মীওইবা শেমদ্রিঙৈ মতম কয়াগী মমাংদা ঈশ্বরনা মীৎনা উবা ঙমদবা স্বর্গ দুত ময়াম অমা শেমখি। ইদেনগী লৈকোন্দা দিয়াবোল কৌবা সৈতান হায়না খংনবা ঈশ্বরগী মাইয়োক্তা লৈবা স্বর্গ দুত অমনা লোনথুপ-লোঞ্জাননা হৱাবু থেমদুনা ঈশ্বরনা চাগনু হায়বা উপান্দুগী উহৈ চাহন্নবা হোৎনরম্মী।

লিন অমবু ৱাঙাংলোই ওইনা শিজিন্নরগা সৈতান্না ঈশ্বরবু নুপী অমসুং মাগী মপুরোইবনা পামজবা করিগুম্বা খরা খংহন্দনা থম্মী হায়দুনা খনহল্লম্মী। চাবা য়াদে হায়দুনা থিংখ্রবা উহৈদু চারবশু মহাক অমদি মহাক্কী মপুরোইবা অদু অশিবা নংলোই হায়না স্বর্গ দুত অদুনা হৱাদা হায়রম্মী। মতৌ অশুম্না মহাক্কী মচাশিংদা মচিন থি হায়দুনা সৈতান্না ঈশ্বরবু মরাল শীরম্মী। নমথাক তৌরিবা অদুনা ঈশ্বরনা হায়বদু ইন্দবনা হেন্নদুম গ্যান অমসুং নিংখা তম্বা ফংগনি হায়দুনা উহল্লম্মী। তৌইগুম্বশুং মসি পুম্নমক মীনম্বা ঙাক্তনি। তশেংনমক মসিনা খ্বাইদগী ইহান হান্না ঙাংথোকখিবা মীনম্বা অদুনি। মসিদা থোক্লকইবা ৱাথোক্তি ঈশ্বরগী পুঙম ঙমজবা অদুদা শিংনরকপা অদুনি। ঈশ্বরনা মীওইবগী মথক্তা শাসন তৌননবগী অধিকার লৈব্রা অমসুং মহাক্কী শাসন অদু অচুম্বা মওংদা মহাক্কী প্রজাগী ফননবগীদমক ওইরিব্রা হায়বদুনি।

সৈতান্না মীনম্বদু হৱানা থাজরম্মী। মহাক উহৈদু চানিংলকই অদুদগীদি মহাক্না উহৈ অদুগী শরুক খরা চারম্মী। তুংদা মহাক্কী মপুরোইবদসু শরুক খরা পীরগা মহাক্নসু চারম্মী। মতৌ অসুম্না তৌদুনা মখোয় পাপ চেন্বা হায়বদু ওইরকখি। মপান্থোংদা ইচম-চম্বা মান্বা থবক অদু তশেংনমক্তি লানহৌবগী পাংখকনি। খংন-খংন ঈশ্বরগী য়াথং হিক্তোক্লুবগী থবক্তুনা আদম অমসুং হৱানা মপুং ফাবা পুন্সি য়াওনা পুম্নমকপু শেম্বিবা মপুগী শাসনবু য়াজখিদে।

মখোয়না তৌরুবা লমহেন্বগী থবক অদুগীদমক ঈশ্বরনা মখোয়বু দন্দি পিরম্মী। লিন অদুনা শক্লোন লৌরম্বা সৈতান্দু মাংহন্ননবা, ঈশ্বরনা লাক্কদৌরিবা ৱাশকপিখিবা ধারা নত্রগা কন্বিবা মীশক অদুগী মরমদা মাংজৌননা হায়রম্মী। পোকত্রিবা মচা-মশুশিং অদুদা নুংশি থৌজাল উৎপা ওইনা আদম অমসুং হৱাগী মথক্তা লাক্কদৌবা অশিবগী দন্দি অদু মতম খরগী ওইনা ঈশ্বরনা য়ৈথোকপিরম্মী। অদুগুম্বা মচা মশুশিং অদুনা আশা তৌজনিংঙাই য়ুম্ফম অমা লৈরম্মী। মরমদি ঈশ্বরনা থাবিরক্কদৌরিবা অদুনা ইদেনগী লৈকোন্দা লমহেন্বগী থবক তৌরুবদগী থোক্লকখিবা অৱা অনাশিংদু লৌথোকপিগনি। মতৌ করম্না তুংদা লাক্কদৌরিবা কন্বিবা মপু অদুগী মরমদা ঈশ্বরগী পান্দমদু মপুং ফারক্কদগে অমসুং থাবিরক্কদৌরিবা অসি কনা ওইগদগে হায়বদু তপ্না-তপ্না বাইবল ইবগী খোংজংগী তুংইন্না ফোংদোকপিরক্কনি।

ঈশ্বরনা আদম অমসুং হৱাবু পারাদাইস্তগী তান্থোকখিরম্মী। ইদেনগী লৈকোনগী ৱাংমদা থোক্লকখ্রবা তুংদদি মখোয়না হিংননবগীদমক ৱানা শু-নোমজবা তারম্মী। তুংদা হৱা মীরোল্লকখিরম্মী। অদুদগী আদম অমসুং হৱাগী অহান্বা মচা, কায়িন পোকখিরম্মী। নোহাগী মপা মপু ওইরিবা অবেল অমদি শেথ য়াওনা মতৈ মনাওদুগী অতোপ্পা মচানুপা অমদি মচানুপীশিংশু লৈরম্মী।

​—মৈহৌরোন পন্দুপ ৩দগী ৫ অমসুং ফোংদোকপিবা ১২:৯​দা য়ুম্ফম ওইবা।