•  F tagsg yaa wãn f mengã zugu?

•  Bõe yĩng tɩ rẽ tar yõodo?

•  F sẽn tõe n maane

•  Bũmb a taab f sẽn tõe n karem tɩ sõng-fo

•  Kom-bɩɩs a taab sẽn yete

•   F yaa ned sẽn baood tɩ bũmba fãa zems kɛpɩ wakat fãa bɩ?

   “M modgdame n na n kell n tall sũ-noogo, la m da yikd m sũur ye. Daar fãa m modgdame tɩ m nengã be laado?”—A Valerie.

•   F getame tɩ bũmb nins fãa sẽn maand pa sõma bɩ?

   “Bũmb sẽn yaa sõma sã n maane, zĩig pʋgẽ m tagsdame tɩ pa tõe n yɩ sɩd ye.”—A Rebecca.

•   F yaa ned sẽn tar tagsg sẽn zems bũmb fãa wɛɛngẽ bɩ?

   “M sã n baoodẽ tɩ bũmba fãa zems kɛpɩ wakat fãa, bũmb sã n wa pa zemse m sũur na n sãamame. M sã n get tɩ bũmb nins fãa sẽn maandã pa sõma me, m pa na n tar sũ-noog ye. La m sã n tar tagsg sẽn zems bũmb fãa wɛɛngẽ, sõngd-m lame.”—A Anna.

 Biiblã yetame tɩ “sẽn tar-a sũ-noog maanda tigr wakat fãa.” (Yel-bũnã 15:15) Neb nins sẽn modgd sẽn na yɩl n da tall tagsg sẽn pa sõma wakat fãa, la b tar yam-sõng yɛl buud fãa wɛɛngẽ wã wae n tara sũ-noogo. Sẽn paase, wõnda nin-kãens paamda zo-rãmb wʋsgo. Ned baa a ye pʋd n pa rat n be ne ned sẽn tar tagsg sẽn pa zemse, t’a neng me gãnem wakat fãa ye.

 Baa f sã n yaa ned sẽn baood tɩ bũmb fãa zems kɛpɩ wakat fãa, zu-loees kẽer la f pa tõe n gil vɩɩmã pʋgẽ ye. Wala makre:

•   Wakat fãa f na n wʋmda kibay sẽn gomd zaba, nin-kʋʋr la tʋʋm-beed a taab yelle.

•   Tõe tɩ f na n maoo ne zu-loees y zakã pʋgẽ.

•   Sãmbg kae tɩ f tara pãn-komsem me n maood ne rẽ.

•   F zoa tõe n maana bũmb tɩ sãam f sũuri.

 F pa segd n sĩnd n get zu-loe-kãensã, bɩ n tagsd b yell wʋsg tɩ namsd foo ye. Sẽn são yaa f tall tagsg sẽn zems rẽ zugu. F sã n tar tagsg sẽn zems yɛlã zugu, tõe n sõng-f lame tɩ f ra tall tags-kɛga, la f sak n deeg tɩ vɩɩmã n yaa woto, tɩ kɩt tɩ f ra koms raood zãng ye.

•   Tall tagsg sẽn zems f pãn-komsmã zugu.

   Biiblã yetame yaa: “Nin-tɩrg ka be dũniyã zug n maand tɩrg n ka kongdẽ ye.” (Koɛɛg soaba 7:20, Wẽnnaam Sebre, 1983) F sẽn mi n kongdẽ la f tudgdẽ wã wilgdame bal tɩ f yaa a wɛ n pa ta piiga, la pa rat n yeel tɩ f ka võor ye.

   F sẽn tõe n maan tɩ sõng-fo: Modg n tõog f pãn-komsmã, la ra yɩ dem-dem ne f menga, n dat tɩ f sẽn maandã fãa zems kɛpɩ ye. Bi-bɩɩg a ye yʋʋr sẽn boond t’a Kalɛɛb yeelame: “M pa tagsd m kong-bõonesã yell wʋsg ye. M dɩkda yam rẽ pʋgẽ, n bãng m sẽn tõe n maan to-to nindaar tɩ yɩ sõma n yɩɩda.”

•   Ra makd f meng ne f taabã ye.

   Biiblã yetame yaa: “Bɩ d ra lebg wuk-m-mens rãmba, n wagsd taab la d maand sũ-kiir ne taab ye.” (Galat-rãmbã 5:26) F sã n get soaare bɩ zĩis f zo-rãmb sẽn kẽng n pa bool foo fot-rãmb reezo sosiyo wã pʋgẽ, tõe n sãama f sũuri, la koms f raoodo. Tõe n kɩtame tɩ f wa get f zo-rãmbã wa f bɛɛba.

   F sẽn tõe n maan tɩ sõng-fo: Sak n deeg tɩ pa bũmb fãa la f zo-rãmbã na n bool-f tɩ f wa naag ye. Sẽn paase, pa bũmb nins fãa sẽn maanã la nebã ningd reezo sosiyo wã pʋgẽ ye. Bi-bɩɩg a ye yʋʋr sẽn boond t’a Alɛgsɩ yeelame: “Nebã sẽn nong n ningd reezo sosiyo wã pʋgẽ n yɩɩd yaa bũmb nins sẽn yɩ-b noogã bala. B pa wae n paasd bũmb nins sẽn pa yɩ-b noogã ye.”

•   Modg n bao laafɩ y zakã pʋgẽ.

   Biiblã yetame yaa: “Sã n tõeyã, la sã n bee ne yãmb bɩ y kɩt tɩ laafɩ zĩnd yãmb ne nebã fãa sʋka.” (Rom dãmbã 12:18) Naoor wʋsgo, f pa tõe n toeem ned manesem ye. La fo tõe n toeema f mengã menesem. F tõe n yãka yam n yɩ ned sẽn baood laafɩ.

   F sẽn tõe n maan tɩ sõng-fo: Ra yɩ ned sẽn wat ne yɛl zakã pʋgẽ ye. Yɩ ned sẽn baood laafɩ wa f sẽn maand to-to ne f zo-rãmbã. Bi-bɩɩg a ye yʋʋr sẽn boond t’a Melinda yeelame: “Ned kae n zems zãng ye. Rẽ wã, f pa tõe n pa wa maan bũmb n sãam f to sũur ye. La foo n segd n yãk f sã n na n yɩɩ ned sẽn baood laafɩ, wall ned sẽn pa baood laafɩ.”

•   Yɩ sõm-mita.

   Biiblã yetame yaa: “Wilg-y tɩ y yaa sõm-mitba.” (Kolos rãmbã 3:15) F sã n yaa sõm-mita, na n sõng-f lame tɩ f tagsd bõn-sõma nins sẽn maand f vɩɩmã pʋgẽ wã yell n yɩɩda, la pa bũmb nins sẽn pa noom-fã yell ye.

   F sẽn tõe n maan tɩ sõng-fo: Sak n deeg tɩ f tara zu-loeese, la ra maan wa f pa ne bũmb sẽn yaa sõma f vɩɩmã pʋgẽ ye. Bi-bɩɩg a ye yʋʋr sẽn boond t’a Rebeka yeelame: “Daar fãa mam gʋlsda bũmb a ye sẽn maan m vɩɩmã pʋgẽ tɩ yaa sõma sebr zugu. M dat n tẽegdame tɩ baa m sã n tara zu-loeese, bũmb sẽn yaa sõma n maand m vɩɩmã pʋgẽ tɩ m tõe n tags a zugu.”

•   Tags f zo-rãmbã sẽn yaa neb ninsã yelle.

   Biiblã yetame yaa: “Tũud-n-ta-wẽns sãamda minim-sõamyã.” (1 Korẽnt rãmbã 15:33) F tũud-n-taasã sã n yaa sũ-to-neba, neb sẽn nong wɩdga, sãbsgo, la sẽn tar sũ-kẽka, fo me na n wa yɩɩ wa bãmba.

   F sẽn tõe n maan tɩ sõng-fo: Sã n wa pa nana ne f zo-rãmbã, f sũur tõe n sãamame bɩ n koms raood wakat bilfu. Sã n wa yaa woto bɩ f sõng-ba, la f ra bas tɩ b zu-loeesã reeg n namsd foo wʋsg ye. Pʋg-sad a ye yʋʋr sẽn boond t’a Misɛll yeelame: “Pa neb nins sẽn pa get yɛlã ne yam-sõngã bal n segd n yɩ d tũud-n-taas ye.”

 D vɩɩ wakat ning Biiblã sẽn boond tɩ “yaoolem wakatã,” la a paas tɩ “yɛlã na n yɩɩ kãn-kãe” wã. (2 Tɩmote 3:1) Yɛlã sẽn lebgd wʋsg dũniyã gill zugã yĩnga, yaa toog ne-f tɩ f kell n tall yam-sõng bɩ? Sã n yaa rẽ bɩ f karem sõsg ning gom-zug sẽn yaa: “Bõe yĩng tɩ ninsaalbã namsd wʋsgo?”