Ewõr juon kõrã etan in Sylvia im jerbal eo an ej kau rũtto ro. Kõrã in ej ba: “Ke iar college, elukkuun lõñ ri jikuul̦ rej ba bwe rej etal im jar aolep iien, ak elukkuun nana m̦wilier. Rej ko̦o̦t ilo iien teej. Bareinwõt, rej rupe kien ilo aer bõk uno ko rekkajjoor ãinwõt marijuana im cocaine. Meñe rej jar aolep iien ilo m̦õn jar ko aer ak ejjab em̦m̦an men ko rej kõm̦m̦ani.”

Bar juon em̦m̦aan etan in Lionel, ej ba: “Elukkuun lõñ ri jerbal ilo m̦õn jerbal en̦ aõ rej call im riab im ba bwe renañinmej. Meñe rej ba bwe ewõr aer kabuñ, ak rejjab l̦oore kien ko ilo Baibõl̦. Ej ãinwõt ñe ewõr juon aer jea ak rejjab kõjerbale.”

Meñe elõñ armej ro rej etal im jar ak enana wõt m̦wilier. Elõñ armej raan kein rej “kwal̦o̦k bwe rejel̦ã Anij, a ilo jerbal ko aer rej kaarmejjete.” (Taitõs 1:16) Ri tõl in kabuñ ko rejjab likũt joñak ko rem̦m̦an bwe armej ro ren l̦oori. Rejjab katakin armej ro kõn katak ko jãn Baibõl̦ kõn m̦wil ko rem̦m̦an. Eñin unin elõñ rej l̦õmn̦ak bwe Anij ejjab kea kõn jabdewõt men rej kõm̦m̦ane ilo mour ko aer.

Baibõl̦ ej ba bwe men ko jej kõm̦m̦ani remaroñ kabũrom̦õj ak kam̦õn̦õn̦õik Anij. Ke Ri Israel ro rar jab pokake Anij, men in ear “kabũrom̦õj E.” (Sam 78:40) Ak ñe juon ej ukot mour eo an im jab bar kõm̦m̦ani men ko renana, innem ewõr “lañlõñ ilañ.” (Luk 15:7) Ñe juon armej ej kajjioñe Anij ilo men ko rem̦m̦an ãinwõt yokwe, jouj im men ko ãierl̦o̦kwõt, eokwe enaaj l̦apl̦o̦k an yokwe Anij. Kõn men in, yokwe in an ñan Anij enaaj kõm̦m̦an an kũtõtõiki men ko renana im yokwe men ko me rem̦m̦an ippãn Anij.​—Amos 5:15, UBS.

Juon nuujpeba ilo Amedka ilo Salt Lake City, Utah, ear ba bwe Ri Kõnnaan ro an Jeova rej jipañ armej ro bwe baam̦le ko aer ren epaake doon, im bwe ren jipañ ro jet im pokake kien. Nuujpeba in ej bar ba: “Ro uwaan kabuñ in el̦ap aer l̦oore kien ko ilo Baibõl̦ ñan kwal̦o̦k m̦wil em̦m̦an. Rejjab kõbaatat, kadek, im bõk uno ko rekkajjoor. Rejjab kããm̦bõl̦, im redike l̦õñ im an em̦m̦aan ñan em̦m̦aan im kõrã ñan kõrã pãleek doon. Rejjab kõm̦m̦ane jabdewõt iaan m̦anit kein renana me rej ko̦kkure kõtaan eo aer ippãn Anij.”

Ri Kõnnaan ro an Jeova rej katak kõn Anij im wãween ko rem̦m̦an kõn e. Men in ej jipañ er bwe ren ta? Sylvia, eo im kar kõnono kake m̦oktal̦o̦k, ear ba: “Ilo jikin jerbal eo aõ, el̦ap aer kõm̦m̦ani jerbal ko rejjab jim̦we im rej ko̦o̦t. Ej juon mãlejjoñ me epidodo ñan po ie. Ak kõn aõ jel̦ã bwe Jeova edike jerbal rot in, men in ej jipañ eõ ñan kõm̦m̦ani men ko rejim̦we. * (Lale kõmel̦el̦e eo itulal̦.) Kõn men in, im̦õn̦õn̦õ im eaenõm̦m̦an bũruõ.” Sylvia el̦ap an tõmak bwe an l̦oore men ko kabuñ eo an ej katakin e jãn Baibõl̦ ear jipañ e ñan kwal̦o̦k m̦wil em̦m̦an.