Em̦õj ke am̦ baj l̦õmn̦ak kõn kajjitõk kein? El̦aññe aet, ejjab kwe wõt kwõj l̦õmn̦ak kõn kajjitõk kein. Elõñ armej jãn ipel̦aakin lal̦ in rej l̦õmn̦ak kõn kajjitõk ko raorõk kõn mour. Kwõmaroñ ke lo uwaakin kajjitõk kein?

Elõñ milien armej renaaj ba, “Aet!” Etke? Kõnke em̦õj aer lo uwaakin kajjitõk ko aer ilo Baibõl̦. Kokõn̦aan ke jel̦ã ta ko Baibõl̦ ej ba? Kwõnaaj bõk tokjãn jãn bũrookraam̦ in katak Baibõl̦ eo an Ri Kõnnaan ro an Jeova me ejjel̦o̦k on̦ãn. *—Lale kõmel̦el̦e eo itulal̦.

Ñe ej itok ñan katak Baibõl̦, jet armej rej ba bwe repoub. Jet rej ba bwe epen ñan mel̦el̦e kõn Baibõl̦. Jet rejjab kõn̦aan kallim̦ur bwe renaaj kajejjet aer katak Baibõl̦ aolep iien. Ak ro jet eoktak aer l̦õmn̦ak. Jet armej rem̦õn̦õn̦õ in katak kõn ta ko Baibõl̦ ej ba. Jen lale jet waanjoñak ko:

• “Ikõn etal ñan im̦õn jar ko an Katlik im Bũrotijen, juon tampel̦ an ro rej kabuñ in Sikhism, im̦õn kabuñ ko an armej ro rej kabuñ ñan Buddha, im ikar bar ekkatak kõn kabuñ ilo juon university. Bõtab, ijjañin kar loi uwaakin kajjitõk ko aõ kõn Anij. Ak juon raan, juon iaan Ri Kõnnaan ro an Jeova ear itok ñan m̦weo im̦õ. Iar bwilõñ kõn an kar uwaaki kajjitõk ko aõ jãn Baibõl̦, im iar ba bwe im̦õn̦õn̦õ in katak Baibõl̦.”​—Gill, juon kõrã jãn Iñlen.

• “Ekar lõñ aõ kajjitõk kõn mour, ak ear jab jubũruõ kõn uwaak ko an rũkaki in kabuñ eo aõ. Bõtab, juon iaan Ri Kõnnaan ro an Jeova ear uwaaki kajjitõk ko aõ ilo an kar kõjerbal wõt Baibõl̦. Ke ear kajjitõk el̦aññe ikõn̦aan kal̦apl̦o̦k aõ jel̦ã, iar ba em̦m̦an.”​—Koffi, juon em̦m̦aan jãn Benin.

• “Iar kõn̦aan jel̦ã kõn ta eo ej wal̦o̦k ñan ro remej. Iar tõmak bwe ro remej remaroñ kajorrããn ro remour, bõtab iar kõn̦aan jel̦ã ta eo Baibõl̦ ej ba. Iar jino katak Baibõl̦ ippãn juon m̦õtta me ej juon iaan Ri Kõnnaan ro an Jeova.”​—José, juon em̦m̦aan jãn Brazil.

• “Iar kajjioñ riit Baibõl̦ ak iar jab mel̦el̦e. Tokãlik juon iaan Ri Kõnnaan ro an Jeova ear itok im ear lukkuun alikkar an kõmel̦el̦eik tok ñan ña jet iaan kanaan ko ilo Baibõl̦. Iar kõn̦aan lale ta ko jet imaroñ bar katak im jel̦ã kaki.”​—Dennize, juon kõrã jãn Mexico.

• “Iar kõn̦aan jel̦ã el̦aññe Anij ej m̦oolin kea kake eõ. Innem, iar jar ñan Anij eo me an Baibõl̦. Raan eo tok juon jet Ri Kõnnaan ro an Jeova rar kal̦l̦al̦l̦al̦ ilo kõjãm eo aõ, im iar m̦õn̦õn̦õ in katak Baibõl̦ ippãer.”​—Anju, juon kõrã jãn Nepal.

Waanjoñak kein an armej rein rej kakeememej kõj kõn naan ko an Jijej: “Em̦õn̦õn̦õ ro rej kwõle im maro kõn Kwõjarjar.” (Matu 5:6) Ealikkar bwe ewõr an armej ro kõn̦aan ñan jel̦ã kõn Anij. Anij wõt emaroñ katõprak kõn̦aan in ikijjeen naan ko an ilo Baibõl̦.

Innem, ewi wãween ammim katak Baibõl̦ ippãn armej ro? Ewi wãween am̦ naaj bõk tokjãn ñe kwõnaaj katak Baibõl̦? Jenaaj lo uwaakin kajjitõk kein ilo katak in tok juon.