মীওইবনা মশিং য়ামখৎলকপগী মতুং ইন্না পৃথিবীগী মথক্তা পাপ অমসুং ফত্তবা খোংজেল য়াংনা শন্দোক্লকই। হনোক কৌবা ঈশ্বরগী পাউ পুবা মীশক অমনা নোংমদি ধর্ম্ম চেন্দবশিং মাংহনগনি হায়দুনা মাংজৌননা হায়রম্মী। অদুম ওইরবা ফাওবদা ফত্তবা অদুম্মক লৈরম্মী অদুগা হেন্না ফৎচিল্লকলমদে। স্বর্গ দুত খরনা ঈশ্বরগী মাইয়োক্তা লেপ্তুনা মখোয়গী লৈফম স্বর্গ থাদোক্লম্মী। মখোয়না মীওইবগী শক্লোন লৌরবা তুংদা কারাম চাওনা নুপীশিংবু মখোয়গী লোইনবি ওইনা লৌরম্মী। অদুগুম্বা মহৌশাগী নিয়মগী ৱাংমদা তিন্নরুবদগী পোক্লকপা মুকসন মচা-মশুশিংদু নেফীলিম নত্রগা হিংচাবা হায়না কৌরম্মী। মখোয়না তাইবংপান্বদা মীহাৎ মীপুন অমদি হাৎন-শুনবগী থবক হেনগৎহল্লম্মী। মহাক্কী পৃথিবীগী ওইবা খুৎশেম অদুনা মাং তাক্লকপা অদুদা ঈশ্বরগী থৱায় শোক্লম্মী।

হনোক্না শিরবা তুংদা ফএবা তাইবংপান অদুগী মনুংদা অফবা মীওই অমখক্তমক লৈরম্মী। মহাক্কী মমীং নোহা কৌরম্মী। মহাক অমদি মহাক্কী ইমুংনা ঈশ্বরগী অপাম্বা তৌননবা হোৎনরম্মী। ঈশ্বরনা ফএবা মীশিংবু মাংহল্লগে হায়না ৱারেপ লৌরবা তুংদা মহাক্না নোহা অমদি পৃথিবীগী শা-উচেকশিংবু কন্নিংলম্মী। মরম অদুনা ঈশ্বরনা নোহাবু হি অমা শাননবা হায়রম্মী। মদুগী মনুংদা নোহা অমদি মহাক্কী ইমুংগা লোইননা মশিং য়াম্লবা মখল খুদিংগী শা-উচেকশিং পুম্নমক পৃথিবী পুম্বগী ওইবা ইচাও অদুদগী কলহৌগদৌরিবনি। ঈশ্বরনা হায়বা অদু নোহানা ইঞ্জরম্মী চহি কয়া চংনা হি অদু শারিঙৈদা মহাক “অচুম্বা হায়দোকখিবা” মীশক ওইরম্মী। (২ পিতর ২:৫) মহাক্না লাক্কদৌরিবা ঈশিং ইচাও অদুগী মরমদা মাংজৌননা পাউ পীরম্মী অদুবু মখোয়না মহাকপু থৌশারমদে। নোহা অমদি মহাক্কী ইমুংশিং অমসুং শা-উচেকশিং অদুগা লোইননা হি অদুদা চংনবগী মতম ওইরক্লম্মী। মখোয় চংখ্রবা তুংদা ঈশ্বরনা থোং লোনশিল্লম্মী। মদুদগীদি নোং তারক্লম্মী।

অহিং নুংথিল নুমিৎ ৪০নি চুপ্না অকন্বা নোং তারক্তুনা পৃথিবী শিন্বা থুংনা ঈশিংনা থুমজিনখি। ফত্তবশিং অদু মাংখ্রে। থা কয়ামুক লৈরবা তুংদা ঈশিংগী ইমাই হন্থরকপগা লোইননা হি অদু চীংজাও অমগী মথকতা লেপলম্মী। হি অদুগী মনুংদা চহি অমা মপুং ফানা লৈরুরবা তুংদা হি অদুদা তোংলম্বশিং অদুনা তেক্ত কায়দনা থোক্লকখি। থাগৎপা ফোংদোকপা ওইনা নোহানা ঈশ্বরদা খুদোনপোৎ কৎলম্মী। ঈশ্বরনা নোহাগী খুদোনপোৎ অদু লৌবিখি অদুগা মহাক্না অমুক হন্না ইশিং ইচাও অমা পুরক্তুনা পৃথিবীগী মথক্তা লৈরিবা অহিংবা জীবশীং মাংহন্বা তৌররোই হায়রম্মী। মদুগী শাক্ষি অমা ওইনা চুমথাং পীবিরম্মী। মসিনা ঐখোয়দা মহাক্কী ৱাশক অদুবু নিংশিংহন্বিগনি।

ঈশিং ইচাও অদুগী মতুংদা ঈশ্বরনা মীওইবদা য়াথং খরা অমশু পীবিরম্মী। মহাক্না মখোয়বু শা চাবা য়াবগী অয়াবা পীবিরম্মী। অদুম ওইনমক মহাক্না ঈ চাববুদি অথিংবা পীরম্মী। মহাক্না নোহাগী মচা-মশুশিংদা পৃথিবীগী মথক্তা পাক-শন্না শন্দোকনবা য়াথংশু পীবিরম্মী অদুবু মখোয় খরনদি য়ানিংলমদে। মীওই খরনা নিম্রোদ কৌবা লুচিংবা অমগী মতুং ইল্লগা কায়নথংদা বাবিলোন হায়না খংনখিবা বাবেলগী সহরদা অৱাংবা য়ুম অমা শাবা হৌরক্লম্মী। মখোয়গী পান্দমদি ঈশ্বরগী য়াথংবু শীংনবনি। তৌইগুম্বশুং মখোয়গী লোন অদু চমম্নহল্লগা তোঙান তোঙান্বা লোন ঙাংহন্দুনা ঈশ্বরনা মখোয়গী পান্দম্বু থুগায়রম্মী। অমগা অমগা লোন ফাওনবা ঙমলক্তবদগী মখোয়না থবক অদু থাদোক্লম্লগা তোঙান তোঙান্না চৎনখি।

​—মৈহৌরোন পন্দুপ ৬তগী ১১; যিহূদা ১৪, ১৫​দা য়ুম্ফম ওইবা