1. Тендан могай йодышда лектын кертеш?

ТИДЕ книгам шымлен, те шуко библийысе туныктымаш дене палыме лийында. Мутлан, курымашлык илыш, ылыжмаш да колымаш деч вара айдеме дене мо лийме нерген чыным пален налында (Экклезиаст 9:5; Лукан 23:43; Иоаннын 5:28, 29; Почмаш 21:3, 4). Ала те Иегован Таныкше-влакын вашлиймашышкышт уже кошташ  тӱҥалында да нуно Юмылан чын служитлат манын ӱшанеда (Иоаннын 13:35). Очыни, тендан Иегова дене кыл кучымашда вияҥаш тӱҥалын, да тудлан служитлаш кумылда лектын. Тугеже тендан тыгай йодышда лектын кертеш: «Ындыжым мый мом ыштышаш улам?»

2. Эфиопийысе ик еҥын тынеш пураш кумылжо молан лектын?

² Иисус Христосын илыме жапыштыже Эфиопийысе ик еҥын тыгаяк йодышыжо лектын. Тудо каласен: «Теве вӱд. Мыйым тынеш пурташ чарак уло мо?» (Апост. пашашт 8:26—36). Тынеш пураш тудын кумылжо молан лектын? Иисусын тунемшыже Филипп тудлан Иисус Мессий улеш манын умылтарен. Тиде умылымаш Эфиопийысе еҥын шӱмжым тарватен, да тудын тынеш пураш кумылжо лектын.

3. а) Иисус шке тунемшыж-влаклан мом кӱштен? б) Тынеш пурымаш кузе эртаралтшаш?

³ Библий раш умылтара: айдеме Иеговалан служитлынеже гын, тынеш пурышаш. Иисус Христос шке тунемшыж-влаклан кӱштен: «Чыла калык-влакым туныктыза. ...Нуным тынеш пуртыза» (Матфейын 28:19). Иисус шкежат тынеш пурен. Тудын вуйжо гына нӧртымӧ лийын огыл, тудо тӱрыснек, уло капше дене, вӱдыш пуртымо лийын (Матфейын 3:16). Кызытат христиан-влак тынеш пурымышт годым Иисусын примерже почеш вӱдыш тӱрыснек пурышаш улыт.

4. Тынеш пурымыда весе-влаклан мом палдара?

 ⁴ Кунам айдеме тынеш пура, тудо Юмын йолташыже лияш да тудлан служитлаш кумылжым весе-влаклан ончыкта (Псалом 39:8, 9). Очыни, те шонеда: тынеш пурымо деч ончыч мыланем мом ыштыман?

5. а) Тынеш пурымыда шуэш гын, эн ончыч мом ыштыман? б) Иегован Таныкше-влакын вашлиймашышкышт молан кошташ кӱлеш?

⁵ Тынеш пурымо деч ончыч Иегова да Иисус Христос нерген палымашым налаш кӱлеш. Библийым шымлаш тӱҥалын, те тиде палымашым уже налыда. (Иоаннын 17:3 лудын лекса.) Но тидым гына ышташ шагал. Вет Библий Иегован эрыкшым «тӱрыснек пален налаш» тарата (Колоссян-влаклан 1:9). Тидым ышташ тыланда Иегован Таныкше-влакын вашлиймашышт полшат. Тушко эре коштын, те Юмо дене кыл кучымашдам пеҥгыдемден кертыда (Еврей-влаклан 10:24, 25).

6. Тынеш пурымо деч ончыч Библийым мыняр чот сайын палаш кӱлеш?

⁶ Мутат уке, тынеш пурымыда деч ончыч Библийым тӱрыснек палымыдам Иегова огеш вучо. Юмо тынеш пураш шонышо Эфиопийысе еҥ дечат тидым вучен огыл (Апост. пашашт 8:30, 31). Ме Юмо нерген шинчымашым курым-курымеш налаш тӱҥалына (Экклезиаст 3:11). Тынеш пурашлан библийысе тӱҥ туныктымашым палаш  да нунын дене келшаш сита (Еврей-влаклан 5:12).

7. Библийым шымлымаш тыланда мо шотышто полшен?

⁷ Библийыште каласыме: «Ӱшанымаш деч посна Юмылан йӧрышӧ от лий» (Еврей-влаклан 11:6). Сандене тынеш пурымо деч ончычак айдемылан ӱшанымашыжым пеҥгыдемдаш кӱлеш. Акрет Коринф олаште илыше-влак гыч южышт Иисусын тунемшыж-влакын туныктымыштым колын, «ӱшаненыт да тынеш пуреныт» манын, Библийыште возымо (Апост. пашашт 18:8). Библийым шымлымаш тыландат Юмын сӧрымашыжлан да Иисусын надыржылан, кудо мемнам язык ден колымаш деч утара, ӱшанаш тӱҥалаш полшен (Иисус Навин 23:14; Апост. пашашт 4:12; 2 Тимофейлан 3:16, 17).

8. Пален налмыдам весе-влаклан каласкалаш тендам мо таратен кертеш?

⁸ Библий гыч шукырак палымашым налын, да тиде палымашын илышыште полшымыжым ужын, те шке ӱшанымашдам пеҥгыдемдеда. Вара пален налмыдам весе-влаклан каласкалаш кумылда лектеш (Иеремия 20:9; 2 Коринфян-влаклан 4:13).

9, 10. а) Пален налмыдам кӧлан каласкален кертыда? б) Погынымаш дене пырля таныклаш тӱҥалашлан мом ыштыман?

⁹ Тендан, очыни, кумылда лектеш пален налме  нерген ешлан, йолташлан, пошкудылан але пырля пашам ыштыше-влаклан каласкалаш. Тидым тыматлын да порын ышташ тыршыза. Жап эртымеке, те погынымаш дене пырля таныклаш тӱҥалын кертыда. Таныклаш ямде лиймеке, шке кумылда нерген тендан дене Библийым шымлышылан каласыза. Тудо тендан ямде улмыдам да библийысе принцип-влак почеш илымыдам ужеш гын, кок кугурак изам тендан дене пырля вашлияш йодеш.

¹⁰ А молан кугурак иза-влак дене вашлиялташ кӱлеш? Тиде вашлиймаш годым нуно теве мом ужыт: те тӱҥ библийысе туныктымаш-влакым умыледа, нунылан ӱшанеда, нунын почеш иледа да чынжымак Иегован Таныкше лийнеда. Кугурак иза-влак дене мутланыме деч ида лӱд, вет нуно погынымаште кажныж верч чот тыршат (Апост. пашашт 20:28; 1 Петрын 5:2, 3). Тиде вашлиймаш деч вара кугурак иза-влак, те погынымаш дене пырля таныклен кертыда але уке, тыланда каласат.

11. Погынымаш дене пырля таныклаш тӱҥалме деч ончыч молан илышыштына вашталтышым ышташ кӱлеш?

¹¹ Лийын кертеш, кугурак иза-влак таныклаш тӱҥалмыда деч ончыч илышыштыда иктаж-мом вашталташ кӱлеш манын каласен кертыт. Молан тиде вашталтышым ышташ кӱлешан? Молан манаш гын, кунам ме Юмо нерген каласкален коштына, ме Юмын еҥже улына манын  ончыктена, сандене мемнан илышна Юмым чапландарыше лийшаш (1 Коринфян-влаклан 6:9, 10; Галат-влаклан 5:19—21).

12. Молан чыла еҥлан ӧкынаш кӱлеш?

¹² Тынеш пурымо деч ончыч эше ик кӱлешан ошкылым ышташ кӱлеш. Апостол Петр каласен: «Языкда ӱштылалтше манын, языкдам касарыктыза [«ӧкыныза», УТ] да Юмо деке савырныза» (Апост. пашашт 3:19). Мо тыгай ӧкынымаш? Тиде кунам айдеме ондак чын огыл ыштымыжлан ойгыра. Мутлан, айдеме яжарланен илен гын, тудлан ӧкынаш кӱлеш. Ӧкынаш тыгай еҥланат кӱлеш, кӧ эре чын ышташ тыршен, вет чыла еҥ языкан. Кажне айдемылан Юмо деч языкым кудалташ йодаш кӱлеш (Римлян-влаклан 3:23; 5:12).

13. «Юмо деке савырнаш» манме мом ончыкта?

¹³ Ончыч йоҥылыш пашам ыштымылан ӧкынаш гына сита мо? Уке. Эше Юмо деке савырнаш кӱлеш манын, апостол Петр каласен. Вес семынже ондакысе уда илышым кодаш да уын илаш тӱҥалаш кӱлеш. Тидым умылаш ик пример полша. Шоналтыза, пуйто те ик олаш икымше гана каяш корныш лектында. Жап эртымеке, йоҥылыш могырыш каеда манын умыледа. Мом ышташ тӱҥалыда? Мутат уке, писылыкдам иземдеда, чарнен шогалыда, вара савырнеда  да чын могырыш каеда. Библийым шымлен, те илышыштыда иктаж-мом вашталташ кӱлмым тыгак ужын кертыда. Илышдам вашталташ — вес семынже «Юмо деке савырнаш» — да чын ышташ ямде лийза!

14. Юмылан ӱшанле лияш сӧрымаш мом ончыкта?

¹⁴ Тынеш пурымо деч ончыч эше ик кӱлешан ошкылым ыштыман — Иеговалан ӱшанле лияш сӧрымашым пуыман. Тиде сӧрымашым айдеме кумалме мут гоч пуа. Тиде кумалме мутышто тудо Иеговалан веле служитлаш да тудын эрыкшым шке илышыште эре икымше верыш шындаш сӧра (Второзаконие 6:15).

15, 16. Юмылан ӱшанле лияш сӧрымашым пуаш айдемым мо таратен кертеш?

¹⁵ Иеговалан веле служитлаш сӧрымашым ӱмыр мучко ик айдеме дене илаш пуымо сӧрымаш дене таҥастараш лиеш. Айста ик примерым ончен налына. Рвезылан ик ӱдыр чот келша. Тудо ӱдырым сайрак пален налашлан тудын дене кошташ тӱҥалеш. Жап эртымеке, рвезе ӱдырым йӧрата манын умыла да тудым марлан налнеже. Тиде решений пеш кугу улеш манын умыла гынат, рвезе тидым ышташ ямде, вет ӱдырым йӧрата.

¹⁶ Иеговам сайрак пален налын, жап эртымеке, те тудым йӧратеда да тудлан уло чон дене  служитлынеда манын умылен налыда. Тендан тудлан курымеш служитлаш сӧрымашым пуаш кумылда лектеш. Библий дене келшышын, кӧ Иисус почеш каяш шона, шке эрыкшым кудалтышаш (Маркын 8:34). Мом тиде ончыкта? Иеговам чыла шотыштат колышташ кӱлеш. Вет тудын эрыкшым шуктымаш мемнан кумыл да цельна деч кӱлешанрак. (1 Петрын 4:2 лудын лекса.)

17. Молан южышт Иеговалан ӱшанле лияш сӧрымашым огыт пу?

¹⁷ Южышт сӧрымӧ мутыштым кучен огыт керт манын лӱдыт, сандене Иеговалан ӱшанле лияш сӧрымашым огыт пу. Тыгай еҥ-влак Иеговам ынешт шӱлыкаҥдаре. Весышт шонат, пуйто, Юмылан ӱшанле лияш сӧрымашым огыт пу гын, йоҥылыш пашам ыштымылан мутым кучаш огеш кӱл лиеш.

18. Юмын йодмыжым шуктен ом керт манын лӱдмашым сеҥаш мо полша?

¹⁸ Иеговам йӧратымаш тыланда чыла тиде лӱдмашым сеҥаш полша. Те тудым йӧратеда гын, шке мутдам кучашлан чыла кертмыдам ышташ тӱҥалыда (Экклезиаст 5:4; Колоссян-влаклан 1:10). Юмын эрыкшым шукташ пеш йӧсӧ манын ода шоно. Апостол Иоанн возен: «Юмым йӧратымаш Тудын кӱштымыжым шуктымаш лиеш, а кӱштымыжӧ неле огыл» (1 Иоаннын 5:3).

19. Иеговалан ӱшанле лияш сӧрымашым пуаш молан лӱдаш огеш кӱл?

 ¹⁹ Тудлан служитлаш шонышо-влак ситыдымаш деч посна лийшаш улыт манын, Иегова огеш вучо. Тудо пуэн кертмына деч утыжым огеш вучо (Псалом 102:14). Тудо мыланна чын ышташ полшаш тӱҥалеш манын сӧра (Исаия 41:10). Библий кумылаҥда: «Иеговалан уло шӱмет дене ӱшане... ...Да тудо корнетым вияшым ышта» (Притчи 3:5, 6).

20. Иеговалан ӱшанле лияш сӧрымашым пуымо деч вара мом ыштыман?

²⁰ Те Иеговалан ӱшанле лияш сӧрымашым уже пуэнда гын, вес ошкылым ышташ — тынеш пураш — ямде улыда.

21, 22. Иеговалан служитлаш кумылдам чыла еҥ ончылно кузе ончыктен кертыда?

²¹ Иеговалан ӱшанле лияш сӧрымашым пуэнда да тынеш пураш кумылда уло манын, шке погынымаште кугурак иза-влак советын виктарышыжлан каласыза. Тудо кугурак иза-влакым тендан дене тӱҥ библийысе туныктымаш-влак нерген мутланаш йодеш. Нуно тендан ямде улмыдам ужыт гын, тыланда Иегован Таныкше-влакын лийшаш конгрессыштышт тынеш пураш темлат. Конгрессыште лӱмын ямдылыме ойлымашыште иза тынеш пурымашын значенийжым умылтара. Вара тудо тынеш пураш  шонышо-влаклан кок проста йодышым пуа. Нине йодышлан «туге» манын вашештен, те Юмылан служитлаш кумылда нерген чыла еҥ ончылно почын каласеда (Римлян-влаклан 10:10).

²² Ындыжым те тынеш пураш ямде лийыда. Тендам тӱрыснек вӱдыш пуртат. Тынеш пурымыда чылалан  ончыкта: те Иегова Юмылан ӱшанле лияш сӧрымашдам пуэнда да Иегован Таныкше лийында.

23. Ача, Эрге да святой шӱлыш лӱмеш тынеш пурымаш мом ончыкта?

²³ Тудын тунемшыже-влак Ача, Эрге да святой  шӱлыш лӱмеш тынеш пурышаш улыт манын, Иисус каласен. (Матфейын 28:19 лудын лекса.) Тиде теве мом ончыкта: ме Иегован властьше дене келшена, Юмын шонен пыштымаштыже Иисусын рольжым умылена, да шке эрыкшым шукташлан Иегова святой шӱлышыжым кучылтеш манын палена (Псалом 82:19; Матфейын 28:18; Галат-влаклан 5:22, 23; 2 Петрын 1:21).

24, 25. а) Тынеш пурымаш мом ончыкта? б) Пытартыш ужашыште мо нерген пален налына?

²⁴ Тынеш пурымашын тыгак символический значенийже уло: вӱдыш тичмашын пурен, те пуйто ондакысе илышлан коледа, а вӱд гыч лектын — Юмын служитлыше семын у илышым тӱҥалыда. Шарныза: те ала-могай еҥ, организаций але пашалан огыл, а Иеговалан ӱшанле лияш сӧрымашым пуэда.

²⁵ Юмылан ӱшанле лияш сӧрымаш да тынеш пурымаш Иегова дене кыл кучымашдам чынжымак пеҥгыдемдат (Псалом 24:14). Но тынеш пурымо дене гына те утарымашым огыда нал. Апостол Павел каласен: «Шкендан утаралтмашдам лӱдын да тыршен шуктыза» (Филиппысе-влаклан 2:12). Шарныза: тынеш пурымаш — тиде утарымашке наҥгайыше корнын тӱҥалтышыже веле. Иегова дене лишыл кыл кучымашым йомдараш огыл манын, мом ышташ кӱлеш? Тиде йодышлан вашмутым пытартыш ужаш гыч пален налына.