নহাক্কী য়ুম্বান পুন্সি অমসুং ইমুং মনুং য়াম্না নুংঙাইনবা কন্না হোৎনরবসু, খঙহৌদনা থোক্লকপা থৌদোক অমনা নুংঙাইবা পুম্নমক মাঙহনখিবা য়াই। (পাউ শন্দোকপা ৯:১১) অসিগুম্বা খুদোংচাদবা থৌদোকশিং অসি থেংনবা ঙম্নবগীদমক ঈশ্বরনা ঐখোয়বু নুংশিনা মতেং পাংবি। মখাদা পীরিবা বাইবলগী নিয়মশিং অসি ইল্লগা চৎপা মতমদা, খৱাইদগী ৱারে হায়না খনবা ফীভমদু ফাওবা নহাক অমসুং নহাক্কী ইমুং-মনুংনা পুন্না মাইয়োক্নবা ঙমগনি।

বাইবলনা করি হায়রি: “নখোয়গী লাঙতক্নবা পূম্নমক মঙোন্দা লংশিল্লু;মরমদি মহাক্না নখোয়গীদমক খনবি।” (১ পিতর ৫:৭) নহাক্না নংলিবা খুদোংথীবশিং অদু ঈশ্বরনা থোকহনবা নত্তে হায়বসি মতম পুম্নমক্তা নীংশিংবিয়ু। (যাকোব ১:১৩) নহাক্না মঙোন্দা নকশীনজরিবমখৈ, খৱাইদগী ফবা মওংদা ঈশ্বরনা নহাক্কী মতেং পাংবিগনি। (যিশাইয়া ৪১:১০) “মহাক্কী মাঙদা নখোয়গী থম্মোই ফোংদোকচৌ।”—থাগৎ ঈশৈ ৬২:৮

নহাক্না নুংতিগী বাইবল পাবা অমসুং নৈনজবা মতমদা, পুক্নিংদা নুংঙাইবা ফাওজগনি। মদুনা মরম ওইরগা, যেহোবানা “ঐখোয়গী অৱা-অনা পূম্নমক্তা থেমজিনবি” হায়বসি নহাক্না খঙলক্কনি। (২ কোরিন্থীয়া ১:৩, ৪; রোমীয় ১৫:৪) “খঙবা পূম্নমক্তগী হেন্দোক্লবা ঈশ্বরদগী লাকপা ঈঙথবা” অদু নঙোন্দা পীবিগনি হায়না মহাক্না ৱাশক্লি।—ফিলিপ্পীয়া ৪:৬, ৭, ১৩

নহাক্না তৌবা য়াবদি:

• ঈংথনা লৈবা অমসুং ৱাখল ফজনা খন্থবা ঙম্নবগীদমক যেহোবাদগী মতেং নিজৌ

• ফীভমদুদা করি করি তৌবা য়াবগে হায়বদু মুন্না খনবীরগা, খৱাইদগী ফবদু খল্লগা তৌবিয়ু

বাইবলনা করি হায়রি: “হৈশিংবা মীগী থম্মোইনা লৌশিং ফংই, অশিংবগী নাকোংনা খঙজিন্নবা হোৎনৈ।” (পাউরৌ ১৮:১৫) ওইরিবা ফীভমদু মাইয়োক্নবদা ইমুংগী মীওই খুদিংমকপু করিনা মতেং পাংবা য়াগনি হায়বদু খঙদোকপীয়ু। ইমুংগী মীওই খুদিংমক্কী দরকার ওইবশিংদু খঙদোকপীয়ু। মখোয়গা ৱারী শান্নবীয়ু অমসুং মখোয়না হায়বা তাবীয়ু।—পাউরৌ ২০:৫

অদুবু ঐখোয়গী নুংশিজবা মীওই অমা লৈখিদবা তারগদি করি তৌগনি? পুক্নিংদা ফাওবশিং ফোঙদোকপদা হঙ্গোইবা তৌবিগনু। যীশু ফাওবা তাঞ্জা অমদদি “কপখি” হায়বসি নীংশিংবিয়ু। (যোহান ১১:৩৫; পাউ শন্দোকপা ৩:৪) অসিগুম্বা মতমদদি তুম্বা অমসুং নীংথিজনা পোত্থাবা হায়বসিসু য়াম্না দরকার ওই। (পাউ শন্দোকপা ৪:৬) মদুনা অরুবা ফীভমদু থেংনবদা মতেং পাংগনি।

নহাক্না তৌবা য়াবদি:

• খুদোংথীবা থৌদোক থোক্ত্রিঙৈ মমাঙদগী হৌনা ইমুং মনুংগী মীওইশিংগা ৱারী শান্নদুনা পাউ ফাওনবগী হৈনবী থম্বিয়ু। মদুনা কোন্না খুদোংথীবা থৌদোকশিং থোক্লকপা মতমদা মখোয়নসু নহাক্কা ৱারী শান্নবদা অপনবা লৈরোই

• নহাক্না থেংনরিবা ফীভমদু হান্ননা থেংনখ্রে হায়না খনবা মীওইশিংগা ৱারী শান্নবীয়ু

বাইবলনা করি হায়রি: “মরূপ্না মতম পূম্নমক্তা নুংশি, মচীন মনাউনা অৱা অনাগীদমক পোকই।” (পাউরৌ ১৭:১৭) নহাক্কী মরুপশিংনা নহাকপু মতেং পাংবা পাম্লবসু, মখোয়না করি তৌগদগে হায়বদু খঙদবা য়াই। অদুনা, নহাক্না তশেংনা করি মতেং পাংহন্নিংবগে হায়বদু মখোয়দা ফোঙদোকপিয়ু। (পাউরৌ ১২:২৫) মদুগা লোয়ননা, বাইবলগী নিয়মশিং করম্না ইল্লগা চৎচগনি হায়বদু বাইবলগী মরমদা খঙবা মীওইশিংদগী মতেং লৌবীয়ু। মখোয়না বাইবলগী মতুং ইন্না পীরকপা পাউতাকশিংদুনা নহাক্কী মতেং শোয়দনা পাংগনি।—যাকোব ৫:১৪

ঈশ্বর অমসুং মহাক্কী ৱাশকশিংদা চেৎনা থাজবা মীওইশিংগা লেপতনা পুনজবা মতমদা নহাক্না শোয়দনা মতেং ফংজগনি। পুক্নিং থৌগৎপীবা দরকার ওইরিবা মীওইশিংবু নহাক্না মতেং পাংবিবা মতমদসু, নহাক্কী পুক্নিংদা নুংঙাইবা ফাওগনি। যেহোবা অমসুং মহাক্কী ৱাশকশিংদা লৈবা নহাক্কী থাজবদু মখোয়দা হায়বীয়ু। পুক্নিং থৌগৎপীবা দরকার ওইবা মীওইশিংবু মতেং পাংবদা ইশামক ইথৌ চিনবা ওইবিয়ু। নহাকপু নুংশিবিবা অমসুং নহাক্কীদমক খনবীবা মীওইশিংদগী লাপথোকপিগনু।—পাউরৌ ১৮:১; ১ কোরিন্থীয়া ১৫:৫৮

নহাক্না তৌবা য়াবদি:

• লুনা তিন্নজবা মরুপ অমদা ৱারী শান্নবীয়ু অদুগা মহাক্কী মতেং লৌবীয়ু

• থম্মোয়শেংনা নহাক্কী দরকার ওইবশিংদুগী মরমদা ময়েক শেংনা হায়বীয়ু