1, 2. a) Неле годым шкетын кодына манын, молан мыланна лӱдман огыл? б) Тиде статьяште мом лончылен лектына?

 КУГУ нелылык дене тӱкнымына годым мемнан тыгай шижмашна лийын кертеш, пуйто ме теҥызыште тӱтан годым изи пушышто шкетын улына. Но чынжымак ме нелылык годым нигунамат шкетын она код. Йӧратыше кавасе Ачана нелылыкнам ужеш да мыланна чылажымат чытен лекташ полшаш сӧра. Иегова ӱшанле служитлышыж-влаклан порын ойла: «Мый... тыланет полшем» (Ис. 41:10).

² Тиде статьяште ме лончылен налына, кузе Иегова мыланна полша. Тудо 1) мемнам вӱда, 2) физический кӱлешлыкна верч тырша, 3) мемнам арала да 4) лыпландара. Иегова ӱшандара: илышыштына кеч-мо лиеш гынат, тудо нигунамат мемнан нерген огеш мондо да нигунамат мемнам огеш кодо. Сандене тыгай ситуацийжат огеш лий, кунам ме шкетын кодына.

ИЕГОВА МЕМНАМ ВӰДА

3, 4. Иегова мемнам кузе вӱда? (Псалом 47:15, У Сугынь, 1986).

³ Псалом 47:15 (У Сугынь, 1986) палдара: «Вот тиде Юмо уло, Юмо мемнан курым и курымеш; Тудо лиеш вӱдышӧ мемнан колымашке шумешке». Иегова пала: ме шкенам шке кӱлеш семын вӱден она керт. Мыланна тудын виктарымыже кӱлеш. Кузе тудо ӱшанле служитлышыже-влакым таче виктара? Тудо мыланна Библийым пуэн (Пс. 118:105). Тудын каҥашыже-влак мыланна сай решенийым лукташ a да Юмын гаяк койыш-влакым кушташ полшат. Мутлан, Иегова весе-влакым проститлаш, чыла шотыштат честный лияш да уло шӱм дене весе-влакым йӧраташ туныкта  (Пс. 36:8; Евр. 13:18; 1 Пет. 1:22). Чыла тидым ыштена гын, ме уже кызыт пиалан лийын кертына да ончыкыжым курымеш илен кертына. Кунам Иеговам колыштына, ме сайрак ача-ава, марий, вате да йолташ лийына.

⁴ Тыгак Иегова шке Мутышкыжо чынжымак илыше еҥ-влакын историйыштым пуртен. Нунын нелылыкышт да тургыжланымышт нерген лудын, ме ужына: нуно мемнан гаяк айдеме лийыныт (1 Кор. 10:13; Иак. 5:17). Нине каласкалымаш-влак мыланна пеш пайдале улыт. Мутлан, икымше, ме умылена: ме гына огыл нелылык ден тӱкнена, — весе-влакынат тыгайрак нелылыкышт лийын да нуно Иегован полшымыж дене чылажымат чытен лектын кертыныт (1 Пет. 5:9). Кокымшо, ме умылена, мо мыланна нелылыкнам чытен лекташ да куаным йомдараш огыл полша (Рим. 15:4).

5. Мемнам вӱдашлан Иегова кӧм кучылтеш?

⁵ Эше Иегова, иза-ака-влакым кучылтын, мемнам вӱда b. Мутлан, районым эскерыше иза-влак мемнам кумылаҥдашлан погынымаш-влакыш толыт. Нунын ойлымашышт ӱшанымашнам пеҥгыдемдат да иктылыкнам аралаш полшат (Ап. паш. 15:40—16:5). Кугурак иза-влакат мемнан гыч кажныжлан Иегова дене лишыл кодаш полшашлан шуко тыршат (1 Пет. 5:2, 3). Ача-ава-влак йочаштым Иеговам йӧраташ туныктат да нунылан уш-акылан решенийым лукташ да сай привычке-влакым кушташ полшат (Прит. 22:6). А духовный шотышто кушкын шушо илалше ака-влак самырык ака-влакым шке примерышт дене туныктат, нунылан пайдале каҥаш-влакым пуат да нуным моктат (Тит. 2:3—5).

6. Иегован полшымыжым аклена манын, кузе ончыктен кертына?

⁶ Мыланна сай решений-влакым лукташлан да пиалан лияшлан Иегова шке могыржо гыч чылажымат ыштен. Иегован полшымыжым аклена манын, кузе ончыктен кертына? Притчи 3:5, 6 почеламут-влакыште каласыме: «Иеговалан уло шӱмет дене ӱшане да шке умылымашетлан ит инане». Ме тыге ыштена гын, тудо мемнам «чын корно дене наҥгая» — вес семынже, шуко проблеме деч утлаш полша. Иеговалан кугу тау, вет тудо мемнам сайын пала, йӧрата да мемнан гыч кажныжлан кӱлешан каҥашым пуа! (Пс. 31:8).

ИЕГОВА ФИЗИЧЕСКИЙ КӰЛЕШНЫКНА ВЕРЧ ТЫРША

7. Иегова физический кӱлешлыкна верч тырша манын, кушеч коеш? (Филиппысе-влаклан 4:19).

⁷ Филиппысе-влаклан 4:19 лудын лекса. Иегова мемнан духовный кӱлешлыкна верч гына огыл тырша. Тудо пала: мыланна кочкыш, вургем да илыме вер кӱлеш. Садлан тудо шкенан да ешнан кӱлешлыкым ситараш тыршымынам суапландара (Матф. 6:33; 2 Фес. 3:12). Южгунам ме тургыжланен кертына: илышлан чыла кӱлешан лиеш але уке. Тыге шонаш уда огыл. Но Иегова «тидын верч шуко ида тургыжлане» манын ойла. («Тунемме Библийыште» Матфейын 6:25 почеламутлан комментарийым ончыза.) Молан? Молан манаш гын, Ачана мемнам неле жапыште нигунамат огеш кодо (Матф. 6:8; Евр. 13:5). Иегова мемнан верч тыршаш сӧрен гын, тугеже тидын нерген тургыжланаш нимогай амал уке.

8. Иегова Давид верч кузе тыршен?

⁸ Шоналтыза, кузе Иегова Давид верч тыршен. Кунам Давид Саул деч шылын коштын, Юмо тудлан да еҥже-влаклан илен лекташыштлан чыла кӱлешаным пуэн. Ту жапыште  Иегован полшымыжо нерген шонкален, Давид возен: «Самырык ыльым да теве ынде шоҥгемым, но Юмылан йӧрышӧ еҥым ӧрдыжеш кодымым да тудын тукымжын киндым йодышт коштмым шым уж» (Пс. 36:25). Очыни, теат шуко случайым каласкален кертыда, кузе Иегова неле жапыште тыланда да вес иза-ака-влаклан полшен шоген.

9. Эҥгек лийме годым Иегова шкенжын калыкше верч кузе тырша? (Тыгак сӱрет-влакым ончыза.)

⁹ Эҥгек лийме годым Иегова шке калыкшым огеш кодо. Мутлан, кунам икымше курымышто шужымаш лийын, тӱрлӧ вер гыч христиан-влак нужнаш логалше иза-ака-влаклан полышым колтеныт (Ап. паш. 11:27—30; Рим. 15:25, 26). Тачат Юмын служитлышыже-влак икте-весыштлан уло кумылын полшат. Иегова эҥгекыш логалше-влаклан кочкышым, вӱдым, вургемым да эмым колташ служитлышыже-влакым порын тарата. Чоҥымаш бригаде-влак локтылалтше пӧрт-влакым да Вашлиймаш зал-влакым ачалат. Тыгак Иегован Таныкше-влак эҥгекыш логалше-влаклан вигак эмоциональный да духовный шотышто полшат c.

10, 11. Борисын историйже тендам мо́лан туныкта?

¹⁰ Иегова тыгай еҥ-влак верчат тырша, кӧ тудлан эше огеш служитле. Поро Юмына деч примерым налын, ме тудлан служитлыдыме-влаклан порым ышташ йӧным кычалына (Гал. 6:10). Чӱчкыдын тидлан кӧра еҥ-влакын мемнан нерген да Юмына нерген шукырак пален налаш кумылышт лектеш. Теве Борис лӱман ик школын директоржын случайже, кудыжо Украиныште ила. Тудо шкеже Иегован Таныкше огыл гынат, тудо  Танык улшо тунемшыж-влак дене эре поро лийын да нуным пагален. Кунам Борис сар кайыме вер гыч элыштыжак тынысрак верыш куржаш шонен пыштен, мемнан иза-влак тудлан куржаш полшеныт. Вараракшым Борис Христосын колымыжым шарнымаш касыш толын. Теве мом тудо Иегован Таныкше-влак нерген каласен: «Нуно мый денем пеш поро лийыныт да мыйын верч чот тыршеныт. Пеш кугу тау нунылан!»

¹¹ Меат чаманыше Кавасе Ачана семын ыштен кертына да эҥгекыш логалше иза-ака-влаклан гына огыл, а чылаштланат йӧратымашым ончыктен кертына (Лук. 6:31, 36). Ӱшанен кодына, йӧратымашна нуным Иегова нерген пален налаш да мемнан дене пырля тудлан служитлаш тӱҥалаш тарата (1 Пет. 2:12). Но тыгай лектыш огеш лий гынат, ме садак пиалан лийына, вет «пуымыж годым айдеме... пиаланрак» (Ап. паш. 20:35).

ИЕГОВА МЕМНАМ АРАЛА

12. Иегова шке калыкшым мо деч арала? (Псалом 90:1, 2, 14).

¹² Псалом 90:1, 2, 14 лудын лекса. Таче Иегова мемнам чылаж дечат арала, мо тудын дене кыл кучымашнам пужен кертеш. Тудо Сатаналан чын кумалмашым пытараш нигунамат ок пу (Иоан. 17:15). Ме пеҥгыдын ӱшанена: Иегова сӧрымыжӧ почеш кугу орлык годым мемнан ӱшанымашнам пеҥгыдемда да мемнам утара (Почм. 7:9, 14).

13. Кузе Иегова мемнан гыч кажныжым арала?

¹³ А кузе Иегова мемнан гыч кажныжым арала? Библий гоч тудо мыланна умылаш полша, мо поро, а мо осал (Евр. 5:14). Ме библийысе принцип-влак почеш илена гын, тиде Юмо дене кыл кучымашнам арала, ме пиаланрак да тазарак лийына (Пс. 90:4). Эше Иегова мыланна погынымашым пуэн (Ис. 32:1, 2). Иза-акана-влак Юмым йӧратат да тудым колыштыт. Кунам ме нунын дене пырля вашлиймаште улына, служитлена да канена, тиде мыланна удам ыштыме деч кораҥаш полша (Прит. 13:20).

14. a) Молан Юмо мемнам чыла нелылык деч огеш арале? б)  Псалом 9:11 мемнам мо шотышто ӱшандара? (Тыгак сноскым ончыза.)

¹⁴ Ожно Иегова служитлышыже-влакым сусыргымо да пуштмо лийме деч южгунам арален. Но тудо эре тыге ыштен огыл. Библийыште ойлымо дене келшышын, кажныж денат «иктаж-мо вучыдымын лийын кертеш», сандене орланымаш ден тӱкнен кертына (Эккл. 9:11). Тыгак Иегова южо служитлышыже-влаклан поктылмо да пуштмо лияш пуэн. Ӱшанле кодмышт дене нуно Сатанан шояче улмыжым ончыктеныт (Иов 2:4—6; Матф. 23:34). Меат таче тыгай дене тӱкнен кертына. Но ме пеҥгыдын ӱшанена: Иегова нелылыкым огеш кораҥде гынат, тудым йӧратыше-влакым тудо нигунамат огеш кодо (Пс. 9:11) d.

ИЕГОВА МЕМНАМ ЛЫПЛАНДАРА

15. Кузе Иегова мемнам кумалмаш, Библий да иза-ака-влак гоч лыпландара? (2 Коринфян-влаклан 1:3, 4).

¹⁵ 2 Коринфян-влаклан 1:3, 4 лудын лекса. Южо годым ме кугун ойгырена, чот тургыжланена але мом ышташат она пале. Очыни, те кызыт неле ситуацийыште улыда да шкем шкет кодмыла шижыда. Тендан шижмашдам иктаж-кӧ умыла мо? Иегова умыла. Тудо чон корштымашдам пала да тыгак тендам «кеч-могай нелылык годымат лыпландара». Кузе тудо тидым ышта? Кунам ме кумалме годым тудлан шӱмнам почына, тудо шӱмнам «Юмын кеч-могай уш деч кӱшнӧ шогышо тыныслыкше» дене тема (Флп. 4:6, 7). Тыгак, кунам ме лудына,  мом Иегова мыланна Библий гоч ойла, тунам чонлан ласкарак лиеш. Тудо мемнам чот йӧрата манын ӱшандара, мемнам уш-акылан лияш туныкта да мыланна ӱшаным пуа. А эше ме христиан вашлиймаште лыпландарымашым муына, кушто Библий гыч кумылаҥдыше шомак-влакым колына да иза-ака-влакын йӧратымыштым шижына.

16. Нейтан ден Присцилла деч те мо́лан тунемында?

¹⁶ Айста ончалына ик примерым, кудыжо ончыкта, кузе Иегова шке служитлышыже-влакым Библий гоч лыпландара да нунылан полша. Ушымо Штат-влакыште илыше Не́йтан ден Присци́лла икмыняр ий ончыч тыгай верыш илаш кусненыт, кушто уверзе шагал лийын. Нейтан ойла: «Иегова мемнам суапландара манын, ме пеҥгыдын ӱшаненна». Но у верыште нунылан пашам муаш йӧсӧ лийын да когыньыштынат тазалыкышт начаремын. Нунылан мӧҥгеш пӧртылаш логалын. Но туштат окса эре ситен огыл. Нейтан шарналтен ойла: «Мый умылен омыл, молан Иегова шонымына почеш мемнам суапландарен огыл. Мый ала-мом ыштымылан титакан улам манын шонашат тӱҥалынам». Но жап эртымеке, Нейтан ден Присцилла умылаш тӱҥалыныт: Иегова нуным коден огыл. Тудо эре воктенышт лийын. Нейтан ойла: «Ту неле жапыште Библий мыланна чын йолташ семын лийын, кудыжо мемнам лыпландарен да уш-акылан каҥашым пуэн. Ме нелылыкна нерген шуко шонен огынал. Тидын олмеш ме шоненна, кузе Иегова мыланна полшен шоген. А тидыже ӱшанымашнам пеҥгыдемден: тудо мемнам ончыкыжымат огеш кодо».

17. Иегова Хельга лӱман акам кузе лыпландарен? (Тыгак сӱретым ончыза.)

¹⁷ Иза-ака-влакат мемнам лыпландарен кертыт. Кузе? Айста Венгрий гыч Хе́льга лӱман акана дене палыме лийына. Илышыштыже шуко ий шуйнышо тӱрлӧ нелылык лийын. Тидын верч тудын кидше шуко гана волен да тудо шкенжым йӧрдымылан шотлен. Но эртыше жапым шарналтен, Хельга умыла: Иегова тудым эре иза-ака-влак гоч лыпландарен.  Тудо воза: «Мыйын шуко проблемем лийын, пашаште чот ноенам да эше черле йочам лийын... Но кажне гана, кунам вием пытымыла чучын, Иегова мыланем вийым ешарен. Иегова мыйым лыпландараш сӧрен да пытартыш 30 ий жапыште тудо кажне кечын мыйым лыпландарен. Чӱчкыдын тудо тидлан иза-ака-влакым кучылтын. Мый шуко гана поро мут дене сообщенийым але открыткым налынам, да мыйым лач тунам моктеныт, кунам мыланем тиде пеш чот кӱлын!»

18. Кузе ме весе-влакым лыпландарен кертына?

¹⁸ Весе-влакым лыпландарен, ме Юмына деч примерым налына. Кузе нуным лыпландараш лиеш? Нуным тӱткын колышташ, нунын дене порын мутланаш да нунылан тӱрлӧ шотышто полшаш (Прит. 3:27). Ме чыла орланыше-влакым лыпландараш вашкена, — кеч нуно кызыт Иеговалан огыт служитле. Кунам лишылна-влакын ойго лектеш, кунам нуно черле улыт але иктаж-мо верч чот тургыжланат, ме нунын дек миена, нуным колыштына да библийысе шонымаш-влак дене нуным лыпландарена. Иегова, «лыпландарымашын Юмыжо», семын ыштен, ме иза-ака-влаклан нелылыкыштым чытен лекташ полшена. Но эше порым ыштыме дене ме тыгай еҥ-влакым, кӧ Иеговалан кызыт огеш служитле, Юмына нерген шукырак пален налаш таратен кертына (Матф. 5:16).

ИЕГОВА ЭРЕ ВОКТЕННА ЛИЕШ

19. Иегова мыланна мом ышта, да ме тудын деч кузе примерым налына?

¹⁹ Иегова тудым йӧратыше-влак гыч кажныж верч чот тырша. Нелылыкна годым тудо мемнам огеш кодо. Кузе ача-ава, йочаштым йӧратен, нунын верч тыршат, тыгак Иегова ӱшанле служитлышыже верч тырша. Тудо мемнам вӱда, физический кӱлешлыкна верч тырша, мемнам арала да лыпландара. Йӧратыше кавасе Ачана деч примерым налын, ме весе-влаклан нунын нелылыкышт годым полшена да нуным кумылаҥдена. Тиде тӱняште илен, ме тӱрлӧ нелылык да орланымаш дене тӱкнена. Но Иегова воктенна улеш манын, ме пеҥгыдын ӱшанена. Вет тудо шкеже каласен: «Ит лӱд, вет мый тый денет улам» (Ис. 41:10). Тиде мут-влак мемнам ӱшандарат: Иегова эре воктенна улеш да ме шкетын огынал!