1, 2. Etke Jeova ej keidi e make ñan juon jabõt?

 JEOVA ej keidi e make ñan juon jabõt ak ri lale jiip. (Ezekiel 34:11-14) Men in ej jipañ kõj ñan ad jel̦ã im mel̦el̦e kõn Jeova. Juon jabõt em̦m̦an ej lukkuun kate e ñan kõjparok jiip ko nejin. Ej tõl er ñan jikin m̦õñã im idaak ko aer, im ej kotak jiip ko rej kab l̦otak ñe rej itoitak jãn jikin ñan jikin. (Sam 23:1, 2; Aiseia 40:11) Ej lale er raan im boñ, im kõjparok er jãn menninmour ko relãj bwe ren jab ko̦kkure er. (1 Samuel 17:34, 35; Luk 2:8, UBS) Im ñe ejebwãbwe ak jako juon jiip, ej m̦õkaj in pukote. Ej bareinwõt korake kinej ko kinjen jiip ko rejorrããn.​—Ezekiel 34:16, UBS.

² Ilo iien ko etto, enañin aolep ro doon Anij rar ri lale jiip im ri kallib. Eñin unin rar mel̦el̦e ke Jeova ear keidi e make ñan juon jabõt. Rar jel̦ã bwe jiip ko rej aikuji juon ri lale er bwe en kõjparok er jãn aer nañinmej im bwe ren maroñ mour. Ãindein, armej ro rej aikuji Jeova bwe en kõjparok im tõl er. (Mark 6:34) Ñe armej ro rejjab kõtl̦o̦k bwe Jeova en tõl im kõjparok er, rej eñtaan im iioon jorrããn. Im kõn men in, rejaje oktak eo ikõtaan jim̦we im bõd, im ejjel̦o̦k en̦ emaroñ lale ak kõjparok er. Rej “ãinwõt jiip ko ejjel̦o̦k aer jabõt.” (1 Kiiñ 22:17) Ak ro me rej kõtl̦o̦k bwe Jeova en tõl im lale er, eokwe rejjab pãd ilo aikuj.

3. Ta ko jenaaj katak kaki ilo katak in?

³ Jej bar mel̦el̦e unin an Jeova keidi e make ñan juon jabõt, kõnke ej bar kõjparok armej ro an ilo raan kein. Jenaaj kiiõ katak kõn wãween an tõl kõj im kabwe aikuj ko ad. Jenaaj bar katak kõn ta eo jej aikuj kõm̦m̦ane bwe jen bõk tokjãn jãn an Jeova tõl im kõjparok kõj.

4. Ewi wãween an Jijej jipañ im kõjparok jiip ko an Jeova?

⁴ Jeova ear kããlõt Jijej bwe en bõran eklejia ko. (Epesõs 1:22, 23) Jijej ej ‘jabõt eo em̦m̦an,’ im ej ãinwõt Jemãn. Jijej ej yokwe jiip ko im ej kõjparok er. Joñan  an yokwe er, ear aje mour eo an bwe en mej kõn er. (Jon 10:11, 15) Men in ear kõm̦m̦ane ej juon jeraam̦m̦an ñan aolep armej! (Matu 20:28) Jeova ekõn̦aan bwe aolep ro me rej kam̦ool aer tõmak ilo Jijej ren ‘jab jako, ak ren mour indeeo’!​—Jon 3:16, UBS.

5, 6. (1) Wõn ro Jijej ear kããlõt er bwe ren lale jiip ko an? (2) Ta eo jiip ko rej aikuj kõm̦m̦ane bwe Jijej en jabõt er? (3) Ta unleplep in ad aikuj l̦oore naan in tõl ko jãn em̦m̦aan ro rej lale eklejia?

⁵ Ewi wãween an jiip ko kaalikkar bwe Jijej ej aer Jabõt? Jijej ear ba: “Aõ jiip rej roñjake ainikiõ, im Ijel̦ã er, im rej l̦oor Eõ.” (Jon 10:27) Jiip ko rej roñjake ainikien Jabõt eo aer Em̦m̦an. Ilo wãween et? Ilo aer l̦oori naan in tõl ko an Jijej aolep iien. Men in ej kitibuj aer bar roñjake em̦m̦aan ro me kar jitõñ er bwe ren jabõte bwij eo an Anij. Ilo iien ko an rijjilõk ro, Jijej ear kããlõt rũkal̦oor im rijjilõk ro an bwe ren jabõt ak lale ro doon. Ear jiroñ er im ba bwe ren lale jiip ko an im katakin er. (Riit Jon 21:15-17, UBS; Matu 28:20) Ilo an kar ajeededl̦o̦k wõt nuuj eo em̦m̦an, ear lõñl̦o̦k oran rũkal̦oor ro an Kũraij. Kõn men in, Jijej ear karõk bwe en wõr em̦m̦aan ro me ekajoor tõmak ko aer ñan aer jabõte ak lale ro ilo eklejia ko.​—Epesõs 4:11, 12.

⁶ Tokãlik, Paul ear jiroñ em̦m̦aan ro me rar lale eklejia eo ilo Epesõs im ba: “Jetõb Kwõjarjar [kajoor an Anij, NW] ar liwaj bwe kom̦win bõk eddoier. Kom̦win ãinwõt jabõt ñan eklejia eo an Anij.” (Jerbal 20:28, UBS) Kajoor eo an Anij ear jitõñ em̦m̦aan ro rej lale eklejia ko rainin. Ewi wãween? Eokwe, Anij ear kõjerbale kajoor eo an ñan je Baibõl̦ im kõllaajraki aolep men ko me em̦m̦aan rein rej aikuj kõm̦m̦ani bwe en tõllo̦kũn aer lale eklejia ko. Kõn men in, ñe jej pokake em̦m̦aan rein, jej kaalikkar ad kautiej Jabõt ro ruo rem̦m̦antata, ej Jeova im Jijej. (Luk 10:16) Eñin unleplep in ad m̦õn̦õn̦õ in pokake em̦m̦aan ro rej lale eklejia ko. Ak ebar wõr un ko jet unin ad aikuj in l̦oore naan in tõl ko jãn em̦m̦aan rein.

7. Ta ko em̦m̦aan ro rej lale eklejia rej kõm̦m̦ani ñan jipañ kõj bwe jen epaake wõt Jeova?

⁷ Em̦m̦aan ro me rej lale eklejia rej letok naan in rõjañ im tõl ko me rej pedped wõt ioon Baibõl̦. Em̦m̦aan rein rejjab iuun ri tõmak ro m̦õttaer ak kõbbo̦o̦jo̦j ñan er. (2 Korint 1:24, UBS) Rekõn̦aan bwe ri tõmak ro m̦õttaer ren kõm̦m̦an aer make pepe me ej pedped ioon Baibõl̦. Ñe em̦m̦aan ro rej jipañ ro uwaan eklejia ñan kõm̦m̦ane men in, aolepeer renaaj bõrokuk im aenõm̦m̦an. (1 Korint 14:33, 40) Baibõl̦ ej ba bwe em̦m̦aan ro me rej lale eklejia rej “lale ami.” Ta mel̦el̦ein? Eokwe, ej mel̦el̦ein bwe em̦m̦aan rein rej kate er ñan jipañ kajjojo uwaan eklejia ko bwe ren epaake wõt Jeova. Eñin unin ñe ro jeid im jatid rej tõn kõm̦m̦ane juon pepe ebõd, em̦õkaj an em̦m̦aan rein jipañ er. Im el̦aññe em̦õj an juon kõm̦m̦ane juon pepe ejjab jim̦we, em̦õkaj an em̦m̦aan rein pojak in jipañe. (Galetia 6:1, 2, UBS; Jud 22) Kõn men in, ewõr unin ad aikuj “pokake im kõttãik” kõj ñan em̦m̦aan rein me rej lale eklejia.​—Riit Hibru 13:17.

8. Ta eo em̦m̦aan ro rej lale eklejia rej kõm̦m̦ane ñan kõjparok kõj?

⁸ Rijjilõk Paul ear juon jabõt em̦m̦an. Ear kakkõl ri tõmak ro m̦õttan ilo Kolosse im ba: “Kom̦win kõjparok kom̦ bwe ejjel̦o̦k juon en rakimi kom̦ kõn katak in mãlõtlõt eo an ak kõn an m̦on̦ pata, ekkar ñan m̦anit ko m̦okta an armej ran̦, im ñan katak ko jinoin an lal̦, im jab ñan Kũraij.” (Kolosse 2:8) Naan in kakkõl in ej kwal̦o̦k kõn bar un eo juon unin jej aikuj pokake em̦m̦aan ro rej lale eklejia. Em̦m̦aan rein rej kõjparok ri tõmak ro m̦õttaer jãn armej ro me renaaj ko̦kkure jem̦jerã eo aer ippãn Jeova. Rijjilõk Piter ear kwal̦o̦k bwe “ri kanaan riab” im “ri kaki riab” renaaj kate er ñan kapo ro rem̦õjn̦o̦ bwe ren jab pokake Jeova. (2 Piter  2:1, 14) Ilo raan kein, em̦m̦aan ro rej lale eklejia rej bareinwõt lel̦o̦k naan in kakkõl ko ñan eklejia ko bwe ren kõjparok er. Eto an em̦m̦aan rein karejar ñan Jeova im em̦õj aer kaalikkar ilo mour ko aer bwe remel̦el̦e im rej l̦oore naan ko ilo Baibõl̦. Rej bar jel̦ã kilen kõjerbale Baibõl̦ ñan katakin ro jet m̦ool eo. (1 Timote 3:2, UBS; Taitõs 1:9) Rerũtto ilo tõmak, ejim̦we aer l̦õmn̦ak, im rej kõm̦m̦ani pepe ko ekkar ñan Baibõl̦. Kõn men in, naan in tõl im rõjañ ko jãn em̦m̦aan rein rem̦m̦an ñan ri tõmak ro m̦õttaer.

9. Ewi wãween an Jijej naajdik im tõl eklejia ko ilo raan kein?

⁹ Jeova ej kõjerbal doulul eo an ñan katakin im tõl aolep Ri Kõnnaan ro an Jeova ijoko otemjej. Ewi wãween? Eokwe, ilo bok ko ad ewõr naan in kakapilõk ko me jej aikuj l̦oori. Im ilo iien ko jet, doulul eo an Jeova ej kajju lel̦o̦k naan in tõl ko ñan em̦m̦aan ro rej lale eklejia ikijjeen aer jilkinl̦o̦k lõta ko ñan er, im ikijjeen em̦m̦aan ro me rej lol̦o̦k eklejia ko. Innem, em̦m̦aan ro me rej lale eklejia rej lel̦o̦k naan in tõl kein ñan jiip ko ilo eklejia. Aolep wãween kein rej kaalikkar bwe Jijej ej naajdik im tõl jiip ko.

10. El̦aññe juon ilo eklejia eo ej jebwãbwe, ta eo jabõt ro rem̦m̦an renaaj kõm̦m̦ane?

¹⁰ An wõn eddo eo ñan kõjparok im lale jiip ko? Eokwe, ej eddo eo an jabõt ro ak em̦m̦aan ro rej lale eklejia. Em̦m̦aan rein rekõn̦aan jipañ ro em̦õjn̦o̦ tõmak ko aer  kab ro me rar kõm̦m̦ane juon bõd el̦ap. (Riit Jemes 5:14, 15.) Jet iien armej ro rej jebwãbwe jãn eklejia ak rej bõjrak jãn aer karejar ñan Anij. El̦aññe ej wal̦o̦k men in, ta eo juon jabõt em̦m̦an enaaj kõm̦m̦ane? Enaaj kamaat an maroñ ñan pukot armej rein im rõjañ er bwe ren bar jerbal ñan Jeova. Jijej ear ba: “Jememwõj ej pãd ilañ Ejjab kõn̦aan bwe juon iaan rein redik en jako.”​—Matu 18:12-14.

11. Taunin ejjab pidodo an jet armej pokake em̦m̦aan ro rej lale eklejia?

¹¹ Ewõr ruo wõt jabõt ro reweeppãn, ej Jeova im Jijej. Ak em̦m̦aan ro me erro ej kõjerbal er ñan jabõte kõj rejjab weeppãn im ewõr aer likjab. Eñin unin ejjab pidodo an jet armej pokake em̦m̦aan ro rej lale eklejia. Bõlen rej l̦õmn̦ak im ba: ‘Jejaam̦ pokake er ke rejjab weeppãn ãinwõt bar kõj?’ Jejel̦ã bwe ewõr an em̦m̦aan ro rej lale eklejia likjab. Bõtab, ejjab em̦m̦an ñan kalimjek likjab ko im bõd ko aer.

12, 13. (1) Ta bõd ko an ro rar lale armej ro doon Anij ilo iien ko etto? (2) Etke Jeova ear kwal̦o̦k bõd ko aer ilo Baibõl̦?

¹² Baibõl̦ ej kwal̦o̦k kõn bõd ko an em̦m̦aan ro me Jeova ear kõjerbal er ñan lale armej ro doon ilo iien ko etto. Ñan waanjoñak, kar kapit Devid bwe en kiiñ in Israel, ak tokãlik ear jerawiwi n̦ae Anij. Ear l̦õñ ippãn Batshiba, innem ear m̦an l̦eo pãleen. (2 Samuel 12:7-9) Im ta kõn rijjilõk Piter? Elõñ eddo ko an ilo eklejia ko. Meñe ãindein ak ear kõm̦m̦an elõñ bõd. (Matu 16:18, 19; Jon 13:38; 18:27; Galetia 2:11-14, UBS) Keememej bwe jãn kar raan ko an Adam im Iv ejjel̦o̦k juon armej eweeppãn ijello̦kun wõt Jijej.

¹³ Ta am̦ l̦õmn̦ak, etke Jeova ear jab n̦ooje bõd kein an em̦m̦aan ro me ear kõjerbal er ñan lale ro doon? Eokwe elõñ un ko. Im juon iaan un kein ej kõnke ear kõn̦aan kaalikkar ñan kõj bwe ej kõjerbal em̦m̦aan ro meñe ewõr aer likjab bwe ren lale im tõl armej ro An. Aolep iien ear kõm̦m̦ane men in jãn kar m̦okta. Kõn men in, jen jab ellotaane em̦m̦aan ro rej lale eklejia ko kõn aer likjab im kõjekdo̦o̦n maroñ ko aer. Jeova ekõn̦aan bwe jen kwal̦o̦k kautiej ñan rein im pokake er.​—Riit Exodus 16:2, 8.

14, 15. Ta eo jej katak jãn an kar Jeova lel̦o̦k naan in tõl ñan ro doon ilo iien ko etto?

¹⁴ Elukkuun aorõk bwe jen pokake em̦m̦aan ro rej lale eklejia ko. Etke? Eokwe, baj l̦õmn̦ak m̦õk, wõn ro Jeova ear kõjerbal er ñan lel̦o̦k naan in tõl ko rekanooj aorõk ñan armej ro an bwe ren el̦l̦ã im mour? Anij ear kõjerbal Moses im Aron. Ñan waanjoñak, ke Ri Israel ro rar diwõjl̦o̦k jãn Ijipt, Anij ear lel̦o̦k naan in tõl ko raorõk ñan erro, im rar kwal̦o̦k naan kein ñan Ri Israel ro. Bareinwõt, bwe Ri Israel ro ren jab mej ilo kein kaeñtaan eo kein kajoñoul, rar aikuj pokake naan in tõl ko. Rar aikuj kõm̦m̦ane juon kõjota eaorõk, m̦an juon jiip im kabõtõktõke ilõñin kõjãm in m̦õko m̦weer kõn bõtõktõkin jiip eo. Anij ear ke kajju kõnnaan im kwal̦o̦k men kein ñan Ri Israel ro? Jaab. Anij ear lel̦o̦k ennaan kein ñan Moses, im Moses ear lel̦o̦k naan kein ñan em̦m̦aan ro jet. Im Ri Israel ro rar aikuj pokake naan in tõl ko jãn em̦m̦aan rein. (Exodus 12:1-7, 21-23, 29) Ilo wãween in, Jeova ear kõjerbal Moses im em̦m̦aan ro jet ñan tõl armej ro doon bwe ren el̦l̦ã im mour. Ãindein ilo raan kein, Jeova ej kõjerbal em̦m̦aan ro rej lale eklejia ñan tõl armej ro An.

¹⁵ Elukkuun lõñ bwebwenato ko ilo Baibõl̦ kõn an kar Jeova kõjerbal em̦m̦aan ro ak enjel̦ ro bwe ren lel̦o̦k naan in tõl ñan armej ro an. Im elõñ alen ro wõt me rar pokake naan in tõl ko rar el̦l̦ã im mour.  Aolep iien Anij ear pepe wõn ro ej kõjerbal er ñan karoñ armej ro an kõn ta ko rar aikuj kõm̦m̦ani ilo iien ko reppen im rekauwõtata. Jejel̦ã bwe enaaj bar ãindein an Jeova kõm̦m̦ane men in ilo Armagedon. Bõtab, em̦m̦aan ro rej lale eklejia ko im doulul eo an raan kein rej aikuj kõjparok bwe ren jab wel̦o̦k ak bõd aer kõjerbal maroñ eo aer.

16. Ta “naan” eo jej aikuj pokake?

¹⁶ Armej ro an Jeova rej “juon wõt bwij” im rej pãd ium̦win “juon jabõt” ej Jijej Kũraij. (Jon 10:16) Jijej ear ba bwe enaaj pãdwõt ippãn rũkal̦oor ro an “iien otemjej, ñan iien eo ãliktata.” (Matu 28:20, UBS) Jijej ej irooj ilañ. Kõn men in, ewõr an maroñ ñan kõm̦m̦an men ko me renaaj tõllo̦k ñan iien eo naaj jol̦o̦k jukjukun pãd in an Setan. Jej aikuj et bwe jen bõrokuk wõt ilowaan doulul eo an Anij im el̦l̦ã im mour? Eokwe, Baibõl̦ eo ej letok uwaak eo. Ej ba: “Lo̦jilñũm̦ renaaj roñjake juon naan ilikũm̦, ej ba, ‘Eñin ial̦ eo, kom̦win etetal ilowaan.’” Ta mel̦el̦ein an eoon in ba “naan”? Eokwe, ej kitibuji men ko Jeova ej katakin kõj ilo Baibõl̦ ekoba men ko erro Jijej ej ba ikijjeen jabõt ro me kar jitõñ er bwe ren lale kõj.​—Riit Aiseia 30:21; Revelesõn 3:22.

17, 18. (1) Etke armej ro an Jeova rej pãd ilo kauwõtata? (2) Ta kallim̦ur eo jej lõke im tõmake? (3) Ta eo jenaaj katak kake ilo katak in tok juon?

¹⁷ Baibõl̦ ej ba bwe Setan ej ãinwõt juon “l̦aiõn erorror, ej etetal wõt im pukot eo ej maroñ in kañi.” (1 Piter 5:8) Ãinwõt juon menninmour elãj im kaamijak, ej pukot juon iien ejejjet ñan an m̦ane jiip ko. Ej pukot jiip ko me rem̦õjn̦o̦ ak rejebwãbwe jãn bwij eo. Eñin unin jej aikuj in pãdwõt ilowaan eklejia eo im ippãn Jeova, eo ej “Jabõt eo im Ri Lale” eo ad. (1 Piter 2:25) Ilo Revelesõn 7:17, ej kwal̦o̦k kõn ro me renaaj el̦l̦ã im mour jãn eñtaan eo el̦ap. Ej ba bwe Jijej “enaaj tõl er ñan unin dãn ko dãnnin mour; im Anij enaaj kõm̦õrãik dãnnin kõmjaal̦al̦ otemjej jãn mejãer.” Ejjab ke juon kallim̦ur ekanooj in em̦m̦an?

¹⁸ Elukkuun aorõk jerbal eo an em̦m̦aan ro rej lale eklejia ko. Ej eddo eo aer ñan lale im kõjparok eklejia ko. Ta ko em̦m̦aan rein ren kõm̦m̦ane bwe en jim̦we im jejjet wãween aer jabõte jiip ko an Jijej? Eokwe, jenaaj uwaake kajjitõk in ilo katak in tok juon.