2 УРОК
Кӧ тыгай Юмо?
1. Молан Юмылан кумалаш кӱлеш?
Чын Юмо — тиде чылажымат Ыштыше. Тудын ни тӱҥалтышыже, ни мучашыже уке (Псалом 89:3). Лач Юмо мыланна Библийыште возымо поро уверым каласен (1 Тимофейлан 1:11). Юмо мыланна илышым пӧлеклен, сандене ме тудлан веле кумалшаш улына. (Почмаш 4:11 лудын лекса.)
2. Юмо нерген мом палена?
Юмо — Шӱлыш, сандене ик еҥат тудым нигунам ужын огыл. Еҥ-влак дене таҥастарымаште тудо ушанрак да виянрак (Иоаннын 1:18; 4:24). Юмым ужаш огеш лий гынат, ыштымыже нерген шонкалымаш тудым пален налаш полша. Мутлан, тӱрлӧ фрукт ден пеледыш-влак Юмын йӧратымашыжым да уш-акылжым ончыктат. А Сандалыкын кугытшо тудын вийжым палдара. (Римлян-влаклан 1:20 лудын лекса.)
Эше Юмо нерген шукырак пален налашлан Библийым лудаш лиеш. Тушто возымо мо тудлан келша, а мо огеш келше, кузе тудо еҥ-влак дене шкенжым куча да кузе тӱрлӧ ситуацийыште ышта. (Псалом 102:7—10 лудын лекса.)
3. Юмын лӱмжӧ уло мо?
Иисус каласен: «Пылпомышто улшо мемнан Ачана! Тыйын святой лӱмет мокталтше» (Матфейын 6:9). Юмын шуко титулжо уло, но лӱмжӧ тудын икте гына. Кажне йылмыште тудын лӱмжым тӱрлӧ семын маныт. Марла тудын лӱмжӧ «Иегова» лиеш. (Тӱҥалтыш 22:14 лудын лекса.)
Библийын шуко кусарымаштыже Юмын лӱмжым кораҥденыт да олмешыже Господь да Юмо манме титулжо-влакым возен шынденыт. Но ондакшым Библийыште Юмын лӱмжӧ 7 000 наре гана вашлиялтын. Еҥ-влакым Юмо нерген туныктымыж годым Иисус тудын лӱмжым эре кучылтын. (Иоаннын 17:26 лудын лекса.)
«Юмын лӱмжӧ уло мо?» видеороликым ончалза.
4. Иегова мемнам йӧрата мо?
Тиде йӧратыше ача семын Юмо ончыкылыкышто мыланна сай лийже манын, чылажымат ышта
Таче уло тӱня орлык дене темын. Туге гынат, Юмо мемнам огеш йӧрате да мемнан верч огеш тырше манын каласаш лиеш мо? Южышт ойлат, пуйто Юмо мемнам тергашлан мыланна орлыкым колта. Но тиде чын огыл. (Иаковын 1:13 лудын лекса.)
Юмо мемнам эрыканым ыштен: тудлан служитлаш але уке, ме шке ойырен налын кертына (Иисус Навин 24:15). Но шукышт осал корным ойырен налыт. Теве молан тӱняште тынар шуко орланымаш. Тыгай чын огыл ыштымылан кӧра Иегован чонжо коршта. (Тӱҥалтыш 6:5, 6 лудын лекса.)
Иегова мемнам йӧрата. Тудо илышлан куанымынам ужнеже. Вашке тудо осалым да осалым ыштыше-влакым пытара. Иегова орланымашлан кызыт лияш пуа гынат, тиде ик жаплан веле да тидлан тудын кугу амалже уло. Могай? Тидын нерген ме 8-ше урок гыч пален налына. (2 Петрын 2:9; 3:7, 13 лудын лекса.)
5. Кузе Юмо дек лишемаш?
Иегова мемнам тудын дек лишемаш ӱжеш. Тидым ышташлан мыланна кумалме мут гоч Юмо дене мутланаш кӱлеш. Тудын кажне айдеме нерген чылажымат палымыже шуэш (Псалом 64:3; 144:18). Иегова титакнам кудалташ ямде. Южгунам мыланна чын ышташ куштылго огыл, но Юмо тудым куандараш тыршымынам ужеш. Чыла тиде ончыкта: языкан улмынам ончыде, ме Юмо дене лишыл кылым кучен кертына. (Псалом 102:12—14; Иаковын 4:8 лудын лекса.)
Иегова мыланна илышым пӧлеклен, сандене утларакшым весе-влакым огыл, а тудым йӧратышаш улына (Маркын 12:30). Юмым йӧратымынам ончыкташ манын, тудын нерген шинчымашым умбакыжат налаш да тудын кӱштымыжым шукташ кӱлеш. Чыла тидым ыштен, те Иегова дек лишемын кертыда. (1 Тимофейлан 2:4; 1 Иоаннын 5:3 лудын лекса.)
