Ilo kar jibboñõn Wõnje, Jeptõm̦ba 5, 2012, kar kõjjel̦ãik ri jerbal in Betel̦ ro ilo Amedka im Canada bwe ewõr juon em̦m̦aan ekããl me ej kiiõ m̦õttan Kumi eo Ej Lale Aolep Eklejia ko an Ri Kõnnaan ro an Jeova. Etan em̦m̦aan in ej Mark Sanderson. Im ear bõke jerbal in ekããl jino jãn kar Jeptõm̦ba 1, 2012 eo.

Mark Sanderson ear dik im rũttol̦o̦k ilo San Diego, California, ilo Amedka. Jinen im jemãn rej Ri Kõnnaan ro an Jeova. Mark Sanderson ear peptaij ilo Pãpode 9, 1975. Ear jino an pioneer ilo Jeptõm̦ba 1, 1983 ilo Saskatchewan, Canada. Im ilo kar Tijem̦ba 1990, ear kadiwõjl̦o̦k ilo Amedka jãn kilaaj eo kein kajiljilimjuon ilo Jikuul̦ eo an L̦õm̦aro Ejjel̦o̦k Pãleer. Kar kããlõt Mark bwe en jerbal ãinwõt juon special pioneer ilo juon ãne ilo Canada etan Newfoundland, ilo kar Eprõl̦ 1991. Ãlikin an kar bar jerbal ãinwõt juon eo ej lol̦o̦k eklejia ko, kar kajjitõk ippãn bwe en kobal̦o̦k im jerbal ilo Betel̦ eo ilo Canada ilo Pãpode 1997. Im ilo kar Nobõm̦ba 2000 eo, kar jilkinl̦o̦k ñan Ra eo ilo Amedka im ear jerbal ilo opij eo me ej loloorjake apañ ko Ri Kõnnaan ro an Jeova rej jelm̦aiki ikijjeen taktõ. Tokãlik, ear jerbal ilo opij eo me ej loloorjake jerbal in kwal̦o̦k naan ilo Amedka.

Ilo kar Jeptõm̦ba 2008, Mark Sanderson ear pãd ilo Jikuul̦ eo ñan L̦õm̦aro Me Rej Pãd ilo Kumi eo ej Lale Ra Ko. Tokãlik, kar jitõñ Mark bwe en ilo̦k im pãd ilo Kumi eo me ej Lale Ra eo ilo Philippines. Ilo kar Jeptõm̦ba 2010, kar kajjitõk ippãn bwe en bar jepl̦aak ñan Amedka, im ear jerbal ãinwõt juon ri jipañ ilo Kamiti in Jerbal in Kwal̦o̦k Naan eo ñan Kumi eo Ej Lale Aolep Eklejia ko an Ri Kõnnaan ro an Jeova.