AKORANGA 19
He Karaitiana Pono Rānei Ngā Kaiwhakaatu a Ihowā?
E whakapono ana mātou, Ngā Kaiwhakaatu a Ihowā, he Karaitiana pono mātou. He aha ai? Whakaarohia te pūtake o a mātou whakapono, te ingoa i wehea ai mātou i ētahi atu, me tō mātou aroha tētahi ki tētahi.
1. He aha te pūtake o ngā whakapono a Ngā Kaiwhakaatu a Ihowā?
I mea a Īhu, “ko tāu [te Atua] kupu te pono.” (Hoani 17:17) Pērā i a Īhu, mai i te tīmatanga ko te Kupu a te Atua te pūtake o ngā whakapono a Ngā Kaiwhakaatu a Ihowā. Hei tauira, tirohia tō mātou hītori ao-hōu nei. I ngā tau tōmuri o te rautau 19, i tīmata tētahi rōpū ākonga o te Paipera te āta tātari i ngā kōrero o te Paipera. I meinga e rātou te Paipera hei pūtake mō a rātou whakapono, ahakoa i rerekē aua whakapono i ngā akoranga o ngā hāhi. Kātahi, ka tīmata rātou te tuwha i aua pono o te Paipera ki ētahi atu. a
2. He aha mātou i tango ai i te ingoa Kaiwhakaatu a Ihowā?
Ka huaina e Ihowā āna kaikarakia he kaiwhakaatu, nō te mea e kōrero ana rātou i te pono mōna. (Ngā Hīperu 11:4–12:1) Hei tauira, i ngā wā o nehe, i mea te Atua ki tāna iwi: “Ko koutou hei whakaatu mō tāku.” (Pānuitia Īhāia 43:10.) Kua karangatia a Īhu ko “te kaiwhakaatu pono.” (Whakakitenga 1:5) Nō reira, i te tau 1931 i tangohia e mātou te ingoa Kaiwhakaatu a Ihowā. He tino koa mātou ki te kawe i taua ingoa.
3. He rite pēhea te aroha o Ngā Kaiwhakaatu a Ihowā ki tō Īhu aroha?
Nā te aroha nui o Īhu ki āna ākonga i rite rātou ki tana whānau. (Pānuitia Māka 3:35.) Pērā hoki, he whānau kotahi Ngā Kaiwhakaatu a Ihowā, puta noa i te ao. Nā reira ka karangatia ai mātou he tungāne, he tuahine, he tuakana, he teina rānei. (Pirimona 1, 2) Ka pupuri hoki mātou i te whakahau: “Arohaina ngā tēina, ngā tuākana.” (1 Pita 2:17) He maha ngā ara e whakaatu ai Ngā Kaiwhakaatu a Ihowā i tēnei aroha, pēnei i te āwhina i ō mātou hoa whakapono i te ao katoa i ngā wā e puta mai he aituā.
KIMI MĀRAMATANGA
Āta tirohia te hītori o Ngā Kaiwhakaatu a Ihowā, kia kitea ētahi atu mea e whakatūturu ana he Karaitiana pono mātou.
Ko te Paipera te pūtake o ngā whakapono a ngā Karaitiana pono, ka kōrero hoki rātou i aua whakapono ki ētahi atu
4. Ko te Paipera te pūtake o ngā mea e whakapono ana mātou
I kī a Ihowā ka nui haere te mātauranga ki ngā pono o te Paipera. Pānuitia Rāniera 12:4 me te kīwae, kōrerotia tēnei pātai:
-
He aha rā te mea “ka nui haere” i roto i te iwi a te Atua i a rātou e āta tātari ana i te Paipera?
Tirohia te tikanga ako i te Kupu a te Atua a tētahi rōpū ākonga Paipera, ko Charles Russell nei tētahi. Mātakitakitia te ATAATA, kōrerotia te pātai ka whai ake.
-
I te ataata, i ako pēhea a Charles Russell rātou ko ōna hoa Ākonga i te Paipera?
I mōhio rānei koe?
I ētahi wā, kua whakatika e mātou ētahi mea i whakapono mātou. He aha ai? Pērā i te rā ka whiti, ā ka mārama haere te whenua, pērā anō, mā te homai a te Atua, ka mārama haere tāna Kupu. (Pānuitia Ngā Whakataukī 4:18.) Nā reira ahakoa kāore e puta kē ngā kōrero o te Paipera, ka whakatikaia e mātou ngā whakapono ina pai haere tā mātou mōhio ki te Paipera.
5. Ka rite a mātou mahi ki te tikanga o tō mātou ingoa
Nā te aha mātou i tango ai i te ingoa Ngā Kaiwhakaatu a Ihowā? Mātakitakitia te ATAATA, kōrerotia te pātai ka whai ake.
-
He aha te ingoa Ngā Kaiwhakaatu a Ihowā i tika ai?
He aha a Ihowā i whiriwhiri tāngata ai hei kaiwhakaatu mōna? Nō te mea mā rātou e tautuhi ko ia te Atua pono ahakoa te nui o ngā kōrero teka mōna. Whakaarohia ētahi kōrero teka e rua.
Kei te whakaako ētahi momo karakia e hiahia ana te Atua kia whakamahi whakapakoko a rātou mema i roto i te karakia. Heoi anō, pānuitia Rewitikuha 26:1, kōrerotia ēnei pātai:
-
He aha rā te pono? He aha te whakaaro o Ihowā mō ngā whakapakoko?
E whakaako ana ētahi kaiārahi karakia ko Īhu te Atua. Heoi, pānuitia Hoani 20:17, kōrerotia ēnei pātai:
-
He aha rā te pono? He kotahi rānei te Atua rāua ko Īhu?
-
He pēhea tōu whakaaro ina mōhio koe kua tonoa e Ihowā āna Kaiwhakaatu ki te kauwhau i te pono mōna, mō tāna tama hoki?
6. Ka aroha mātou tētahi ki tētahi
E whakaritea ana e te Paipera ngā Karaitiana ki ngā wāhi rerekē o te tinana tangata. Pānuitia 1 Koriniti 12:25, 26, kōrerotia ēnei pātai:
-
Me pēhea ngā Karaitiana pono ina mamae ētahi atu Karaitiana?
-
He aha te mea kua kite koe e pā ana ki te aroha i waenganui i Ngā Kaiwhakaatu a Ihowā?
Ina whakamamaetia Ngā Kaiwhakaatu a Ihowā i tētahi wāhi o te ao, he tere tonu ngā hoa Kaiwhakaatu puta noa i te ao ki te āwhina. Kia kite i tētahi tauira, mātakitakitia te ATAATA. Kōrerotia te pātai ka whai ake.
-
Ka kitea pēheatia te aroha i roto i ngā mahi āwhina a Ngā Kaiwhakaatu a Ihowā?
E aroha ana ngā Karaitiana pono ki a rātou e mamae ana
E KĪ ANA ĒTAHI: “He hāhi hōu Ngā Kaiwhakaatu a Ihowā.”
-
Nōnahea a Ihowā i tapa ai i āna kaikarakia he kaiwhakaatu?
WHAKARĀPOPOTO
He Karaitiana pono Ngā Kaiwhakaatu a Ihowā. He whānau kaikarakia mātou huri noa i te ao, ko te Paipera nei te pūtake o a mātou whakapono, e kauwhau ana hoki i te pono mō Ihowā.
Titiro anō
-
He aha te take i tango ai mātou i te ingoa Ngā Kaiwhakaatu a Ihowā?
-
Ka pēhea mātou tētahi ki tētahi?
-
Ki tōu whakaaro, he Karaitiana pono rānei Ngā Kaiwhakaatu a Ihowā?
RAPU
Akona ētahi atu mea mō tō mātou hītori.
Jehovah’s Witnesses—Faith in Action, Part 1: Out of Darkness (1:00:53)
Tirohia tētahi tauira he pēhea i huraina e Ngā Kaiwhakaatu a Ihowā ētahi akoranga teka.
Whiwhi ki ngā whakautu ki āu pātai mō Ngā Kaiwhakaatu a Ihowā.
“Frequently Asked Questions About Jehovah’s Witnesses” (web page)
I uru a Tipene ki ngā tūkino mauāhara. Tirohia he aha ngā mea i kite ia i roto i Ngā Kaiwhakaatu a Ihowā i akiaki i a ia ki te huri i tōna āhua.
“My Life Was Going From Bad to Worse” (The Watchtower, July 1, 2015)
a Mai i te tau 1879, kua whakaputa mai tā mātou pukapuka matua, The Watchtower, i ngā pono o te Paipera.
