19 ШЫМЛЫШАШ СТАТЬЯ
6 МУРО Пылпомыш Юмын чапшым увертара
Ӱшанле суксо-влак деч примерым налза
«Шуко виян чыла Суксыжо... Юмым моктыза» (ПС. 102:20).
МЕ ШЫМЛЕН ЛЕКТЫНА
Мо́лан ме ӱшанле суксо-влак деч тунемын кертына.
1, 2. a) Ме суксо-влак деч мо дене ойыртемалтына? б) Ме суксо-влак дене мо шотышто икгай улына?
ИЕГОВА мемнам кугу йӧратыше ешышкыже ушнаш ӱжын. Тиде ешыште уло тӱня мучко илыше тӱрлӧ иза-ака-влак, тыгак миллион дене ӱшанле суксо-влак улыт (Дан. 7:9, 10). Суксо-влак нерген шарналтен, ме, очыни, вигак шонена, мыняр чот нуно мемнан деч ойыртемалтыт. Мутлан, суксо-влак еҥ-влакым ыштыме деч шуко жап ончыч ыштыме лийыныт (Иов 38:4, 7). Нуно мемнан дене таҥастарымаште шуко пачаш куатле улыт. Мыланна шоналташат йӧсӧ, мыняр чот нуно святой да чын ыштыше улыт (Лук. 9:26).
2 Суксо-влак деч чот ойыртемалтына гынат, ме нунын дене южо шотышто икгай улына. Мутлан, мемнанат, суксо-влакынат ойырен налаш эрык уло да меат, нунат Иегован гаяк сылне койыш-влакым ончыктен кертына. Кажне суксын шке лӱмжӧ, койыш-шоктышыжо да Иегова деч пуымо заданийже уло. Чыла тиде мемнанат уло. А эше мемнанат, суксо-влакынат чылажымат Ыштышылан кумалаш кӱлешлык уло (1 Пет. 1:12).
3. Ме ӱшанле суксо-влак деч мо́лан тунемын кертына?
3 Тыгела, ме суксо-влак дене шуко шотышто икгай улына. Тугеже, ме нунын деч тунемын кертына. Айста ончен лектына, кузе ӱшанле суксо-влак ӱҥышылыкым да еҥ-влакым йӧратымым ончыктат, ӱшанымаште пеҥгыдын шогат да погынымашын арулыкшо верч тыршат. Тыгак лончылен налына, кузе ме нунын деч примерым налын кертына.
СУКСО-ВЛАК ӰҤЫШӦ УЛЫТ
4. a) Суксо-влакын ӱҥышылыкышт кушеч коеш? б) Молан суксо-влак ӱҥышӧ улыт? (Псалом 88:8).
4 Суксо-влак ӱҥышӧ улыт. Кеч нунын кугу илыш опытышт уло да кеч нуно виян да уш-акылан улыт, нуно садак Иеговам колыштыт (Пс. 102:20). Суксо-влак нигунамат огыт моктане, мыняр чот сайын нуно заданийыштым шуктат да ӧрыктарыше моштымашышт дене огыт кугешне. Нуно Иегован эрыкшым куанен шуктат, кеч нунын лӱмышт палдарыде кодеш (Тӱҥ. 32:24, 29; 2 Цар. 19:35) a. Суксо-влак шкаланышт чапым огыт кычал, кудыжым Иегова веле налаш йӧрышӧ. Молан нуно тыгай ӱҥышӧ улыт? Молан манаш гын, нуно Юмым йӧратат да тудым келгын пагалат. (Псалом 88:8 лудын лекса.)
5. Кузе ик суксо ӱҥышылыкым ончыктен, кунам апостол Иоанн шкенжым йоҥылыш кучен? (Тыгак сӱретым ончыза.)
5 Ик случайым ончен лектына, кудыжо суксо-влакын ӱҥышӧ улмыштым сайын ончыкта. Мемнан эран иктаж 96 ийыште суксо, кудыжын лӱмжым ме она пале, апостол Иоаннлан ӧрыктарыше кончымашым пуэн (Почм. 1:1). Иоаннын реакцийже могай лийын? Тудо кумык возын да суксылан вуйым савынеже ыле. Но тудыжо вигак каласен: «Ончо, тыге ит ыште! Мый тый денет да... иза-шольыч-влак дене пырля служитлыше улам. Юмылан вуетым саве» (Почм. 19:10). Тиде суксо чот ӱҥышӧ лийын. Тудо шкаланже чапым кычалын огыл. Тудо вигак Иоанным уло чапым Иеговалан пуаш таратен. Тыгак тудо шонен огыл, пуйто Иоанн деч сайрак улеш. Конешне, тиде суксо Иеговалан Иоанн деч шукырак жап служитлен да шуко пачаш виян лийын. Но тудо ӱҥышын каласен: «Мый тый денет... пырля служитлыше улам». Иоанн шкенжым йоҥылыш кучен гынат, суксо тудым вурсен огыл. Мӧҥгешла, тудо илалше апостол дене ныжылгын да порын мутланен. Очыни, тудо умылен: Иоанн чот ӧрмылан кӧра кумык возын.
Суксо Иоанн дене шкенжым ӱҥышын кучен. (5 абзацым ончыза.)
6. Кузе ме суксо-влак семын ӱҥышылыкым ончыктен кертына?
6 Кузе ме суксо-влак семын ӱҥышылыкым ончыктен кертына? Суксо-влак семынак меат, Иеговалан служитлымаште тӱрлӧ заданийым шуктен, мом ыштымына дене она моктане да шкенам кӱшкӧ она шынде, пуйто мемнан ала-могай ойыртемалтше моштымашна уло (1 Кор. 4:7). Тыгак ме весе-влак дене таҥастарымаште Иеговалан шукырак жап служитлена гын, але иктаж-могай ойыртемалтше заданийым шуктена гын, мыланна шонаш огеш кӱл, пуйто ме весе-влак деч сайрак улына. Мӧҥгешла, Иеговалан служитлымаште мыняр шукырак заданийым шуктена, тынар шукырак ӱҥышӧ лийман (Лук. 9:48). Суксо-влак семын мемнан весе-влаклан служитлымына шуэш, да нуно мемнан воктен шкем йӧрдымылан ынышт шотло манын, чылажымат ыштена.
7. Иктаж-кӧм тӧрлатыме годым але иктаж-кӧлан каҥашым пуымо годым кузе ӱҥышылыкым ончыктен кертына?
7 Кунам эше ӱҥышӧ лийман? Иза-ака-влак гыч иктаж-кӧм але йочанам тӧрлаташ але тудлан каҥашым пуаш логалеш гын, мыланна ӱҥышӧ лийман. Южгунам туран ойлаш кӱлеш, но тидым торжан ыштыман огыл. Айдемым сырыктымына але тудын кумылжым волтымына ок шу. Ме шкенам весе-влак деч кӱшкӧ она шынде гын, тунам Библий гыч каҥашым пуаш кӱлмӧ годым тидым пагалымаш дене да йӧратымаш дене ыштена (Кол. 4:6).
СУКСО-ВЛАК ЕҤ-ВЛАКЫМ ЙӦРАТАТ
8. a) Суксо-влак еҥ-влакым йӧратат манын, кушеч коеш? (Лукан 15:10). б) Кузе суксо-влак мыланна таныклаш полшат? (Тыгак сӱретым ончыза.)
8 Суксо-влаклан еҥ-влакын илышышт садиктак огыл. Нуно еҥ-влакым йӧратат. Нуно куанат, кунам сулыкым ыштыше айдеме ӧкына да Иегова дек пӧртылеш. Тыгак нуно куанат, кунам иктаж-кӧ Иегова нерген пален налеш, илышыжым вашталта да тудлан служитлаш тӱҥалеш. (Лукан 15:10 лудын лекса.) А эше суксо-влак мыланна Юмын Кугыжаныш нерген уверым каласкалымаш пашаште полшат (Почм. 14:6). Нуно еҥ-влаклан шкешт огыт таныкле гынат, нуно мемнан гыч иктаж-кӧжым Иеговам пален налаш тыршыше еҥ дек конден кертыт. Конешне, каласаш огеш лий, пуйто кажне случайыште суксо-влак мемнам айдеме дек вӱден конденыт. Вет Иегова вес семын ыштен кертеш. Мутлан, шукыж годым тудо еҥ-влаклан полшашлан да нунын дек шке служитлышыже-влакым мияш кумылаҥдашлан святой шӱлышыжым кучылтеш (Ап. паш. 16:6, 7). Туге гынат ме пеҥгыдын ӱшанен кертына: таныклыме годым суксо-влак мемнан дене пырля лийыт, вет Юмо нунылан мыланна полшаш кӱштен. (« Нуно шке кумалтыш мутыштлан вашмутым налыныт» рамкым ончыза b.)
Еш мужыр стенд дене служымаш деч вара мӧҥгыш пӧртылеш. Ака шӱлыкан койшо ӱдырым ужеш. Тудо умыла: суксо-влак мемнам тыгай еҥ-влак дек виктарен кертыт, кудыштлан духовный полыш кӱлеш. Акан ӱдырлан иктаж-мом порым каласаш кумылжо лектеш. (8 абзацым ончыза.)
9. Кузе ме суксо-влак семын еҥ-влакым йӧратена манын ончыктен кертына?
9 Меат суксо-влак гай еҥ-влакым йӧратена манын, кузе ончыктен кертына? Погынымаш гыч кораҥдыме айдеме Иеговалан угыч служитлаш тӱҥалын манын, увертарымым колмеке, ме суксо-влак семынак куанен кертына. Тыгай изалан але акалан ончыктымына шуэш, мыняр чот ме нуным йӧратена да Иегова дек пӧртылмыштлан чот куанена (Лук. 15:4—7; 2 Кор. 2:6—8). Тыгак, суксо-влак деч примерым налын, ме уло кумылын таныклен кертына (Эккл. 11:6). Кузе суксо-влак мыланна поро уверым таныклаш полшат, меат иза-ака-влаклан служитлыме годым полшен кертына. Мутлан, те тыгай иза дене але ака дене таныклаш каен кертыда мо, кӧн опытшо шагалрак? Тыгак начар тазалыкан але илалше иза-ака-влак дене пырля служитлен кертыда мо?
10. Ме Сара деч мо́лан тунемына?
10 Илышыште лекше иктаж-могай амаллан кӧра Иеговалан служитлымаште ончычсо семын тынар шуко ыштен она керт гын, кузе лийман? Тунам служитлымаште суксо-влак дене пырля тыршашлан у йӧн-влакым муын кертына. Айста Индий гыч Сара c ака дене палыме лийына. Тудо 20 ий наре пионер семын служитлен, но варажым чот черланен. Сара коштынат, койко гыч кынелынат кертын огыл. Тидын верч тудо чот ойгырен. Но иза-ака-влакын полшымыштлан кӧра да Библийым эре лудмылан кӧра Сара эркын-эркын угыч куанаш тӱҥалын. Конешне, тудлан у семын служитлаш тунемаш логалын. Сара серыш-влакым возашлан шинченат кертын огыл, сандене тудо телефон дене гына таныклен. Кунам тудо еҥ-влаклан угыч йыҥгыртен, нуно тудлан тыгай палымышт-влакын номерыштым пуэныт, кудыштынат Библий нерген мутланаш кумылышт лектын кертын. Тыгела, икмыняр тылзе коклаште тудын 70 Библийым шымлымаш тӱҥалын! Чыла нине шымлымашым эртараш тудын жапше ситен огыл, сандене нунын гыч южыштым тудо погынымаш гыч вес уверзе-влакым эртараш йодын. Шымлыше-влак гыч шукышт кызыт вашлиймашыш коштыт. Сара семынак вес ӱшанле христиан-влакат улыт, кудышт кертме семын таныклат. Шоналтыза гына, могай куаным суксо-влаклан Сара денат, тыгай христиан-влак денат пырля служитлымаш конда!
СУКСО-ВЛАК ӰШАНЫМАШТЕ ПЕҤГЫДЫН ШОГАТ
11. Суксо-влак ӱшанымаште пеҥгыдын шогат манын, молан каласаш лиеш?
11 Суксо-влак ӱшанымаште пенгыдын шогат да тиде шотышто мыланна примерым ончыктат. Нуно уже шуко тӱжем ий несправедливость ден осалым ужыт. Нуно ужыныт, кузе Сатана да шуко вес суксо, кудышт нунын дене пырля Юмылан служитленыт, Юмын тушманышкыже савырненыт (Тӱҥ. 3:1; 6:1, 2; Иуд. 6). Библийыште возымо дене келшышын, ик ӱшанле суксо шуко кече виян демон дене кучедалын (Дан. 10:13). Тыгак суксо-влак теве мом ужыныт: Адам ден Еван жапышт гыч тӱҥалын, еҥ-влак гыч шукышт Иегован могырышкыжо шогалын огытыл. Чыла тидым ончыде, нине ӱшанле суксо-влак умбакыжат Юмылан куанен да тыршен служитлат. Нуно палат: шке жапыштыже Иегова уло несправедливостьым пытара.
12. Ӱшанымаште пеҥгыдын шогаш мыланна мо полша?
12 Кузе меат суксо-влак семын ӱшанымаште пеҥгыдын шоген кертына? Суксо-влак гаяк ме шуко несправедливостьым ужына. Но меат пеҥгыдын ӱшанена: шке жапыштыже Юмо уло осалым пытара. Сандене, ӱшанле суксо-влак деч примерым налын, ме киднам она волто да порым ыштена (Гал. 6:9). А Юмо мыланна чылажымат чытен лекташ полшаш сӧра (1 Кор. 10:13). Чытыше да куаныше лияшлан мыланна Иеговалан кумалаш да тудын деч святой шӱлышыжым йодаш кӱлеш (Гал. 5:22; Кол. 1:11). Но те кызыт поктылмаш дене тӱкнеда гын, кузе лийман? Ида тургыжлане, Иеговалан ӱшаныза. Тудо тыланда чынжымак полша да тендам пеҥгыдемда (Евр. 13:6).
СУКСО-ВЛАК ПОГЫНЫМАШЫН АРУЛЫКШО ВЕРЧ ТЫРШАТ
13. Тиде пытартыш кечылаште суксо-влак могай ойыртемалтше заданийым шуктат? (Матфейын 13:47—49).
13 Тиде пытартыш кечылаште Иегова суксо-влаклан ойыртемалтше заданийым пуэн. (Матфейын 13:47—49 лудын лекса.) Уло тӱня мучко миллион дене еҥ-влак Юмын Кугыжаныш нерген уверым колыт. Иктышт Иегован нормыжо-влак почеш илаш тӱҥалыт да христиан лийыт, а весышт — уке. Суксо-влаклан осал-влакым чын ыштыше-влак деч ойыраш кӱштымӧ. Вес семынже, погынымаште арулык лийже манын, нуно эскерышаш улыт. Конешне, тиде огеш ончыкто, пуйто иктаж-могай амаллан кӧра погынымаш гыч кайыше айдеме нигунамат пӧртылын огеш керт. Тыгак погынымаште нигунамат проблеме-влак огыт лий манын, тиде огеш ончыкто. Но ме пеҥгыдын ӱшанен кертына: погынымаш ару кодшо манын, суксо-влак уло вийым пыштен тыршат.
14, 15. Кузе ме, суксо-влак деч примерым налын, погынымашын духовный да нравственный арулыкшо верч тыршен кертына? (Тыгак сӱрет-влакым ончыза.)
14 Кузе ме, суксо-влак деч примерым налын, погынымашын арулыкшо верч тыршен кертына? Погынымаш нравственный да духовный шотышто ару кодшо манын, ме шкенан могырна гыч чылажымат ыштышаш улына. Сандене ме Иегова дене лишыл кыл кучымашнам аралаш тыршена. Ме тудым йӧратыше еҥ-влак дене веле кылым кучена, да чылаж дечат, мо тудын дене кыл кучымашнам лушкыдемден кертеш, кораҥына (Пс. 100:3). Тыгак ме иза-ака-влаклан Иеговалан ӱшанле кодаш полшен кертына. Мутлан, иза але ака кугу сулыкым ыштен манын пален налына гын, мом ыштена? Ме тиде айдемым йӧратена, сандене тудым кугурак иза-влак дене мутланен налаш таратена. А иза але ака тидым огеш ыште гын, ме шке тудын сулыкшо нерген кугурак иза-влаклан каласкален пуэна. Духовный шотышто лушкыдемше иза але ака вашкерак полышым налже манын, кумылна уло (Иак. 5:14, 15).
15 Чаманаш логалеш, южгунам кугу сулыкым ыштыше-влакым погынымаш гыч кораҥдаш логалеш. Тунам ме нунын дене кыл кучымым чарнена (1 Кор. 5:9—13) d. Тиде погынымашын арулыкшым аралаш полша. Но эше вес пайда уло. Кунам ме погынымаш гыч кораҥдыме айдеме дене кылым она кучо, ме чынжымак тудлан порым ыштена. Молан тыге каласаш лиеш? Молан манаш гын, тунам тудо вашкерак умылен налеш: тудлан Иегова дек пӧртылман. Тудо пӧртылеш гын, ме Юмо дене да тудын суксыжо-влак дене пырля куанаш тӱҥалына (Лук. 15:7).
Ме изан але акан сулыкым ыштымыже нерген пален налынна гын, тунам мом ыштыман? (14 абзацым ончыза.) e
16. Те суксо-влак деч мо шотышто примерым налнеда?
16 Иегова мыланна суксо-влак нерген каласкала да мыланна нунын дене пырля тыршаш йӧным пуа. Тидлан Юмылан кугу тау! Айста суксо-влак семынак ӱҥышӧ лийына, еҥ-влакым йӧратена, ӱшанымаште пеҥгыде лийына да погынымашын нравственный да духовный арулыкшо верч тыршена. Ӱшанле суксо-влак деч примерым налына гын, тунам курым-курымеш Иегован служитлышыже-влак коклаште лийын кертына.
123 МУРО Юмын ыштыме радамым пагалена
a Шуко миллион суксо кокла гыч Библий кок суксым гына лӱм дене палемда — Михаилым да Гавриилым (Дан. 12:1; Лук. 1:19).
b Вес случай-влакым лудын лекташлан «Индекс публикаций Сторожевой башни» кучылтса. «Ангелы» вуймутым, «руководство ангелов (примеры)» изи вуймутым почса.
c Лӱмым вашталтыме.
d 2024 ийысе Вуйлатыше советын 2-шо обращенийыштыже умылтарыме лийын: кунам погынымаш гыч кораҥдыме айдеме вашлиймашыш толеш, кажне уверзе, Библий почеш туныктымо совестьшым шотыш налын, шке шонен кертеш, тыгай айдеме дене саламлалташ але уке.
e СӰРЕТЫШТЕ. Ака сулыкым ыштыше йолташ ӱдыржым кугурак иза-влак дене мутланен налаш тарата. Йолташ ӱдыржӧ каҥашыже почеш огеш ыште, сандене икмыняр жап гыч ака шке кугурак иза-влаклан тудын сулыкшо нерген ойла.
