Иегован Таныкше-влак коклаште иктаж-кӧм паледа мо? Лийын кертеш, нуно тендан пошкудыда улыт, але те нунын дене пырля пашам ыштеда, тунемыда. Ала те нунын дене Библийым шымледа. Иегован Таныкше-влак чынжымак кӧ улыт да молан нуно шке ӱшанышт нерген чыла вере каласкален коштыт?

Ме тыглай еҥ улына. Иегован Таныкше-влак коклаште тӱрлӧ калык да тӱрлӧ культур гыч еҥ-влак улыт. Мемнан кокла гыч южышт ончыч вес религийыште лийыныт, а южышт Юмылан ӱшаненат огытыл. Иегован Таныкше лиймына деч ончыч ме чыланат Библийын туныктымашыжым келгын шымлен налынна (Апост. пашашт 17:11). Тиде туныктымаш мыланна келшен, сандене ме шке кумылна почеш Иегова Юмылан служитлаш тӱҥалынна.

Ме Библий гыч налме шинчымашым аклена. Моло еҥ семынак мемнан тӱрлӧ нелылык да ситыдымашна улыт. Но библийысе принцип-влакым кучылташ тыршымыланна кӧра илышна сай могырыш вашталтын, да ме пиаланрак лийынна (Псалом 127:1, 2). Тиде ик амал, кудыжо мемнам Библий нерген еҥ-влаклан каласкалаш тарата.

Ме Юмын законжо дене келшышын илена. Юмын законжо-влак Библийыште возымо улыт. Нуно мыланна шот дене илаш полшат, весе-влакым пагалаш туныктат да тыгак чыла шотыштат чын ышташ да поро лияш таратат. Эше нине закон-влак сай айдеме лияш полшат, еш кылым пеҥгыдемдат да шкем кучымо шотышто ару лияш кумылаҥдат. Ме тӱрлӧ калык гыч улына да тӱрлӧ эллаште илена. Но Юмо чыла калыкым ик семын онча. Сандене мемнан коклаште нимогай келшыдымаш уке. Чыла Иегован Таныкше-влак тӱнямбалысе ешыш ушымо улыт, кушто кажныже Юмо дене кылдалтше пашам акла. Ме тыглай еҥ улына гынат, мемнан тӱнямбалысе ешна моло калык деч пешак чот ойыртемалтеш (Апост. пашашт 4:13; 10:34, 35).

• Иегован Таныкше-влак тыглай еҥ улыт манын, молан каласаш лиеш?

• Библий гыч налме шинчымашлан кӧра Танык-влакын илышышт кузе вашталтын?