ТЕНДАН иктаж-кунам тыгай лийын мо, кунам те проблеме дене тӱкненда да тыланда полшашлан пеленда нигӧ лийын огыл? Ме чыланат «неле жапыште» илена. Чӱчкыдын тидын верч шӱлыкаҥше лийын кертына, да тыгай шижмаш лийын кертеш, пуйто ме шкетын гына кодынна (2 Тим. 3:1). Но тиде проблеме дене шкетын гына кучедалаш огеш кӱл. Библий мемнам ӱшандара: ойго ден тӱкнымына годым чын йолташ-влак мыланна эҥертыш семын лийыт (Прит. 17:17).

Апостол Павелын йолташыж-влак тудлан миссионер путешествий годым чот полшеныт. Тидым апостол Павел чот аклен (Кол. 4:7—11). Кунам тудо петырымаште Римыште лийын, йолташыж-влак тудлан заданий-влакым шукташ полшеныт, кудыштым тудо шке вийже дене гына шуктен кертын огыл. Мутлан, Епафродит Павеллан Филиппысе иза-ака-влак деч пӧлекым конден (Флп. 4:18). А Тихик апостолын возымо серышыж-влакым икмыняр погынымашыш намиен пуэн. Мӧҥгысӧ арестыштат, казаматыштат лиймыж годым Павел йолташыж-влаклан кӧра служымашыжым умбакыжат шуэн кертын. А ме кузе чын йолташ лийын кертына?

Теве мо дене Элисабе́т, Испаний гыч эрелык пионер семын служышо ака, тӱкнен. Тудын аважын ракым муыныт, кудыжым эмлаш уже огеш лий ыле. Тиде неле жапыште ик ака Элисабетлан чын йолташ лийын. Ака тудлан Библий гыч почеламут-влак дене негызлыме шуко кумылаҥдыше сообщенийым колтен. «Нине сообщений-влак, — ойла Элисабет, — мыланем вийым пуэныт, да мый шкемым шкет кодмыла шижын омыл» (Прит. 18:24).

Иза-ака-влак дене пырля духовный паша-влакым ышташ тӱҥалыда гын, нуно тыланда эше лишылрак йолташ лийыт. Мутлан, тендан машина уло гын, те илалше изам але акам шке дене пырля погынымашыш але служымашыш налын кертыда мо? Тыге те икте-весыдам пеҥгыдемден кертыда (Рим. 1:12). А мӧҥгӧ гыч лектын кертдыме христиан-влаклан ме кузе чын йолташ лийын кертына?

Тазалыклан але вес нелылыклан кӧра южо иза-ака-влак вашлиймашыш миен огыт керт. Мутлан, лимфома дене черле Дэвид изана 6 тылзе утла химиотерапийым эртен. Чыла тиде жапыште Дэвид да Лидия ватыже вашлиймашыш видеоконференций гоч лектыныт.

Погынымаш гыч йолташ-влак нунылан кузе полшеныт? Кажне вашлиймаш деч вара иза-ака-влак, кудышт Вашлиймаш залыште лийыныт, Дэвид ден Лидия дене видеосвязь гоч мутланеныт. А кунам Дэвид ден Лидия комментарийым пуэныт, иза-ака-влак нунылан тау мут дене сообщенийым  колтеныт. Лектышыже могай лийын? Нуно шкеныштым тунарак шкет кодмыла шижын огытыл.

Те тыгай христиан-влак дене, кӧ мӧҥгӧ гыч лектын огеш керт, служитлен кертыда мо? Изишак графикдам вашталтен, те нунын дене пырля служитлен кертыда. Тыгела те нуным ода мондо манын, нунылан ончыктеда (Прит. 3:27). Те нунын дене пырля серышым возен але телефон дене таныклен кертыда. Южышт, кӧ мӧҥгӧ гыч лектын огеш керт, таныклашлан кӱчык вашлиймашыш видеосвязь гоч лектын кертыт. Дэвид ден Лидия иза-влакым тыгай йӧнлан тауштат. Дэвид ойла: «Вашлиймаште кӱчык лончылымаш да кумалмаш веле лийыныт. Но тидат мыланна эре шуко вийым пуэн». Тыгак мӧҥгыштӧ шинчыше иза-ака-влаклан йӧнан гын, шымлышына дене пырля нунын дек мияш да пырля Библий шымлымашым эртараш лиеш.

Тыгай иза-ака-влак дене таныклен, кӧ мӧҥгӧ гыч лектын огеш керт, те эше сайрак нунын сылне койышыштым ужыда да нунын дек эше чотрак лишемыда. Мутлан, кунам те ужыда, кузе нуно иктаж-кӧн шӱмжым тарваташлан Библийым мастарын кучылтыт, те нуным эше чотрак пагалаш тӱҥалыда. Иза-ака-влак дене пырля духовный пашаште тыршымылан кӧра тендан эше шукырак йолташда лиеш (2 Кор. 6:13).

Неле жапыште Павел дене пырля Тит лӱман йолташыже лийын. Тиде Павелым чот лыпландарен (2 Кор. 7:5—7). Мутат уке, иза-ака-влакым мут дене кумылаҥдаш пеш сай. Но Титын примерже мемнам эше теве мо́лан туныкта: тыгак нунын дене жапымат эртараш, практический шотыштат полшаш кӱлеш (1 Иоан. 3:18).

Россий гыч иза ден акана-влак сай примерым ончыктат, кузе икте-весылан полшаш лиеш. Ончалына, мо Сергей дене да тудын Татьяна ватыж дене лийын. Полицейский-влак нунын мӧҥгыштышт обыскым ыштеныт, а варажым нуным йодышташ наҥгаеныт. Эн ончыч полиций гыч Татьяна пӧртылын. Сергей шарналтен ойла: «[Татьянан] мӧҥгеш пӧртылмекыже, тудын дек лӱдде ик акана вигак толын. Йолташна-влак мыланна обыск деч вара арулыкым ышташ полшеныт».

Притчи 17:17 почеламутышто возымо: «Чын йолташ эре йӧрата, тудо иза семын ойго годым эҥертыш лиеш». Сергей ойла: «Тиде почеламут мыланем эре келшен. Но кызыт, поктылмаш жапыште, кунам тиде нелылыкым шке вий дене сеҥен ом керт, мый тиде почеламутым эше чотрак аклаш тӱҥалынам. Лач тыгай лишыл кылым Иегова погынымаште ужнеже: неле жапыште воктене йолташ-влак лийшаш улыт» a.

Кунам ме нелылык ден тӱкнена, мыланна ӱшанле йолташ-влак чот кӱлыт. А кугу орлык годым нуно мыланна эше чотрак кӱлеш лийыт. Айста уже кызытак чын йолташ лияшлан уло вийым пыштена! (1 Пет. 4:7, 8).