Без сомнение, ова разгледување на основните библиски учења ја зајакна твојата љубов кон Јехова. Но, мора постојано да ја зајакнуваш оваа љубов (1. Петрово 2:2). Ако продолжиш да се зближуваш со Бог така што ќе ја проучуваш неговата Реч, ќе можеш да се надеваш на вечен живот. (Прочитај Јован 17:3; Јуда 21.)

Колку повеќе го запознаваш Бог, толку поцврста ќе станува твојата вера. Верата ќе ти помогне да му угодиш на Бог (Евреите 11:1, 6). Ќе те поттикне да се покаеш и да направиш промени во својот живот. (Прочитај Дела 3:19.)

Сигурно ќе сакаш да им го пренесеш и на другите она што го научи, бидејќи обично сакаме да ги споделиме добрите вести. Додека и понатаму ја проучуваш Библијата, ќе научиш како можеш со нејзина помош да објасниш зошто веруваш во Јехова и која е добрата вест. (Прочитај Матеј 24:14; Римјаните 10:13, 15.)

Повеќето од нас најпрво им ја кажале добрата вест на своите пријатели или роднини. Но, убаво е да бидеме обѕирни. Наместо да им речеш дека нивната религија е погрешна, кажувај им за убавите работи што ги ветил Бог. Исто така, имај на ум дека врз луѓето честопати поголем впечаток остава твоето однесување отколку твоите зборови. (Прочитај 2. Тимотеј 2:24, 25.)

Ако продолжиш да ја проучуваш Библијата, ќе можеш да напредуваш во духовен поглед. Со текот на времето, ќе можеш да станеш многу близок со Јехова. Всушност, ќе можеш да станеш дел од неговото семејство. (Прочитај 2. Коринќаните 6:18.)

Ќе напредуваш во духовен поглед ако продолжиш да ја проучуваш Божјата Реч (Евреите 5:13, 14). Замоли некој Јеховин сведок да ја проучува Библијата со тебе со помош на книгата Што навистина учи Библијата? Колку повеќе учиш од Божјата Реч, толку посреќен ќе бидеш. (Прочитај Псалм 1:1-3; 73:27, 28.)

Добрата вест ни ја дал Јехова, кој е среќен Бог. Ќе се зближиш со него ако се зближиш и со неговиот народ (Евреите 10:24, 25). Ако продолжиш да го правиш она што го сака Јехова, ќе можеш да го добиеш вистинскиот живот — вечен живот. Најдоброто нешто што можеш да го направиш е да се зближиш со Бог. (Прочитај 1. Тимотеј 1:11; 6:19.)