যাকোব অমসুং যিহূদা যীশুগা পোকমিন্নদবা মচিন মনাওনি। পিতর অমসুং যোহান যীশুগী সেবোক ১২ অদুগী মনুংদা য়াওবা মীশকনি। খৃষ্টিয়ান গ্রীক্কী শাস্ত্রগী শরুক অমা ওইরিবা চিঠি তরেৎ অসি মীওই মরি অসিনা ইরম্বনি। চিঠিশিংসি ইরম্লিবা মীশকশিংদুগী মমীং লৌদুনা থোল্লি। চিঠিশিং অসিদা য়াওরম্লিবা পাউতাক পুম্নমক ঈশ্বরগী স্বরদগী ওইবনি। চিঠিশিং অসিগী পান্দমদি খৃষ্টিয়ানশিংবু যেহোবাগা লৈনরিবা লমচৎকী নিয়ম-নিতি ফজনা ঙাকপা ঙম্ননবা অমসুং ঈশ্বরগী নিংথৌ লৈবাকপু মতম পুম্বা ৱাখলদা থম্নবা হোৎনবদা মতেং পাংনবনি।

থাজবা উৎথোকউ। ঐহাক থাজৈ হায়বনা য়ারোই। তশেংবা থাজবা হায়বদু লৈরবদি মদুনা ঐখোয়বু থবক তৌহনগনি। যাকোবনা ইরম্মী: “থবক য়াওদবা থাজবসু শিবনি।” (যাকোব ২:২৬) সমস্যা কয়াগী মরক্তা ঐখোয়না থাজবদা লেংদনা লৈরবদি খাংবা ঙম্বগী শক্তি ফংগনি। মাই পাক্না হিংননবগীদমক ঐখোয়না ঈশ্বরদগী লৌশিং নিজগদৌবনি। মদু নিজবা মতমদা ঈশ্বরনা শোয়দনমক্কী পীবিরক্কনি হায়বগী থাজবসু লৈগদৌবনি। ঐখোয়না খাংলবদি ঈশ্বরগী অয়াবা ফংজগনি। (যাকোব ১:২-৬, ১২) থাজবা অদুগা লোইননা ঈশ্বর নিংজরিবা মী অদুনা লমচৎকী নিয়ম-নিতি ঙাক্না চৎচরবদি যেহোবা ঈশ্বরনা মহাক্কী প্রার্থনা তাবিগনি। যাকোবনা হায়রম্মী: “ঈশ্বরদা নকশিল্লু, অদুগা মহাক্না নখোয়দা নকশিনবিগনি।”—যাকোব ৪:৮.

খৃষ্টিয়ান অমগী থাজবা হায়বসি য়াম্না কনগদবনি। মসিনা মহাকপু অথেম্বদগী অমসুং লমচৎ ওক্তবা থবক্তগী লাপথোক্তুনা লৈবা ঙমহনগনি। ফত্তবা লমচৎকী লৈরম্লিবা ফিভমদু উরগা যিহূদানা থাজবদা লৈমিন্নবা মপাংশিংদা “থাজবা অদুগীদমক্ত থৱায় য়াওনা লান্থেংননবা” অশুম্না পুক্নিং থৌগৎলম্মী।—যিহূদা ৩.

লিচৎ-শাজৎ শেংনা লৈয়ু। যেহোবানা মহাক্কী মীশিংবু শেংনা লৈহন্নিংঙই। মসিগী অর্থদি মখোয় হীরম খুদিংমক্তা অশেংবা ওইগদবনি। পিতরনা অশুম্না ইরম্মী: “নচৎ নতৌ পুম্নমক্তা নখোয় অশেংবা ওইয়ু। মরমদি মসি ইদুনা লৈ, ‘নখোয় অশেংবা ওইগদবনি, মরমদি ঐদি অশেংবনি।’” (১ পিতর ১:১৫, ১৬) খৃষ্টিয়ানশিংনা মতৌ তমজনবা অফবা খুদম লৈ। পিতরনা হায়রম্মী: “খৃষ্টনসু ঐখোয়গীদমক্তা অৱাবা খাঙখিবা মরম্না নখোয়না মহাক্কী খোঙ্গূন লীজনবা ঐখোয়গীদমক খূদম অমা থম্বিরম্লে।” (১ পিতর ২:২১) ঈশ্বরগী নিয়ম-নিতি ঙাক্না চৎপগীদমক খৃষ্টিয়ানশিংনা অৱা-অনা নংবা য়াই। অদুম ওইনমক মখোয়দা “অফবা অচুম অরান খঙবা পূক্নীং” লৈগদবনি। (১ পিতর ৩:১৬, ১৭) পিতরনা খৃষ্টিয়ানশিংবু শেংনা লৈননবা অমদি অফবা তৌদুনা ঈশ্বরগী থবক্তা লুপ্তুনা লৈজনবা হায়রম্মী। মখোয়না ৱায়েল বিচারগী নুমিৎ অমসুং ৱাশকপিরম্লবা ‘ধর্ম্মচেনবনা লৈরগদবা’ অনৌবা পৃথিবী অদু ঙাইদুনা লৈজগদবনি।—২ পিতর ৩:১১-১৩.

নুংশিবা উৎলু। যোহান্না অশুম্না ইরম্মী: “ঈশ্বরদি নুংশিবনি।” “ঐখোয়গী পাপকীদমক” শিবিননবা ঈশ্বরনা যীশুবু থাবিরকখিবা মরমদুনা ঈশ্বরনা মহাক্কী নুংশিহৈবা অদু উৎখি হায়দুনা পাখোনচৎপা অসিনা ফোংদোক্লম্মী। অদু ওইরবদি খৃষ্টিয়ানশিংনা করি তৌফম থোকই? যোহান্না শন্দোক্না তাক্লম্মী: “অচানবশা, ঈশ্বরনা ঐখোয়বু অসুম্না নুংশিবিরবদি, ঐখোয়নসু অমগা অমগা নুংশিনফম থোকই।” (১ যোহান ৪:৮-১১) অসিগুম্বা নুংশিবা অসি উৎননবগী লম্বী অমদি ইচিন-ইনাওশিংদা অতিথী সেবা উৎপা হায়বসিনি।—৩ যোহান ৫-৮.

মতৌ করম্না ঈশ্বর নিংজবশিংনা যেহোবাদা নুংশিবা উৎকনি? যোহান্না মদুগী পাউখুম পীরম্মী: “মরমদি ঐখোয়না ঈশ্বরগী য়াথংশিং ঙাকপা অসি ঐখোয়না মহাকপু নুংশিবনি, মহাক্কী য়াথংশিং অসি অরূম্বা নত্তে।” (১ যোহান ৫:৩; ২ যোহান ৬) ঈশ্বরনা হায়বা ইঞ্জবশিংদা ঈশ্বরনশু “লোম্বা নাইদনা হিংনবা” আশা পীবিবগা লোইননা নুংশিবিগনি।—যিহূদা ২১.

​—যাকোব; ১ পিতর; ২ পিতর; ১ যোহান, ২ যোহান, ৩ যোহান; যিহূদাদা য়ুম্ফম ওইবা।