KATHERINE ear dik im rũttol̦o̦k ilo Amedka. Ear peptaij im erom juon iaan Ri Kõnnaan ro an Jeova ke ear 16 an iiõ. Meñe ear kate e ilo jerbal in kwal̦o̦k naan ak ejeja an kar armej ro ilo bukwõn eo an itoklimo in roñjake nuuj eo kõn Aelõñ eo an Anij. Ej ba: “Iar riiti bwebwenato ko an ro jet me rar jar ñan Anij bwe en jilkinl̦o̦k juon bwe en jipañ er ñan jel̦ã kõn e. Iar lukkuun kõn̦aan iioon armej rot in ilo kwal̦o̦k naan ak men in ear jab wal̦o̦k ñan ña.”

Ãlikin elõñ iiõ in an kar Katherine kwal̦o̦k naan ilo bukwõn eo an, ear jiktok juon l̦õmn̦ak ippãn ñan em̦m̦akũt ñan juon jikin me enaaj pidodol̦o̦k an armej ro roñjake nuuj eo em̦m̦an. Bõtab, ear bar l̦õmn̦ak ippãn make el̦aññe enaaj pidodo ñane ñe enaaj em̦m̦akũt. Juon wõt alen an kar em̦m̦akũt jãn baam̦le eo an im kar 2 wõt wiik in an jako jãn iturier, ak aolep raan ear oñkake er. Bõtab, eitok wõt bwe en kõn̦aan pukot armej ro me rekõn̦aan jel̦ã kõn Jeova im an kõn̦aan lo lõñlõñ ilo an katak ippãer. Ear l̦õmn̦ak kõn jet jikin ko me emaroñ em̦m̦akũtl̦o̦k im jipañ ie. Tokãlik, ear jeje ñan Ra eo ilo Guam kõn men in, im rar bar jejel̦o̦k ñane im kwal̦o̦k mel̦el̦e ko ej aikuji ñan em̦m̦akũtl̦o̦k. Innem, ilo kar Jul̦ae 2007 ke ear 26 an iiõ, Katherine ear em̦m̦akũt ñan Jãipaan (Saipan), juon aelõñ me ej pãd ilo Pacific Ocean, im 6,000 m̦ail̦ ettol̦o̦k jãn baam̦le eo an. Ewõr ke tokjãn pepe in ear kõm̦m̦ane ñan em̦m̦akũt? Eokwe, jen lale.

Jejjo iien ãlikin an kar Katherine em̦m̦akũtl̦o̦k ñan eklejia eo an ekããl, ear iioon juon kõrã me 40 jim̦a an iiõ etan Doris. Im kõrã in ear lukkuun itoklimo in katak Baibõl̦. Ãlikin aerro kar katak im etale jebta 3 ilo bok eo Katak ko Rem̦ool, Katherine ear jino inepata jidik im jab lõke e make bwe emaroñ katak ippãn kõrã in. Ej ba: “Joñan an kar em̦m̦an an Doris katak, iar mijak im l̦õmn̦ak bwe ejekkar aõ katak ippãn. Ijjañin kar katak Baibõl̦ ippãn juon armej me ej ekkeini an katak im iar l̦õmn̦ak bwe em̦m̦anl̦o̦k ñe ej katak ippãn juon me dettan wõt e im el̦apl̦o̦k an jel̦ã im imminene in katak Baibõl̦ ippãn ro jet.” Katherine ear jar im kajjitõk ippãn Jeova bwe en jipañe pukot juon jeid im jatid kõrã me enaaj jejjet ñan an katak ippãn rũkkatak in an. Innem, ear pepe in ba ñan Doris bwe enaaj lel̦o̦ke ñan bar juon bwe en katak Baibõl̦ ippãn.

Katherine ej ba: “M̦okta jãn aõ kar bõkm̦aantak men in, Doris ear ba ñan ña bwe ekõn̦aan bwebwenato ippa kõn juon apañ me ej iioone. Ãlikin aõ kar roñjake an kwal̦o̦ke apañ in an, iar kwal̦o̦k ñane kõn ewi wãween an kar Jeova jipañ eõ ke iar iioon ejja apañ eo me ej iioone. Ear kam̦m̦oolole eõ.” Innem, Doris ear ba ñan  Katherine: “Jeova ej kõjerbal eok ñan jipañe ña. Ilo kar raan eo jinointata me kwaar itok ñan m̦weo im̦õ, iar riiti Baibõl̦ eo aõ ium̦win elõñ awa ko. Im iar jañ im akwel̦ap ñan Anij bwe en jilkintok juon bwe en jipañ eõ mel̦el̦e kõn Baibõl̦ eo. L̦ak ilbõk kwõj kal̦l̦al̦l̦al̦ ilo kõjãm e aõ. Jeova ear uwaake jar eo aõ!” Ear obrak mejãn Katherine kõn dãnnin kõmjaal̦al̦ ke ej kwal̦o̦ke bwebwenato in me ear lukkuun kõm̦akũt bũruon. Ej ba: “Naan ko an Doris rar uwaake jar eo aõ. Jeova ear kwal̦o̦k ñan ña bwe ewõr aõ maroñ ñan wõnm̦aanl̦o̦k im katak Baibõl̦ ippãn Doris.”

Doris ear peptaij ilo 2010 eo, im rainin ej katak Baibõl̦ ippãn elõñ armej. Katherine ej ba: “El̦ap aõ kam̦m̦oolol bwe kõn̦aan eo aõ jãn jinoin ñan jipañ juon armej em̦ool bũruon bwe en erom juon rũkarejeran Jeova, em̦õj an jejjet!” Kiiõ, Katherine ej m̦õn̦õn̦õ kõn an jerbal in jipejel̦ bainier (special pioneer) ilo Kũjjae (Kosrae).

Elõñl̦o̦k jãn 100 ro jeid im jatid rar em̦m̦akũt ñan Micronesia im jipañ ie. Im rein me rar em̦m̦akũt, ewõr 19 l̦o̦k ñan 79 aer iiõ. Ej alikkar eñjake ko an rein ilo naan ko an Erica, juon jiroñ me ear em̦m̦akũt ñan Guam ilo 2006 eo ke ear 19 an iiõ. Ej ba: “El̦ap an limo ñe jej bainier ilo juon jikin me armej ro ie relukkuun maro kõn m̦ool eo ak kõn̦aan jel̦ã katak ko rem̦ool jãn Baibõl̦. Ij lukkuun kam̦m̦oolol Jeova kõn an kar jipañ eõ ñan bõk jerbal in eaorõk. Eñin ej wãween mour eo em̦m̦antata!” Kiiõ, Erica ej lo lañlõñ ilo an jipejel̦ bainier ilo Ebeye ilo aelõñ in M̦ajel̦. Meñe ewõr men ko rem̦m̦an kõn an juon em̦m̦akũt ñan bar juon aelõñ im jipañ ie, ak ebar wõr mãlejjoñ ko enaaj iiooni. Jen lale jilu iaan mãlejjoñ kein im ewi wãween an kar ro rar em̦m̦akũt ñan Micronesia kõm̦adm̦õdi.

Eoktak wãween mour. Ilo kar 2007 eo, juon likao etan Simon, ear em̦m̦akũtl̦o̦k ñan Bõl̦au (Palau) ke ear 22 an iiõ. Ãlikin wõt an kar em̦m̦akũt ñan Bõl̦au, ear kile bwe edikl̦o̦k on̦ãn an jerbal ie jãn ke ear jerbal ilo Iñlen, aelõñ eo ej itok jãne. Ej ba: “Iar jab maroñ kiiõ wiaiki jabdewõt men ikõn̦aan. Kiiõ, ij lukkuun kããlõt ta m̦õñã ko ewõr aõ maroñ ñan wiaiki, im ij bar pukot men ko rej wõtlo̦k kaki. Ñe juon men ejorrããn, ij kappok baat in im pukot juon bwe en jipañ ña kõm̦m̦ane.” An kar ekkatak kilen mour, ear jipañe ilo wãween et? Simon ej ba: “Men in ear jipañ eõ ñan jel̦ã ewi wõt men eo eaorõk im ewi wãween aõ maroñ mour kõn joñan eo ewõr ippa. Elõñ iien iar kile an Jeova letok pein im jipañ eõ. Ium̦win iiõ ko 7 in aõ kar jerbal ijin, aolep iien ear wõr kijõ m̦õñã im jikin aõ kiki.” Alikkar bwe Jeova ej lale im kõjparok ro me rej mour ilo wãween in bwe ren pukot m̦okta Aelõñ eo an.​—Matu 6:32, 33.

Oñ. Erica ej ba: “Ij lukkuun epaake baam̦le eo aõ, im iar inepata bwe aõ oñkake er enaaj jelõt eõ im wãween aõ kwal̦o̦k naan.” Ta eo ear jipañe ñan kõpooje e make ñe enaaj em̦m̦akũt? Ej ba: “M̦okta jãn aõ kar em̦m̦akũt, iar riiti katak ko ilo bokin Naan in Keeañ ko me rej kwal̦o̦k kõn an ro jet oñkake baam̦le ko aer. Men in ear lukkuun kõpooje bũruõ ñan jel̦ã nãj kõm̦adm̦õde apañ in. Ilo kar juon katak, ej kwal̦o̦k kõn an juon kõrã kar ba ñan jiroñ eo nejin, ‘Emaroñ naaj em̦m̦anl̦o̦k an Jeova lale im kõjparok eok jãn ña.’ Naan kein rar lukkuun kakajoor eõ.” Bareinwõt, Hannah im likao eo pãleen etan Patrick, rej jipañ ilo Mãjro (Majuro) ilo aelõñ in M̦ajel̦. Ñe Hannah ej oñkake baam̦le eo an, ej kajjioñ l̦õmn̦ak  kõn rũttõmak ro jeid im jatid ilo eklejia eo an. Ej ba: “Aolep iien ij kam̦m̦oolol Jeova kõn rein jeid im jatid jãn aelõñ ko jet kõnke er bareinwõt rej bar baam̦le eo aõ. El̦aññe en kar jab jipañ ko aer, iban kar maroñ wõnm̦aanl̦o̦k im jipañ ijo el̦ap aikuj rukwal̦o̦k naan ie.”

M̦õttaik ro jet. Simon ej ba: “Ke iar itok ñan aelõñ in me ij kab itõn juuri, aolep men im kar lukkuun oktak. Jet iien iar iañaktok aõ kõn iien ko iar maroñ kõm̦m̦an kõjak im ro jet remaroñ mel̦el̦e kõn kõm̦m̦an kõjak ko aõ.” Erica ej ba: “Ilo kar jinoin, iar bũrom̦õj kõn aõ jab mel̦el̦e kõn ta ko ro jet rej ba. Bõtab, iar bar lukkuun etale unleplep in aõ kar em̦m̦akũt ñan jikin in im men in ear jipañ eõ. Iar kile bwe unin aõ kar em̦m̦akũt ej bwe in kal̦apl̦o̦k ijo kun̦aaõ ñan Jeova im jab ñan kam̦õn̦õn̦õik ña make.” Ej wõnm̦aanl̦o̦k im ba: “El̦ak tol̦o̦k aõ pãd, iar jino jel̦ã kajjien ro jet im lukkuun epaake er, im el̦ap aõ kaorõke rein m̦õtta.” Simon ear kate joñan wõt an maroñ ñan katak kajin Bõl̦au. Im men in ear jipañe ñan ‘lukkuun kwal̦o̦k bũruon’ im jel̦ã kajjien ro jeid im jatid jãn aelõñ in Bõl̦au. (2 Korint 6:13, UBS) Ke rein jeid im jatid jãn jikin in rar loe an Simon kate e ñan katak kajin eo aer, rar lukkuun kaorõke. Ñe ro rekããl im armej in jikin eo rej em̦m̦akũt ñane rej jipañ doon, kumi kein ruo renaaj lo elõñ jeraam̦m̦an ko im renaaj lukkuun epaake doon. Bar ta jeraam̦m̦an ko jet me ro rar em̦m̦akũt ñan ijo el̦ap aikuj ie rej loi?

Rijjilõk Paul ear ba: “Eo el̦ap an kallib enaaj l̦ap an m̦adm̦õd im jeraam̦m̦an.” (2 Korint 9:6) Eoon in ej jitõñl̦o̦k ñan ro me rej kal̦apl̦o̦k kun̦aaer ilo jerbal in kwal̦o̦k naan. Ta tõprak ko rein rar “m̦adm̦õd” im loi ilo aelõñ ko ilo Micronesia?

Ilo Micronesia, ej lõñ wõt armej ro rej m̦õn̦õn̦õ in katak Baibõl̦ im kwõmaroñ katak ippãer im lo wãween aer kõm̦m̦an oktak im mour ekkar ñan katak ko rem̦ool jãn Naan in Anij. Patrick im Hannah rar bar kwal̦o̦k naan ilo juon ãne jidikdik ilo Bõl̦au etan Anguar. Ilo ãne in, ewõr 320 wõt armej rej jokwe ie. Ãlikin 2 allõñ in aerro kar pãd ijin, rar iioon juon jiroñ me ewõr nejin im ejjel̦o̦k pãleen. Ilo iien eo wõt, ear jino an katak Baibõl̦ im m̦õkaj an kõm̦m̦an oktak ilo mour eo an. Hannah ej ba: “Kajjojo iien ear m̦õj ammim katak, kõmro ar l̦eo ippa kalimjeke doon ke kõmro ej baajkõl̦ l̦o̦k jãn m̦weo im̦õn rũkkatak in am̦ro, im ba ñan Jeova: ‘Kom̦m̦ool, Jeova!’” Hannah ej wõnm̦aanl̦o̦k wõt im ba: “Ijel̦ã bwe Jeova emaroñ kar kõjerbal jabdewõt armej ñan jipañ jiroñ in ñan katak kõn e. Bõtab, kõnke kõmro ar pãd im jipañ ilo jikin in ilo kar tõre eo, kõmro ar maroñ loe jiroñe in me ej ãinwõt juon jiip im jipañe ñan jel̦ã kõn Jeova. An wõr kun̦aam̦ro ñan kar jipañe, ej juon iaan jeraam̦m̦an ko rel̦l̦ap kõmro ar iioone ilo mour ko am̦ro!” Men in ej ãinl̦o̦k wõt naan kein an Erica ke ear ba: “Ñe kwõj jipañ juon armej ñan jel̦ã kõn Jeova, joñan am̦ m̦õn̦õn̦õ kwõjjab maroñ kõmel̦el̦eiki eñjake in!”

Elõñ aelõñ ko me relukkuun aikuj rukwal̦o̦k naan ro ie. Kwõmaroñ ke em̦m̦akũt ñan jikin kein el̦ap aikuj ie ãinwõt ro jet? Jar im kajjitõk ippãn Jeova bwe en kakajoorl̦o̦k kõn̦aan eo am̦ ñan kal̦apl̦o̦k ijo kun̦aam̦ ilo jerbal in kwal̦o̦k naan. Kõnono ippãn em̦m̦aan ro rej lale eklejia eo am̦ im bar em̦m̦aan eo ej lowaj eklejia eo kwõj pãd ie. Kwõmaroñ bar kõnono ippãn ro me rar em̦m̦akũt ñan juon aelõñ im jipañ ie. Ñe kwõj bũl̦ããn in em̦m̦akũt, kwõn je juon lõta ñan Ra eo me ej lale jikin eo kwõj l̦õmn̦ak in em̦m̦akũt ñane im kajjitõk kõn mel̦el̦e ko im ta ko kwõnaaj aikuj in kõm̦m̦ani. Ãlikin am̦ je lõta in, kwõj aikuj lel̦o̦ke ñan em̦m̦aan ro rej lale eklejia eo am̦ bwe ren lale im jilkinl̦o̦k ñan Ra in. * (Lale kõmel̦el̦e eo itulal̦.) Elõñ to̦ujin em̦m̦aan im kõrã ro jeid im jatid ekoba jo̦dikdik ro im rũtto ro, ro ewõr pãleer im ro ejjel̦o̦k pãleer me rar m̦õn̦õn̦õ in em̦m̦akũt ñan jikin ko el̦apl̦o̦k aikuj ie. Bõlen kwe bareinwõt kwõmaroñ kobal̦o̦k ippãer im lo lañlõñ jãn am̦ “m̦adm̦õd” im loe elõñ jeraam̦m̦an ko.