Иегован чытымашыже мучашдыме огыл, да пеш вашке тиде тӱнялан тудо мучашым пышта. Шоя религий пытарыме лиеш. Варажым наций-влакын коалицийышт Юмын калыкше ӱмбаке кержалтеш, да Иегова чыла осал еҥ-влакым Армагеддонышто пытара. Христиан-влак нине кугу событий-влакым чот вучат.

Мутат уке, кугу орлык нерген чылажымат ме она пале, мутлан, могай кечын тудо тӱҥалеш. Тыгак она пале, могай амаллан кӧра политик-влак шоя религий ӱмбаке кержалтыт. Мыланна пале огыл, мыняр жап наций-влакын коалицийыштын Юмын калыкше ӱмбаке кержалтмыже шуйна да кузе тудо эрта. Тыгак она пале, Армагеддонышто осал еҥ-влакым пытарашлан Иегова могай вийым кучалташ тӱҥалеш.

Но Библийыште мыланна чыла кӱлешан информаций уло. Тудо лийшаш событий-влак деч лӱдмашым сеҥаш полша. Мутлан, ме «пытартыш кечылаште» илена манын палена (2Тм 3:1). Тыгак палена: чын религий пытарыме ынже лий манын, шоя религий ӱмбаке кержалтмыже кӱчыкемдыме лиеш (Мф 24:22). Ме палена: Иегова шке калыкшым утарен кода (2Пт 2:9). Эше палена: осал еҥ-влак шотышто лукмо приговорым шукташ да Армагеддонышто моткоч шуко калыкым утарен кодаш Иегова Иисус Христосым шогалтен. А Иисус — чын ыштыше, да мемнам утарашлан тудын вийже уло (Пчм 19:11, 15, 16).

Кугу орлык годым «еҥ-влак лӱдын вучымышт дене колышаш гай лийыт». Но мемнам лӱдмаш огеш авалте. Ме палена, кузе Иегова шке калыкшым ожно жапыште утарен, да палена, мо мемнам ончыкыжым вуча. Тидын нерген шонкалымаш мыланна ту неле жапыште полша. Ме кынелын да вуйнам нӧлтен шоген кертына. Тунам пеҥгыде ӱшанымашна лиеш: мемнам утарыме жап лишемеш (Лк 21:26, 28).