1. Молан те чыным акледа?

 ИЕГОВАН служитлышыже-влак библийысе чыным йӧратат. Мемнан ӱшаннам тиде чын дене негызлыме (Рим. 10:17). Ме пеҥгыдын ӱшанена: христиан погынымаш «чынын негызше да эҥертышыже» лийже манын, Иегова тудым чумырен (1 Тим. 3:15). Мемнан коклаште «шке ӱмбак виктарымашым налше-влакым» ме уло кумылын колыштына. Нине иза-влак мыланна Библийым да Юмын эрыкшым умылаш полшат (Евр. 13:17, УТ).

2. Чыным палена гынат, мемнан дене мо лийын кертеш? (Иаковын 5:19).

² Ме чыным да Юмын организацийжым йӧратена. Но тиде огеш ончыкто, пуйто чын корно гыч мемнам нимо кораҥден огеш керт. (Иаковын 5:19 лудын лекса.) Сатана тидым веле вуча. Библийлан але Юмын организацийжын пуымо кӱштымашыжлан ӱшанымым чарнена ыле гын, Сатана чот куана ыле (Еф. 4:14).

3. Молан мыланна чын корнышто шогашлан уло вийым пыштыман? (Ефесян-влаклан 6:13, 14).

³ Ефесян-влаклан 6:13, 14 лудын лекса. Чыла калык Иегова ваштареш шогалже манын, вашке Диавол тӱня мучко ӱшандарыше шоякым шаркалаш тӱҥалеш (Почм. 16:13, 14). Тыгак ме палена: Сатана Юмын служитлышыже-влакым ондалашлан эше шукырак вийым пышташ тӱҥалеш (Почм. 12:9). Сандене мыланна чын деч шоям ойыраш да библийысе чыным колышташ тунемаш чот кӱлеш (Рим. 6:17; 1 Пет. 1:22). Тидын деч кугу орлыкым илен лекмына шога.

4. Тиде статьяште ме мом лончылен налына?

 ⁴ Тиде статьяште ме ончен лектына кок койышым, кудышт мыланна полшат шоям чын деч ойыраш да Юмын организацийжылан ӱшанаш. А эше ме чын корнышто пеҥгыдын шогаш полшышо кум каҥашым лончылен налына.

ЧЫНЫМ УЖАШ ПОЛШЫШО КОК КОЙЫШ

5. Кузе Иегова деч лӱдмаш умылаш полша, кушто чын, а кушто шоя?

⁵ Иегова деч лӱдмаш. Иегова деч лӱдмаш тудым йӧратымаш дене чот кылдалтын. Ме Юмым чот йӧратена гын, тунам тудым шӱлыкаҥдыше нимогай пашам она ыште. Мыланна эн тӱҥжӧ — Иеговалан йӧрышӧ лияш. Сандене осалым поро деч да шоям чын деч ойырен мошташ тунеммына шуэш (Прит. 2:3—6; Евр. 5:14). Еҥ деч лӱдмаш Иеговам йӧратымаш деч виянрак лийшаш огыл. Вет могай паша еҥ-влаклан келша, чӱчкыдын Иеговалан огеш келше.

6. Кузе еҥ-влак деч лӱдмашлан кӧра 10 израиль пӧръеҥ чыным савырен каласен?

⁶ Ме Юмо деч огыл, а еҥ-влак деч чот лӱдына гын, тунам шоялан ӱшанаш тӱҥалын кертына. Айста шарналтена, мо лийын, кунам Моисей 12 пӧръеҥым Сӧрымӧ мландым ончалаш колтен. Нунын гыч лужын хананей-влак деч лӱдмаш Иеговам йӧратымаш деч виянрак лийын. Нуно вес израильтян-влаклан каласеныт: «Ме ту еҥ-влак дене кучедалын она керт, вет нуно мемнан деч виянрак улыт» (Чис. 13:27—31). Айдемын шинча дене ончалаш гын, хананей-влак израильтян-влак деч чынжымак виянрак лийыныт. Но израильтян-влак тушманышт-влакым сеҥен огыт керт манын ойлаш чын лийын мо? Тидым ойлен кертын тыгай айдеме веле, кӧ Иегова нерген пӱтынек монден. Нине лу пӧръеҥлан Юмын эрыкше нерген шонаш кӱлын. Вет израильтян-влак ту мландым сеҥен налышт манын, Юмын кумылжо лийын. Тыгак нунылан шарнаш кӱлын, кузе Иегова шукерте огыл  шке калыкшым утарен. Тунам нуно теве мом умылат ыле: хананей-влакын вийышт Юмын куатше дене таҥастарымаште — тиде нимо, манаш лиеш. Саде 10 пӧръеҥлан ӱшанымаш ситен огыл. Но нунын дене таҥастарымаште Иисус Навин ден Халевлан эн тӱҥжӧ Иеговалан йӧрышӧ лиймаш лийын. Нуно калыклан каласеныт: «Иегова мемнам йӧрышылан шотла гын, тудо мемнам чынжымак... ту мландыш вӱден конда, да тудым мыланна пуа» (Чис. 14:6—9).

7. Иегова деч лӱдмашым вияҥдаш мо полша? (Тыгак сӱретым ончыза.)

⁷ Иегова деч лӱдмашым вияҥдаш мыланна мо полша? Кажне гана решенийым лукмо годым Иегован шижмашыже нерген шонкалыза (Пс. 15:8). Иктаж-могай библийысе ужашым лудмыда годым шке деч йодса: «А мый тиде ситуацийыште лиям ыле гын, мом ыштем ыле?» Мутлан шоналтыза, пуйто те саде израильтян-влак коклаште улыда да 10 пӧръеҥын ойлымыштым колыда. Нунын мутыштлан ӱшанаш тӱҥалыда ыле мо? Тендамат лӱдмаш авалта ыле мо? Але Иеговам йӧратымаш еҥ-влак деч лӱдмашым сеҥаш полша ыле? Иисус Навин ден Халев чыным ойленыт. Но калык нунылан ӱшанен огыл. Лектышыже тыгай лийын: саде тукым Сӧрымӧ мландыш логалын огыл (Чис. 14:10, 22, 23).

8. Могай койышым вияҥдаш мыланна чотак кӱлешан да молан?

⁸ Ӱҥышылык. Иегова ӱҥышӧ еҥ-влаклан веле чыным умылаш полша (Матф. 11:25). Кунам мыланна Библийым шымлаш темленыт, ме ӱҥышын умыленна: библийысе чыным умылымаште мыланна полыш кӱлеш (Ап. паш. 8:30, 31). Но кугешныше лияш огыл манын, мыланна тӱткӧ лийман. Кугешныше улына гын, шонаш тӱҥалын кертына, пуйто мемнанат шонымашна библийысе принцип ден Иегован организацийжын кӱштымашыж гаяк чын.

9. Ӱҥышӧ кодаш мыланна мо полша?

⁹ Ӱҥышӧ кодашлан мыланна шарнаш кӱлеш, мыняр чот ме Иегова дене таҥастарымаште изи улына (Пс. 8:4, 5). Юмо мыланна эше чотрак ӱҥышӧ лияш полшыжо да тудын деч тунемаш кумылым пуыжо манын, ме кумалын кертына. Иегова шке Мутыштыжо возымо шонымашыж-влакым да организацийжын пуымо кӱштымашыже-влакым мыланна аклаш да шке шонымашна деч кӱшкырак шындаш полша. Библийым лудмыда годым вниманийым ойырыза, кузе Иегова ӱҥышылыкым йӧрата да кугешнымаш ден шкем кӱшкӧ шындымым ужмышудымо улеш. Поснак ӱҥышӧ лийман, кунам мыланна почётан заданийым пуат.

ЧЫН КОРНЫШТО ПЕҤГЫДЫН ШОГАШ МО ПОЛША?

10. Ожно Иегова кӧ гоч кӱштымаш-влакым пуэден, да кузе тудо таче тидым ышта?

¹⁰ Эре Иегован организацийжылан ӱшаныза. Ондак Иегова шке калыкшылан кӱштымашыже-влакым Моисей гоч пуэн, а вара — Иисус Навин гоч (Иис. Н. 1:16, 17). Нине пӧръеҥ-влакым Юмо шогалтен манын, израильтян-влаклан келшаш да нуным пагалаш кӱлын. Кунам нуно тыге ыштеныт, нунын чылажат сай лийын. Курым-влак эртымеке, христиан погынымаш чумырымо лийын. Ондак тиде погынымашлан виктарымашым 12 апостол пуэн (Ап. паш. 8:14, 15). Варажым нунын дек Иерусалимысе вес кугурак иза-влакат ушненыт. Кунам христиан-влак нине ӱшанле пӧръеҥ-влакын кӱштымашышт почеш ыштеныт, погынымаш-влак «ӱшанымаште пеҥгыдемыныт, да еҥышт кече еда ешаралтыныт» (Ап. паш. 16:4, 5). Тачат Иегова мемнам суапландара, кунам ме тудын  организацийжын кӱштымашыже почеш ыштена. Иегова мемнан деч лӱмын шогалтыме пӧръеҥ-влакым, кудыштым тудо мемнан верч тыршашлан шогалтен, колыштмым вуча. Но ме нуным она колышт гын, Иегован могай шижмашыже лектеш? Тиде йодышлан вашмутым налашлан айста ончен лектына, мо Сӧрымӧ мландыш кайыме корнышто израильтян-влак дене лийын.

11. Моисейым пагалыдыме израильтян-влак дене мо лийын? (Тыгак сӱретым ончыза.)

¹¹ Сӧрымӧ мландыш кайыме годым Иегова шке калыкшым Моисей гоч виктарен. Но южо пагалыме пӧръеҥ-влаклан тиде келшен огыл. Нунын мутышт почеш калыкыште чылаштат святой лийыныт, Моисей гына огыл, да нунын коклаштат Иегова (Чис. 16:1—3). Чынак, Юмо калыкыштыже чылаштымат святойлан шотлен, но израильтян-влакым вуйлаташ тудо Моисейым шогалтен (Чис. 16:28). Моисейым критиковатлен, ваштареш шогалше-влак чынжымак Иеговам критиковатленыт. Нуно Иегован кумылжо нерген шонен огытыл, а шке кумылышт нерген шоненыт. Нуно шукырак власть ден чапым налнешт ыле. Юмо тудлан ваштареш шогалше-влакым да нунын дене келшыше-влакым пытарен (Чис. 16:30—35, 41, 49). Тачат тыгак: иктаж-кӧ Иегован организацийжын кӱштымашыже-влакым огеш пагале гын, тиде Юмылан огеш келше.

12. Молан ме Иегован организацийжылан ӱшанен кертына?

¹² Ме Иегован организацийжылан пеҥгыдын ӱшанен кертына. Кунам библийысе чыным умылымашке рашемдымашым пурташ кӱлеш але служитлымаштына иктаж-мом вашталташ кӱлеш, Вуйлатыше совет гыч иза-влак тидым жапым шуйкалыде ыштат (Прит. 4:18). Вет нуно эн тӱҥжӧ Иегован кумылжым шуктынешт. Тыгак нуно чыла решенийыштым Библиеш негызлаш тыршат, кудыжо чыла Иегован служитлышыже-влаклан корным ончыкта.

13. Мо тыгай «яндар туныктымаш», да молан тиде туныктымаш почеш илыман?

 ¹³ Тек «яндар туныктымаш» тыланда корным ончыкта (2 Тим. 1:13). «Яндар туныктымашыш» библийысе христиан туныктымаш пура (Иоан. 17:17). Мо́лан ме ӱшанена, чылажат нине туныктымаш негызеш улеш. Иегован организацийже мемнам тиде туныктымаш почеш илаш туныкта. Тыге ыштена гын, тиде мыланна аралтыш лиеш.

14. Кузе южо христиан-влак «яндар туныктымаш» деч кораҥыныт?

¹⁴ «Яндар туныктымаш» деч кораҥына гын, мо лиеш? Ик примерым ончалына. Икымше курымышто христиан погынымаште тыгай манеш-манеш лектын, пуйто Иегован кечыже уже толын шуын. Кушеч тыгай шонымаш лектын? Очыни, нуно тыгай серышым налыныт, кудыжым, южо Фессалоникысе христиан-влакын шонымаште, Павел возен. Нуно тиде информацийым терген налын огытыл, а тиде серышлан вигак ӱшанаш да тушто возымо нерген весе-влаклан ойлаш тӱҥалыныт. Нуно апостол Павелын туныктымашыжым шарнат ыле гын, ондалалтме огыт лий ыле (2 Фес. 2:1—5). Сандене апостол Павел иза-шольыж-влакым чыла колмылан ӱшанаш огыл таратен. Ончыкыжым чыным шоя деч ойырен мошташ полшашлан тудо фессалоникысе-влаклан кокымшо серышыжым тыгай шомак дене кошартен: «Мый, Павел, тиде саламлымашым шке кидем дене возем, тидыже чыла мыйын серышемын палыже лиеш — мый тыге возем» (2 Фес. 3:17).

15. Кузе ме шкенам чынла койшо шоя деч арален кертына? Примерым кондыза. (Тыгак сӱрет-влакым ончыза.)

¹⁵ Фессалоникысе христиан-влаклан возымо апостол Павелын мутшо мемнам мо́лан туныкта? Меат колын кертына иктаж-могай ӧрыктарыше уверым але тыгайым, мо библийысе чынлан келшен ок тол. Тыгай годым мыланна уш-акылан лийман. Икана Советский Союзышто иза-влак ик серышым налыныт. Тиде серыш пуйто тӱҥ виктем гыч толын. Тушто нуным посна организацийым чумыраш таратеныт. Тиде серышым тушманна-влак возеныт гынат, тудо чынла койын. Но  ӱшанле изана-влак ондалалтме лийын огытыл. Нуно умыленыт: серышыште мом возымо организацийын туныктымыж деч чот ойыртемалтын. Таче тушманна-влак мемнам ондалашлан да коклашкына умылыдымашым пурташлан интернет ден соцсеть-влакым кучылтын кертыт. Сандене мыланна уш-акылан лияш кӱлеш да иктешлымашым ышташ вашкаш огеш кӱл. Шкенам шоя деч аралашлан сайын шонаш кӱлеш: чыла лудмына да колмына библийысе чынлан келшен толеш але уке? (2 Фес. 2:2; 1 Иоан. 4:1).

16. Римлян-влаклан 16:17, 18 дене келшышын, погынымаште иктажше тыгай шонымашым шаркала гын, кудыжо библийысе чынлан келшен ок тол, мом ыштыман?

¹⁶ Иеговалан ӱшанле-влак дене иктылыкым аралыза. Юмо тудлан кумалмаште иктылыкнам ужнеже. Библийысе чын дене келшышын илена гын, тунам веле иктылык лиеш. Иктажше тыгай шонымашым, кудыжо библийысе чынлан келшен ок тол, шаркалаш тӱҥалеш гын, тиде погынымаште иктылыкым пудырта. Сандене Юмо мемнам тыгай еҥ-влак деч «кораҥ кошташ» тарата. Тыге она ыште гын, ме шоялан ӱшанаш тӱҥалына да тидын верч Иеговалан ӱшанле лиймым чарнена. (Римлян-влаклан 16:17, 18 лудын лекса.)

17. Кунам ме умылена, кушто чын да тиде чын дене келшышын илена, могай пайдам налына?

¹⁷ Кунам ме умылена, кушто чын да тиде чын дене келшышын илаш тыршена, ме духовный шотышто таза кодына да ӱшанымашна пеҥгыде кодеш (Еф. 4:15, 16). Тиде мемнам Сатанан шояж деч арала. Тыгак ме кугу орлык годым Иегован полшымыжым налын кертына. Яндар туныктымашлан пеҥгыдын ӱшаныза да «тыныслыкым пуышо Юмо тендан дене лиеш» (Флп. 4:8, 9).