যীশুনা শিরবা মতুং নুমিৎ হুম্নি শুবা নুমিৎতা সেবোক নুপী খরনা যীশুগী মোংফমদু হাংদুনা লৈবা উরম্মী। থোংঙাকপশিংদু চেনখিরমলে। মোংফম অদু ইহাং হাংলম্মী!

স্বর্গ দুত অনিখক থোরক্লম্মী। অমনা হায়রম্মী: “নাজরেৎকী যীশু অদু নখোয়না থিরি।” “মহাক হিঙ্গৎখ্রে”। (মার্ক ১৬:৬) খুদক্তা নুপী অদুনা পাখোনচৎপশিংদা পাউ তম্নবা চেল্লম্মী। লম্বিদা মখোয়না যীশুবু থেংনৈ। মহাক্না হায়রম্মী: “কীগনু, চত্তুনা ঐগী ইচীন ইনাউশিংদা গালীল তান্না চৎনবা হায়য়ু; মখোয়না মফম অদুদা ঐবু উগনি।”—মাত্থি ২৮:১০.

মতুংগী নুমিৎ অদুদা সেবোক অনিখক যেরূশালেমদগী ইম্মাওস তম্না চৎলম্মী। মহাক্না মখোয়দা করি ৱারি শারিবনো হংলম্মী। মদুগী নুপা অদু হিঙ্গৎপিখ্রবা যীশু অদুনি। অদুবু অহানবদদি সেবোকশিং অদুনা মহাকপু মশক খংলমদে। মখোয়না থৱায় নুংঙাইতনা খুম্লক্লম্মী মদুদি মখোয়না ৱারি শান্নরিবা অদু যীশুগী মরমদনি। শকখংদবা নুপা অদুনা মশীহগী মরমদা ইরম্বা শাস্ত্রগী ৱাফম পুম্নমক শন্দোক্না তাকপিরম্মী। অচুম্বনি, মশীহগী মরমদা মাংজৌননা তাকথোক্লম্বা খুদিংমক যীশুদা থুংখি। * সেবোকশিং অদুনা আত্মাগী মীশক অমা ওইনা হিঙ্গৎহনবিখ্রবা যীশু অদুনি হায়দুনা শক খংলকপা মতমদা মহাক মাংখিরম্মী।

সেবোক অনি অদুনা খুদক্তা যেরূশালেম তম্না হনখি। মফম অদুদা মখোয়না পাখোনচৎপশিং পুল্লপ্না থোংলোনবা কা অমগী মনুংদা লৈবা থেংনরম্মী। মদুদগী সেবোক অনি অদুনা মখোয়না থেংনখিবা অদু তম্লিঙৈদা যীশুনা মখোয়গী মমাংদা থোরক্লম্মী। মহাক্কী তুংইনবশিং অদু মহাকপু উবদা ঙক্লম্মী। যীশুনা হায়রম্মী: “নখোয়গী পূক্নীংদা চিংনবা পোক্লিবা করিগীনো?” মহাক্না অসিমশু হায়রম্মী: “অসুম্না ইদুনা লৈ মদুদি খৃষ্টনা অৱাবা খাঙবা তাই অমসুং হুম্নিশুবা নুমিত্তা অশিবশিংগী মরক্তগী হিঙ্গৎপা তাই।”—লূক ২৪:৩৮, ৪৬.

মহাক্না হিঙ্গৎখ্রবা মতুং নুমিৎ নিফুনি চুপ্না যীশুনা মহাক্কি সেবোকশিংগী মমাংদা থোক্লকখি। নোংমগী নুমিত্তদি মহাক্না মীওই ৫০০গী মমাংদা থোক্লকপিরম্মী। থাজনবগী মতুং ইন্না নুমিৎ অসিদা য়াম্না মরুওইবা থবক অমা মহাক্কী সেবোকশিংদা শীন্নরম্মী: “মরম অসিনা নখোয়না চত্তুনা জাৎ পুম্নমকপু সেবোক শেম্মু; অদুগা মখোয়বু মপা, মচা নিপা অমসুং থৱায় অশেংবগী মিংদা বাপটাইজ তৌ। ঐনা নখোয়দা পীখিবা য়াথং পূম্নমক অদু ঙাক্নবা মখোয়বু তম্বিয়ু; অদুগা য়েংউ, ঐনা তাইবঙপান অরোইবা ফাওবা নখোয়গা মতম পূম্নমক্তা লোয়নরি।”—মাত্থি ২৮:১৯, ২০.

অরোইবা ওইনা মহাক্কী থাজবা য়াবা পাখোনচৎপা ১১শিংগা উন্নবা মতমদা যীশুনা ৱাশক্লম্মী: “থৱায় অশেংবা অদুনা নখোয়গী নথক্তা লাক্লবা মতমদা নখোয়না পাঙ্গল ফংজগনি; অদুগা নখোয়না যেরূশালেমদা, যুদিয়া অপূম্বদা, সমরিয়া অপূম্বদা অমসুং মালেমগী অরোইবা ঙমখৈ ফাওবদা ঐগী মরমদা সাক্ষী ওইগনি।” (পাখোনচৎপশিংগী থবক ১:৮) মদুগী তুংদা যীশু মথক্লোমদা পুখৎখিরম্মী। লৈচিন্না কুপশিন্দুনা মহাক স্বর্গদা কাখি।

​—মাত্থি পন্দুপ ২৮; মার্ক পন্দুপ ১৬; লূক পন্দুপ ২৪; যোহান পন্দুপ ২০ অমসুং ২১; ১ কোরিন্থীয়া ১৫:৫, ৬​দা য়ুম্ফম ওইবা।