Язык — тиде Юмын нормыж-влаклан келшен толдымо кеч-могай ыштымаш, шижмаш але шонымаш. Тышке Юмын законжым пудыртымашат пура, кунам айдеме, Юмын шонымаште, йоҥылыш але чын огыл ышта (1 Иоаннын 3:4; 5:17). Тыгак Библий дене келшышын, кунам айдеме пала, кузе чын ышташ, но тыге ок ыште, языкым ышта (Иаковын 4:17).

 Библийым возымо йылме-влакыште языкым ончыктышо мут-влак «тура логалдымым», вес мут дене цельыш шудымым, ончыктат. Мутлан, акрет годсо Израильыште южо сарзе-влак кӱм кышкаш мастар лийыныт да эре «тура логалтеныт». Тиде шомакым эше «языкым ыштен огытыл» манын кусараш лиеш (Судей 20:16). Тыгела, языкым ыштымаш цельыш шудымым ончыкта. А цельже — Юмын нормыж-влаклан келшен толаш.

 Юмо — чылажымат Ыштыше, сандене еҥ-влаклан тӱрлӧ нормым пуаш тудын праваже уло (Почмаш 4:11). Ме ыштыме пашаналан Юмо ончылно мутым кучена (Римлян-влаклан 14:12).

Языкым ыштыде илаш лиеш мо?

 Уке. Библийыште возымо: «Чылан языкым ыштеныт да Юмын чапше деч посна кодыныт» (Римлян-влаклан 3:23; 1 Царей 8:46; Экклезиаст 7:20; 1 Иоаннын 1:8). Кузе тыге лийын?

 Икымше еҥ-влак, Адам ден Ева, ончыч языкдыме лийыныт, вет Юмо нуным шке тӱсшӧ почеш ситыдымаш деч посна ыштен (Тӱҥалтыш 1:27). Но нуно Юмым колыштмым чарненыт, сандене языкан лийыныт (Тӱҥалтыш 3:5, 6, 17—19). Кузе генетический чер ача-ава деч йочаштлан кусна, туге Адам ден Еван языкышт икшывышт-влакланат куснен (Римлян-влаклан 5:12). Теве молан израильысе Давид кугыжа языкан шочынам манын каласен (Псалом 50:7).

Ик язык-влак вес язык-влак деч нелырак улыт манын каласаш лиеш мо?

 Лиеш. Мутлан, Библийыште возымо почеш акрет Содомышто илыше еҥ-влак чот пужлышо лийыныт, кугу сулыкым ыштеныт, «нунын сулыкышт пеш неле» лийын (Тӱҥалтыш 13:13; 18:20). Языкын неле улмыжым палдарыше кум факторым ончен лектына.

1.   Могай язык ыштыме лийын. Библий мемнам кугу языкым ыштымаш деч шекландара, мутлан, яжарланыме, шоя юмылан кумалме, шолыштмо, утыжден аракам йӱмӧ, пуштмо ден спиритизм деч (1 Коринфян-влаклан 6:9—11; Почмаш 21:8). Библий почеш нуно шоныде ыштыме язык-влак деч ойыртемалтыт, мутлан, весе-влаклан эҥгекым конден кертше мут але ыштымаш деч (Притчи 12:18; Ефесян-влаклан 4:31, 32). Туге гынат Библий мемнам языкын неле улмыжым иземдаш ок тарате, вет изи йоҥылышым ыштымаш Юмын законжым пудыртымашке конден кертеш (Матфейын 5:27, 28).

2.   Молан языкым ыштыме. Южо языкым айдеме Юмын нормыжо-влакым палыде ышта (Апост. пашашт 17:30; 1 Тимофейлан 1:13). Библий тыгай язык-влакын неле улмыштым ок иземде гынат, тудо нуным шонен ыштыме язык-влак деч ойыра (Числа 15:30, 31). Языкым лӱмын ышташ айдемым осал шӱмжӧ тарата (Иеремия 16:12).

3.   Языкым мыняр гана ыштыме. Библий дене келшышын, Юмо ик гана ыштыме языкым да шуко жап мучко ыштыме языкым тӱрлӧ семын онча (1 Иоаннын 3:4—8). Юмо титаклыме пунчалым луктеш тыгай еҥ-влаклан, кӧ чын ыштышашым пала гынат, садак языкым шонен ышта (Еврей-влаклан 10:26, 27).

 Еҥ-влак кугу языкым ыштымыштлан чот ойгырен кертыт. Давид кугыжа, мутлан, тыге ойлен: «Мыйын закондымылыкем вуемымат эртен, неле нумалтыш гае мыйым темден шога» (Псалом 37:5). Но Библий ӱшаным пуа: «Осалым ыштыше шке корныжым кодыжо да языкан еҥ — осал шонымыжым. Тек нуно Иегова Юмына деке пӧртылыт, вет тудо нунылан порылыкшым ончыкта да нуным уло кумылын проститла» (Исайя 55:7).