নহাক যেহোবা অসি অশিংবা লৈঙাকপনি হায়না খনব্রা? ৱাহং অসিগী চপচাবা পাউখুম পীননবগীদমক ঐখোয়না মহাক্কী পাউতাকশিং খন্নবা দরকার ওই। মহাক্কী পাউতাকশিংবু ঙাক্না চৎচবনা ঐখোয়গী পুন্সি অসি হেন্না ফগৎলকপা অমসুং অর্থ চেনবা ওইগনি হায়দুনা নহাক্না খনব্রা? অশিংবা নিংথৌ সোলোমোন্না পাউরৌ ময়াম অমা ইরম্মী। মসিদা পীরম্লীবা পাউতাকশিং অসি ঐখোয়গী পুন্সিগী শরুক খুদিংমক্তা চন্নৈ। ঐখোয় খুদম খরা নৈনসি।

ঈশ্বরদা থাজবা থম্বা। ঐখোয়না ঈশ্বরগা অফবা মরি থম্নিংলবদি ঐখোয়না মঙোন্দা থাজবা থমগদবনি। সোলোমোন্না ইরম্মী: “নহাক্কী থম্মোই অপূম্বনা যেহোবাবু চেৎনা থাজৌ, নশাগী ৱাখল তাবদা ঙাজগনু। নহাক্না তৌবা হীরম খুদিংমক্তা মহাকপু নীংশিংউ, অদুগা মহাক্না নহাক্কী লম্বেলশিং চুমহনবিগনি।” (পাউরৌ ৩:৫, ৬) থাজবা থম্বগা লোইননা ঐখোয়না মহাক্কী মতেং নিজরবা অমদি মহাক্না হায়বা ইল্লবদি ঐখোয়গী পুন্সি অসি হেন্না অর্থ চেল্লকই। অসিগুম্বা খোংথাং অসিনা মীশিংবু মপুক্নিং হরাওহনবদা মতেং পাংবা ঙম্মী। মসিনা যেহোবাবুশু মহাক্কী য়েক্নবা সৈতান্না থাংগৎলকপা ৱাথোক অদুগী মরমদা পাউখুম পিবদা মতেং পাংগনি।—পাউরৌ ২৭:১১.

অতোপ্পা মীওইশিংগা হৈশিংনা লোইনবা। মপুরোইবশিং, মখোয়গী নুপীশিং অমসুং মচাশিংগী মরমদা ঈশ্বরনা পীরম্বা পাউতাকশিংদু ঙসিদি য়াম্না কান্নবা ওই। “নহাক্কী নহা ওইরিঙৈগী নুপীগা হরাউমিন্নৌ।” হায়রদুনা ঈশ্বরনা মপুরোইবশিংবু মখোয়গী নুপীশিংনা থাজবা য়ানা লৈহল্লু হায়রম্মী। (পাউরৌ ৫:১৮-২০) পাউরৌগী লাইরিক্না ময়ুম পাল্লবী নুপীশিংবু অফবা য়ুম কোইবি নুপী ওইবা ঙম্ননবা অমশুং মৱা-মপুরোইবগী অমদি মচাশিংদগী মতৌ করম্না নুংশিবা অমদি ইকাই খুম্নজবা ফংবা ঙমগদগে হায়দুনা উৎপি। (পাউরৌ, পন্দুপ ৩১) অঙাংশিংবুশু মমা-মপাগী হায়বা ইন্জনবা তাক্লম্মী। (পাউরৌ ৬:২০) মসিগী লাইরিক অসিনা ঐখোয়দা মরুপ লৈবা হায়বসি য়াম্না মরু ওই হায়বসি ফোংদোক্লম্মী। ঐখোয় ইথন্তা লৈবা হায়বসিনা ঐখোয়বু ইশাতগী খনবা হায়বদু ওইহল্লকই। (পাউরৌ ১৮:১) মরুপ তিন্নবা অসিনা ঐখোয়বু অফবা নত্রগা ফৎতবা মী ওইহল্লকপা য়াবা মরম্না ঐখোয়না মখোয়বু হৈশিংনা খনগদবনি।—পাউরৌ ১৩:২০; ১৭:১৭.

ঐখোয় ইশা ইথন্তগা হৈশিংনা লোইনবা। পাউরৌগী লাইরিক্তা ঐখোয়না মমল য়াম্লবা পাউতাক কয়া ফংই। খুদম ওইনা: মতৌ করম্না য়ু লান্না শিজিন্নরোইদগে, মতৌ করম্না অফবা গুনশিং হাপচিনগদগে অদুগা মাং-তাক্নিংঙাই ওইবা গুনশিংবু মাইয়োক্নগদগে, লোইননা মতৌ করম্না ঐখোয়না নোম্বা কন্বা ওইগদগে। (পাউরৌ ৬:৬; ১৪:৩০; ২০:১) লাইরিক অসিনা ঐখোয়বু খংহল্লি মদুদি ঐখোয়না ঈশ্বরগী পাউতাকপু থৌশাদ্রবা অদুগা মীওইবগী ৱায়েলদা থাজবা থম্লবদি মদুনা ঐখোয়গীদমক য়াম্না অমাংবা ওইরক্কনি। (পাউরৌ ১৪:১২) লাইরিক অসিনা ঐখোয়গী থম্মোইবু নত্রগা নুংগী ওইবা মীশক অদুবু ফৎতবা থবকশিংদগী ঙাক শেন্নবা পুক্নিং থৌগৎপিরম্মী। মসি করিগীনো হায়রবদি “মদুদগী [থম্মোই] হিংবগী ঈফুৎশিং চেন্থোকই।”—পাউরৌ ৪:২৩.

পৃথিবীদা লৈবা মী ময়াম অমনা য়ানৈ মদুদি মসিদা য়াওরিবা পাউতাকশিং অসি ইন্দুনা চৎলবদি পুন্সি অসি য়াম্নমক ফগৎকনি। মরম অদুনা যেহোবাবু মখোয়গী শাসন মপু ওইনা লৌশিন্জবা হায়বসে মরম চাই।

​—পাউরৌগী লাইরিক্তা য়ুম্ফম ওইবা