Юмо уло манын, Библий шкежат пеҥгыдемда. Тудо мемнам религийлан шоныде ӱшанымаш почеш огыл, а «шонен моштымашым» кучылтын Юмылан ӱшанымашым кушташ тарата (Римлян-влаклан 12:1; 1 Иоаннын 5:20). Ме тендам Библий негызеш нине факт-влакым ончен лекташ таратена:

•   Сандалыкысе порядок да тусо илыш Ыштышынан улмыжым ончыктат. Библийыште каласыме: «Вет кажне пӧртын чоҥышыжо уло, а чылажымат чоҥышыжо — Юмо» (Еврей-влаклан 3:4). Тиде шонымаш проста гынат, шуко кӱшыл образованиян еҥ тидым кугу аргументлан шотла a.

•   Кажне айдеме тыгай кумыл дене шочеш — илышын смыслжым умылен налаш. Тыгай кумыл кап-кылын кӱлешлыкшым ситарыме дене огеш пыте. Тиде кумыл Юмым пален налаш да тудлан кумалаш тыршымаш дене икгай. Библийыште тиде кумылым «духовный кӱлешлык» манме (Матфейын 5:3, УТ; Почмаш 4:11). Айдемын духовный кӱлешлык улмыжо Юмын улмыжым гына огыл пеҥгыдемда. Тыгак чылажымат Ыштыше еҥ-влакым йӧрата да еҥ-влак духовный кӱлышлыкыштым ситарышт манын, Юмын кумылжым ончыкта (Матфейын 4:4).

•   Библийысе ончылгоч каласымаш-влак шукталтмышт деч икмыняр курым ончычак возымо лийыныт да тушто возымо событий-влак шке жапыштыже шукталтыныт. Мо ончылгочак каласыме лийын, чылажат шукталтын. Тиде теве мом пеҥгыдемда: ончылгоч каласымаш айдемын эрыкше почеш лектын огеш керт (2 Петрын 1:21).

•   Библийым возышо-влакын шинчымашышт ту жапысе илыше еҥ-влакын шинчымашышт деч ойыртемалтын. Акрет годым еҥ-влак ӱшаненыт, пуйто мланде слон, ир сӧсна, ӱшкыж але моло янлык ӱмбалне шога. Но Библийыште мландын эҥертышыже уке манын каласыме (Иов 26:7). Тыгела, мландын йыргешке форман улмыжо нерген Библийыште чын возымо (Исаия 40:22). А Библийым возышо-влакын тыгай шинчымаш кушеч лийын? Чын шинчымашым нунылан Юмо пуэн манын, шуко еҥ шотла.

•   Южо еҥ илыш дене кылдалтше йодыш-влаклан вашмутым кычал муын огыт керт, сандене Юмылан ӱшаныштым йомдарат да атеистыш савырнат. Но Библий тыгай йодыш-влаклан вашмутым пуа. Мутлан: Юмо йӧратыше да чылакерше гын, молан тӱняште тынар шуко осал ден орланымаш лиеда? Молан религийыште улшо еҥ-влак чӱчкыдын порым огыл, а осалым ыштат? (Титлан 1:16).