Yaa tɩ goam kẽer b sẽn togsd fo zug yaa wẽnga. Wala makre, b tõe n togsa goam sẽn pa sɩd fo zug sẽn na yɩl n sãam f yʋʋre. La baa b sẽn togs bũmb ning fo zugã pa wẽng wʋsgo, tõe n baas n zab-f lame, sẽn yɩɩd fãa sã n mik tɩ yaa ned f sẽn tagsd t’a yaa f zoa n togse!—Yɩɩn-sõamyã 55:12-14.

 M bãngame tɩ m zoa n gomd mam yell ne neb a taabã, n yetẽ tɩ ned yell pa pak-m ye. Rẽ sãama m sũur wʋsgo. M pa wʋm a sẽn yeel woto wã võor ye.”—A Ashley.

 Sɩdã: Ned ning sẽn yelgd goam fo zugã yaa f zoa t’a pa f zoa me, fo sã n bãng tɩ nebã gomda goam sẽn pa sõma fo zugu, sãamda f sũuri.

  Bũmb toor-toor n tõe n kɩt tɩ nebã gomd b taabã yelle. Ad bũmb kẽere:

 F yell sẽn pak-bã yĩnga. Wẽnnaam naana ninsaalb tɩ b vɩ ne taaba. Dẽnd yaa tɩlɛ tɩ d sõsd ne taaba, la d gomd d taabã yelle. Biiblã pʋd n sagend-d lame tɩ d “bao d taabã nafr me.”—Filip rãmbã 2:4.

 “Nebã nong n gomda b taabã yelle.”—A Bianca.

 “Togs sɩdã, m nong n dat n bãnga bũmb ning sẽn maan neb a taabã vɩɩmã pʋgẽ la m gomd rẽ yelle. M pa mi sẽn yaa bũmb ning yĩng ye. Rẽ nooma maam.”—A Katie.

 B sã n pa tar bũmb n maandẽ. Pipi kiris-nebã wakatẽ, neb n da be tɩ b “sã n paam sẽk fãa, b pa maand bũmb a to n zʋʋg kiba-paal togsg wall b kelgr ye.” (Tʋʋma 17:21) Neb wʋsg me maanda woto rũndã-rũndã.

 “Wakat ninga bũmb sã n pa maan tɩ b tõe n gom rẽ yelle, nebã wata ne goam sẽn ka be.”—A Joanna.

 B sẽn pa kɩs b mens sɩdã yĩnga. Biiblã bee bʋʋm la a sẽn sagend tõnd tɩ d ra mak d mens ne d taabã. (Galat-rãmbã 6:4) Bʋko, neb kẽer sẽn pa kɩs b mens sɩdã yĩng kɩtame tɩ b yelg kibay sẽn pa sõma b taabã zugu.

 “Neb nins sẽn togsd goam sẽn pa sõma b taabã zugã wilgda b sẽn sɩd yaa neb nins buudu. Woto tõe n dat n yeelame tɩ b maanda sũ-kĩir ne ned ning b sẽn wɩtã. B yelgda goam sẽn pa sɩd b taabã zugu, sẽn na yɩl n tẽ tɩ b sãoo nin-kãense.”—A Phil.

 Sɩdã: F rat tɩ f pa rate, nebã na n goma b taabã yelle, baa foo menga.

 Baa f sẽn pa tõe tɩ b pa gom f yellã, f tõe n yãka f manesem sẽn na n yɩ to-to. F sã n bãng tɩ b gomda f yelle, bũmb a yiib la f tõe n maane.

 PIPI BŨMBU: Maan wa yell kae ye. Naoor wʋsgo, f sã n maan wa yell kae n yaa sõma n yɩɩda, sẽn yɩɩd fãa sã n mik tɩ b sẽn yeel bũmb ning fo zugã pa wẽng ye. Tũ Biiblã saglga. A yetame yaa: “Ra bas tɩ f sũur yik tao-tao ye.”—Koɛɛg soaba 7:9.

 “Nebã ra gomdame tɩ maam ne bi-ribl n dood taaba, tɩ mam yaool n da zɩ n yã bi-riblã meng ye. B sẽn da yet bũmb ningã ra pa tar võor ye. Ra maanda maam laad menga.”—A Elise.

 “Nebã sã n wa gomd f yelle, bũmb sẽn tõe n sõng-f n yɩɩd yaa f sẽn na n tar yʋ-noogo. Baa neb sã n yelg goam sẽn pa sõma fo zugu, f sã n tar yʋ-noogo, neb nins sẽn na n tẽ goam-kãensã pa na n yɩ wʋsg ye. Naoor wʋsgo, nebã wat n bãnga sɩdã.”—A Allison.

 Saglga: 1) Gʋls b sẽn yet bũmb ning fo zugã, la 2) rẽ sẽn namsd foo to-to wã. F sã n tõog n ‘gom f sũurẽ,’ na n yɩɩ nana ne-f tɩ f kell n sĩndi.—Yɩɩn-sõamyã 4:4.

 BŨMB A YIIB-N-SOABA: Sõs ne ned ning sẽn yelg goamã fo zugã. Sasa ninga, f tõe n getame tɩ b sẽn yeel bũmb ning fo zugã yaa wẽng wʋsgo, tɩ yaa tɩlɛ tɩ f tɩ gom ne ned ning sẽn yelg rẽ wã.

 “F sã n tɩ gom ne ned ning sẽn gom fo yellã, tõe n kɩtame t’a bãng tɩ f sã n yelg goam ned zugu, a soabã wat n baas n bãngame. Sẽn paase, tõe n kɩtame tɩ f wʋm yellã vɩʋʋgo, n tõog n welg-a.”—A Elise.

 Nand tɩ f tɩ sõs ne ned sẽn yelg goam fo zugu, reng n karem Biiblã sagls nins sẽn pʋgdã, la f sok f meng sogsg nins sẽn be be wã.

•   “Ned sã n leok yell wɛɛngẽ n pa reng n kelg n wʋm yɛlã vɩʋʋgo, yaa yalemdo.” (Yel-bũnã 18:13) ‘M mii yellã fãa vɩʋʋg bɩ? Ned ning sẽn wa n togs maam tɩ b gomda mam yellã wʋma b sẽn yeelã sõma bɩ?’

•   “Ned buud fãa segd n wɩnga ne kelgre, la a maag ne goama, la a maag ne sũ-yikri.” (Zak 1:19) ‘Yaa masã la m segd n tɩ sõs ne ned ning sẽn yelg goamã mam zugã bɩ? Wakat ning m sẽn yãk n na n tɩ gom ne-a wã zemsame bɩ? M kɩsa sɩd tɩ m sẽn dat n welg yellã to-to wã zemsame bɩ, bɩ yɩta sõma tɩ m bas tɩ kaoos bilf tɩ m sũurã sig nanda?’

•   “Yãmb sẽn dat tɩ nebã maan bũmb nins yãmb yĩngã, yãmb me segd n maana bãmb bõn-kãense.” (Matiye 7:12) ‘Sã n da mik tɩ yaa maam n yelg goam sẽn pa sɩd ned zugu, m da na n datame t’a soabã manesem yɩ wãn ne maam? M da na n datame tɩ d welg yellã yɛɛnẽ? M da na n datame t’a soabã gom ne maam wãn to, la a tall manesem-bʋg ne maam?’

 Saglga: Nand tɩ f tɩ gom ne ned ning sẽn yelg goamã fo zugã, reng n gʋls bũmb ning f sẽn dat n yeel-a wã. Rẽ poor bɩ f gũ semen a ye bɩ a yiib n lebg n karem bũmb ning f sẽn gʋlsã n ges f sã n pa rat n toeem bũmb kẽere. F tõeeme me n togs f sẽn magd n na n maan bũmb ningã f roagda, wall f zoa tẽeb sẽn bɩ, la f kos-a sagls rẽ wɛɛngẽ.

 Sɩdã: Bũmb wʋsg la d pa tõe n gɩdg tɩ pa maan d vɩɩmã pʋgẽ ye. Wala makre, pa wakat fãa la d tõe tɩ nebã pa gom d yell ye. La rẽ pa segd n gɩdg-f tɩ f pa vɩɩmd ye.