1. Еҥ-влак кызыт эн шукыжым мо нерген шонат?

 ОЧЫНИ, те келшеда, таче шуко еҥ шке нерген гына шона. Мутлан, южышт социальный сетьлаште шке нерген да кӱкшытыш шумышт нерген ойлашлан шуко жап ден вийым пытарат. Шагал еҥ гына Иегова Юмым чапландара. Тиде статьяште ме ончен лектына: Иеговалан чапым пуымаш мом ончыкта, тидым ышташ мемнам мо таратышаш да кузе тидым ыштен кертына. Тыгак ме пален налына, кузе лишыл жапыште Юмо шке лӱмжым чапландара.

ИЕГОВАЛАН ЧАПЫМ ПУЫМАШ МОМ ОНЧЫКТА?

2. Синай курык воктене Иегова шке чапшым кузе ончыктен? (Сӱретым ончыза.)

² Мо тыгай чап? Библийыште «чап» манме мут тыгайым ончыктен кертеш, мо иктаж-кӧм ойыртемалтшым ышта. Кунам Иегова Израиль калыкым Египет гыч луктын, тудо шке чапшым ӧрыктарышын ончыктен. Шоналтыза гына: миллион дене еҥ-влак Юмо дене вашлиялташлан Синай курык воктене погыненыт. Курыкым шем пыл авырен. Мланде чытырналтын, да вулкан тул пӱрген. Волгенче волгалтын, кӱдырчӧ кӱдыртен, да йырваш чот кугу пуч йӱк йоҥген (Исх. 19:16—18; 24:17; Пс. 67:9). Шоналташ веле, мыняр чот израильтян-влак лӱдын ӧрыныт, кунам Иегова шке чапшым ончыктен.

3. Иеговалан чапым пуымаш мом ончыкта?

³ А ме, проста еҥ-влак, Иеговалан чапым конден кертына мо? Кертына. Кузе тидым ышташ? Мутлан, весе-влаклан тудын ӧрыктарыше паша ден сылне койышыж-влак нерген каласкалаш лиеш. Тыгак кеч-могай кӱкшытыш Юмын полшымыжлан  кӧра гына шуынна манын келшена гын, тидын дене тудлан чапым кондена (Ис. 26:12). Ме Давид кугыжа деч примерым налын кертына — тудо Иеговалан эре чапым пуэн. Икана тудо шуко еҥ ончылно кумалын да каласен: «Иегова, тый эн кугу улат. Вий, моторлык, сылнылык да чап тыйын улыт, вет каваште да мландыште мо уло, чылажат тыйын». Кумалмышт деч вара чыланат Иеговалан чапым пуэныт (1 Лет. 29:11, 20).

4. Иисус Иеговам кузе чапландарен?

⁴ Мландыште илымыж годым Иисус шке Ачажлан чапым пуэн. Тудо чыла ӧрыктарыше пашам Юмын вийже дене ышта манын каласен (Мар. 5:18—20). Тыгак Иисус весе-влаклан ужаш полшен, могай сай тудын Ачаже. А эше тудо Иеговам шкем кузе кучымыж дене чапландарен. Икана синагогышто туныктымыж годым Иисус ик ӱдырамашым ужын. Тудо демонлан кӧра 18 ий черле лийын. Ӱдырамаш чот пӱгырнен коштын да вийнен кертын огыл. Тудо чот орланен! Иисус тудым чаманен, туддек лишемын да порын каласен: «Ӱдырамаш, тый чер дечет утлет». Вара Иисус ӱмбакыже кидшым пыштен, ӱдырамаш тунамак вийнен шогалын да «Юмым чапландараш тӱҥалын». Тиде ӱдырамаш Иеговам чот тауштен, вет Юмо тудлан тазалыкым пӧртылтен да еҥ-влак тудым шӧрын ончымым чарненыт (Лук. 13:10—13). Юмын чапше нерген каласыде, тудо кодын кертын огыл. Мемнанат Иеговалан чапым пуаш шуко амална уло.

ИЕГОВАМ ЧАПЛАНДАРАШ МЕМНАМ МО ТАРАТА?

5. Молан ме Иеговам пагалена?

⁵ Ме Иеговам келгын пагалена, сандене тудым чапландарена. Юмым пагалаш шуко амална уло. Иегова — Чылакертше, тудын вийже нимучашдыме (Пс. 95:4—7). Чыла ыштымашыже тудын ойыртемалтше уш-акылжым ончыкта. Иегова мыланна илышым да илашлан чыла кӱлешаным пуэн (Почм. 4:11). Тудо ӱшанле (Почм. 15:4). Кеч-могай шонен пыштымашыжым тудо сайын шукта да шке мутшым эре куча (Иис. Н. 23:14). Теве молан Иеремия пророк Иегова нерген каласен: «Чыла калык да чыла кугыжаныш гыч ушан еҥ-влак коклаште тыйын гай иктат уке» (Иер. 10:6, 7). Тиде икмыняр амал гына, молан ме кавасе Ачанам пагалена. Но ме Иеговам пагалена гына огыл, тыгак тудым чот йӧратена.

6. Молан ме Иеговам йӧратена?

⁶ Ме Иеговам йӧратена, сандене тудым чапландарена. Юмын шуко сылне койышыжо уло. Тудо поро да чаманыше (Пс. 102:13; Ис. 49:15). Мемнан орланымашна тудлан чон корштымашым конда (Зах. 2:8). Иегова мыланна тудын йолташыже лияш полша (Пс. 24:14; Ап. паш. 17:27). Тыгак тудо ӱҥышӧ — «кава ден мландыш ончалашлан тудо лап лиеш, вийдыме еҥым пурак гыч нӧлта» (Пс. 112:6, 7). Тыгай Юмым эре чапландарымына шуэш! (Пс. 85:12).

7. Молан весе-влаклан Иегова нерген каласкалымына шуэш?

⁷ Весе-влак Иегова нерген чыным пален налышт манын кумылна уло, сандене тудым чапландарена. Шукышт огыт пале, чынже денак кӧ тыгай Иегова. Молан? Молан манаш гын, Сатана Юмо нерген шоям шаркала да еҥ-влак тудлан ӱшанат (2 Кор. 4:4). Иегова торжа да мемнан верч огешат тырше манын, Сатана калыкым ӱшандарен. Тыгак мемнан орланымашлан Юмо титакан манын, тудо ойла. Но ме кавасе Ачана нерген чыным палена да  тидым весе-влаклан каласкален кертына. Тыге ме Юмылан чапым пуэна (Ис. 43:10). 95-ше Псалом Иеговалан чапым кондаш тарата. Айста тиде псалом гыч икмыняр шомакым лончылен налына да шоналтена, кузе Иеговалан чапым кондаш, кудыжлан тудын гына праваже уло.

КУЗЕ МЕ ИЕГОВАМ ЧАПЛАНДАРЕН КЕРТЫНА?

8. Кузе ме Иеговам шке мутна дене чапландарен кертына? (Псалом 95:1—3).

⁸ Псалом 95:1—3 лудын лекса. Иегова нерген весе-влаклан каласкален, тудым чапландарена. 95-ше Псаломын тӱҥалтыш почеламут-влак мемнам таратат: «Иеговалан мурыза», «лӱмжым чапландарыза», «тудын утарымыже нерген поро уверым... увертарыза», «калык-шамыч коклаште тудын чапше нерген ойлыза». Кавасе Ачанам чапландараш тиде икмыняр йӧн. Ӱшанле израильтян ден икымше курымысо христиан-влак Юмышт нерген да нунылан ыштыме пашаже нерген весе-влаклан каласкалаш вожылын огытыл (Дан. 3:16—18; Ап. паш. 4:29). Кузе ме нунын семынак ыштен кертына?

9, 10. Анджелинан случайже тендам мо́лан туныкта? (Тыгак сӱретым ончыза.)

⁹ Ушымо Американ Штат гыч Анджели́на a акан случайжым ончен лектына. Тудо Иеговам лӱддымын арален налын. Анджелина у пашашке пурен. Пашам пырля ыштыше-влак дене палыме лияшлан тушто вашлиймаш эртаралтын, кушто кажныже шкеж нерген изиш каласкален кертын. Иеговалан служымаш мыняр шуко куаным конда манын ончыкташлан Анджелина фотографий-влак дене презентацийым ямдылен. Но туддеч ончыч вес пӧръеҥ шкеж нерген каласкален. Тудо «Иегован Таныкше-влакын ешыште кушкынам» манын каласен да ӱшанымашна нерген мыскылен ойлаш тӱҥалын. Анджелина шарналтен ойла: «Шӱмем чот кырен. Но мый шоналтышым: „Иегова нерген каласымыже чын огыл. Чылан палышаш улыт, могай чынжымак Иегова. Мый шып лийын ом керт“».

¹⁰ Ойлымо деч ончыч Анджелина шке семын кӱчыкын кумалын. Вара тудо пӧръеҥлан порын каласен: «Ме изиш икгай улына. Мыят Иегован Таныкше-влакын ешыште  кушкынам да шкежат Танык улам». Колыштшо-влак аптыранен шинченыт, но Анджелина тургыжланымашым ончыктен огыл. Тудо шке презентацийым ончыкташ да, весе-влакын шижмашыштым шотыш налын, ӱшанымашыже нерген каласкалаш тӱҥалын (1 Пет. 3:15, УТ). Умбакыже мо лийын? Кунам Анджелина каласкалымым чарнен, пӧръеҥын кумылжо вашталтын, да тудо йоча годсо сай шарнымаш нерген каласкален пуэн, кунам Танык-влак дене кылым кучен. Анджелина ойла: «Еҥ-влак Иегова нерген чыным пален налышт манын, Иегован праваже уло. Тудын лӱмжым аралаш — тиде кугу чап». Меат Иеговам моктен да чапландарен кертына, кеч весе-влак тудым огыт пагале.

11. Историй мучко Иегован служитлышыже-влак Псалом 95:8 гыч принцип почеш кузе ыштат?

¹¹ Псалом 95:8 лудын лекса. Ме Иеговам шке окса надырна дене чапландарена. Ожнысо жап гыч тӱҥалын, Юмын служитлышыже-влак, нунын шергакан мо уло, тидын дене Иеговам чапландарат (Прит. 3:9). Мутлан, израильтян-влак храмым чоҥаш, арулыкышто кучаш да ачалашлан оксам да шергакан арверым конденыт (2 Цар. 12:4, 5; 1 Лет. 29:3—9). Христос ден апостолжо-влаклан полшашлан южо тунемшыже-влак шке оксаштым кучылтыныт (Лук. 8:1—3). Тыгак икымше курымысо христиан-влак нужна иза-ака-влаклан полышым колтеныт (Ап. паш. 11:27—29). Тачат ме, уло кумылын окса надырым ыштен, Иеговам чапландарен кертына.

12. Кузе окса надырна Иеговам чапландара? (Тыгак сӱретым ончыза.)

¹² Окса надырна Иеговам чапландара манын ончыктышо теве ик случай. 2020 ийын Зимбабвыште чот кукшо игечылан кӧра миллион дене еҥ шужен колен кертын. Нунын коклаштышт При́ска лӱман аканат лийын. Кукшо игечым ончыде, Приска кажне вӱргечын да кугарнян служымашке коштын, кӱрал-ӱдымӧ пагыт годымат. Пошкудо-влак тудым воштылын ойленыт: «Пасушто пашам ыштыме олмеш эре таныклен коштат. Вашке ешет шужен кола». Тидлан Приска эре тура вашештен: «Иегова служитлышыже-влакым нигунам огеш кодо». Вашке иза-влак тудлан кочкышым да вес кӱлешан арверым конденыт. Уло тӱня мучко илыше иза-ака-влакын окса надырыштлан кӧра организацийна тыгай полышым  пуэн. Прискан пошкудыжо-влак тидлан чот ӧрыныт да тудлан каласеныт: «Юмет чынжымак тыйым коден огыл. Тыгай Юмо нерген шукырак палымына шуэш». Пошкудо-влак кокла гыч шымытше вашлиймашкына кошташ тӱҥалын.

13. Кузе ме шкем кучымына дене Иеговам чапландарена? (Псалом 95:9).

¹³ Псалом 95:9 лудын лекса. Ме Иеговам шкем кучымына дене чапландарена. Иегован храмыштыже служитлыше священник-влак шке пашаштым шуктымо деч ончыч мушкылтшаш ыльыч (Исх. 40:30—32). Но физический арулык деч теве мо кӱлешанрак: шкем сайын кучымаш да Иеговалан йӧрдымӧ паша деч кораҥаш тыршымаш (Пс. 23:3, 4; 1 Пет. 1:15, 16). Мыланна, «тошто айдемым» кудалтен, «у айдемыш» вӱдылалташ кӱлеш, вес семынже, Юмылан келшыдыме шонымаш, привычке да паша деч утлаш. Иегова семын шонымына, ыштымына, тыгак тудын гаяк койыш-влакым куштымына шуэш (Кол. 3:9, 10). Иегован полшымыж дене эн кугу языкым ыштыше айдемат вашталтын да «у айдемыш» вӱдылалтын кертеш.

14. Джекын случайже тендам мо́лан туныкта? (Тыгак сӱретым ончыза.)

¹⁴ Джек торжа да шучко преступник лийын. Весе-влак тудым Демон маныныт. Чыла ыштыме преступленийжылан тудлан колымаш приговор лукмо лийын. Казаматыште приговор шуктымым вучымыж годым тудо тушко таныклаш коштшо изана дене палыме лийын. Джек тудын дене Библийым шымлаш келшен. Чыла осал пашажым ончыде, Джек «тошто айдемым» кудалтен да, жап эртымеке, тынеш пурен. Тудо тынар чот вашталтын, колымаш приговорым шуктымо кечын южо орол-влакын тудден чеверласыме годым шинчавӱдышт лектын. Казаматыште пашам ыштыше ик еҥ каласен: «Кунам Джекым конденыт, тудо тыште эн уда айдеме лийын. А кызыт тудо эн сай-влак гыч иктыже». Джекын колымыж деч арня эртымеке, иза-влак молгунамсе семынак казаматыште вашлиймашым эртареныт да тушко казаматыште шинчыше ик пӧръеҥ икымше гана толын. Мо тудым толаш таратен? Джекын вашталтмыже тудым чот ӧрыктарен. Иегован служитлышыже лияшлан мом ышташ кӱлеш,  тудо пален налнеже ыле. Тиде случай сайын ончыкта, кузе ме шкенам кучымо дене кавасе Ачанам чапландарен кертына (1 Пет. 2:12).

КУЗЕ ИЕГОВА ВАШКЕ ШКЕ ЛӰМЖЫМ ЧАПЛАНДАРА?

15. Чот вашке Иегова шке лӱмжым кузе чапландара? (Псалом 95:10—13).

¹⁵ Псалом 95:10—13 лудын лекса. 95-ше Псаломын пытартыш почеламутлаште Иеговам Судья да Кугыжа манме. Кузе Иегова ончыкыжым шке лӱмжым чапландара? Тудо справедливый пунчалжым луктеш. Вашке Иегова чыла шоя религийым — Кугу Вавилоным — пытара, вет нуно тудын святой лӱмжым амыртат (Почм. 17:5, 16; 19:1, 2). Тидым ужмеке, очыни, южо еҥ-влак Иеговалан кумалмаште мемнан дек ушнат. Варажым Армагеддонышто Иегова Сатанан тӱняжлан мучашым пышта. Юмым ужмышудымо да мыскылыше-влак курымешлан пытарыме лийыт. А тудым йӧратыше, мутшым колыштшо да тудым кугешнен чапландарыше-влакым Иегова утара (Мар. 8:38; 2 Фес. 1:6—10). Кунам Христосын тӱжем ий вуйлатымыже пыта да еҥ-влак пытартыш тергымашым эртат, Юмын лӱмжӧ тӱрыснек святитлыме лиеш (Почм. 20:7—10). Тунам «вӱд теҥызым темыме семын Иегован чапше нерген шинчымаш мландым тема» (Авв. 2:14).

16. Мом ышташ кумылда уло? (Тыгак сӱретым ончыза.)

¹⁶ Ме чот вучена жапым, кунам чыланат Иеговалан тыгай чапым пуаш тӱҥалыт, кудыжлан тудын чыла праваже уло. А кызыт мут дене да паша дене Юмынам чапландарашлан мыланна кажне йӧным кучылташ кӱлеш. Мыланна тидын нерген шарнашлан Вуйлатыше совет 2025 ийлан почеламутым Псалом 95:8 гыч налын: «Иеговалан тудын лӱмжылан келшен толшо чапым пуыза».