6 УРОК
Колышо еҥ-влак угыч илен кертыт мо?
1. Колышо-влакым мо вуча?
Иисусын Лазарь лӱман йолташыже лийын. Тудо Иерусалим воктене Вифаний ялыште илен. Икана Лазарь черланен да колен. Кунам Иисус толын, тудын колымыжлан ныл кече лийын. Иисус Лазарьын родыжо-влак дене пырля, Марфа да Мария дене, колышын шӱгарже деке каен. Вашке тушан ятыр еҥ погынен. Чыла еҥ ончылно Иисус йолташыжым угыч илышыш пӧртылтен. Шоналтыза гына, Марфа ден Мария ылыж кынелше Лазарьлан мыняр чот куаненыт! (Иоаннын 11:21—24, 38—44 лудын лекса.)
Марфа колышо-влакын ылыжмыштлан ӱшанен. Иегова нуным мландыште илашлан пӧртылта манын, тудо пален. (Иов 14:14, 15 лудын лекса *.)
2. Колышо айдеме дене мо лиеш?
Юмо Адамлан каласен: «Тый мланде пурак улат да пуракышкак савырнет» (ТӰҤАЛТЫШ 3:19).
Айдеме «мланде пурак» гыч ыштыме лийын (Тӱҥалтыш 2:7; 3:19). Еҥ-влак — кап-кылан шӱлыш-влак огытыл. Колымеке, айдемын чонжо илымым умбакыжат огеш шуйо. Кунам айдеме кола, тудын вуйдорыкшат кола, чыла шонымашыжат пыта. Ылыж кынелше Лазарь колымыж деч вара мо лиймыж нерген нимомат ойлен огыл, вет колымаш деч вара айдеме нимомат огеш шиж. (Экклезиаст 9:5, 6, 10 лудын лекса *.)
Юмо еҥ-влакым тамыкыште индыра мо? Библийыште каласыме почеш колышо-влак нимомат огыт шиж. Тугеже, тул тамык нерген туныктымаш — Юмым шӱктарыше шоя туныктымаш. Иегова — йӧратыше Юмо. Вет тудо еҥ-влакым нигунамат огеш индыре. (1 Иоаннын 4:8 лудын лекса.)
«Колымо деч вара айдеме дене мо лиеш?» видеороликым ончалза.
3. Колышо-влак мемнан дене мутланен кертыт мо?
Колышо-влак ни ойлен, ни колын огыт керт (Псалом 113:25, 26). Но улыт осал суксо-влак, кудышт еҥ-влак дене мутланен кертыт. Нуно, колышо айдеме семын койын, еҥ-влакым ондалкалат (2 Петрын 2:4). Сандене Иегова колышо-влак дене мутланымым чара. (Второзаконие 18:10, 11 лудын лекса *.)
4. Кӧ ылыжтыме лиеш?
Шуко миллион колышо айдеме мландыште угыч илаш тӱҥалеш. Тудат, кӧ Юмым пален огыл да чын огыл ыштен, ылыжтыме лиеш. (Лукан 23:43; Апост. пашашт 24:15 лудын лекса.)
Ылыж кынелше-влак Юмо нерген чын шинчымашым налыт да, Иисусым колыштын, тудлан ӱшанымым ончыктен кертыт (Почмаш 20:11—13). Ылыжше айдеме чыным ышташ тӱҥалеш гын, рай мландыште курымеш илен кертеш. (Иоаннын 5:28, 29 лудын лекса.)
5. Колышо-влакым ылыжташ Иегован кумылжо тудын могай улмыжым ончыкта?
Колышо-влакын ылыжаш ӱшанышт лийже манын, Иегова шке Эргыжым мемнан верч колаш колтен. Колышо-влакым ылыжташ Иегован кумылжо мемнам йӧратымым да поро улмыжым ончыкта. Кунам колышо-влак ылыжыт, поснак кӧм вашлияш кумылда уло? (Иоаннын 3:16; Римлян-влаклан 6:23 лудын лекса.)
^ абз. 2 Иов 14:14, 15: «Айдеме кола гын, угыч илен кертеш мо? Куллыкышто лиймем чыла жап мучко, утарымаш толмешке, мый вучаш тӱҥалам. Тый ӱжат, да мый вашештем. Шке кидет дене ыштымет верч йокрокланаш тӱҥалат».
^ абз. 3 Экклезиаст 9:5, 6, 10: «Илыше-влак колышашлыкыштым палат, а колышо-влак нимомат огыт пале, да нуно ынде нимогай суапландарымашым огыт нал, вет нунын нерген шарнымаш мондалтеш. Нунын йӧратымашышт, да ужмышудымашышт, да кӧранымашышт пытен; кече йымалне ышталтме паша деч нунын нимогай ужашышт огеш лий. ...Кидет дене мом ыштен кертат, уло вийым пыштен, ыште, вет Шӱгарыште — верыште, кушко тый кает, — ни пашаже, ни шонымашыже, ни шинчымашыже, ни уш-акылже уке».
^ абз. 5 Второзаконие 18:10, 11: «Тендан коклаштыда ни шке эргыжым але ӱдыржым тул гоч колтышо, ни мужедше, ни юзыланыше, ни тӱрлӧ пале-влакым умылтарыше, ни еҥым локтышо, ни шӱлыш-влакым ӱжшӧ дек мийыше, ни мо лийшашым ончылгоч каласыше але колышо деч иктаж-мо нерген йодшо лийшаш огыл».
