Рози вели: „Постојано бев загрижена затоа што некои работи си ги преувеличував во главата и си го замислував најцрното сценарио“. Кои библиски стихови ѝ помогнале? Еден од нив е Матеј 6:34: „Не бидете загрижени за утрешниот ден, зашто утрешниот ден ќе си има свои грижи. На секој ден му е доволно неговото зло“. Рози вели дека тие зборови, кои ги кажал Исус, ѝ помогнале да не биде загрижена за тоа што би можело да се случи утре. Таа додава: „Имав доволно проблеми и без да ја додавам грижата за работи кои не се случиле и кои најверојатно нема ни да се случат“.

И Јасмина се чувствувала преплавена од грижи. Таа вели: „Плачев неколку дена во неделата и имаше ноќи кога не спиев. Негативното размислување како да ме јадеше однатре“. Ѝ помогнал библискиот стих 1. Петрово 5:7: „Сите свои грижи фрлете ги на [Бог], зашто тој се грижи за вас“. Јасмина вели: „Не престанав да му се молам на Јехова, и тој ми одговори на молитвите. Како да ми падна камен од срце. Одвреме-навреме пак ми доаѓаат негативни мисли, но сега знам како да се справам со нив“.

Една девојка по име Изабела вели: „Мислам дека одолговлекувањето е наследно бидејќи и татко ми е таков. Ги одложувам важните работи, а потоа не правам ништо — си се релаксирам и си гледам телевизија. Таа навика е штетна бидејќи те става под силен стрес, и на крај она што ќе го сработиш не е сработено како што треба“. Многу ѝ помогнал советот од 2. Тимотеј 2:15, кој гласи: „Дај сѐ од себе за да стекнеш признание од Бог, да бидеш работник кој нема од што да се срами“. Изабела вели: „Не сакав Јехова да се срами од мене бидејќи нешто не сум сработила добро само затоа што сум одолговлекувала“. Со текот на времето, таа многу се подобрила во овој поглед.

И Келси вели нешто слично: „Имав проекти со рок, но ги одложував до последен момент. Плачев, не спиев и се секирав. Тоа стварно ми штетеше“. На Келси ѝ помогнал библискиот стих Изреки 13:16: „Секој умен човек прво проучува, па делува, а безумникот си ја истакнува глупоста“ (Радосна Вест). Таа објаснува што научила откако размислувала за овој стих: „Мудро е да си организиран и да имаш план. Сега на бирото секогаш си имам тефтер во кој си ја организирам работата. Тоа ми помага да бидам во тек со сѐ и да не чекам до последен момент“.

„Маж ми ме напушти и ме остави сама со четири мали деца“, раскажува Кристина. Во таа ситуација, многу ѝ помогнале зборовите од Изреки 17:17: „Вистинскиот пријател сака во секое време, и брат станува во неволја“. Кристина побарала помош од нејзините пријатели кои исто така му служат на Јехова. Таа вели: „Добив огромна поддршка од нив! Некои ми оставаа намирници и цвеќиња пред вратата. Цела војска пријатели трипати ни помогнаа мене и на децата да се преселиме. Еден пријател ми помогна да најдам работа. Пријателите секогаш беа тука за мене“.

Со осаменост се борела и Делфина, која веќе ја спомнавме. После сите тие болни загуби, таа објаснува: „Се чувствував како да не живеам, како да стојам сама во некој ќош и гледам како сите други си го живеат животот. Бев толку осамена“. Еден од стиховите кој ѝ помогнал бил Псалм 68:6: „Бог ги населува во куќа оние што се сами“. Таа објаснува: „Знаев дека не е можно овој стих да се однесува само на дословна куќа. Сфатив дека Бог ни нуди дом во симболична смисла, безбедно место каде што може да најдеме вистински и грижливи пријатели кои го сакаат Јехова. Но знаев дека, за да бидам блиска со другите, најпрво мора да сум блиска со Јехова. Во тоа ми помогна Псалм 37:4: ’Јехова нека биде твојата радост, па ќе добиеш од него што ти срце сака‘“.

На крај Делфина вели: „Сфатив дека треба да станам уште поблиска со Јехова. Тој е најдобриот пријател. За да си стекнам пријатели кои го сакаат Јехова, си направив список со работи што би можеле да ги правиме заедно. Научив да го гледам доброто кај другите и да не се концентрирам на нивните маани“.

Се разбира, и оние што му служат на Бог се несовршени. Како и сите луѓе, и Јеховините сведоци се борат со разни проблеми. Сепак, тоа што ја проучуваат Библијата ги поттикнува да им помагаат на другите секогаш кога е можно. Зар не би било убаво човек да има такви пријатели? Но, дали Библијата може да ни помогне кога станува збор за проблеми што не можеме да ги решиме — на пример, хроничен здравствен проблем или тага поради нечија смрт?