KAMBʼAL 4
Maki a Jesucristo?
1. Bʼikiʼ ti kaji u kuxtal a Jesus?
Kʼuʼ ti modʼojil a yan tiʼi a Jesus ti kʼuʼun u chiitbʼil?—MATEO 11:29; MARCOS 10:13-16.
A Jesusu, espiritu ti keʼen ti kaʼan antes ti tali ti kuxtal yokʼolkabʼ, maʼ jabʼix u laakʼ mak. (Juan 8:23) Leʼek a yaax bʼetajbʼi u men a Dʼioso y uchi u anat kaʼ u bʼeteʼ tulakal a bʼaʼal a yan. Jadʼi leʼek a chukul bʼetajbʼi u men a Dʼioso mentäkä adʼajaʼan ti leʼek u Mejen «a jun tuul ilik tu bajil.» (Juan 1:14) A Jesusu uchi u meyaj ti Mansaj Tʼan ti a Dʼioso y adʼajaʼan ilik ti aj «Mansaj Tʼan.» Xoko Colosenses 1:15, 16.
2. Kʼuʼkaʼa tali yokʼolkabʼ a Jesusu?
A Dʼioso u jela u kuxtal u Mejen ti kaʼan ti kaʼ u täkaaʼta u mejen yokʼolkabʼ ti kaʼ yankunbʼäk u men ixchuʼ ix Maria u kʼabʼaʼ. ʼAangel u explenartaj ti ix Maria leʼek kaʼ u yadʼaj: «Santo espiritu watak ta wokʼol y u mukʼ a Noochtzil bʼel u kaʼa u bʼoʼoyteech. U men abʼeʼe leʼek mak a bʼel u kaʼa ti kuxtal bʼel u kaʼa ti chiitbʼil ti Santo, u Mejen Dʼios.» Ti bʼoobʼeʼ a Jesusu maʼ yan u yaj luʼumil tat. (Lucas 1:30-35, NWT) A Jesusu tali yokʼolkabʼ (1) ti kaʼ u kaʼanse u jajil pektzil a Dʼioso, (2) kaʼ u yeʼ a ejemploj bʼikiʼ kaʼ ti tzʼaaʼ u yanil a Dʼioso, kaʼax keʼenoʼon ichil a yaja, y (3) u tzʼaaʼ u yaj maʼloʼ kuxtal tiʼi kaʼ u «saʼaltooʼ a yaaba.» Xoko Mateo 20:28.
3. Kʼuʼkaʼa ti kʼati aj saʼalil?
Ti kaʼ saʼalbʼäkoʼon tzaj u uchul a bʼoʼol leʼek u chaʼbʼeebʼ a mak tuwich a kimil. (Exodo 21:29, 30) Maʼ yan ichil u tukul a Dʼios ti kaʼ kimik y kaʼ uchbʼenakooʼ a kristiyaano. Bʼikiʼ ti weel abʼeʼe? A Dʼios u yadʼaj tiʼi a yaax winik, a Adʼan, wa kaʼ u bʼeteʼ kʼuʼ u yadʼaj a Bʼibʼle ti «sipʼil» bʼel u kaʼa ti kimil. Wa kuchi maʼ uchi u sipʼil a Adʼan, maʼax kuchi bʼikʼin bʼel u kaʼa ti kimil. (Genesis 2:16, 17; 5:5) U yadʼaj a Bʼibʼle, «yanaji» a kimil ichil a yokʼolkabʼ u men a Adʼan. A Adʼan tun u mansaj tiʼi tulakal mak a sipʼil y u bʼoʼolbʼeebʼ a sipʼil, kimil. Ti kʼati aj saʼalil tiʼi kaʼ u jokʼsoʼon ichil u bʼoʼolbʼeebʼ a kimil leʼek u mansajtoʼon a Adʼan. Xoko Romanos 5:12; 6:23.
Mak jedʼeʼek u bʼotik kaʼ saʼalbʼäkoʼon tuwich a kimil? Leʼek ti kimikoʼon, ti bʼoʼtaj ti sipʼil jadʼi a toʼon. Maʼax juntuul ti aj kʼebʼanil winik jedʼeʼek u bʼotik u sipʼil u laakʼ a mak. Xoko Romanos 3:23.
4. Kʼuʼkaʼa kimi a Jesus?
A Jesus maʼloʼ. Maʼ jabʼixoʼon, maʼ tzaj u kimil tiʼi u sipʼil—maʼ yan u sipʼil. Pero, kimi a Jesus tiʼi u sipʼil u laakʼ mak. A Dʼioso u yeʼa u yakunaj tiʼi a kristiyaano leʼek kaʼ u täkaaʼta u Mejen ti kaʼ kimik tiʼi toʼon. A Jesus u yeʼalik u yakunaj ti toʼon leʼek ti kaʼ u tzʼoksaj u Tat ti kaʼ u tzʼaaʼ u kuxtal tiʼi ti sipʼil. Xoko Juan 3:16; Romanos 5:18, 19.
Cha’ante a vid’eo’ K’u’ka’a kimi aj Jesus?
5. Kʼuʼ a tan u bʼetik a Jesus aleebʼe?
Leʼek ti keʼen yokʼolkabʼ a Jesus u chʼanesaj a kʼojaʼan, u likʼsa ti kuxtal tuyaam a kimooʼ y u saʼaltaj a keʼenooʼ ich yajil. U yeʼa kʼuʼ a bʼel u kaʼa u bʼeteʼ ti a wataktoj tiʼi tulakal mak a walak u tzʼoksik a Dʼios. (Mateo 15:30, 31; Juan 5:28) Leʼek ti kimi a Jesus, a Dʼioso u kaʼ likʼsa ti kuxtal ti espiritu. (Efesios 1:20) A Jesusu uchi ti paakʼ tuyajseebʼ kʼäʼ a Dʼioso ʼaasto u tzʼabʼäl tiʼi u mukʼ ti Reyil yokʼol a yokʼolkabʼ. (Hebreos 10:12, 13) Aleebʼe Rey a Jesus ti kaʼan, y u yaj täkʼänooʼ tan u yadʼikooʼ u kichʼpan pektzil tulakal tuwich yokʼolkabʼ. Xoko Lucas 1:32, 33; Mateo 24:14.
Seebʼaʼan, u usartik u mukʼ a Jesus ti Reyil ti kaʼ u jobʼes tulakal a yajilal y etel mak tan u bʼetik. Tulakal mak a kaʼ u tzʼaaʼ u yool u tzʼokes a Jesus, bʼel u kaʼa u yilaʼ u kiʼil a kuxtal ich kichʼpan kuuchil tuwich yokʼolkabʼ. Xoko Mateo 5:5.
