1 Tesalonik rãmbã 4:1-18
4 M saam-biisi, sẽn na n baase, tõnd kõo yãmb noy n wilg yãmb y sẽn segd n kẽn to-to n ta Wẽnnaam yam. La sɩd-sɩda, yãmb maanda woto. Masã, tõnd rat n sagla yãmb la d kos-y ne Zu-soab a Zeezi yʋʋr tɩ y kell n maan dẽ n paase.
2 Bala, yãmb mii noy nins tõnd sẽn kõ yãmb ne Zu-soab a Zeezi maasmã.
3 Ad Wẽnnaam daabã: Yaa tɩ yãmb segd n yɩɩ nin-sõamyã, n lak y mens ne yoobo.*
4 Yãmb ned kam fãa segd n bãnga a sẽn na n tõog a meng yĩngã to-to, n zã-a t’a yɩ sõng la a tall waoogre.
5 Da yɩ-y wa neb nins sẽn pa mi Wẽnnaamã ye. Bala, b basame tɩ yoobã tʋlsem soog-ba, hal tɩ pa sekd-b ye.
6 Yel-kãngã wɛɛngẽ, ned baa a ye pa segd n maan sẽn pa zems n wẽg a saam-biig ye. Bala, yaa a Zeova* n wat ne sɩbgr bõn-kãensã fãa poorẽ wa tõnd sẽn da yeel yãmbã, la d sẽn keoog-y ne d sũy fãa me wã.
7 Bala, Wẽnnaam pa bool tõnd tɩ d tʋm dẽgd ye. B bool-d lame tɩ d yɩ nin-sõamyã.
8 Rẽnd ned ning sẽn kɩɩsd sagl-kãensã pa kɩɩsd ninsaal ye. Yaa Wẽnnaam sẽn yaa soab ning sẽn kõt yãmb b vʋʋsem sõngã la a kɩɩsda.
9 La saam-biir nonglmã wɛɛngẽ, yãmb pa baood tɩ tõnd gʋls yãmb n yeel bũmb ye. Bala, yãmb mens paamame tɩ Wẽnnaam zãmsd yãmb sẽn na yɩl tɩ y nong taaba.
10 Sɩd-sɩda, yãmb maanda woto ne saam-biisã fãa sẽn be Masedoan soolmã tõrã. La m saam-biisi, tõnd sagenda yãmb tɩ y kell n maan dẽ n paase.
11 Modg-y ne y sũy fãa n zĩnd bãane, la y ra kẽes y toog neb a taab yɛlẽ ye. Tʋm-y ne y nusã wa tõnd sẽn sagl yãmbã.
12 Woto, yãmb kẽnã na n yɩɩ sõma yɩng rãmbã nifẽ. Sẽn paase, bũmb pa na n paoog yãmb ye.
13 La m saam-biisi, sã n yaa neb nins sẽn ki wã* wɛɛngẽ, tõnd pa rat tɩ yãmb be zɩɩlem pʋgẽ, n wa maand sũ-sãang wa neb a taabã sẽn pa tar saagrã sẽn maandã ye.
14 Bala, tõnd sã n tẽed t’a Zeezi kiime n lebs n vʋʋge, d tẽedame me tɩ Wẽnnaam na n vʋʋga neb nins sẽn ki* a Zeezi pʋgẽ wã tɩ b naag a Zeezi.
15 Ad tõnd sẽn yet yãmb bũmb nins wa sẽn zems a Zeova* goamã: Yaa tɩ tõnd sʋkã neb nins sẽn na n ket n vɩ Zu-soabã waoong wakatã pa na n deng sẽn ki-bã* n dʋ saasẽ ye.
16 Bala, Zu-soabã meng na n yii saasẽ n sigd la b kõt noy ne malɛgs naab koɛɛga, la b zãad Wẽnnaam baorgo. La neb nins sẽn ki Kirist pʋgẽ wã na n deng n vʋʋgame.
17 Rẽ poore, tõnd a neb nins sẽn na n ket n vɩ wã na n naaga sẽn na n vʋʋg-bã, tɩ b zẽk tõnd sawat pʋsẽ tɩ d tɩ seg Zu-soabã yĩngri. Woto, tõnd na n paa ne Zu-soabã wakat fãa yĩnga.
18 Bɩ y ket n belsd taab ne gom-kãensã.
Vẽnegr toor-toore
^ Gɛrk, porneya. Ges-y gom-biis võor bilgrã zĩigẽ.
^ Ges-y gom-biis võor bilgrã zĩigẽ.
^ Gɛrk, “sẽn gõe wã.”
^ Gɛrk, “sẽn gõe.”
^ Ges-y gom-biis võor bilgrã zĩigẽ.
^ Gɛrk, “sẽn gõe-bã.”
