1, 2. a) Шымлышылан Иегован Таныкше лияш мо мешаен кертеш? б) Тиде статьяште ме мом лончылен лектына?

 ШАРНАЛТЫЗА ту жапым, кунам тендан дене Библийым шымленыт. Те Иегован Таныкше лияш решенийым вигак луктында мо? Але тендам тиде шотышто ала-мо кучен? Очыни, родо, йолташ але пашам пырля ыштыше-влак тендан дене кыл кучымым чарнат манын лӱдында. А можыч, те шоненда, пуйто библийысе принцип-влак почеш илаш пеш йӧсӧ да те нунын почеш нигунамат илен ода керт. Чыла тиде тыланда Библийым шымлыше-влакын шижмашыштым умылаш полша, кудышт Иегован Таныкше лияш лӱдыт.

² Иисус пален: тыгай лӱдмаш-влак духовный шотышто кушкаш мешаен кертыт (Матф. 13:20—22). Но еҥ-влак иктаж-могай амаллан кӧра тудын почеш каен огытыл гынат, тудо нунылан умбакыжат полшен шоген. Иисус нунылан полшен: 1) пален налаш, мо нунылан духовный шотышто кушкаш мешаен, 2) Иеговам чотрак йӧраташ, 3) Иеговалан служымашым илышыште икымше верыш шындаш да 4) поктылмашым чыташ. Иисус моткоч сай туныктышо лийын, да ме тудын деч примерым налнена. Айста ончен лектына, кузе, «Курымеш куанен илыза!» книгам кучылтын, ме шымлышыналан Иегован могырышкыжо шогалаш полшен кертына.

ШЫМЛЫШЫЛАН УМЫЛАШ ПОЛШЫЗА, МО ТУДЛАН ДУХОВНЫЙ ШОТЫШТО КУШКАШ МЕШАЯ

3. Никодимлан Иисусын тунемшыже лияш мо мешаен кертын?

³ Никодим иудей вуйлатыше-влак гыч иктыже лийын. Иисус эше пел ий веле служитлен, а Никодим, тиде айдемым Юмо колтен манын, уже тунамак умылен (Иоан. 3:1, 2). Туге гынат тудо иудей-влак деч лӱдмыжлан кӧра Иисус дене шолып вашлийын (Иоан. 7:13; 12:42). Мо Никодимлан Христосын тунемшыже лияш мешаен?  Очыни, тудо тидын верч шуко йомдара манын лӱдын, мутлан, власть ден оксам a.

4. Кузе Иисус Никодимлан умылаш полшен, мом Юмо тудын деч вуча?

⁴ Никодим Моисейын законым пеш сайын пален, но мом Иегова лач тудын деч вуча умылен огыл. Кузе Иисус тудлан полшен? Тудо Никодимлан жапшым ойыраш да тудын дене эсогыл йӱдымат вашлиялташ ямде лийын. Иисус Никодимлан раш умылтарен, мом тудлан тунемшыже лияшлан ышташ кӱлын: сулыкым ыштымаште ӧкынаш, вӱдыштӧ тынеш пураш да Юмын Эргыжлан ӱшанымашым паша дене ончыкташ (Иоан. 3:5, 14—21).

5. Кузе шымлышылан умылаш полшаш, мо тудлан духовный шотышто кушкаш мешая?

⁵ Шымлыше дене тыгай лийын кертеш: очыни, тудо Библийым сайын пала, но мо тудлан духовный шотышто кушкаш мешая, тудо огеш умыло. Очыни, тудо пеш шуко пашам ышта. Але родыжо-влак тудын Танык лияш шонымылан тореш улыт да тудлан шуко чаракым шындат. Шымлыше дене пырля жапым эртараш ямде лийза. Тудым чайым пырля йӱаш але прогулкыш лекташ ӱжаш лиеш. Тыгай обстановкышто тудлан чонжым почаш куштылгырак лиеш да тудо шке нелылыкше нерген ойлен кертеш. Шымлышылан умылаш полшыза, мом тудлан вашталташ кӱлеш, да шарныктыза: тиде вашталтышым тудо тендан верч огыл, а Иеговам куандарашлан ышта.

6. Кузе шымлышылан Библий гыч пален налмым илышыш пурташ полшаш? (1 Коринфян-влаклан 16:13).

⁶ Иегова библийысе принцип-влак почеш илаш полша манын, шымлыше еҥ ӱшана гын, тунам тудын пален налмым илышыш пурташ вийже лиеш. (1 Коринфян-влаклан 16:13 лудын лекса.) Тендан рольдам школысо туныктышын рольжо дене таҥастараш лиеш. Могай школысо туныктышо тыланда чотрак келшен? Очыни, тыгай туныктышо, кудыжо тыланда кузе иктаж-мом ышташ умылтара гына огыл, тыгак те тидым ыштен кертыда манын ӱшандара. Меат Юмын Мутшым шымлаш полшышо сай туныктышо лийнена. Ме еҥ-влакым библийысе чын дене палымым ыштена гына огыл, нуно Иегован полшымыж дене тудын нормыжо почеш илен кертыт манын ӱшандарена. Тыгай туныктышо кузе лияш?

ШЫМЛЫШЫЛАН ИЕГОВАМ ЧОТРАК ЙӦРАТАШ ПОЛШЫЗА

7. Кузе Иисус тудым колыштшо-влаклан Иеговам эше чотрак йӧраташ полшен?

⁷ Иисус пален: тудын тунемшыж-влак Юмым йӧраташ тӱҥалыт гын, нунын Библий гыч пален налмым илышыш пурташ кугу кумылышт лиеш. Чӱчкыдын тудо тыгай пример-влакым каласкален, кудышт тунемшыж-влаклан кавасе Ачам эше чотрак йӧраташ полшеныт. Мутлан, тудо Иеговам тыгай айдеме дене таҥастарен, кудыжо шке йочаж-влаклан сай пӧлекым ышта (Матф. 7:9—11). Очыни, Иисусым колыштшо-влак гыч южыштын нигунамат тыгай йӧратыше ачашт лийын огыл. Сандене шоналтыза, мом нуно шижыныт, кунам Иисус нунылан чаманыше ача нерген туштен ойлен, кудыжо шуко уда пашам ыштыше эргыжым уло кумылын мӧҥгеш пуртен. Иисус еҥ-влаклан умылаш полшен: Иегова еҥ-влакым чот йӧрата да нунылан полшынеже (Лук. 15:20—24).

8. Кузе шымлышылан Иеговам эше чотрак йӧраташ полшаш?

⁸ А кузе те шымлышылан Иеговам эше чотрак йӧраташ полшен кертыда? Кажне йӧным кучылтын, тудлан Юмын сылне койышыж-влак нерген ойлыза. Кажне гана шымлымыда годым тудлан ужаш полшыза, кузе шымлыме материал Иегован йӧратымашыжым палдара. Мутлан, те шымлышылан тӱлен налмаш нерген ойледа. Иегова чыла еҥ верч гына огыл, тыгак тудын верчат шке Эргыжым пуэн манын, тудо умылышаш (Рим. 5:8; 1 Иоан. 4:10). Кунам шымлыше умылен налеш, мыняр чот Иегова тудым йӧрата,  тудо Иеговам вашеш йӧраташ тӱҥалеш докан (Гал. 2:20).

9. Илышым вашталташ да Иегован служитлышыже лияш Майклым мо таратен?

⁹ Ончен лектына Индонезий гыч Майклын историйжым. Тудо чыным изинек пален, но тынеш пурен огыл. 18 ияш годым Майкл грузовикын водительжылан пашам ышташ вес элыш каен. Варажым тудо пӧртылын, ӱдырым налын да угыч вес элыш оксам ышташ каен. Ту жапыште ватыж ден ӱдыржӧ Библийым шымлаш тӱҥалыныт. Кунам Майклын аваже колен, тудо ачажым ончашлан пӧртылын да Библийым шымлаш келшен. «Курымеш куанен илыза!» книган 27-ше урокым шымлыме годым «Келгынрак шымлен налза» кыдеж гыч шонымаш-влак тудын чонжым чот тарватеныт. Майкл шоналтен, могай корштымашым Иегова шке Эргыжын орланымашыжым ужмылан кӧра шижын. Тидын верч Майкл шортын колтен. Кунам тудо умылен налын, мыняр чот Иегова да Иисус тудым йӧратат, тудын шӱмжӧ тауштымаш дене темын. Тудо шке илышыжым вашталтен да тынеш пурен.

ШЫМЛЫШЫЛАН ИЕГОВАЛАН СЛУЖИТЛЫМЫМ ИКЫМШЕ ВЕРЫШ ШЫНДАШ ПОЛШЫЗА

10. Кузе Иисус тунемшыж-влаклан Иеговалан служитлымым икымше верыш шындаш полшен? (Лукан 5:5—11). (Тыгак сӱретым ончыза.)

¹⁰ Икымше курымышто Иисусын южо тунемшыже-влак тудын Мессий улмыжым вигак умылен налыныт. А теве поро уверым каласкалаш кӱлеш манын, нуно вигак умылен огытыл. Мутлан, кунам Иисус Петр ден Андрейлан тудын почеш каяш темлен, нуно уже икмыняр жап тудын тунемшыже лийыныт (Матф. 4:18, 19). Нуно Иаков да Иоанн дене пырля кол кучышо лийыныт, да тиде паша нунылан сай оксам конден (Мар. 1:16—20). Кунам Петр ден Андрей вапшыштым коден каеныт, нуно ешыштым ончашлан оксам ышташ, очыни, вес йӧным муыныт. Нине пӧръеҥ-влакым тыгай вашталтышым ышташ да оксам ыштымым огыл, а Иеговалан служитлымым икымше верыш шындаш мо таратен? Лукан Евангелийыштыже возымо почеш Иисус нунылан чудым ыштымыж дене Юмылан ӱшанымашыштым пеҥгыдемден. Нуно умылен налыныт:  Иегова нунын илышыштышт эн тӱҥ лиеш гын, тунам тудо нунын верч эре тыршаш тӱҥалеш. (Лукан 5:5—11 лудын лекса.)

11. Шымлышын ӱшанымашыжым пеҥгыдемдашлан мо нерген ме каласкален кертына?

¹¹ Ме Иисус семын чудо-влакым ыштен она керт. Но ме шымлыше-влаклан каласкален кертына, кузе Иегова тыгай-влак верч тырша, кӧ тудым илышыштыже икымше верыш шында. Мутлан, шарналтыза, кузе Иегова тыланда полшен, кунам те вашлиймашыш кошташ гына тӱҥалында. Очыни, тыланда начальникда дене мутланаш логалын, да, те погынымаш кечын шуко пашам ыштен ода керт манын, тудлан умылтаренда. Шымлышылан каласкален пуыза, кузе Иегова тендам суапландарен, кунам те тудлан служитлымым илышыштыда икымше верыш шынденда да кузе тидлан кӧра тендан ӱшанымашда пеҥгыдемын.

12. a) Молан шымлымашыш тӱрлӧ иза-акам ӱжаш кӱлеш? б) Кузе шымлышылан видеоролик-влак гыч шукырак пайдам налаш полшаш? Примерым кондыза.

¹² Тыгак шымлышылан вес христиан-влакын историйыштым пален налаш пайдале лиеш. Сандене тудын дене шымлымашыш тӱрлӧ иза-акам ӱжса. Нуно каласкален пуат, кузе Библийым шымлаш тӱҥалыныт да мо нунылан илышыштышт Иеговалан служитлымым икымше верыш шындаш полшен. Тыгак, «Курымеш куанен илыза!» книга почеш шымлымашым эртарен, шымлыше дене пырля «Келгынрак шымлен налза» кыдеж гыч да, кӱлеш гын, «Ешартышлан» рамке гыч видеоролик-влакым ончалза. Мутлан, 37-ше урокым шымлен, «Иегова чыла кӱлешым пуа» видеороликым ончалза. Шымлышылан умылаш полшыза: тудо Иеговам икымше верыш шында гын, Юмо тудын верч тыршаш тӱҥалеш.

ШЫМЛЫШЫЛАН ПОКТЫЛМАШЫМ СЕҤАШ ПОЛШЫЗА

13. Кузе Иисус тунемшыж-влакым поктылмашлан ямдылен?

¹³ Тунемше-влак поктылмаш дене тӱкнат, эсогыл родышт-влакат нунын ваштареш шогалыт манын, Иисус нунылан икмыняр гана ойлен (Матф. 5:11; 10:22, 36). Колымыж деч икмыняр жап ончыч Иисус тунемшыж-влаклан нунын гыч южыштым пуштыт манын шижтарен (Матф. 24:9; Иоан. 15:20; 16:2). Иисус нуным служымаште тӱткӧ лияш таратен. Мутлан, тудо тунемшыж-влаклан ӱшанымашышт нерген нигӧ дене ӱчашаш огыл каҥашым пуэн. Тыгак тудо нунылан мом ойлымо да мом ыштыме шотышто тӱткӧ лияш каласен. Чыла тидлан кӧра нуно умбакыжат таныклен кертыт ыле.

14. Кузе шымлышылан поктылмашлан ямдылалташ полшаш? (2 Тимофейлан 3:12).

¹⁴ Кузе шымлышылан поктылмашлан ямдылалташ полшаш? Каласыза тудлан, могай реакцийышт пашам ыштыше-влакын, йолташыже-влакын але родыжо-влакын лийын кертеш, кунам нуно тудын Библийым шымлымыже нерген пален налыт. (2 Тимофейлан 3:12 лудын лекса.) Пашаште иктажше тудын библийысе принцип-влак почеш илаш тыршыме верч воштылын кертеш. А весе-влак, лишыл родо-влакат, тудын мо́лан ӱшанымыжым критиковатлен кертыт. Шымлыше дене поктылмаш темым вашкерак лончылен налына гын, тунам тудо тыгайлан сайрак ямдылыме лиеш. Тудо палаш тӱҥалеш: поктылмаш тӱҥалме годым кузе шкем кучаш да мом вашешташ.

15. Шымлышылан родыжо-влакын шыгыремдымыштым сеҥаш мо полша?

¹⁵ Шымлышыда ешыштыже шыгыремдымаш дене тӱкна гын, тудлан шонкалаш полшыза, молан родыжо-влак гыч южыштлан тудын Иегован Таныкше-влак дене Библийым шымлымыже ок келше. Очыни, тудым ондалат манын, нуно лӱдыт. Але нуно шотлат, пуйто Иегован Таныкше-влак уда еҥ улыт. Иисусын родыжо-влакланат тудын ыштымыже келшен огыл (Мар. 3:21; Иоан. 7:5). Сандене шымлышым чылашт денат, ты шотышто лишыл родо-влак денат, чытыше да тыматле лияш туныктыза.

16. Шымлышылан шке ӱшанымашыже нерген тыматлын каласкалаш мо полшен кертеш?

¹⁶ Шымлышын родыжо-влак тудлан Библий  нерген шуко йодышым пуэн кертыт. Но шымлышылан чылажымат, мом тудо пала, нунылан вигак каласкалаш огеш кӱл. Вет тудо нунылан угыч шуко ойлаш тӱҥалеш манын, нуно лӱдын кертыт, да вес гана йодыш-влакым пуэдаш уже кумылышт огеш лий. Сандене шымлышыдам кӱчыкын мутланаш туныктыза. Тунам родыжо-влакын эше вес ганат мутланаш кумылышт лектын кертеш (Кол. 4:6). Мутлан, тудо родыжо-влаклан jw.org сайтым ончыктен кертеш. Тунам нуно Иегован Таныкше-влак нерген кунам, мынярым да мом лудаш шке решенийым луктын кертыт.

17. Кузе шымлышылан Иегован Таныкше-влак нерген йодыш-влаклан вашмутым пуаш полшаш? (Тыгак сӱретым ончыза.)

¹⁷ jw.org сайтыште «Иегован Таныкше-влак нерген чӱчкыдын пуэдыме йодыш-влак» рубрикыште статья-влак улыт. Нуным кучылтын, шымлыше еҥ родыжо-влакын але пашам пырля ыштыше-влакын лекше йодышышт-влаклан проста вашмутым ямдылен кертеш (2 Тим. 2:24, 25). Тыгак «Курымеш куанен илыза!» книган кажне урокын мучаштыже «Иктаж-кӧ каласен кертеш» але «Иктаж-кӧ йодын кертеш» рамке-влакым лончылаш ида мондо. Тек шымлыше умылтара, мо́лан тудо ӱшана. Тудым шке мут дене ойлаш таратыза. Кӱлеш гын, шымлышылан каласыза, мом тудо вес семын ыштен кертеш ыле. Шымлыше дене репетироватлашлан жапым ида чамане. Тунам тудо весе-влаклан сайрак умылтарен кертеш, мо́лан тудо ӱшана, а мо́лан огеш ӱшане.

18. Кузе шымлышым погынымаш дене пырля служитлаш тараташ? (Матфейын 10:27).

¹⁸ Иисус тунемшыж-влаклан чыла еҥлан поро уверым каласкалаш кӱштен. (Матфейын 10:27 лудын лекса.) Шымлыше вашкерак погынымаш дене пырля таныклаш тӱҥалеш гын, тунам тудо вашкерак Иеговалан ӱшаным пышташ тунемеш. Тыгай цельым шындаш те тудлан кузе полшен кертыда? Кунам погынымаштыда таныклымаш кампаний нерген увертарыме лиеш, шымлышыдам уверзе лияш таратыза. Умылтарыза тудлан, молан шукыштлан лач тыгай кампаний годым таныклаш тӱҥалаш куштылгырак. Эше шымлышылан ик сай цель — арня покшелне лийше вашлиймаште тунемме заданий дене лекташ. Тиде тудлан шке ӱшанымашыжым эше сайрак умылтараш полша.

ШЫМЛЫШЫЛАН ТЕ ТУДЛАН ӰШАНЕДА МАНЫН ОНЧЫКТЫЗА

19. Кузе Иисус тунемшыж-влаклан ӱшана манын ончыктен, да кузе ме тудын деч примерым налын кертына?

¹⁹ Кавашке кайыме деч икмыняр жап ончыч Иисус тунемшыж-влаклан палдарен: лиеш тыгай кече, кунам нуно угыч пырля лийыт. Тудо нуным шкеж дене пырля кавашке налаш шонен. Но нуно тидым умылен огытыл. Туге гынат Иисус пеҥгыдын ӱшанен: нунын тудын почеш каяш кумылышт уло (Иоан. 14:1—5, 8). Тудо пален: южо  чыным умылашлан нунылан жап кӱлын, мутлан, нунын каваште илаш тӱҥалмышт нерген чыным (Иоан. 16:12). Шымлышына-влак Иеговам куандарынешт манын, ме ӱшанена да тиде ӱшанымынам нунылан ончыктен кертына.

20. Кузе Малавиште ик ака шымлышылан ӱшана манын ончыктен?

²⁰ Шымлышына-влакын чын ыштымышт шуэш манын, ме ӱшанена. Малавиште Чифу́ндо лӱман акана «Курымеш куанен илыза!» книга почеш Алина́фе лӱман католик самырык ӱдырамаш дене Библий шымлымым тӱҥалын. 14-ше урокым шымлен пытарымеке, Чифундо тиде ӱдырамаш деч йодын, мом тудо кумалмаште сӱрет-влакым кучылтмо нерген шона. Алинафылан тиде йодыш чот келшен огыл, да тудо каласен: «Тиде мыйын пашам!» Вашке Алинафе шымлымым чарна манын, Чифундо шонен. Но акана тудын дене умбакыжат чытымаш дене шымлен, да весыже, жап эртымеке, чылажымат умыла манын ӱшанен. Икмыняр тылзе гыч, кунам нуно 34-ше урокым шымленыт, Чифундо 6-шо пункт гыч тудлан йодышым пуэн: «Библийым шымлымаш да чын Юмо, Иегова, нерген пален налмыда тыланда могай пайдам конденыт?» Чифундо шарналта: «Алинафе тынар шуко пайда нерген каласкален пуэн, ты шотышто тудо палдарен: „Танык-влак нимогай пашам, кудыжым Библий йӧрдымылан шотла, огыт ыште“». Вашке тидын деч вара Алинафе кумалмаште сӱрет-влакым кучылтмым чарнен да тынеш пурен.

21. Кузе ме шымлышынам Иегован могырышкыжо шогалаш кумылаҥден кертына?

²¹ Тӱҥ пашам Иегова ышта гынат, меат шымлышыналан духовный шотышто кушкаш полшена (1 Кор. 3:7). Ме айдемылан мом тудын деч Юмо вуча манын умылтарена гына огыл. Ме тудлан Иеговам чотрак йӧраташ полшена. Тыгак тудым Иеговалан служитлымым илышыштыже икымше верыш шындаш таратена. А эше шымлышынам Иеговалан ӱшаным пышташ да Юмо тудлан поктылмашым сеҥаш полша манын, пеҥгыдын ӱшанаш туныктена. Шымлыше ужшаш: Иеговалан йӧрышӧ лияш кумылжо шотышто ме кокыте она шоно. Тунам тудо Иегован могырышкыжо шогалаш эше чотрак кумылаҥдыме лиеш.