roogẽ wã la wẽnd-doogẽ wã. Yibeoog la yʋng fãa, b ra yõogd-a-la tẽn-kugr ning sẽn da be Zĩ-sõngẽ wã zugu. La Paasg daarã, b ra yõogd-a-la Zĩ-sõng sẽn yɩɩdã pʋgẽ. Wisdã ra makda wẽn-sakdbã pʋʋsg Wẽnnaam sẽn deegdã. Pa tɩlɛ ne kiris-nebã tɩ b yõogd wisd ye.​—Yik 30:34, 35; Maa 16:13; Vẽ 5:8.

• Wudgu.

  Yaa bũmb ning b sẽn pãbd koodã n yelg n yãk ka-bɛɛlã n bas a soabã. Wakat ninga, b mi n gomda wudg yell tɩ makd bũmb sẽn ka yõodo, la bũmb ned sẽn pa rate.​—Yɩ 1:4; Mat 3:12.

• Wʋnga.

  Yaa bũmb b sẽn tar n yẽnegd kutu, sãnem bɩ wanzuri wall zũudu. B tar n wʋmda bũmb toor-toor b sẽn maan ne yagdo. Pĩnd wẽndẽ wã, b ra maanda wʋmsã ne tãn-koɛɛm la kuga. B ra maanda bur la rɩɩb a taab me wʋng pʋgẽ.​—Sɩn 15:17; Dã 3:17; Vẽ 9:2.

Y

• Yagda.

  Yaa ned sẽn maand laase, rʋgd la teed a taab ne tãndo. B mi n maka a Zeova sẽn tar tõog ninsaalbã la tẽnsã zutã ne yagd sẽn tar tõog n maand a sẽn dat ne tãndã.​—Eza 64:8; Ro 9:21.

• Yao n fãage.

  Yaa yaood b sẽn yao n na n fãag ned ne yembdo, sɩbgre, namsgo, yel-wẽnd wall bũmb sẽn yaa tɩlɛ ne ned t’a maane. Pa wakat fãa la yaoodã yaa ligd ye. (Eza 43:3) Fãagr yaood yaa tɩlɛ yɛl toor-toor pʋsẽ. Wala makre, Israyɛll soolmẽ wã, kom-dẽems nins sẽn yaa rapã, ne rũmsã kom-dẽems nins sẽn yaa raadã fãa ra yaa a Zeova n so, tɩ b segd n tʋm a Zeova tʋʋmdã. Sẽn na yɩl tɩ ra yɩ woto, b ra segd n yaoo yaoodo. (Sõ 3:45, 46; 18:15, 16) Ned sã n da tar lol-tãadg n pa gũ-a t’a kʋ neda, a segd n yaoo yaood n fãag a meng ne kũum. (Yik 21:29, 30) La ned sã n da kʋ a to ne pʋ-toogo, b ra pa sakd t’a yao yaood n fãag a meng ye. (Sõ 35:31) Sẽn yɩɩd fãa, Biiblã gomda yaood ning Kiristã sẽn yaoã yelle. Yaa a sẽn ki tɩ yɩ maoong n na n fãag neb nins sẽn yaa sakdbã ne yel-wẽndã la ne kũumã.​—Yɩ 49:7, 8; Mat 20:28; Efɛ 1:7.

• Yaoogo.

  B sã n gʋls-a ne gʋls-bi-bõonese, yaa ned yaoog yell la b gomda. La pipi gʋls-bilã sã n yaa bedre, yaa ned buud fãa sẽn dabdẽ wã yell la b gomda, tɩ zems ne Ebre gom-bil ning sẽn yaa “Seollã” la Gɛrk gom-bil ning sẽn yaa “Hadɛsã.” Biiblã wilgdame tɩ pa zĩig sɩdem-sɩdem ye. A makda zĩig ning tʋʋmd ne tagsg la yam ne bãngr sẽn ka be wã.​— Sɩn 47:30; Koɛ 9:10; Tʋ 2:31.

• Yaoog sẽn be tẽegr yĩnga.

  Yaa zĩig b sẽn solgd ned sẽn maan kaalem. Yaa Gɛrk gom-bil ning sẽn yaa menemeion wã. A yita gom-bil a to pʋgẽ, tɩ yẽ soabã võor rat n yeel tɩ “tẽeg bũmb” yelle, tɩ woto wilgdẽ tɩ b tẽra sẽn ki-a wã yelle.​—Zã 5:28, 29.

• Yaoolem wakate.

  Biiblã bãngr-goam pʋgẽ, b mi n goma “yaoolem wakat” bɩ “wakatã baasg sasa” yelle, n na n wilg tɩ yaa wakat yel-kãsems sẽn na n ta b tɛka. (Eze 38:16; Dã 10:14; Tʋ 2:17) Bãngr-goam kẽer pʋgẽ tõe n yɩɩ yʋʋm a wãn bala, tɩ sãnda pʋgẽ yaa yʋʋm wʋsgo. Sẽn yɩɩd fãa, Biiblã mi n gomda yaoolem wakat yelle, tɩ yaa dũni-kãngã “yaoolem wakatã” sẽn yaa a Zeezi waoongã wakatã yell la b gomda.​—2Tɩ 3:1; Zak 5:3; 2Pɩ 3:3.

• Yãoog lutgã.

  Yaa fuug Israyɛll maan-kʋʋdb kãsmã sẽn da tar n lut a yaoogã a sã n wa na n kẽ Zĩ-sõngẽ wã fãa. B ra ninga kug-neeb fuugã zugu. B ra boond-a lame tɩ “yãoog lutgã b sẽn tar n kaood bʋʋdã,” bala Urimmã la Tumimmã b sẽn tar n wilgd a Zeova sẽn kao bʋʋd to-to wã ra bee a pʋgẽ. (Yik 28:15-30)​—Ges-y vẽnegr ning sẽn yaa B5.

• Yedutun.

  Yaa gom-bil b sẽn pa mi a võorã takɩ, tɩ be Yɩɩn-sõamyã 39, 62 la 77 sɩngr goamẽ wã. Tõe tɩ b sẽn ning sɩngr gom-kãensa wã yaa sẽn na n wilg yɩɩlã sẽn segd n yɩɩl to-to, la b sẽn segd n wẽ yʋʋm-teed ninsã. Levi buudã ned sẽn yaa yɩɩn-yɩɩnd me yʋʋr n da yaa a Yedutun. Dẽnd tõe tɩ yɩɩllã sẽn yɩɩnd to-to wã segd n zemsa ne yẽ mengã wall a kambã sẽn yɩɩnd to-to wã, wall b sẽn wẽed yʋʋm-teedã to-to wã.

• Yel-bũndi.

  Yaa yam gomd wall kiba-koɛɛg sẽn kɩtd tɩ ned rɩk yam. A wilgda bũmb sẽn yaa sɩd me ne gom-biis a wãna. Biiblã pʋgẽ, yel-bũnd tõe n yɩɩ gomd võor wʋmb sẽn yaa toogo, wall goam sẽn gom ne pagdo. Yel-bũnd wilgda gomd sẽn yaa sɩd ne gom-biis sẽn tar pãnga. Naoor wʋsgo yaa makre. Yel-bũn kẽer lebga goam neb sẽn minim n togsdẽ, n na n yaal bɩ n paoog neb a taaba.​—Koɛ 12:9; 2Pɩ 2:22.

• Yel-gɛta.

  Yaa rao tʋʋmd sẽn yaa lʋɩ taoor n ges tigingã neb yell la a kɩɩm-ba. Gɛrk gom-bil ning b sẽn lebg tɩ yel-gɛtã yaa episkopos t’a võorã  yaa kogle. B sã n gomd “yel-gɛt” ne “kãsem-soab” (presbyteros) yell kiris-neb tigingã pʋgẽ, yaa bõn-yɛng yell la b gomda. Gom-bil ning sẽn yaa “kãsem-soabã” wilgdame tɩ b sẽn yãk a soab t’a yaa kãsem-soabã bɩɩme, tɩ gom-bil ning sẽn yaa “yel-gɛtã” bilgd a soabã sẽn tar tʋʋm ninsã.​—Tʋ 20:28; 1Tɩ 3:2-7; 1Pɩ 5:2.

• Yel-soalem, Tʋʋm-kãsemse.

  Yaa tʋʋmd bɩ bãn sẽn yɩɩd ninsaal sẽn tõe n maan bɩ n wʋm a võore. Yaa bũmb tõog sẽn yɩɩd ninsaal n maan dẽ. Biiblã pʋgẽ, “bãnd” la “bõn-bãn” võorã mi n yaa yembr ne gom-bi-kãensã.​—Yik 4:21; Tʋ 4:22; Ebr 2:4.

• Yel-soalgdgã sẽn yaa sõngã.

  Yaa Wẽnnaam daab a sẽn solg hal n tãag wakat ning a sẽn yãkã, n vẽneg-a neb nins a sẽn dat tɩ b wʋm a võorã bala.​—Mrk 4:11; Kol 1:26.

• Yel-wẽnd maoongo.

  Yaa maoong ned sẽn kõt yel-wẽnd a sẽn maan yĩnga. Yaa yel-wẽnd a sẽn tudg n maan a sẽn pa zems zãngã yĩnga. B ra kʋʋda bũmb toor-toor n maand maoongo. Yaa sẽn sɩng ne loalg n tãag marwalle, la ra bee ne sẽn maan-a yel-wẽndã tarem la a yɛlã sẽn yaa to-to.​—Maa 4:27, 29; Ebr 10:8.

• Yibeoog ãdga.​—

  Ges-y TÕD-BEOOG ÃDGA.

• Yiisgu.

  Yaa f sẽn na n tɩ tigs bũmb nins kẽebdbã sẽn bas kẽebgã poorã. Tõe tɩ yaa b sẽn yĩm n pa kẽebe, wall b sẽn yãk yam n base. A Moyiiz Toogã ra yeela nin-buiidã tɩ b pa segd n kẽeb b pʋtã kɩremsã zãnga, bɩ n wob b oliiv biisã wall b viyn biisã fãa ye. Wẽnnaam da kõo naong rãmbã sore, nimbãan-nebã, sãambã, kɩɩbsã la pʋg-kõapã sor tɩ b yiis bũmb nins kẽebdbã sẽn basã.​—Rut 2:7.

• Yɩɩlã taoor soaba.

  Ebre gom-bilã sẽn be Yɩɩn-sõamyã pʋgẽ wã tog n bilgda ned sẽn segend yɩɩla, sẽn wilgd yʋʋm-teedã sẽn segd n wẽ to-to, la sẽn zãmsd Levi buudã neb yɩɩn-yɩɩndbã b sẽn segd n yɩɩl to-to. Yẽ n da lʋɩt taoor yɩɩlã wakate. Biibl-dãmb a taab pʋsẽ, b lebga gom-bi-kãng tɩ “yɩɩlã naaba,” wall “yɩɩlã soaba.”​—Yɩ 4:Sɩngr goamã; Yɩ 5:Sɩngr goamã.

• Yɩɩlle.

  Yaa rũng yɩɩlle. Nebã ra mi n tara rũmsã yɩɩl n yũuda, wall n ningd kaam, gʋls-koom, la ka-zɛɛdem. B leb n da tara yɩɩlã n maand yʋʋm-teed la bard sẽn peebd n taasd nebã koeese. (1Sã 16:1, 13; 1Rĩ 1:39; Eze 9:2) Naoor wʋsgo, b goma “yɩɩll” yelle, tɩ makd pãnga, zab n deeg tẽnga, la tõogre.​—Tõ 33:17; Mi 4:13; Zkr 1:19.

• Yɩɩn-sõamyã.

  Yaa yɩɩll b sẽn yɩɩnd n pẽgd Wẽnnaam. Wẽn-tũudbã ra yɩɩnda yɩɩn-sõamyã la b wẽed yʋʋm-teedo. Wala makre, b sã n da wa tigim taab wẽnd-doogẽ wã Zerizalɛm n na n pẽg Wẽnnaam a Zeova.​—Luk 20:42; Tʋ 13:33; Zak 5:13.

• Yɩlemde.

  Biiblã pʋgẽ, gom-bi-kãngã pa gomd yĩngã yɩlemd yell bal ye. A leb n bilgda ned sẽn modgd sẽn na yɩl n kell n tall manesem sẽn kɩt tɩ b pa tõe n yã bũmb n tik n dõd-a wall b ning-a taale, wall ned sẽn zãagd a meng ne bũmb ning fãa sẽn tõe n sãam-a wall rẽgm-a Wẽnnaam nifẽ. A Moyiiz Tõogã ra wilga bũmb toor-toor ned sẽn segd n maan n yɩlg a menga.​—Maa 10:10; Yɩ 51:7; Mat 8:2; 1Ko 6:11.

• Yɩʋʋse.

  Yaa teed b sẽn maan ne sãnem, tɩ b ra tar n kiisd fɩtl-dãmbã bugum sɛk-roogẽ wã la wẽnd-doogẽ wã.​—Yik 37:23.

• Yoobo.

  Yaa porneya sẽn yaa Gɛrk gom-bil b sẽn pʋt Biiblã pʋgẽ n na n bilg lageng kẽer Wẽnnaam sẽn gɩdge. Makre, ned sẽn kẽed ne ned a to sẽn pa a pag bɩ a sɩda, ned sẽn lagemd ne rap wall pagb n deegd ligd wall bũmb a to, neb sẽn gãe taab n pa kẽ kãadem, rao ne rao wall pag ne pag sẽn kẽed ne taaba, la ned sẽn kẽed ne rũnga. Vẽnegr sebrã pʋgẽ, b pʋda gom-bi-kãngã n na n bilg tũudmã wɛɛngẽ pʋg-yoodr b sẽn boond tɩ “Babilon-kãsengã,” a sẽn zemsd ne dũniyã nanambs n dat naam la arzɛkã yĩnga. (Vẽ 14:8; 17:2; 18:3; Mat 5:32; Tʋ 15:29; Ga 5:19)​—Ges-y PƲG-YOODRE.

• Yubl-balgdga.

  Yaa raoog ned sẽn palgd a bãgdẽ, n yagl zɩɩb a kɩrems a yiibã. Leb n tõe n yɩɩ raoog b sẽn palg rũms a yiib yublẽ sẽn na yɩl tɩ b ko, wall b tak sarɛte (wae n yaa niisi). Sẽn mik tɩ yembsã ra wae n tʋkda zɩɩb sẽn zɩs ne yubl-balgdgã, b mi n gomda yubl-balgdg yelle, tɩ makd yembd bɩ sulg f meng n sak neda, namsgo, la weoogre. B sã n yãk bɩ n kaoog ned yubl-balgdga, rat n yeelame tɩ b yiis-a-la yembdẽ, tɩ b fãag-a-la ne weoogr la ne wẽgbo.​—Maa 26:13; Mat 11:29, 30.

Z

• Zab-teedo.

  Yaa bũmb toor-toor sodaag sẽn bobd sẽn na yɩl n kogl a menga. Wala makre, kut pugla, kut fuugu, sẽbdga, bũmb sẽn maan ne zũud wall kut tɩ b tar n lut karsã, la gãongo.​—1Sã 31:9; Efɛ 6:13-17.

• Zae.

  Ebre gom-bilã rat n yeelame tɩ “pʋdg bũmb sẽn yaa koom-koom ned wall bũmb zugu.” B ra wae n pʋdgda kaam ned wall bũmb zug sẽn na yɩl n wilg tɩ b welg-a-la toor tʋʋmd sẽn yaa zall yĩnga. Biiblã babg ning b sẽn da gʋls ne Gɛrkã pʋgẽ, b pʋta gom-bi-kãngã me n na n bilg vʋʋsem sõngã pʋdgrã. Yaa neb nins b sẽn yãk tɩ b na n kẽng saasẽ wã zut la b pʋdgd-a.​—Yik 28:41; 1Sã 16:13; 2Ko 1:21.

• Zãn tigrã.

  B ra boond-a lame me tɩ Tigsgã tigrã. B ra maand-a-la Etanim kiuugã rasem 15-21. Yaa sẽoogã saabẽ la Israyɛll nebã ra maand tig-kãng koodã kẽebg yĩnga. Wakat kãnga, b ra kɩdemda sũ-noog la b pʋʋsd a Zeova barka, a sẽn ning b koodã barkã yĩnga. Tigrã sasa, nebã ra tiida zãn bɩ sẽgd n gãe be, tɩ tẽegd-b b sẽn wa n yi Ezɩptã. Tig-kãng ra naaga tig a tãab  nins rapã sẽn da segd n tɩ maan Zerizalɛmmã.​—Maa 23:34; Ɛsd 3:4.

• Zees.

  Gɛrk-rãmbã ra pʋʋsda wẽnnaam-dãmb wʋsgo. A Zees n da yaa b wẽnnaam-dãmbã naaba. Listri, b tudgame n bool a Barnabaas t’a Zeese. B yãa pĩnd wẽndẽ gʋlsem zĩig sẽn pẽ Listri, sẽn yete: “A Zees maan-kʋʋdba,” la “wĩntoog wẽnnaam a Zeese.” A Poll kẽe koom-koglg Malt sẽn yaa ko-sʋk tẽngẽ wã, t’a “Zees kom-dibli wã” bõn-naands be koglgã taoore. Ra yaa a Kastor ne a Polligs sẽn yaa kĩn-kĩirsã.​—Tʋ 14:12; 28:11.

• Zems-n-taar maoongo.

  Yaa maoong b sẽn da kõt a Zeova sẽn na yɩl n wilg tɩ b ratame tɩ laafɩ zĩnd bãmb ne yẽ sʋka. Sẽn kõt-a maoongã ne a zakã rãmba, maan-kʋʋd ning sẽn na n maan maoongã, la maan-kʋʋdb a taabã fãa tõe n naag n wãba nemdã. B ra yõogda maoongã kaamã n kõt a Zeova, tɩ yaa yũ-noog a nifẽ. B ra kõta a Zeova zɩɩmã sẽn makd vɩɩmã me. Ra yaa wa maan-kʋʋdbã ne sẽn kõt-b maoongã naaga a Zeova n dɩtẽ, tɩ wilgdẽ tɩ b yaa a zo-rãmba.​—Maa 7:29, 32; Tõ 27:7.

• Zeyɛn.

  Yaa Hinom longã sẽn da be pĩnd wẽndẽ Zerizalɛm goabg sẽnesã yʋʋr ne Gɛrke. (Ze 7:31) B togsa bãngr-gomd n wilg tɩ b na n wa loba kũ-rãmb beenẽ. (Ze 7:32; 19:6) Kaset kae n wilgdẽ tɩ b ra lobda rũms wall ninsaalb vɩɩs Zeyɛn bugmã pʋgẽ sẽn na yɩl tɩ bugmã rɩ-ba, bɩ sẽn na yɩl n nams-b ye. Rẽnd Zeyɛn pa tõe n mak zĩig ninsaal sẽn pa ne, tɩ b ningd ninsaalbã sɩɩs beenẽ tɩ b namsd wakat fãa yĩng bugum sɩd-sɩd pʋgẽ ye. A Zeezi ne a karen-biisã goma Zeyɛn yelle, n wilg tɩ makda “kũum a yiib-n-soabã,” rat n yeel tɩ sãoong zãng-zãnga.​—Vẽ 20:14; Mat 5:22; 10:28.

• Zɛɛga.

  Yaa zĩig b sẽn pãbd koodo, n yãgs a biisã la b bas a kãnkãyã ne a wudgã. B ra pãbda koodã ne raado. La koodã sã n waoogẽ, yaa bũmb a to la b ra tar n pãbda. Wala makre, b balgda rũmsã bũmb tɩ b tɛt n tabd koodã. Bõn-kãng rĩida koodã sẽn be zɛɛgẽ wã t’a biisã yita. Zɛɛg ra yaa zĩig sẽn yaa gilga. Naoor wʋsgo, a bee zĩig sẽn zãnte, tɩ sobgã tõe n ta sõma.​—Maa 26:5; Eza 41:15; Mat 3:12.

• Zĩn-dãmba.

  Yaa malɛg-wẽns sẽn tar pãng n yɩɩd ninsaala. Ned pa tõe n yã-b ye. Sɩngr 6:2 pʋgẽ, b boond-b lame tɩ “Wẽnnaam kom-dibli,” tɩ Ziid 6 boond-b tɩ ‘malɛgse.’ Wẽnnaam pa naan-b tɩ b yaa wẽns ye. La b kɩɩsa Wẽnnaam a Nowe wakatẽ wã, n naag a Sʋɩtãan n lebg Wẽnnaam bɛɛba.​—Tõ 32:17; Luk 8:30; Tʋ 16:16; Zak 2:19.

• Zĩ-sõng sẽn yɩɩdã.

  Yaa sɛk-roogã ne wẽnd-doogã ro-pʋg ning sẽn be hal pʋgẽ wã, zĩig ning b sẽn da bĩngd kaoolã koglgã. A Moyiiz Tõogã ra wilgame tɩ yaa maan-kʋʋdb kãsmã bal n da tar sor n na n kẽ be. La yʋʋmd fãa, yaa Paasg daarã bal la a ra tõe n kẽ be.​—Yik 26:33; Maa 16:2, 17; 1Rĩ 6:16; Ebr 9:3.

• Zĩ-sõngã.

  Yaa sɛk-roogã wall wẽnd-doogã pipi ro-pʋgã, la sẽn yaa-a yaleng n yɩɩdã, n yaa toor ne Zĩ-sõng sẽn yɩɩdã sẽn yaa ro-pʋg ning sẽn be hal pʋgẽ wã. Sɛk-roogã Zĩ-sõngã pʋgẽ, fɩtl-doagendgã sẽn da maan ne sãnemã, sãnem tẽn-kugr ning zug b sẽn da yõogd wisdã, taabl ning zug b sẽn da rogend burã b sẽn dɩk n kõ Wẽnnaamã, n paas teed nins sẽn da maan ne sãnemã ra bee be. Yaa wẽnd-doogã Zĩ-sõngã pʋgẽ la sãnem tẽn-kugrã, fɩtl-dogends piigã, la taabl-dãmb piigã b sẽn da rogend burã b sẽn dɩk n kõ Wẽnnaamã ra be. (Yik 26:33; Ebr 9:2)​—Ges-y vẽnegr ning sẽn yaa B5 ne B8.

• Zĩ-zãntga.

  Yaa zĩig b sẽn waoogd wẽnnaam-dãmba. Wae n yaa kunkubr wall tãng bɩ bũmb b sẽn maan tɩ zẽk zugu. Baa zĩ-zãnts kẽer sẽn da yaa Wẽnnaam sɩd-sɩdã waoogr yĩngã, b wʋsgã fãa yaa wẽn-faad waoogr yĩnga.​—Sõ 33:52; 1Rĩ 3:2; Ze 19:5.

• Zɩɩv.

  Yaa Zʋɩf-rãmbã tũudmã kalãndriye wã kiuug a yiib-n-soabã pipi yʋʋre. La a yaa buud a taabã kiuug a nii-n-soabã. A sɩngda tʋʋl-nif kiuugã pʋɩ-sʋk n tãag sig-noy kiuugã pʋɩ-sʋka. Zʋɩf-rãmbã Talmuudã pʋgẽ la sɛb a taab b sẽn gʋls Babilon yembdã poorã pʋsẽ, b bool-a lame tɩ Iyaare. (1Rĩ 6:37)​—Ges-y vẽnegr ning sẽn yaa B15.

• Zu-soabã zaabr dɩɩbã.

  Yaa rɩɩb sɩd-sɩda. Yaa bur sẽn pa ning rabɩll n paas divẽ, n makd Kiristã yĩngã la a zɩɩmã. Leb n yaa a Zeezi kũumã tẽegre. Sẽn mik tɩ yaa bũmb Gʋls-sõamyã sẽn yeel tɩ kiris-nebã segd n maandame wã, zemsame me tɩ b boond-a t’a “Zeezi kũumã tẽegre.”​—1Ko 11:20, 23-26.

• Zu-vindga.

  Yaa peend b sẽn vind zugu. Maan-kʋʋdb kãsmã ra vinda a zugã ne zu-vindg b sẽn wʋg ne lẽ gĩs-bãanese, tɩ b sẽb sãnem bõn-paglg ne gĩsg sẽn yaa kẽeg haoo a taoorã. Rĩmã ra vinda zu-vindg n yaool n fõgen a maanfã. A Zoob goma zu-vindgã yell tɩ yaa makre, a sẽn mak yẽ mengã tɩrlmã ne zu-vindgã.​—Yik 28:36, 37; Zoo 29:14; Eze 21:26.

• Zʋɩf.

  Israyɛll buud piigã rĩung sãoong poore, b ra boonda Zida buudã ned tɩ Zʋɩfe. (2Rĩ 16:6) Babilon yembdã poore, b ra boonda Israyɛll buud toor-toorã neb sẽn lebg n wa b ba-yirã tɩ Zʋɩf-rãmba. (Ɛsd 4:12) Kaoosg zugẽ, b wa n boonda Israyɛll buudã neb tɩ Zʋɩf-rãmba, n na n welg-b ne bu-zẽmsã. (Ɛst 3:6) Tẽn-tʋmd a Poll goma Zʋɩf-rãmb yelle, tɩ yaa makr sẽn na n wilg tɩ kiris-nebã tiging pʋgẽ, pa f sẽn yaa buud ningã n tar yõod ye.​—Ro 2:28, 29; Ga 3:28.