Юмо мемнан деч шуко пачаш ушанрак да опытанрак. Тудо, йӧратыше Ача семын, мемнан верч азаплана да тӱрлӧ нелылык деч мемнам аралынеже. Тудын полышыж деч посна ме сайын илен она керт (Иеремия 10:23). Кузе ача-ава шке йочаштым илаш туныктат, тыгак Юмо мемнам туныктен кертеш (Исаия 48:17, 18). Тудо мыланна библийысе принцип-влакым пуэн. Нуно мемнам илыш корныштына виктарен кертыт. (2 Тимофейлан 3:16 лудын лекса.)

Мыланна илышым Иегова пуэн гын, тудак мемнам туныктышаш. Юмын туныктымыж почеш илымаш мыланна кызытак пиалан лияш, а ончыкыжым курымеш илышым налаш полша. Тидлан ме Юмым тауштена да сандене тудын принципше-влакым илышыш куанен пуртена. (Псалом 18:8; Почмаш 4:11 лудын лекса.)

Закон — тиде раш пуымо кӱштымаш, кудым посна палемдыме ситуацийлан веле пуымо (Второзаконие 22:8). А принцип-влак — тиде тӱҥ чын-влак, кудыштым тӱрлӧ ситуацийыште кучылташ лиеш. Кузе принцип-влакым кучылташ умылашлан шонкалаш кӱлеш (Притчи 2:10—12). Мутлан, Библийын туныктымыж дене келшышын, илыш — тиде Юмо деч пӧлек. Тиде принцип пашаште, мӧҥгыштӧ але каныме годым эҥгекым конден кертше ситуаций деч кораҥаш полша. (Апост. пашашт 17:28 лудын лекса.)

Иисус кок тӱҥ принцип нерген каласен. Икымше принцип айдемын молан илымыжым ончыкта — Юмым палаш, тудым йӧраташ да тудлан гына служитлаш. Илышыште кеч-могай  решенийым лукмына годым мыланна тиде принципым эре шотыш налаш кӱлеш (Притчи 3:6). Тиде принципым илышыш пуртышо айдеме Юмын йолташыже лийын кертеш. Тыгак тудын курымеш илаш да чынжымак пиалан лияш йӧнжӧ лектеш. (Матфейын 22:36—38 лудын лекса.)

Кокымшо принцип еҥ кокласе кыл кучымаш шотышто полша (1 Коринфян-влаклан 13:4—7). Тиде принципым кучылташ манын, еҥ-влак дене кузе шкем кучымо шотышто Юмо деч примерым налаш кӱлеш. (Матфейын 7:12; 22:39, 40 лудын лекса.)

Библийысе принцип-влак ешым ушат да йӧратымаште илаш туныктат (Колоссян-влаклан 3:12—14). Эше ик кӱлешан библийысе принцип туныкта: ешым чоҥымеке, пӧръеҥ ден ӱдырамаш ӱмыр мучкылан ушнат. Тиде принцип ешым аралаш полша. (Тӱҥалтыш 2:24 лудын лекса.)

Библийын туныктымыж почеш илена гын, тиде мыланна чон тынысым аралаш полша да илышлан кӱлешым ситарашлан мемнан пашана эре лиеш. Вет пашаш чӱчкыдын налыт тудым, кӧ ок шойышт да пашам тыршен ышта (Притчи 10:4, 26; Еврей-влаклан 13:18). Тыгак Юмын Мутшо мемнам мо улмо дене серлагаш да Юмо дене йолташ лиймым поянлык деч утларак аклаш туныкта. (Матфейын 6:24, 25, 33; 1 Тимофейлан 6:8—10 лудын лекса.)

Библийысе принцип-влакым кучылтмаш тазалыкым аралаш полша (Притчи 14:30; 22:24, 25). Мутлан, Библий дене келшышын, аракам утыжден йӱмаш Юмылан йӧрдымӧ. Тиде шотышто Юмым колыштына гын, колымашыш конден кертше чер да эҥгекыш логалме деч аралыме лийына (Притчи 23:20). Иегова аракам йӱаш огеш чаре, но утыждене йӱмым чара (Псалом 103:15; 1 Коринфян-влаклан 6:10). Юмын принципше-влак шкем кузе кучымынам да шонымашнам эскераш туныктат (Псалом 118:97—100). Туге гынат, чын христиан-влак шке пайдашт верч веле огыл Юмын нормыж почеш илат. Эн ончыч нуно Юмым чапландарынешт. (Матфейын 5:14—16 лудын лекса.)