1. Молан апостол Павеллан келшен, кузе тудын ӱмыржӧ эртен?

 АПОСТОЛ Павел тудым вашке казнитлат манын пален. Но эртыше жапым шарналтымаш Павеллан куаным конден, вет тудлан келшен, кузе тудын ӱмыржӧ эртен. Тудо каласен: «Мый... кайышаш корнем мучашыш шуктенам, ӱшанымашым арален коденам» (2 Тим. 4:6—8). Павел илышыжым уш-акыл дене кучылтын — тудо илышыжым Иеговалан служитлымылан пуэн. Тудо Юмылан йӧрышӧ улеш манын пален. Мемнанат сай решений-влакым лукмына да Иеговалан йӧрышӧ лиймына шуэш. Кузе ме тидым ыштен кертына?

2. Ӱшаныме дене илымаш мом ончыкта?

² Павел шкеж нерген да вес ӱшанле христиан-влак нерген теве мом каласен: «Ме ужмо дене огыл, а ӱшаныме дене илена» (2 Кор. 5:7). Мом тудо каласынеже ыле? Ужмо дене илыше еҥ-влак решенийым лукмо годым мом ужмыштым, колмыштым да шижмыштым гына шотыш налыт. А ӱшаныме дене илыше еҥ-влак решенийым лукмо годым Иегован шонымыжым эре шотыш налыт. Тыге нуно тудлан да тудын каҥашыж-влаклан ӱшанымыштым ончыктат (Пс. 118:66; Евр. 11:6).

3. Ӱшаныме дене илыше-влакым могай суап вуча? (2 Коринфян-влаклан 4:18).

³ Решенийым лукмо годым, мутат уке, ме шотыш налшаш улына, мом ужына, колына да шижына. Но ме кугу решенийым лукмо годым шкенан шижмашнам гына шотыш налына гын, тиде, очыни, сайым огеш кондо. Молан? Молан манаш гын, шижмашна мемнам ондален кертеш. Ме ужмо дене гына  илена гын, тунам кунам-гынат Иеговам шӱлыкаҥдена (Эккл. 11:9; Матф. 24:37—39). А ӱшаныме дене илена гын, тунам «Юмылан мо келшымым» ыштена (Еф. 5:10). Кунам Юмым колыштына, ме пиалан лийына да чоныштына тыныс лиеш (Пс. 15:8, 9; Ис. 48:17, 18). А эше ӱшаныме дене илена гын, ончыкыжым курымеш илена. (2 Коринфян-влаклан 4:18 лудын лекса.)

4. Кузе мемнан гыч кажныже умылен кертеш: тудо ӱшаныме дене але ужмо дене ила?

⁴ Мемнан гыч кажныжлан шке деч йодман: «Решений-влакым мый кузе луктам? Мом ужмым гына шотыш налам але Иеговалан ӱшанем да тудын каҥашыже-влак почеш ыштем?» Айста пален налына: ӱшаныме дене илена манын, кузе ончыкташ лиеш. Мутлан, кунам шонена, могай пашаш пураш, кунам шкалан пелашым кычалына да кунам организаций деч кӱштымаш-влакым налына. Ме ончен лектына: уш-акылан решенийым лукташлан мом шотыш налман.

КУНАМ ШОНЕНА, МОГАЙ ПАШАШ ПУРАШ

5. Пашам ойырен налме годым мом шотыш налман?

⁵ Мемнан да лишылна-влакын илышлан чыла кӱлешан лийже манын, кажнынан кумылна уло (Эккл. 7:12; 1 Тим. 5:8). Южо пашаште шуко оксам тӱлат. Тидлан кӧра кажне кечысе кӱлешлыкым ситараш гына огыл, но тыгак иктаж-молан оксам погаш лиеш. А вес пашаште пеш шагал оксам тӱлат, оксаже эн кӱлешанжылан гына сита. Мутат уке, пашам ойырен налме годым ме пален налнена, мыняр оксам мыланна тӱлаш тӱҥалыт. Но тидым гына шотыш налына гын, тугеже, ме ужмо дене гына илена.

6. Пашам ойырен налме годым ӱшаныме дене илымынам кузе ончыкташ лиеш? (Еврей-влаклан 13:5).

⁶ Ме ӱшаныме дене илена гын, тунам шотыш налына, кузе пашана Иегова дене кыл кучымашналан влиятлен кертеш. Шке деч йодаш лиеш: «Мыланем тиде пашаште тыгайым ышташ логалеш мо, мом Иегова ужмышудымо?» (Прит. 6:16—19); «Тидын верч вашлиймашым кодаш, шагалрак таныклаш да шагалрак Библийым шымлаш логалеш мо?»; «Тиде паша верч ешемлан жапым ойыраш йӧсӧ лиеш мо?» (Флп. 1:10). Нине йодыш-влак гыч кеч иктыжлан «туге» манын вашештеда гын, тиде пашаш пураш огыл уш-акыланрак лиеш ыле, кеч вес пашам муаш куштылго огыл. Ме ӱшаныме дене илена да пеҥгыдын ӱшанена: Иегова мемнан верч тыршашлан эре йӧным муэш. Пеҥгыдын ӱшанымынам решенийна-влак ончыктышаш улыт (Матф. 6:33; Еврей-влаклан 13:5 лудын лекса).

7, 8. Кечывалвел Америка гыч ик изана ӱшаныме дене ила манын, кузе ончыктен? (Тыгак сӱретым ончыза.)

⁷ Теве кузе Хавье́р a, Кечывалвел Америка гыч изана, ӱшаныме дене илымыжым ончыктен. Тудо каласкала: «Пашаште кӱшылрак верым налаш йӧн лектын. Мый кок пачаш шукырак оксам налам ыле да мыланем чот келшыше пашам шуктем ыле». Тунамак Хавьер пионер семын служитлымым тӱҥалаш шонен. Тудо шарналтен ойла: «Мыйым лийшаш начальник дене собеседованийыш ӱжыныт. Тудын дене мутланыме деч ончыч Иеговам мыланем полшаш йодынам. Мый пеҥгыдын ӱшаненам: Иегова пала, мо мыланем сайрак. Конешне, мый профессионал семын кушнем ыле. Но пашалан духовный цель-влакыш шуаш мешаяш пуэмем шуын огыл».

⁸ Умбакыже Хавьер теве мом ойла: «Собеседованийыште начальник каласен: „Тыланет паша жап деч шукырак ышташ логалеш“. „Мыланем тиде келшен огеш тол, — тудлан порын умылтаренам, — вет мый эше христиан служымашлан жапым пуэм“». Хавьер  тиде пашаш пурен огыл. Кок арня гычын тудо пионер семын служитлаш тӱҥалын, а варажым ту ийыштак тудо тыгай пашам муын, кушто кечыгут пашам ышташ кӱлын огыл. Тудо ойла: «Иегова кумалмемым колын да мыланем тыгай пашам пуэн, кудыжлан кӧра мый пионер семын служитлен кертам. Мый чынже денак пиалан улам, вет ындыжым Иеговалан да погынымашлан шукырак ыштен кертам».

9. Тео изан историйже мемнам мо́лан туныкта?

⁹ Кызытсе паша верч Иегова дене кыл кучымашна лушкыдемеш гын, мом ыштыман? Айста Конго гыч Те́о лӱман изан историйжым ончалына. Тудо каласкала: «Мый пеш сай пашам муынам. Кум пачаш шукырак оксам налынам, да чыланат мыйым пагаленыт». Но тушто Тео изалан паша жап деч шукырак ышташ логалын. Тидын верч тудо чӱчкыдын вашлиймаш-влакым коден. Тыгак пырля пашам ыштыше-влак тудым южгунам фирмыштын честный огыл сделкыштым шылташ йодыныт. Тео тиде паша гыч кайынеже ыле, но паша деч посна кодаш лӱдын. Мо тудлан полшен? Тудо ойла: «Мыйым Аввакум 3:17—19 гыч мут-влак чот пеҥгыдемденыт. Мый умылен налынам: паша деч посна кодам гынат, Иегова мыйын верч тыршаш йӧным муэш. Садлан мый тушеч каенам». Тео ойла: «Начальник-влак гыч шукышт шонат, пуйто кугу окса верч айдеме чылажымат ышта — ешымат, Юмылан кумалмымат кодаш ямде. Мый пиалан улам, вет Иегова дене да ешем дене лишыл кыл кучымашым арален коденам. Ик ий гыч Юмо мыланем сай пашам муаш полшен, кудыжлан кӧра илыш кӱлешлыкым ситараш лиеш. А эн тӱҥжӧ — служитлымылан жап кодеш. Иегова илышыштына икымше верыште лиеш гын, тиде эше огеш ончыкто, пуйто оксана эре лиеш. Но тудо мемнан верч тыршымыжым нигунамат огеш чарне». Айста чыла решенийна дене Иегован каҥашыже-влаклан да сӧрымашыже-влаклан ӱшанымынам ончыктена. А тудо вашеш мемнам суапландара.

 КУНАМ ШКАЛАН ПЕЛАШЫМ КЫЧАЛЫНА

10. Кӧ ден мужыраҥаш шонымо годым мом шотыш налаш кӱлеш, но тунамак мо нерген шарныман?

¹⁰ Мужыраҥмаш — тиде Иегова деч пӧлек, да ешым чумыраш кумыл уло гын, тиде уда огыл. Мутлан, акалан b ик иза келша, да, акан шонымаште, тиде иза тудлан сай марий лийын кертеш. Ака тудын койышыжым, тӱжвал тӱсшым да репутацийжым ончалеш докан. Тыгак тудлан оҥай лиеш, кузе тудо оксажым кучылтеш да лишылже-влак верч тырша але уке. А эше тиде ака шоналта — тиде иза воктене тудо пиалан улеш але уке. Конешне, чыла тиде кӱлешан. Но ака тидым гына шотыш налеш гын, тудо, очыни, ужмо дене ила.

11. Кӧ дене мужыраҥаш шонымо годым айдеме ӱшаныме дене илымыжым кузе ончыктен кертеш? (1 Коринфян-влаклан 7:39, УТ).

¹¹ Мыняр чот Иегова иза-акана-влак дене кугешна, кудышт кӧ дене мужыраҥаш шонымо годым тудын каҥашыже-влакым колыштыт! Мутлан, нуно пеш самырык улмышт годым ешым чумыраш огыт вашке, а вучат, кунам тиде пеш самырык пагыт эрта (1 Кор. 7:36, УТ). Кӧ ден мужыраҥаш шонымо годым нуно ончат: келшыше изан але акан тыгай койыш-влак улыт мо, кудышт, Иегован шонымаште, сай марийын да сай ватын лийшаш улыт (Прит. 31:10—13, 26—28; Еф. 5:33, УТ; 1 Тим. 5:8). А нунылан Танык огыл айдеме романтический интересшым ончыкта гын, нуно 1 Коринфян-влаклан 7:39, УТ гыч каҥашлан ӱшанат, кудыж дене келшышын, «Господь почеш кайышыж» дене веле мужыраҥаш лиеш (лудын лекса). Нине иза-ака-влак ӱшаныме дене илат да палат: Иегова нунын эмоциональный кӱлешлыкышт верч кеч-могай айдеме деч сайрак тырша (Пс. 54:23).

12. Розан случайже тендам мо́лан туныкта?

¹² Колумбий гыч пионер семын служышо Роза акан историйжым ончалына. Тудо интернет гоч туныктышо семын пашам ыштен, да тудлан ик Танык огыл пӧръеҥ дене чӱчкыдын мутланаш логалын. Тудо Роза дек вниманийжым ончыкташ тӱҥалын. Розаланат тудо келшен. Акана каласкала: «Тиде рвезе сай айдеме гай чучын: чылаштланат полшен, шкенжын тазалыкше верч тыршен. Тыгак мыланем келшен, кузе тудо шкенжым мый денем кучен. Лач тыгай койышан марийым кычалынам. Но тудо Танык лийын огыл». Роза эше ойла: «„Тый денет лишыл кылым ынем кучо“ манын каласаш йӧсӧ лийын. Вет тугодым мый шкемым шкет кодмыла шижынам да марлан лекмем шуын, но погынымаште келшен толшо изам муын кертын омыл». Роза ужмым гына огыл шотыш налын. Тудо шоналтен, кузе тудын решенийже Иегова дене кыл кучымашыжлан влиятла. Садлан тудо саде пӧръеҥ дене чыла кылым кӱрлын да уло вийжым служитлымылан виктарен. Вашке тудым Кугыжанышын увертарышыж-влаклан школышто тунемаш ӱжыныт. Кызыт тудо специальный пионер семын служитла. Роза ойла: «Иегова мыланем шуко пӧлекым пуэн. Мый пиалан улам». Южо решений-влакым лукташ куштылго огыл, поснак кунам йӧршынак весым ыштымына шуэш. Но ме ӱшанымына дене илена гын, тунам нигунам тидлан она чамане!

КУНАМ ОРГАНИЗАЦИЙ ДЕЧ КӰШТЫМАШ-ВЛАКЫМ НАЛЫНА

13. Организацийын пуымо кӱштымашлан южгунам реакцийна могай лийын кертеш?

¹³ Верысе кугурак иза-влак да районым эскерыше иза-влак, филиал да Вуйлатыше совет мыланна чӱчкыдын кӱштымаш-влакым пуат, кудышт Иеговалан служымаш дене  кылдалтыт. Южгунам ме она умыло, молан иза-влак мыланна иктаж-могай кӱштымашым пуэныт. Ме шонен кертына, пуйто тиде мыланна нелылыкым веле конда. Але ме кӱштымашым пуышо иза-влакын йоҥылышыштым гына ужын кертына.

14. Иегован организацийже деч налме кӱштымашым колышташ мыланна мо полшен кертеш? (Еврей-влаклан 13:17, УТ).

¹⁴ Ме ӱшанена: Иегова организацийжым вуйлата да ситуацийнам сайын пала. Сандене, кунам ме кӱштымашым налына, ме нуным вигак кучылтына да тидым куанен ыштена. (Еврей-влаклан 13:17, УТ лудын лекса.) Ме умылена: колыштмына погынымаште иктылыкым аралаш полша (Еф. 4:2, 3). Конешне, шке ӱмбак виктарымашым налше иза-влак сулыкан улыт. Но ме нуным колыштына гын, Иегова мемнам суапландара (1 Сам. 15:22). А иктаж-мом чынже денак тӧрлаташ кӱлеш гын, Иегова тидым шке жапыштыже ышта (Мих. 7:7).

15, 16. Ик иза кӱштымаш-влак нерген ончыч кокыте шонен гынат, нуным колышташ тудлан мо полшен? (Тыгак сӱретым ончыза.)

¹⁵ Теве Перу гыч ик случай. Тудо ончыкта: ӱшанымаш да организацийын кӱштымашыжым колыштмаш шуко пайдам конда. Тиде элыште испан йылме деч посна еҥ-влак вес йылме денат мутланат, мутлан, кечуа йылме дене. Шуко ий иза-ака-влак кечуа йылме дене мутланыше еҥ-влакым погынымашын уло территорийыштыже кычалыныт. Но вара правительстве у законым луктын, да иза-ака-влаклан кычалмаш методыштым вашталташ логалын (Рим. 13:1). Тиде таныклымаш пашам чара манын, южышт тургыжланеныт. Но кунам нуно кӱштымаш-влакым колыштыныт, нуно ужыныт, кузе Иегова нуным суапландара.

¹⁶ Ке́вин, ик кечуа погынымаш гыч кугурак иза, тыгай иза-влак кокла гыч лийын, кӧ налме кӱштымаш-влак шотышто кокыте шонен. Тудо умылтара: «Мый шоненам: „Кузе  ме ындыжым кечуа йылме дене мутланыше еҥ-влакым муына?“». Мом Кевин ыштен? Тудо ойла: «Мый Притчи 3:5 гыч мут-влакым шарналтенам да Моисей нерген шоненам. Иегова тудлан Египет гыч израильтян-влакым лукташ да Йошкар теҥыз воктек вӱден кондаш кӱштен. Ик жапыште чучын кертын, пуйто калык вапшыш логалын да поктылшо-влак нуным куштылгын пытарат. Туге гынат Моисей Иеговам колыштын, да тидлан Юмо тудым суапландарен да израильтян-влаклан чудым ыштен» (Исх. 14:1, 2, 9—11, 21, 22). Кевин уло кумылын вашталтышым ыштен да у семын таныклаш тӱҥалын. Тиде могай лектышым конден? Тудо ойла: «Ӧрам веле, кузе Иегова мемнам суапландарен. Ончыч ме шуко коштынна, а еҥ-влакым пеш шагал вашлийынна — иктым але кокытым веле. Ындыжым ме тыгай район-влакыште шукырак вийым пыштена, кушто еҥ-влак шукыжым кечуа йылме дене мутланат. Утларак еҥ дене мутланымаш лектын, да шукырак еҥ Библийым шымлаш да вашлиймашыш толаш тӱҥалын». Чынак, ме ӱшаныме дене илена гын, Иегова мемнам суап деч посна огеш кодо.

17. Тиде статья тендам мо́лан туныктен?

¹⁷ Ме лончылен налынна, кузе ӱшаныме дене илен кертына, кунам пашам ойырен налына, шкалан пелашым кычалына да организаций деч кӱштымаш-влакым налына. Но мыланна вес ситуаций-влакыштат Иегован шонымыжым шотыш налман. Мутлан, кунам ме шонена, могай фильмым ончалаш, кузе яра жапым эртараш, могай образованийым налаш але кузе йоча-влакым ончен кушташ. Кеч-могай решенийым лукмо деч ончыч мыланна ужмым гына огыл шотыш налман. Мыланна Иегован шижмашыже, тудын каҥашыже-влак да мемнан верч тыршаш сӧрымыжӧ нерген шарныман. Тунам ме Иегова Юмылан курымеш служитлен кертына! (Мих. 4:5).